កាលពីថ្ងៃទី២៦ កក្កដា ប្រធានាធិបតីនៃប្រទេសនីហ្សេរ លោក Mohamed Bazoum ត្រូវបានទម្លាក់ពីអំណាចដោយរដ្ឋប្រហារយោធា ដែលអ្នកដឹកនាំរដ្ឋប្រហារ គឺឧត្តមសេនីយ៍ Abdourahmane Tchiani ជាមេអង្គរក្សប្រធានាធិបតី។
នៅថ្ងៃចន្ទ ទី១៤ សីហា នេះ មេរដ្ឋប្រហាររូបនេះបានបញ្ជាឱ្យមានការកាត់ទោសលោក Mohamed Bazoum ក្រោមបទចោទថាក្បត់ជាតិ។ បណ្ដាញផ្សាយព័ត៌មាន Aljazeera បានចុះផ្សាយថា ក្រុមរដ្ឋប្រហារជាក្រុមប្រឹក្សាយោធាដែលប្លន់អំណាចពីរដ្ឋាភិបាលប្រជាធិបតេយ្យ បានប្រកាសពីដំណើរការនីតិវិធីដែលឈានដល់កាត់ទោសប្រធានាធិបតីធ្លាក់ពីអំណាច។
លោក Mohamed Bazoum ត្រូវបានចោទពីបទក្បត់ជាតិករណីទាក់ទងជាមួយក្រុមមេដឹកនាំបរទេស និងអង្គការអន្តរជាតិផ្សេងៗ រួមទាំងករណីមានផែនការបំផ្លាញសន្តិភាពរបស់ប្រទេស។
លោក Amadou Abdramane ដែលជាអ្នកនាំពាក្យនៃរបបយោធានីហ្សេរ បាននិយាយថា អាជ្ញាធរយោធាបានប្រមូលភស្តុតាងដើម្បីរៀបចំការកាត់ទោសប្រធានាធិបតីដែលត្រូវបានទម្លាក់ពីអំណាចនេះពីទោសក្បត់ជាតិ និងពីបទបំផ្លាញសន្តិសុខផ្ទៃក្នុងនៃប្រទេសនីហ្សេរ។
លោក Abdramane បន្តថា នាពេលនេះកំពុងតែចាត់វិធានការប្រឆាំងនឹងការបំភ្លៃព័ត៌មានចំពោះប្រព័ន្ធផ្សព្វផ្សាយណាដែលមានផែនការប្រឆាំងនឹងរបបយោធា ក្នុងគោលដៅព្យាយាមបំផ្លាញឱកាសនៃការស្វែងរកដំណោះស្រាយវិបត្តិតាមរយៈការចរចាក្រោមលេសការធ្វើអន្តរាគមន៍យោធាបរទេស។
នៅខណៈនេះ ក្រុមមេដឹកនាំរដ្ឋប្រហារបានឃុំខ្លួនលោក Bazoum និងរំលាយរដ្ឋាភិបាលជាប់ឆ្នោតស្របច្បាប់ ដែលសកម្មភាពនេះបានទទួលរងនូវការចេញមុខរិះគន់ថ្កោលទោសពីក្រុមមហាអំណាចពិភពលោក និងពីសំណាក់ក្រុមប្រទេសជិតខាងនៅតំបន់អាហ្វ្រិកខាងលិច ដែលបានដាក់កងកម្លាំងយោធាឱ្យប្រុងជើងការក្នុងករណីត្រូវចូលធ្វើអន្តរាគមន៍ដើម្បីដណ្ដើមអំណាចឱ្យលោក Bazoum វិញ។
ជាមួយគ្នានេះ ក្រុមប្រទេសអាហ្វ្រិកខាងលិច ហៅកាត់ ECOWAS នៅថ្ងៃចន្ទនេះបានជំរុញឱ្យមានកិច្ចសន្ទនាបន្ថែមទៀតជាមួយរបបសឹកនៅនីហ្សេរ ក្នុងការស្វែងរកដំណោះស្រាយការទូតជុំវិញរដ្ឋប្រហារកាលពីថ្ងៃទី២៦ ខែកក្កដា។
ចំណែកក្រុមប្រឹក្សាសន្តិភាព និងសន្តិសុខរបស់សហភាពអាហ្វ្រិកខាងលិច ដែលមាន ១៥ប្រទេសវិញ ក៏នឹងត្រូវជួបប្រជុំនៅក្នុងថ្ងៃនេះផងដែរ ដើម្បីជជែកអំពីស្ថានការណ៍នៅនីហ្សេរ ដែលអាចឈានដល់ការកំណត់ត្រូវលើកទ័ពអន្តរាគមន៍ជួយស្ដារប្រជាធិបតេយ្យប្រទេសនេះឡើងវិញ។ ចំពោះស្ថានភាពនេះ ក្រុមប្រទេសអាហ្វ្រិកខាងលិចបានត្រៀមបញ្ជូនទ័ពទៅប្រទេសនីហ្សេររួចហើយ។
