សហជីពប្រចាំទេសជប៉ុន ដែលធ្វើការលើវិស័យការងារ ត្អូញត្អែរថា ពលករខ្មែរដែលប្រព្រឹត្តអំពើចោរកម្មដោយការលួចកាត់ខ្សែភ្លើងរហូតធ្វើឱ្យស្ថានីយរថភ្លើងលែងដំណើរការជាបន្តបន្ទាប់មកនេះ គឺដោយសារតែពួកគេជួបវិបត្តិអត់ការងារ ព្រោះតែរត់ចេញពីក្រុមហ៊ុនដែលថៅកែរំលោភសិទ្ធិការងារ និងគ្មានការជួយដោះស្រាយបញ្ហាពីស្ថានទូតខ្មែរ។
សហជីពជប៉ុន ដែលទទួលបន្ទុកការពារសិទ្ធិពលករខ្មែរ ប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះនៅថ្ងៃទី១៧ សីហា នេះថា នៅពេលដែលពលករទាំងនោះចូលបម្រើការនៅតាមរោងចក្រនានា ទោះត្រូវថៅកែក្រុមហ៊ុនរំលោភបំពានសិទ្ធិការងារយ៉ាងណាក៏ដោយ ក៏ស្ថានទូតខ្មែរ និងក្រុមហ៊ុនដែលបញ្ជូនពួកគេទៅធ្វើការមិនដែលចុះទៅជួយដោះស្រាយបញ្ហាឱ្យពលករខ្មែរទាំងនោះម្តងណាឡើយ រហូតដល់ដំណាក់កាលមួយដែលទ្រាំលែងបាន ពលករទាំងនោះក៏សម្រេចចិត្តរត់ចេញពីកន្លែងធ្វើការតែម្តង។
ប្រភពដដែលលើកឡើងថា នៅពេលដែលពួកគេរត់ចេញពីកន្លែងធ្វើការ ខាងក្រុមហ៊ុនដែលបានបញ្ជូនពួកគេទៅ ក៏ទាក់ទងមិនបាន ដូច្នេះលិខិតឆ្លងដែនរបស់ពួកគេក៏ត្រូវផុតកំណត់។ ប្រភពខាងលើបន្តថា នៅពេលលិខិតឆ្លងដែនផុតកំណត់ ពួកគេមិនអាចធ្វើការងារបានទេ ដូច្នេះប្រាក់ចំណូលរបស់ពួកគេនឹងត្រូវបាត់បង់ទាំងស្រុង ហេតុនេះហើយ ដើម្បីចិញ្ចឹមជីវិត និងរកលុយផ្ញើទៅស្រុកកំណើតសងធនាគារដែលខ្លួនជំពាក់មុននឹងមកធ្វើការនៅប្រទេសជប៉ុន នោះ គឺមានតែប្រព្រឹត្តអំពើល្មើសបែបនេះ។
សហជីពជប៉ុន ដែលទទួលបន្ទុកការពារសិទ្ធិពលករខ្មែរខាងលើបញ្ជាក់ថា នៅពេលដែលបញ្ហាកាន់តែរីករាលដាលធំឡើងៗ ដោយសារតែពលករខុសច្បាប់ស្គាល់គ្នាកាន់តែច្រើន ហើយនាំគ្នាប្រព្រឹត្តអំពើល្មើសច្បាប់កាន់តែធំទៅៗពីមួយថ្ងៃទៅមួយថ្ងៃ ខាងសហជីពក៏បានទាក់ទងទៅស្ថានទូតខ្មែរប្រចាំប្រទេសជប៉ុន ដែរ ប៉ុន្តែមិនអាចទាក់ទងបានទេរហូតមកដល់ពេលនេះ។
