សាលាដំបូងរាជធានីភ្នំពេញ ព្រមានចាប់ឃុំខ្លួនលោក រ៉ុង ឈុន សាជាថ្មី ប្រសិនបើមន្ត្រីជាន់ខ្ពស់គណបក្សកម្លាំងជាតិរូបនេះមិនព្រមបង់ប្រាក់ពិន័យទៅតាមការកំណត់ពីតុលាការ។
តំណាងអយ្យការអមសាលាដំបូងរាជធានីភ្នំពេញ លោក ឆាយ ហុង បានចេញលិខិតជូនដំណឹងកាលពីថ្ងៃទី១៩ ខែកុម្ភៈ ឆ្នាំ២០២៤ ដែលត្រូវបានផ្សព្វផ្សាយនៅថ្ងៃទី២៩ កុម្ភៈ នេះ ដោយបង្គាប់ឲ្យលោក រ៉ុង ឈុន ជាទីប្រឹក្សាគណបក្សកម្លាំងជាតិ (NPP) បង់ប្រាក់ពិន័យចំនួន ២លានរៀល (២០០០០០០រៀល) តាមអំណាចសាលដីកាតុលាការកំពូល កាលពីចុងខែកក្កដា ឆ្នាំ២០២២ កន្លងទៅនោះ។
លិខិតជូនដំណឹងរបស់តំណាងអយ្យការអមសាលាដំបូងរាជធានីភ្នំពេញ បញ្ជាក់ថា លោក រ៉ុង ឈុន ត្រូវតែទៅបង់ប្រាក់ពិន័យនៅការិយាល័យកិច្ចការគណនេយ្យរបស់សាលាដំបូងរាជធានីភ្នំពេញ (ជាន់ទី១) ឲ្យបានមុនថ្ងៃទី៤ ខែមីនា ឆ្នាំ២០២៤ រៀងរាល់ម៉ោងធ្វើការជាកំហិត ប៉ុន្តែក្នុងករណីមិនអនុវត្តតាមការជូនដំណឹងអំពីការបង់ប្រាក់ពិន័យនេះទេ តុលាការនឹងចេញដីកាបញ្ជាឲ្យបង្ខំ និងឃុំខ្លួនតាមនីតិវិធីដោយគ្មានករណីលើកលែងដាច់ខាត។
កាលពីថ្ងៃទី៣១ ខែកក្កដា ឆ្នាំ២០២០ កម្លាំងប្រដាប់អាវុធប្រមាណជា ៥០នាក់ បានឡោមព័ទ្ធផ្ទះលោក រ៉ុង ឈុន និងបានចូលទៅចាប់ខ្លួនលោកនៅក្នុងផ្ទះតែម្តង និងត្រូវបានចោទប្រកាន់ពីបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ពាក់ព័ន្ធនឹងការលើកឡើងអំពីបញ្ហាព្រំដែនរវាងប្រទេសកម្ពុជា និងប្រទេសវៀតណាម។
បន្ទាប់ពីត្រូវបានចោទប្រកាន់ និងត្រូវបានឃុំខ្លួន នៅថ្ងៃទី១៨ ខែសីហា ឆ្នាំ២០២១ សាលាដំបូងរាជធានីភ្នំពេញសម្រេចកាត់ទោសលោក រ៉ុង ឈុន ឲ្យជាប់ពន្ធនាគាររយៈពេល ២ឆ្នាំ និងពិន័យជាប្រាក់ ២លានរៀល ពីបទ ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ពាក់ព័ន្ធនឹងការចុះទៅពិនិត្យមើលព្រំដែន និងការចេញសេចក្តីថ្លែងការណ៍អំពីការបោះបង្គោលព្រំដែនកម្ពុជា-វៀតណាមនៅខេត្តត្បូងឃ្មុំ កាលពីចុងឆ្នាំ២០២០ កន្លងទៅនោះ។
ទោះជាយ៉ាងណាក៏ដោយ លោក រ៉ុង ឈុន ក៏បានប្តឹងជំទាស់ទៅនឹងសាលក្រមសាលាដំបូង ទៅកាន់សាលាឧទ្ធរណ៍ក្រុងភ្នំពេញផងដែរ ប៉ុន្តែនៅថ្ងៃទី១២ ខែវិច្ឆិកា ឆ្នាំ២០២១ សាលាឧទ្ធរណ៍ក្រុងភ្នំពេញ នៅតែសម្រេចតម្កល់ការផ្ដន្ទាទោសរបស់សាលាដំបូងរាជធានីភ្នំពេញនៅបានការដដែល ដោយកាត់ទោសឱ្យលោកជាប់ពន្ធនាគារ ២ឆ្នាំ តែត្រូវអនុវត្តទោសត្រឹម ១៥ខែ ១១ថ្ងៃ ខណៈទោសដែលនៅសល់ ៨ខែ ១៩ថ្ងៃទៀត ត្រូវបានព្យួរ។
