ពីទីក្រុងណាយម៉េ នៃប្រទេសនីហ្សេរ បានឲ្យដឹងថា កងទ័ពនៃក្រុមរដ្ឋប្រហារផ្ដួលរំលំប្រធានាធិបតី មហាម៉ាត បាហ្សូម កំពុងតែទប់ទល់ជាមួយនឹងក្រុមប្រទេសសហភាពអាហ្វ្រិកខាងលិច ត្រូវលើកទ័ពចូលអន្តរាគមន៍ដើម្បីរំដោះប្រធានាធិបតីដែលរងការធ្វើរដ្ឋប្រហារនេះ ហើយសំដៅស្ដារប្រជាធិបតេយ្យឡើងវិញ។
ទីភ្នាក់ងារសារព័ត៌មាន AP ចុះផ្សាយនៅថ្ងៃទី១១ សីហា ថា ភាពតានតឹង និងចលាចលក្នុងប្រទេសនីហ្សេរ ក៏ចាប់ផ្ដើមផងដែរនៅពេលមានដំណឹងថា សហភាពអាហ្វ្រិកខាងលិចមាន ១៥ប្រទេសនេះ បានសម្រេចរួចរាល់ហើយថាត្រូវលើកទ័ពចូលទៅកាន់ប្រទេសនីហ្សេរ។ កងទ័ពដែលត្រូវបញ្ជូននោះមានចំនួនជាង ៥ពាន់នាក់ដែលជាវគ្គដំបូងនៃការធ្វើអន្តរាគមន៍របស់ខ្លួន។
ក្រុមមេដឹកនាំនៃប្រទេសសហភាពអាហ្វ្រិកអះអាងថា ក្រុមឧត្តមសេនីយ៍នីហ្សេរ មិនបានទម្លាក់ចោលនូវភាពមានះរបស់ខ្លួននោះទេ បើទោះជាមានការព្រមានពីសហរដ្ឋអាមេរិកក៏ដោយនោះ។ មិនតែប៉ុណ្ណោះ ពួកគេបានគំរាមថានឹងសម្លាប់ប្រធានាធិបតី បាហ្សូម ទៀតផង ប្រសិនបើមានអន្តរាគមន៍ណាមួយដោយកងទ័ពពីប្រទេសខាងក្រៅ។
តាមដំណឹងមកថា កងទ័ពមកពីប្រទេសនីហ្សេរីយ៉ា និងប្រទេស Ivory coast ជាង ៥ពាន់នាក់បានត្រៀមរួចហើយ។ ទ័ពទាំងនោះក៏បានបំពាក់អាវុធរួចហើយដែរ ដើម្បីចូលទៅក្នុងប្រទេសនីហ្សេរ។ ប្រធានាធិបតីនៃប្រទេស Ivory coast អាឡាហ្សង់ គូតារ៉ា បាននិយាយថា ប្រទេសរបស់លោកបានសម្រេចជាផ្លូវការហើយថា នឹងបញ្ជូនទ័ពដើម្បីអន្តរាគមន៍ដោយសហការជាមួយនឹងប្រទេសនីហ្សេរីយ៉ា និងប្រទេសទាំងឡាយណាដែលជាសមាជិកអាហ្វ្រិកខាងលិចនេះ។
ប្រធានាធិបតីនៃប្រទេស Ivory coast រូបនេះបានបញ្ជាក់ថា ប្រធានាធិបតីដែលរងការធ្វើរដ្ឋប្រហារនោះត្រូវតែរស់រានមានជីវិត គឺរហូតទាល់តែការស្ដារសន្តិភាព ស្ថិរភាព និងប្រជាធិបតេយ្យរបស់ប្រទេសនីហ្សេរ ឡើងវិញ ជាមួយនឹងពួកយោធាយល់ព្រមផ្ទេរអំណាច។
ជាមួយគ្នានេះ សហរដ្ឋអាមេរិក និងបារាំង ត្រូវបានគេរាយការណ៍មកថាមានកងទ័ពរបស់ពួកគេនៅក្នុងផ្នែកមួយនៃទឹកដីប្រទេសនីហ្សេរ រួចទៅហើយ គឺចំនួនជាង ២៥០០នាក់ ដែលពួកគេចូលទៅកាន់ក្នុងប្រទេសនេះតាំងពីមុនប្រទេសនេះធ្លាក់ក្នុងអស្ថិរភាពដំបូងនៃរដ្ឋប្រហារកាលពីពីរសប្ដាហ៍មុន។ ទ័ពប្រទេសពីរនេះជាផ្នែកមួយដើម្បីជួយប្រជាជននីហ្សេរ ដែលរត់ភៀសខ្លួនដោយសារតែអំពើបះបោរដោយរដ្ឋប្រហារ។
រដ្ឋប្រហារទម្លាក់ប្រធានាធិបតី មហាម៉ាត បាហ្សូម ដឹកនាំដោយឧត្តមសេនីយ៍ អាដុល រ៉ាម៉ានទីឆានី ដែលបុរសរូបនេះជាមេអង្គរក្សរបស់ប្រធានាធិបតី មហាម៉ាត បាហ្សូម។