សេចក្ដីថ្លែងការណ៍របស់ក្រុមមេដឹកនាំនៃប្រទេសសហភាពអាហ្វ្រិកខាងលិច បានឱ្យដឹងថា ក្រុមឧត្តមសេនីយ៍នីហ្សេរ មិនបានទម្លាក់ចោលនូវភាពមានះរបស់ខ្លួននោះទេ បើទោះជាមានការព្រមានពីសហរដ្ឋអាមេរិក និងក្រុមប្រទេសប្រជាធិបតេយ្យក៏ដោយនោះ។ មិនតែប៉ុណ្ណោះ ពួកយោធាបានគំរាមថា នឹងសម្លាប់ប្រធានាធិបតី Bazoum ទៀតផង ប្រសិនបើមានអន្តរាគមន៍ណាមួយដោយកងទ័ពពីប្រទេសខាងក្រៅ។
តាមដំណឹងមកថា កងទ័ពមកពីប្រទេសនីហ្សេរីយ៉ា និងប្រទេស Ivory coast ជាង ៥ពាន់នាក់បានត្រៀមរួចហើយ។ ទ័ពទាំងនោះបំពាក់ដោយអាវុធរួចហើយដែរ ដើម្បីចូលទៅក្នុងប្រទេសនីហ្សេរ។ ប្រធានាធិបតីនៃប្រទេស Ivory coast អាឡាហ្សង់ គូតារ៉ា បាននិយាយថា ប្រទេសរបស់លោកបានសម្រេចជាផ្លូវការហើយក្នុងការបញ្ជូនទ័ពដើម្បីអន្តរាគមន៍ដោយសហការជាមួយនឹងប្រទេសនីហ្សេរីយ៉ា និងប្រទេសទាំងឡាយណាដែលជាសមាជិកនៃសហភាពអាហ្វ្រិកខាងលិច។
ប្រធានាធិបតីប្រទេស Ivory coast បានបញ្ជាក់ថា ប្រធានាធិបតីដែលរងការធ្វើរដ្ឋប្រហារនោះត្រូវតែរស់រានមានជីវិត គឺរហូតទាល់តែមានការស្ដារសន្តិភាព ស្ថិរភាព និងប្រជាធិបតេយ្យរបស់ប្រទេសនីហ្សេរ ឡើងវិញ ជាមួយនឹងពួកយោធាយល់ព្រមផ្ទេរអំណាច។
ជាមួយគ្នានេះ សហរដ្ឋអាមេរិក និងបារាំង ត្រូវបានគេរាយការណ៍ថាមានកងទ័ពរបស់ពួកគេនៅក្នុងផ្នែកមួយនៃទឹកដីប្រទេសនីហ្សេររួចទៅហើយ គឺចំនួនជាង ២៥០០នាក់ ដែលពួកគេចូលទៅក្នុងប្រទេសនេះតាំងពីមុនប្រទេសនេះធ្លាក់ក្នុងអស្ថិរភាពដំបូងនៃរដ្ឋប្រហារកាលពីចុងខែកក្កដា។
ទ័ពប្រទេសពីរនេះជាផ្នែកមួយដើម្បីជួយប្រជាជននីហ្សេរ ដែលរត់ភៀសខ្លួនដោយសារតែអំពើបះបោររដ្ឋប្រហារ។ រដ្ឋប្រហារទម្លាក់ប្រធានាធិបតី Bazoum ដឹកនាំដោយឧត្តមសេនីយ៍ Abdourahmane Tchiani ដែលបុរសនេះជាមេអង្គរក្សរបស់ប្រធានាធិបតី Mohamed Bazoum។
ក្រុមប្រទេសសហភាពអាហ្វ្រិកខាងលិច បានសម្ដែងការគាំទ្រជាខ្លាំងនូវសេចក្ដីសម្រេចរបស់ខ្លួនដោយអំពាវនាវទៅកាន់ពួកយោធានីហ្សេរជាថ្មីម្ដងទៀត ឲ្យបញ្ឈប់ជាបន្ទាន់ការច្បាមយកអំណាចដោយរដ្ឋប្រហារ គឺត្រូវផ្ទេរអំណាចទៅដល់រដ្ឋាភិបាលប្រធានាធិបតី Bazoum ឡើងវិញជាមួយនឹងការដោះលែងប្រធានាធិបតីរូបនេះឲ្យមានសេរីភាពឡើងវិញ។
កាលពីថ្ងៃអង្គារសប្ដាហ៍មុននេះ អនុរដ្ឋមន្ត្រីការពារជាតិអាមេរិកម្នាក់ គឺអ្នកស្រី វ៉ិចតូរីយ៉ា នូឡេន ដែលបានទៅដល់ប្រទេសនីហ្សេរ ហើយបានជួបនឹងមេរដ្ឋប្រហារផងដែរនោះ អ្នកស្រីព្រមានថា ពួកយោធាប្រទេសនីហ្សេរ ត្រូវតែសងតម្លៃខូចខាតទៅឲ្យរដ្ឋាភិបាលប្រជាធិបតេយ្យ បើពុំនោះទេ ប្រឈមមុខនឹងផលវិបាកធ្ងន់ធ្ងរ។
ក្នុងជំនួបរយៈពេល ២ម៉ោងនោះ អ្នកស្រីអនុរដ្ឋមន្ត្រីការពារជាតិអាមេរិក បានព្យាយាមសុំជួបប្រធានាធិបតី Bazoum ប៉ុន្ដែត្រូវបានពួកឧត្តមសេនីយ៍មិនអនុញ្ញាតឲ្យជួបដាច់ខាត។ អ្នកស្រីក៏ត្រឡប់ឡើងយន្តហោះមកសហរដ្ឋអាមេរិកវិញ ហើយព្រមានថា ពួកយោធានីហ្សេរ នឹងប្រឈមមុខយ៉ាងពិតប្រាកដនូវផលវិបាកធ្ងន់ធ្ងរពីសំណាក់សហគមន៍អន្តរជាតិ៕