បែបនេះក្តី ក្រោយចេញពីពន្ធនាគារ លោក រ៉ុង ឈុន ក៏បានដាក់ពាក្យបណ្តឹងទៅតុលាការកំពូល ដើម្បីជំទាស់ទៅនឹងការសម្រេចរបស់សាលាឧទ្ធរណ៍បន្តទៀតដែរ ប៉ុន្តែនៅថ្ងៃទី២២ ខែកក្កដា ឆ្នាំ២០២២ តុលាការកំពូលបានសម្រេចតម្កល់ការផ្ដន្ទាទោសរបស់សាលាឧទ្ធរណ៍ទុកជាបានការដដែល ដែលមានន័យថា លោក រ៉ុង ឈុន នៅតែត្រូវបានកាត់ឲ្យជាប់ពន្ធនាគាររយៈពេល ២ឆ្នាំ និងពិន័យជាប្រាក់ ២លានរៀលដូចសាលដីកាសាលាដំបូង និងសាលាឧទ្ធរណ៍បានសម្រេចដដែល ក្នុងនោះ តុលាការកំពូលបានបញ្ជាក់ថា ទោសដែលនៅសល់ត្រូវព្យួរសាកល្បងដោយកំណត់រយៈពេល ៣ឆ្នាំ។
ផ្អែកទៅលើការសម្រេចពីតុលាការកំពូលក្នុងការព្យួរទោសសាកល្បងរយៈពេល ៣ឆ្នាំ លោក រ៉ុង ឈុន នៅតែមានឈ្មោះជាទណ្ឌិតនៅឡើយ គិតត្រឹមដើមឆ្នាំ២០២៤ នេះ ក្នុងនោះ ក្រសួងយុត្តិធម៌ ធ្លាប់បានបញ្ជាក់កាលពីអំឡុងខែឧសភា ឆ្នាំ២០២៣ ថា លោក រ៉ុង ឈុន នៅតែមានទោសជាប់ខ្លួននៅឡើយ ដោយសារលោកពុំទាន់ផុតរយៈពេល ៥ឆ្នាំ ដោយគិតចាប់ពីថ្ងៃអនុវត្តទោសរួច។
លោក រ៉ុង ឈុន ត្រូវបានតុលាការចោទប្រកាន់ពីបទ «ញុះញង់បង្កឲ្យមានភាពវឹកវរដល់សន្តិសុខសង្គម» បន្ទាប់ពីត្រូវបានសមត្ថកិច្ចចាប់ខ្លួនកាលពីថ្ងៃទី៣១ ខែកក្កដា ឆ្នាំ២០២០ កន្លងទៅ ជុំវិញការចុះទៅពិនិត្យព្រំដែនកម្ពុជា-វៀតណាម ក្នុងស្រុកពញាក្រែក ខេត្តត្បូងឃ្មុំ និងបានចេញសេចក្តីថ្លែងការណ៍ជុំវិញការបោះបង្គោលព្រំដែនរវាងកម្ពុជា-វៀតណាម លេខ១១៤ ដល់ ១១៩ អំពីភាពមិនប្រក្រតីមួយចំនួននៅពេលនោះ។
លោក រ៉ុង ឈុន គឺជាអតីតប្រធានសមាគមគ្រូបង្រៀនកម្ពុជាឯករាជ្យ មុននឹងលោកចូលបម្រើការងារជាមន្ត្រីជាន់ខ្ពស់នៅក្នុងស្ថាប័នជាតិរៀបចំការបោះឆ្នោត (គ.ជ.ប) ប៉ុន្តែលោកបានលាលែងតំណែងនេះវិញក្រោយគណបក្សសង្គ្រោះជាតិ ត្រូវតុលាការកំពូលប្រកាសរំលាយកាលពីថ្ងៃទី១៦ ខែវិច្ឆិកា ឆ្នាំ២០១៧ កន្លងទៅ ដើម្បីចូលរួមកិច្ចការសង្គមក្នុងការតវ៉ាទាមទារផលប្រយោជន៍ប្រជាពលរដ្ឋវិញ។
ជុំវិញសកម្មភាពការពារផលប្រយោជន៍ប្រជាពលរដ្ឋកន្លងមក លោក រ៉ុង ឈុន ត្រូវបានសមត្ថកិច្ចចាប់ខ្លួនដាក់ពន្ធនាគារចំនួន ៣លើករួចមកហើយ ក្នុងនោះ កាលពីថ្ងៃទី១៥ ខែតុលា ឆ្នាំ២០០៥ លោកត្រូវបានចាប់ខ្លួន និងចោទប្រកាន់តាមផ្លូវតុលាការ ជុំវិញការរិះគន់អំពីសន្ធិសញ្ញាបំពេញបន្ថែមកម្ពុជា-វៀតណាម។
ជាងនេះទៀត នៅចុងខែមករា ឆ្នាំ២០១៤ លោក រ៉ុង ឈុន ត្រូវបានសមត្ថកិច្ចចាប់ខ្លួនម្តងទៀត ដោយសារតែលោកបានដឹកនាំទាមទារឱ្យមានការដោះលែងប្រធានសមាគមសេដ្ឋកិច្ចប្រជាធិបតេយ្យឯករាជ្យក្រៅប្រព័ន្ធ លោក វន់ ពៅ។
ចុងក្រោយបង្អស់ នៅថ្ងៃទី៣១ ខែកក្កដា ឆ្នាំ២០២០ លោក រ៉ុង ឈុន ក៏ត្រូវសមត្ថកិច្ចចាប់ខ្លួនជាលើកទី៣ បន្ទាប់ពីលោកបានចេញសេចក្តីថ្លែងការណ៍អំពីការបាត់ដីរបស់ពលរដ្ឋខ្មែរទៅខាងវៀតណាម នៅខេត្តត្បូងឃ្មុំ រហូតធ្វើឱ្យលោកស្ពាយទោសជាទណ្ឌិតរហូតដល់សព្វថ្ងៃនេះ៕