ប្រភពខាងលើគូសបញ្ជាក់ថា ពលករខ្មែរដែលត្រូវសមត្ថកិច្ចចាប់ខ្លួន បានសារភាពថា ពួកគេមិនចង់ធ្វើបែបនេះទេ ប៉ុន្តែដោយសារពួកគេគ្មានជម្រើស ខណៈស្ថានទូតខ្មែរមិនដែលយកចិត្តទុកដាក់នឹងពួកគេឡើយចាប់តាំងពីមកបម្រើការងារនៅទីនេះ ទោះត្រូវថៅកែរោងចក្រធ្វើបាបយ៉ាងណាក៏ដោយ ដូច្នេះហើយបានជាពួកគេគ្មានសង្ឃឹមថា ស្ថានទូតខ្មែរនឹងជួយដោះស្រាយបញ្ហាឱ្យពួកគេឡើយ។
កាលពីចុងខែកក្កដា ឆ្នាំ២០២៣ សារព័ត៌មានជប៉ុន NHK World Japan បានចេញផ្សាយតាមកញ្ចក់ទូរទស្សន៍កាលពីពេលថ្មីៗនេះថា ពលករខ្មែរចំនួន ១២នាក់ដែលរស់នៅក្នុងទីក្រុងមីណេ (mine) ខេត្ត Yamaguchi ត្រូវបានសមត្ថកិច្ចចាប់ខ្លួនពីបទស្នាក់នៅដោយខុសច្បាប់នៅក្នុងប្រទេសជប៉ុន ដែលមានអាយុចាប់ពី ២៦ឆ្នាំដល់ ៤២ឆ្នាំ។ ក្រោយការឆែកឆេរកន្លែងស្នាក់នៅរបស់ពលករខ្មែរទាំងនោះ ប៉ូលិសបានអះអាងថា ពួកគេពិតជាកំពុងរស់នៅ និងធ្វើការដោយខុសច្បាប់ប្រាកដមែន។
ដោយឡែកសារព័ត៌មានជប៉ុន Ibaraki News ក៏បានចុះផ្សាយកាលពីពេលថ្មីៗនេះផងដែរថា ប៉ូលិសខេត្ត Ibaraki ចាប់ចោរជាជនជាតិខ្មែរ ៦នាក់ ដែលមានអាយុចាប់ពី ២៥ឆ្នាំដល់ ៣៦ឆ្នាំ ពីបទចោរកម្ម ហើយម្នាក់ក្នុងចំណោមអ្នកទាំងនោះបានសារភាពប្រាប់ប៉ូលិសថា រូបគេស្គាល់អ្នកដែលលួចខ្សែភ្លើងកន្លងមកដែលមានចំនួនដល់ទៅជាង ១០០នាក់ឯណោះ ខណៈប៉ូលិសកំពុងស៊ើបអង្កេតតាមចាប់ខ្លួនអ្នកទាំងនោះមកដាក់ទោសមុននឹងពួកគេវិលត្រឡប់ទៅប្រទេសកម្ពុជាវិញ។
សារព័ត៌មានជប៉ុន Ibaraki News ក៏បានបង្ហាញដែរថា គិតត្រឹមខែមករា ឆ្នាំ២០២៣ ចំនួនពលករដែលកំពុងស្នាក់នៅខុសច្បាប់ក្នុងប្រទេសជប៉ុន មានចំនួនជាង ៧ម៉ឺននាក់ (៧០៤៩១នាក់) ក្នុងនោះពលករខ្មែរដែលរស់នៅដោយខុសច្បាប់មានចំនួនប្រមាណជាង ១ពាន់នាក់ (១១៨៥នាក់) ខណៈពលករជាស្ត្រីមានរហូតដល់ទៅជាង ៤០០នាក់ (៤០៦នាក់) ផងដែរ។
