អាជ្ញាធរប្រឆាំងបទល្មើសគ្រឿងញៀន សម្រេចបញ្ជូនខ្លួនជនជាតិថៃ ២នាក់ទៅសាលាដំបូងរាជធានីភ្នំពេញ ពាក់ព័ន្ធនឹងការចរាចរគ្រឿងញៀនជាង ៤៦៥គីឡូក្រាម ស្របពេលដែលមន្ទីរប្រឆាំងបទល្មើសគ្រឿងញៀនកំពុងសស្រាក់សស្រាំបង្ក្រាបការជួញដូរគ្រឿងញៀនដែលបានឆ្លងដែនចូលប្រទេសកម្ពុជាប្រមាណជាង ១តោនកន្លះត្រឹមតែរយៈពេល ១សប្តាហ៍ចុងក្រោយនេះ។
មន្ទីរប្រឆាំងបទល្មើសគ្រឿងញៀននៃអគ្គស្នងការនគរបាលជាតិ បានបញ្ជូនក្រុមឧក្រិដ្ឋជនជនជាតិថៃ ២នាក់ បន្ទាប់ពីពួកគេបានចរាចរសារធាតុញៀនប្រភេទមេតំហ្វេតាមីនចំនួន ៤៦៥ដុំ ស្មើនឹង ៤៦៥គីឡូក្រាម និង ៦៥១ក្រាម ឆ្លងដែនពីតំបន់ត្រីកោណមាសឆ្លងកាត់តាមប្រទេសឡាវ ចូលទៅប្រទេសកម្ពុជា កាលពីដើមខែសីហា ឆ្នាំ២០២៣ នេះ។
ប្រភពដដែលអះអាងថា មន្ទីរប្រឆាំងបទល្មើសគ្រឿងញៀន បានប្ដេជ្ញាចិត្តខ្ពស់ក្នុងការបង្ក្រាបបទល្មើសគ្រឿងញៀនដូចភ្លៀងរលឹមនៅទូទាំងប្រទេសឱ្យដល់ឫសគល់ ក្រោមបទបញ្ជារបស់អគ្គស្នងការនគរបាលជាតិលោក នេត សាវឿន និងបទបញ្ជារបស់អគ្គស្នងការរងទទួលផែនបង្ក្រាបគ្រឿងញៀន លោក ម៉ក់ ជីតូ ក្នុងការបោសសម្អាត និងបង្ក្រាបគ្រឿងញៀនឱ្យអស់ពីកម្ពុជា ក្នុងនោះកម្លាំងសម្ងាត់របស់មន្ទីរប្រឆាំងបទល្មើសគ្រឿងញៀនត្រូវបានពង្រាយគ្រប់រាជធានី-ខេត្តផងដែរដើម្បីបង្ក្រាបករណីនេះ។
កាលពីថ្ងៃទី០៨ ខែសីហា ឆ្នាំ២០២៣ សមត្ថកិច្ចជំនាញនៃមន្ទីរប្រឆាំងគ្រឿងញៀន បានចុះបង្ក្រាបក្រុមឧក្រិដ្ឋជនដែលចរាចរគ្រឿងញៀនឆ្លងដែនពីតំបន់ត្រីកោណមាសឆ្លងកាត់ប្រទេសឡាវ ចូលទៅកម្ពុជាចំនួន ៤៦៥គីឡូក្រាម និង ៦៥១ក្រាមនៅមុខផ្ទះសំណាក់កណ្តាលស្ទឹងព្រែកជ្រៃ ស្ថិតភូមិព្រែកជ្រៃ សង្កាត់ស្ពានថ្ម ខណ្ឌដង្កោ និងនៅសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
ទាក់ទិននឹងបញ្ហានេះ លោក ហ៊ុន សែន បានលើកឡើងកាលពីថ្ងៃទី១០ ខែសីហា ឆ្នាំ២០២៣ នេះថា ក្នុងនាមរូបលោកជាប្រធានបក្សប្រជាជនកម្ពុជាដែលត្រូវដឹកនាំរដ្ឋាភិបាលអាណត្តិទី៧ នេះ បានចាត់ទុកបញ្ហាគ្រឿងញៀនជាបញ្ហាប្រឈមដ៏ធំមួយសម្រាប់សង្គមកម្ពុជា។
លោក ហ៊ុន សែន អះអាងថា ដើម្បីបង្ក្រាបការជួញដូរគ្រឿងញៀនឱ្យមានប្រសិទ្ធភាព លោកបានផ្ដួចផ្ដើមគំនិតឱ្យធ្វើកំណែទម្រង់អាជ្ញាធរប្រយុទ្ធប្រឆាំងគ្រឿងញៀន និងស្ថាប័នពាក់ព័ន្ធដទៃទៀត ព្រោះថាប្រសិនបើការប្រយុទ្ធប្រឆាំងគ្រឿងញៀននេះទទួលបានជោគជ័យ នោះវាគឺជាសមិទ្ធផលដ៏ធំមួយឆ្លុះបញ្ចាំងពីសមត្ថភាពរបស់រាជរដ្ឋាភិបាលអាណត្តិថ្មីនេះផងដែរ។
កាលពីអំឡុងខែកុម្ភៈ ឆ្នាំ២០២៣ ប្រធានអាជ្ញាធរជាតិប្រយុទ្ធប្រឆាំងគ្រឿងញៀន លោក កែ គឹមយ៉ាន បានលើកឡើងថា បច្ចុប្បន្ននេះ កម្ពុជានៅតែបន្តរងការគំរាមកំហែងឥតឈប់ឈរពីការចរាចរ ការជួញដូរ និងប្រើប្រាស់គ្រឿងញៀននៅឡើយ ក្នុងនោះការចរាចរគ្រឿងញៀនទាំងតាមផ្លូវគោក ផ្លូវទឹក បញ្ញើប្រៃសណីយ៍ និងផ្លូវអាកាសផងដែរ ជាពិសេសករណីរក្សាទុក កែច្នៃ ផលិត និងជួញដូរគ្រឿងញៀននៅកម្ពុជានៅតែបន្តកើតមានដដែលសព្វថ្ងៃនេះ។
ចំណែករដ្ឋមន្ត្រីក្រសួងមហាផ្ទៃ លោក ស ខេង កាលពីថ្ងៃទី១២ ខែមេសា ឆ្នាំ២០២៣ ត្អូញត្អែរថា សព្វថ្ងៃនេះគ្រឿងញៀនកំពុងបំផ្លាញធនធានយុវជននៅកម្ពុជាក្នុងការចូលរួមការពារឯករាជ្យ បូរណភាពទឹកដី អធិបតេយ្យភាព និងការអភិវឌ្ឍប្រទេសជាតិ ស្របពេលដែលបទល្មើសជួញដូរ ចែកចាយ និងចរាចរគ្រឿងញៀននៅកម្ពុជាមិនថយចុះទាល់តែសោះ គឺមានតែកើតឡើងខ្លាំងជាងមុន។
ក្រុមអ្នកសង្កេតការណ៍លើកឡើងថា គ្រឿងញៀននៅកម្ពុជាមិនអាចបំបាត់បានទេ ព្រោះវាជាមុខរបររបស់អ្នកមានអំណាចដែលអាចមានជាប់ពាក់ព័ន្ធនឹងក្រុមគ្រួសាររបស់ថ្នាក់ដឹកនាំកំពូលនៃប្រទេសកម្ពុជា៕