សមត្ថកិច្ចរឹបអូសសារធាតុញៀនជាង ១០០គីឡូក្រាម ហើយបានឃាត់ខ្លួនជនជាតិចិនម្នាក់ និងខ្មែរ ២នាក់ ដោយសង្ស័យថាបានពាក់ព័ន្ធនឹងករណីនេះ។
បើតាមអគ្គស្នងការដ្ឋាននគរបាលជាតិចុះផ្សាយនៅថ្ងៃទី០៩ ខែសីហា ឆ្នាំ២០២៣ នេះ ឲ្យដឹងថា សមត្ថកិច្ចបានធ្វើការបង្ក្រាបគ្រឿងញៀននៅ ២ទីតាំងផ្សេងគ្នា ដោយរឹបអូសសារធាតុញៀនស្ថិតនៅសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ហើយបានឃាត់ខ្លួនជនសង្ស័យចំនួន ០២នាក់ ភេទប្រុស ជនជាតិខ្មែរ ខណៈមេខ្លោងធំបានរត់គេចខ្លួន។
ប្រភពដដែលបញ្ជាក់ថា សារធាតុញៀនដែលសមត្ថកិច្ចបង្ក្រាបបាននៅ ២ទីតាំងផ្សេងគ្នានោះ ក្នុងខណ្ឌសែនសុខ និងខណ្ឌចំការមន រាជធានីភ្នំពេញ មានចំនួន ១០២គីឡូក្រាម និង ៣៥២,២៧ក្រាម។
ចំពោះវត្ថុតាង និងជនសង្ស័យទាំង ៣នាក់ ក្នុងនោះមានជនជាតិចិនម្នាក់ និងខ្មែរ ២នាក់ ហើយសមត្ថកិច្ចនឹងកសាងសំណុំរឿងដើម្បីបញ្ជូនទៅតុលាការតាមនីតិវិធីបន្តទៀត។
កាលពីដើមខែសីហា ឆ្នាំ២០២៣ សមត្ថកិច្ចបង្ក្រាបបទល្មើសគ្រឿងញៀនចំនួន ២ទីតាំងដែរ ក្នុងនោះស្ថិតនៅភូមិ២ សង្កាត់លេខ៣ ក្រុង-ខេត្តព្រះសីហនុ និងស្ថិតនៅបុរី ប៉េងហួត (បឹងស្នោ)សង្កាត់និរោធ ខណ្ឌច្បារអំពៅ រាជធានីភ្នំពេញ ដោយរឹបអូសបានសារធាតុញៀនចំនួនជាង ៧៨០គីឡូក្រាមផ្សេងទៀត។
ប្រតិបត្តិការចុះបង្ក្រាបកាលពីថ្ងៃទី០១ ខែសីហា សមត្ថកិច្ចឃាត់បុរសជនជាតិចិន (តៃវ៉ាន់) ២នាក់ ក្នុងនោះឈ្មោះ AN CHI WEI និងឈ្មោះ TUAN ZHONG YUE ព្រមទាំងរថយន្ត ០១គ្រឿង ហើយទូរសព្ទ ០២គ្រឿងផងដែរ។
ចំណែកនៅរាជធានីភ្នំពេញវិញនៅថ្ងៃទី០១ ខែសីហា ដដែលនោះ សមត្ថកិច្ចបានឃាត់ខ្លួនបុរសជនជាតិចិន (តៃវ៉ាន់) ០៤នាក់ ក្នុងនោះឈ្មោះ CHEN CHI HSIANG ឈ្មោះ CHAN I YANG ឈ្មោះ LIAO SHI BO ឈ្មោះ TSAI YU CHING ព្រមទាំងរថយន្ត ០៣គ្រឿង ហើយម៉ូតូ ០២គ្រឿង និងទូរសព្ទ ០៥គ្រឿង រួមទាំងគណនីធនាគារ ០៨គណនីផងដែរ។
ក្រោយពីឃាត់ខ្លួននោះ សមត្ថកិច្ចបានកសាងសំណុំរឿងដោយបញ្ជូនជនជាតិចិនតៃវ៉ាន់ទាំង ០៦នាក់ និងវត្ថុតាងដែលបានរឹបអូសទាំងនេះទៅកាន់សាលាដំបូងរាជធានីភ្នំពេញ ដើម្បីចាត់ការតាមនីតិវិធីច្បាប់។
ជាក់ស្ដែងចាប់ពីឆ្នាំ២០១៧ ដល់ឆ្នាំ២០២៣ នេះ រដ្ឋាភិបាលកម្ពុជាក្រោមការដឹកនាំរបស់លោក ហ៊ុន សែន បានបរាជ័យទប់ស្កាត់បទល្មើសគ្រឿងញៀននៅកម្ពុជា។
ចាប់តាំងពីឆ្នាំ២០១៧ មកដល់បច្ចុប្បន្ន ចំនួនគ្រឿងញៀនដែលអាជ្ញាធររឹបអូសបានកើនឡើងពីមួយឆ្នាំទៅមួយឆ្នាំ ក្នុងនោះនៅឆ្នាំ២០១៧ អាជ្ញាធរចាប់បានគ្រឿងញៀនជិត ៣០០ (២៩៦) គីឡូក្រាម ហើយឆ្នាំ២០១៨ រឹបអូសបានជិត ៥០០ (៤៧២,៥៣) គីឡូក្រាម និងឆ្នាំ២០១៩ ចាប់បាន ៧៥០គីឡូក្រាម។ នៅឆ្នាំ២០២០ អាជ្ញាធររឹបអូសបានជិត ៤ពាន់ (៣៨៧៦) គីឡូក្រាម និងឆ្នាំ២០២១ រឹបអូសបានជាង ៤៦០០ (៤៦៨៩) គីឡូក្រាម ហើយនៅឆ្នាំ២០២២ អាជ្ញាធរចាប់បានជាង ១ម៉ឺន ៤ពាន់ (១៤៩១៩) គីឡូក្រាម។
ការបរាជ័យនេះ ត្រូវគេរកឃើញថា មកពីក្រុមគ្រួសាររបស់បុរសខ្លាំងក្រាញអំណាចនៅកម្ពុជាលោក ហ៊ុន សែន ជាអ្នកនៅពីក្រោយនៃការចរាចរគ្រឿងញៀនដ៏ធំបំផុតនៅកម្ពុជា ដែលកំពុងចែកចាយយ៉ាងអនាធិបតេយ្យនៅតាមក្លឹបរាត្រី រង្គសាល ហាងខារ៉ាអូខេ និងផ្ទះសំណាក់ផ្សេងៗនៅកម្ពុជា។
ចំណែកអ្នកដែលចែកចាយធំវិញ គឺជាជនជាតិវៀតណាម និងជនជាតិចិន ដែលអាចនិយាយភាសាខ្មែរបានប៉ៃឡាំៗតាមរយៈបណ្ដាញសង្គមតេឡេក្រាម ដោយគ្មានសមត្ថកិច្ចទទួលបន្ទុកបង្ក្រាបគ្រឿងញៀនណាម្នាក់ ឬថ្នាក់ដឹកនាំរដ្ឋាភិបាលណាមួយហ៊ានប៉ះពាល់ឡើយ ដោយសារតែពួកគេខ្លាចអំណាចរបស់លោក ហ៊ុន សែន៕