មេធាវីការពារក្ដីឲ្យអតីតមេដឹកនាំខ្មែរក្រហមលោក ខៀវ សំផន បានស្នើទៅក្រសួងមហាផ្ទៃអនុញ្ញាតឲ្យកូនក្ដីរបស់ខ្លួនប្រើកុំព្យូទ័របន្ត ដើម្បីអាចសរសេរបញ្ចប់សៀវភៅដែលលោកបានចងក្រងទុកនាពេលកន្លងមក។
មេធាវីការពារក្ដីឱ្យលោក ខៀវ សំផន គឺលោក គង់ សំអុន បានប្រាប់ទៅវិទ្យុបារាំងកាលពីម្សិលមិញ (ថ្ងៃទី១៥ សីហា) ថា ការស្នើនេះបន្ទាប់ពីមន្ត្រីពន្ធនាគារនៃក្រសួងមហាផ្ទៃមិនអនុញ្ញាតឲ្យលោក ខៀវ សំផន ប្រើប្រាស់កុំព្យូទ័របន្ត បើទោះកុំព្យូទ័រចាស់របស់លោកត្រូវបានមេធាវីយកទៅជួសជុលឲ្យរួចហើយក្ដី។
លោក គង់ សំអុន អះអាងថា កន្លងមក កូនក្ដីរបស់លោកអាចប្រើកុំព្យូទ័របាន ប៉ុន្តែក្រោយពីកុំព្យូទ័រនោះខូច នៅពេលខាងពន្ធនាគារសាលាក្ដីខ្មែរក្រហមបញ្ជូនកូនក្ដីរបស់លោកទៅឃុំខ្លួននៅពន្ធនាគារខេត្តកណ្ដាល។ លោកថា កុំព្យូទ័រខូច លោកបានយកទៅជួសជុលរួចហើយ ហើយក៏យកទៅប្រគល់ឲ្យកូនក្ដីប្រើប្រាស់ដែរ ប៉ុន្តែមន្ត្រីពន្ធនាគារមិនអនុញ្ញាតឲ្យកូនក្ដីប្រើកុំព្យូទ័រនោះឡើយ។
ជុំវិញរឿងនេះ លោកក៏បានដាក់ពាក្យបណ្តឹងទៅក្រសួងមហាផ្ទៃរួចហើយដែរ ដើម្បីស្នើសុំជួយអន្តរាគមន៍ឲ្យកូនក្ដីរបស់លោកអាចប្រើប្រាស់កុំព្យូទ័របានដូចមុន ប៉ុន្តែមកដល់ពេលនេះ ខាងក្រសួងមិនទាន់ឆ្លើយតបមកវិញនៅឡើយទេ។
លោក គង់ សំអុន បញ្ជាក់ថា កូនក្ដីរបស់លោកត្រូវការកុំព្យូទ័រដើម្បីយកមកសរសេរបញ្ចប់សៀវភៅដែលលោកកត់ត្រា និងចងក្រងទុកអំឡុងពេលលោកត្រូវបានឃុំខ្លួននៅក្នុងពន្ធនាគាររបស់សាលាក្ដីខ្មែរក្រហម។ ចំពោះខ្លឹមសារវិញ លោកថាពាក់ព័ន្ធទៅនឹងប្រវត្តិរបស់ខ្លួនឯង និងរឿងរ៉ាវផ្សេងទៀតដែលបានស្រាវជ្រាវ ហើយបានជួបនាពេលកន្លងមក។
សារព័ត៌មាន The Cambodia daily មិនទាន់អាចសុំការឆ្លើយតបរឿងនេះពីអ្នកនាំពាក្យក្រសួងមហាផ្ទៃ លោក ខៀវ សុភ័គ បាននៅឡើយ។
តុលាការខ្មែរក្រហមកាលពីខែកញ្ញា ឆ្នាំ២០២២ សម្រេចផ្ដន្ទាទោសអតីតមេដឹកនាំខ្មែរក្រហមលោក ខៀវ សំផន អាយុជាង ៩០ឆ្នាំ ឲ្យជាប់ពន្ធនាគារអស់មួយជីវិត បន្ទាប់ពីលោកត្រូវបានចាប់ខ្លួន និងឃុំឃាំងអស់រយៈពេលប្រមាណ ១៥ឆ្នាំរួចមក៕