មេធាវីការពារក្ដីឲ្យប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ និងលោក ថេង សាវឿន ស្នើទៅសាលាឧទ្ធរណ៍ឲ្យចាត់ទុកសាលក្រមរបស់តុលាការជាន់ទាបជាមោឃៈ ដោយឲ្យពួកគេរួចពីការចោទប្រកាន់ ខណៈតុលាការនឹងប្រកាសសាលដីកានៅចុងខែកញ្ញា ខាងមុខនេះ។
ការស្នើនេះ បន្ទាប់ពីសាលាឧទ្ធរណ៍រាជធានីភ្នំពេញនៅថ្ងៃទី១៧ សីហា នេះ បានបើកសវនាការជំនុំជម្រះលើសំណុំរឿងរបស់លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ និងលោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា ពាក់ព័ន្ធនឹងការតវ៉ាទាមទារឲ្យដំឡើងប្រាក់ឈ្នួលអប្បបរមា ១៦០ដុល្លារកាលពីខែមករា ឆ្នាំ២០១៤ កន្លងមក។
ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន បានសរសេរលើហ្វេសប៊ុកបន្ទាប់ពីចូលរួមសវនាការថា ដំណើរការសវនាការថ្ងៃនេះ លោកនិងមេធាវីការពារក្ដីមានពេលវេលាគ្រប់គ្រាន់ធ្វើការស្រាយបំភ្លឺ អង្គហេតុ អង្គច្បាប់ ធាតុផ្សំ និងលើកឡើងអំពីភស្តុតាងដោះបន្ទុកទៅកាន់ប្រធានក្រុមប្រឹក្សាជំនុំជម្រះ ដោយមិនមានការកាត់ ឬហាមឃាត់ពីតំណាងមហាអយ្យការ ឬសមាជិកក្រុមប្រឹក្សាជំនុំជម្រះណាមួយឡើយ។
ចំណែកនាយិកាមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព លើកឡើងលើហ្វេសប៊ុកថា ចៅក្រម និងមហាអយ្យការនៅក្នុងសវនាការនេះបានប្រើភាសាទន់ភ្លន់ មិនមានការគំហក ឬពាក្យដែលសង្កត់ ឬដាក់បន្ទុកណាមួយឡើយ ខណៈកន្លងមកនៅសវនាការមួយចំនួនដែលអ្នកស្រីចូលសង្កេតនោះ បានឃើញចៅក្រមខ្លះ មហាអយ្យការខ្លះ ប្រើឥរិយាបថបែបសម្លុត ឬសម្ដីខ្លាំងៗដាក់ជនជាប់ចោទ ហើយហាក់បង្ហាញទំនោរលម្អៀងតាមរយៈការបង្ហាញការគាំទ្រលើភស្តុតាងដាក់បន្ទុកច្រើនជាងការថ្លឹងថ្លែងបែបកណ្តាលក្នុងដំណើរការនីតិវិធី។
ក្នុងបន្ទប់សវនាការ មេធាវីការពារឲ្យលោក វន់ ពៅ និងលោក ថេង សាវឿន បានបង្ហាញអំណះអំណាង និងស្នើទៅសាលាឧទ្ធរណ៍ឲ្យចាត់ទុកសាលក្រមរបស់តុលាការដំបូងជាមោឃៈ ដោយឲ្យកូនក្ដីខ្លួនបានរួចពីការចោទប្រកាន់។
បន្ទាប់ពីសវនាការសួរដេញដោល តុលាការសម្រេចប្រកាសសាលដីកាក្នុងសំណុំរឿងនេះនៅថ្ងៃទី២៩ ខែកញ្ញា ឆ្នាំ២០២៣ វេលាម៉ោង ៨ព្រឹក។
អ្នកស្រី ចក់ សុភាព បង្ហាញសង្ឃឹមថា សាលាឧទ្ធរណ៍នឹងផ្តល់យុត្តិធម៌ដល់ពួកគាត់ និងអ្នកពាក់ព័ន្ធដទៃទៀត ដោយសារពួកគេសុទ្ធតែជាអ្នកអហិង្សានិយម។ អ្នកស្រីថា ពួកគេមិនគួរត្រូវបានរងការផ្ដន្ទាទោសនេះទេ ដោយសារពួកគេមិនត្រឹមតែជាជនរងគ្រោះពីអំពើហិង្សាដែលកើតឡើងនៅអំឡុងដើមឆ្នាំ២០១៤ នោះទេ តែថែមទាំងជាជនរងគ្រោះក្នុងនីតិវិធីដែលពួកគេពុំបានជួបមេធាវី និងព័ត៌មានរបស់ពួកគេ បន្ទាប់ពីរងហិង្សានោះរហូតដល់ ៥ថ្ងៃ ទើបមេធាវី និងក្រុមគ្រួសារបានដឹងថាពួកគេត្រូវបានយកទៅឃុំនៅពន្ធនាគារត្រពាំងផ្លុង ផងដែរ។
លោក វន់ ពៅ និងលោក ថេង សាវឿន គឺជាអ្នកការពារសិទ្ធិមនុស្សដែលត្រូវបានចាប់ខ្លួនក្នុងចំណោមអ្នកការពារសិទ្ធិមនុស្ស និងបាតុករចំនួន ២៣នាក់ទៀតនៅក្នុងព្រឹត្តិការណ៍បង្ក្រាបដោយហិង្សានៅរោងចក្រ យ៉ាក់ជីង ពាក់ព័ន្ធនឹងការតវ៉ាទាមទារឱ្យដំឡើងប្រាក់ឈ្នួលអប្បបរមា ១៦០ដុល្លារកាលពីខែមករា ឆ្នាំ២០១៤។
ដំបូងឡើយ តុលាការបានចោទប្រកាន់លើអ្នកការពារសិទ្ធិមនុស្ស ៤នាក់ពីបទ «ញុះញង់ឲ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ប៉ុន្តែក្រោយមក តុលាការបានប្ដូរទៅជាបទ «អ្នកផ្ដើមគំនិតក្នុងអំពើហិង្សាដោយចេតនាដែលមានស្ថានទម្ងន់ទោស» តាមមាត្រា ២៨ និង ២១៨ នៃក្រមព្រហ្មទណ្ឌ។
ចំពោះជនជាប់ចោទទាំង ១៩នាក់ផ្សេងទៀតត្រូវបានចោទប្រកាន់ពីបទ «ហិង្សាដោយចេតនាមានស្ថានទម្ងន់ទោស និងខូចខាតដោយចេតនាមានស្ថានទម្ងន់ទោស»។
បន្ទាប់ពីបើកសវនាការចំនួន ៥ថ្ងៃ ពោលគឺចាប់ពីថ្ងៃទី២៥ ខែមេសា ដល់ថ្ងៃទី២២ ខែឧសភា ឆ្នាំ២០១៤ នៅថ្ងៃទី៣០ ខែឧសភា ឆ្នាំ២០១៤ តុលាការក្រុងភ្នំពេញបានផ្ដន្ទាទោសអ្នកការពារសិទ្ធិមនុស្ស ២៣នាក់ដាក់ពន្ធនាគារចន្លោះពី ២ឆ្នាំទៅ ៥ឆ្នាំ ប៉ុន្តែលោក វន់ ពៅ លោក ថេង សាវឿន និងអ្នកផ្សេងទៀត ត្រូវបានដោះលែងវិញនៅថ្ងៃទី៣០ ខែឧសភា ឆ្នាំ២០១៤ ខណៈទោសនៅសល់ត្រូវព្យួរ៕