ទាក់ទិននឹងបញ្ហានេះ សារព័ត៌មានជប៉ុន NHK World Japan បានចេញផ្សាយផងដែរថា ដោយសារតែបែបនេះ រដ្ឋាភិបាលជប៉ុន បានប្រកាសចេញគម្រោងចាប់បញ្ជូនពលករខ្មែរដែលកំពុងរស់នៅប្រទេសជប៉ុនដោយខុសច្បាប់ទៅកម្ពុជាវិញ ខណៈច្បាប់ថ្មីរបស់ប្រទេសជប៉ុនដែលទើបនឹងត្រូវបានអនុម័តកាលពីពេលថ្មីៗនេះ ក៏បានរឹតបន្តឹងទៅលើអ្នករស់នៅដោយខុសច្បាប់យ៉ាងខ្លាំងផងដែរ បន្ទាប់ពីអំពើល្មើសជាច្រើនកន្លងមកត្រូវគេរកឃើញថា កើតចេញមកតែពីអ្នកដែលរស់នៅដោយខុសច្បាប់ទាំងនោះ។
មន្ត្រីជាន់ខ្ពស់ទទួលបន្ទុកផ្នែកការងារនៃអង្គការសង់ត្រាល់ លោក ឃុន ថារ៉ូ ប្រាប់សារព័ត៌មាន The Cambodia Daily នៅថ្ងៃទី១៧ សីហា នេះដែរថា បច្ចុប្បន្ននេះ ពលករខ្មែរខុសច្បាប់កំពុងមានការកើនឡើងជាបន្តបន្ទាប់ ដែលពួកគេកំពុងប្រឈមនឹងវិធានការច្បាប់ពីការរស់នៅដោយខុសច្បាប់ផង និងប្រឈមនឹងវិធានការច្បាប់ពីការប្រព្រឹត្តបទល្មើសនានាផងដែរ នៅពេលដែលពលករទាំងនោះធ្វើសកម្មភាពលួចសម្ភារៈផ្សេងៗ ដើម្បីយកប្រាក់មកចិញ្ចឹមជីវិតបន្ទាប់ពីបាត់បង់ការងារ។
លោក ឃុន ថារ៉ូ លើកឡើងថា បញ្ហាខាងលើនេះតម្រូវឱ្យរាជរដ្ឋាភិបាលកម្ពុជាធ្វើកំណែទម្រង់ជាបន្ទាន់ជុំវិញកិច្ចសន្យារវាងទីភ្នាក់ងារបញ្ជូនពលករ និងទីភ្នាក់ងារទទួលពលករនៅឯប្រទេសជប៉ុន ព្រោះថាសព្វថ្ងៃនេះ រដ្ឋាភិបាលជប៉ុនបានអនុម័តយកគោលនយោបាយអនុលោមទៅតាមយន្តការច្បាប់លើកកម្ពស់សិទ្ធិមនុស្ស និងសិទ្ធិពលករបរទេស ប៉ុន្តែវិធានការនេះមិនទាន់ត្រូវបានអនុវត្តពេញលេញនៅឡើយទេ ខណៈការកេងប្រវ័ញ្ចកម្លាំងពលកម្មពីសំណាក់ថៅកែក្រុមហ៊ុនលើពលករបរទេស បានបន្តកើតមានជាបន្តបន្ទាប់នាពេលកន្លងមក។
កាលពីអំឡុងឆ្នាំ២០២២ ពលករខ្មែរភេទប្រុសម្នាក់ដែលគេសុំមិនបញ្ចេញឈ្មោះ បានធ្វើអត្តឃាតដោយចងកសម្លាប់ខ្លួនឯងក្នុងផ្ទះជួលស្ថិតនៅខេត្តកាណាកាវ៉ា ប្រទេសជប៉ុន ក្រោយរងនូវសម្ពាធការងារធ្ងន់ធ្ងរពីខាងក្រុមហ៊ុន បន្ទាប់ពីពលករខ្មែររូបនេះបានបម្រើការងារអស់រយៈពេលប្រមាណជាង ២ឆ្នាំកន្លងមក ខណៈមន្ត្រីស្ថានទូតខ្មែរប្រចាំប្រទេសជប៉ុន មិនដែលខ្វល់ខ្វាយយកចិត្តទុកដាក់លើសុខទុក្ខរបស់ពលករខ្មែរទាំងនោះឡើយ ខណៈករណីសម្លាប់ខ្លួនក៏ចេះតែបន្តកើតមានជាបន្តបន្ទាប់ក្រោយៗមកទៀត៕