មកដល់ពេលនេះ ប្រជាជននីហ្សេរ នៅរដ្ឋធានីណាយម៉េ បាននិយាយថា ការធ្វើអន្តរាគមន៍របស់កងទ័ពក្រុមសហភាពអាហ្វ្រិកខាងលិចនេះ អាចនឹងរកមធ្យោបាយដើម្បីបញ្ចប់ចលាចល តែពួកគេបារម្ភថាវាអាចនឹងនាំទៅរកសង្គ្រាមទ្រង់ទ្រាយធំក៏ថាបាន ប្រសិនបើពួកយោធាមិនព្រមទម្លាក់អំណាចចោលនោះ។
មិនតែប៉ុណ្ណោះ ពួកគេនិយាយថា មុខជំនួញរបស់ពួកគេនៅពេលនេះ គឺគ្រោះថ្នាក់ហើយ ព្រោះប្រទេសរបស់ពួកគេមិនត្រឹមតែឈានទៅរកសង្គ្រាមផ្ទៃក្នុងប៉ុណ្ណោះទេ ប៉ុន្តែនឹងមានសង្គ្រាមជាមួយប្រទេសជិតខាងទៀតផង។
នៅថ្ងៃសុក្រនេះ ក្រុមប្រទេសសហភាពអាហ្វ្រិកខាងលិចបានសម្ដែងការគាំទ្រជាខ្លាំងនូវសេចក្ដីសម្រេចរបស់ខ្លួន ដោយអំពាវនាវទៅកាន់ពួកយោធានីហ្សេរ ឲ្យបញ្ឈប់ជាបន្ទាន់ការច្បាមយកអំណាចដោយរដ្ឋប្រហារ គឺត្រូវផ្ទេរអំណាចទៅដល់រដ្ឋាភិបាលប្រធានាធិបតី មហាម៉ាត បាហ្សូម ជាមួយនឹងការដោះលែងប្រធានាធិបតីរូបនេះឲ្យមានសេរីភាពឡើងវិញ។
បើតាមដំណឹងមកថា ប្រទេសនៃសហភាពអាហ្វ្រិកខាងលិច មេដឹកនាំប្រទេសទាំងអស់នោះនឹងជួបជុំគ្នាជាថ្មីម្ដងទៀតនៅថ្ងៃសៅរ៍ក្នុងសប្ដាហ៍នេះ ដើម្បីកំណត់ថា តើត្រូវប្រើប្រាស់កងទ័ពប៉ុន្មានពាន់នាក់ និងសព្វាវុធអ្វីខ្លះត្រូវបំពាក់ឲ្យទ័ព។ ប៉ុន្តែអាមេរិក បានឲ្យដឹងថា បើទោះអាមេរិកមិនសម្រេចដោយផ្ទាល់ក៏ដោយ ក៏អាមេរិកមិនទាន់បានប្រកាសចូលរួមជាមួយនឹងទ័ពអាហ្វ្រិកខាងលិចនៅឡើយទេ។
កាលពីថ្ងៃអង្គារសប្ដាហ៍មកនេះ អនុរដ្ឋមន្ត្រីការពារជាតិអាមេរិកម្នាក់ គឺអ្នកស្រី វ៉ិចតូរីយ៉ានូឡេន ដែលបានទៅដល់ប្រទេសនីហ្សេរ ហើយបានជួបនឹងមេរដ្ឋប្រហារផងដែរនោះ ព្រមានថាពួកយោធាប្រទេសនីហ្សេរ ត្រូវតែសងតម្លៃខូចខាតទៅឲ្យរដ្ឋាភិបាលប្រជាធិបតេយ្យ បើពុំនោះទេ ប្រឈមមុខនឹងផលវិបាកធ្ងន់ធ្ងរ។
ក្នុងជំនួបរយៈពេល ២ម៉ោងនោះ អ្នកស្រីអនុរដ្ឋមន្ត្រីការពារជាតិអាមេរិក បានព្យាយាមសុំជួបប្រធានាធិបតី មហាម៉ាត បាហ្សូម ប៉ុន្តែត្រូវបានពួកឧត្តមសេនីយ៍មិនអនុញ្ញាតឲ្យជួបដាច់ខាត។ អ្នកស្រីក៏ត្រឡប់ឡើងយន្តហោះមកសហរដ្ឋអាមេរិកវិញ ហើយព្រមានថា ពួកយោធានីហ្សេរ នឹងប្រឈមមុខយ៉ាងពិតប្រាកដនូវផលវិបាករបស់សហគមន៍អន្តរជាតិ។
សូមជម្រាបថា ប្រទេសនីហ្សេរ ស្ថិតនៅអាហ្វ្រិកខាងលិច។ ប្រទេសនេះមានប្រជាជន ២៥លាននាក់ ជាប្រទេសក្រីក្រមួយនៅក្នុងតំបន់។ ពួកយោធាដែលធ្វើរដ្ឋប្រហារកំពុងតែស្វែងរកជំនួយពីក្រុមទាហានស៊ីឈ្នួល Wagner ឲ្យប្រទេសរុស្ស៊ី ដើម្បីឲ្យក្រុមនេះជួយការពារអំណាចរបស់ពួកគេ។
ក្រុមអ្នកវិភាគព្រមានថា បើក្រុម Wagner ចូលទៅក្នុងប្រទេសនីហ្សេរ នោះវានឹងនាំទៅរកសង្គ្រាមបែបភេរវកម្ម ហើយចង់មិនចង់ ក្រុមរក្សាសន្តិភាពនៃសហភាពអាហ្វ្រិកខាងលិចអាចនឹងស្នើឲ្យសហរដ្ឋអាមេរិក បារាំង ជួយកម្លាំងទ័ពរបស់ពួកគេថែមទៀត ដើម្បីចូលទៅប្រទេសនីហ្សេរ ដើម្បីផ្ដួលរំលំពួកយោធារបស់ប្រទេសអាហ្វ្រិកខាងលិចមួយនេះ៕