ប្រជាជនថៃ ដែលគាំទ្រលោក ថាក់ស៊ីន ស៊ីណាវ៉ាត់ អតីតនាយករដ្ឋមន្ត្រីថៃដែលជាប់ពិរុទ្ធភាព បានប្រកូកប្រកាសប្រមូលផ្ដុំគ្នានៅខាងមុខព្រលានយន្តហោះដងមឿង នៃទីក្រុងបាងកក ដើម្បីចាំទទួលលោក ថាក់ស៊ីន។
កូនស្រីរបស់លោក ថាក់ស៊ីន អ្នកស្រី ផៃថោថាន បានឲ្យដឹងថា លោក ថាក់ស៊ីន កំណត់វិលចូលប្រទេសថៃវិញនៅព្រឹកថ្ងៃទី២២ តាមរយៈជើងហោះហើរមួយដែលត្រូវមកដល់ព្រលានយន្តហោះដងមឿង។
ការប្រកាសរបស់អ្នកស្រី ផៃថោថាន បាននាំឲ្យក្រុមគាំទ្រលោក ថាក់ស៊ីន និងគណបក្សភឿថៃ ដែលភាគច្រើនគេហៅថាក្រុមអាវក្រហម បានប្រកូកប្រកាសប្រមូលផ្ដុំគ្នាតាមបណ្ដាញសង្គមហ្វេសប៊ុកដោយប្រាប់ថា ចាប់ពីរសៀលថ្ងៃចន្ទ ទី២១ ខែសីហា នេះ គឺត្រូវជួបជុំគ្នានៅខាងមុខព្រលានយន្តហោះដងមឿង។
កាសែតបាងកកប៉ុស្តិ៍ បានចុះផ្សាយថា មេក្រុមអាវក្រហមដែលនៅតែស្មោះស្ម័គ្រនឹងលោក ថាក់ស៊ីន ពួកគេបានប្រមូលអ្នកគាំទ្រមកពីតាមបណ្ដាខេត្តនៅជុំវិញទីក្រុងបាងកក មកទទួលលោក ថាក់ស៊ីន។
តែយ៉ាងណា ក្នុងស្ថានភាពនយោបាយនៅបាងកកនៅពេលនេះស្ថិតក្នុងភាពតានតឹង នៅខណៈដែលនគរបាលយុត្តិធម៌បានចេញសេចក្ដីប្រកាសព័ត៌មានថា លោក ថាក់ស៊ីន អាចនឹងត្រូវឃាត់ខ្លួននៅព្រលានយន្តហោះ ឲ្យតែលោកមកដល់តាមការកំណត់របស់លោក។
ពួកមន្ត្រីប៉ូលិសនៅទីក្រុងបាងកក ក៏បានត្រៀមកម្លាំងរួចរាល់ហើយដែរ ដោយពួកគេពង្រាយកម្លាំងនៅខាងមុខព្រលានយន្តហោះដងមឿង ដែលជាការត្រៀមនាំខ្លួនលោក ថាក់ស៊ីន ទៅកាន់តុលាការកំពូល ដើម្បីស្នើសុំតុលាការនេះពិនិត្យឡើងវិញចំពោះសាលក្រមរបស់តុលាការដែលបានផ្ដន្ទាទោសលោក ថាក់ស៊ីន ឲ្យមានទោស ១០ឆ្នាំក្នុងសំណុំរឿងចោទអតីតនាយករដ្ឋមន្ត្រីរូបនេះពីបទពុករលួយ និងបំពានអំណាចរដ្ឋ។
សាលដីការបស់តុលាការកំពូល ធ្វើឡើងកាលពីឆ្នាំ២០០៨ នៅពេលដែលលោក ថាក់ស៊ីន បានភៀសខ្លួនចាកចេញពីទីក្រុងបាងកក នៅមុនប៉ុន្មានថ្ងៃប៉ុណ្ណោះដែលចៅក្រមបើកការជំនុំជម្រះក្ដី។
លោក ថាក់ស៊ីន ស្ថិតនៅក្រៅប្រទេសរយៈពេល ១៥ឆ្នាំមកហើយ។ បុរសវ័យ ៧៤ឆ្នាំរូបនេះត្រូវបានពួកយោធាធ្វើរដ្ឋប្រហារទម្លាក់លោកពីនាយករដ្ឋមន្ត្រីកាលពីឆ្នាំ២០០៦។
រដ្ឋប្រហារឆ្នាំ២០០៦ នោះ ចំពេលដែលស្ថានភាពនយោបាយនៅទីក្រុងបាងកកស្ថិតក្នុងភាពជ្រួលច្របល់ ដែលក្រុមអាវលឿងមានទំនោរទៅរករាជបល្ល័ង្គ បានធ្វើបាតុកម្មរហូតដល់ផ្ទុះហិង្សាជាមួយក្រុមអាវក្រហម។ បាតុកម្មរបស់ក្រុមអាវលឿងនៅពេលនោះ គឺទាមទារឲ្យលោក ថាក់ស៊ីន លាលែងពីតំណែង ដែលបាតុករចោទលោក ថាក់ស៊ីន ថាមានផែនការប្រឆាំងនឹងអំណាចរបស់ព្រះរាជា ហើយចោទពីបទពុករលួយករណីដែលថា គ្រួសារលោក ថាក់ស៊ីន បានទិញដីរដ្ឋមួយកន្លែងនៅទីក្រុងបាងកក ដោយពុំមានការដេញថ្លៃ ហើយបង្កើតឲ្យមានការកិបកេង និងការគេចពន្ធ។
ឥឡូវនេះ នៅទីក្រុងបាងកក ស្ថានភាពនយោបាយក៏ស្ថិតក្នុងភាពតានតឹងផងដែរ ព្រោះតែនៅថ្ងៃទី២២ សីហា សភាទាំងពីរថ្នាក់ត្រូវប្រជុំដើម្បីបោះឆ្នោតជ្រើសតាំងបេក្ខជននាយករដ្ឋមន្ត្រីម្នាក់ដែលមកពីគណបក្សភឿថៃ ជាគណបក្សដែលលោក ថាក់ស៊ីន នៅពីក្រោយបក្សនេះ។
បើតាមការចុះផ្សាយរបស់កាសែតបាងកកប៉ុស្តិ៍ បក្សភឿថៃ បានបង្កើតសម្ព័ន្ធភាពថ្មីរហូតដល់ទៅ ១១គណបក្ស ហើយក្នុងនោះ គណបក្សរបស់ពួកយោធាក៏ជាសម្ព័ន្ធភាពនៅក្នុងរដ្ឋាភិបាលចម្រុះរបស់គណបក្សភឿថៃផងដែរ។
ប្រជាជនថៃ ដែលមិនគាំទ្របក្សភឿថៃ ជាពិសេសប្រជាជនដែលបោះឆ្នោតគាំទ្រគណបក្សចលនាឆ្ពោះទៅមុខ ក៏បានបង្ហាញប្រតិកម្ម ព្រោះតែបក្សភឿថៃចាប់យកសម្ព័ន្ធភាពជាមួយពួកយោធាដែលជាក្រុមរដ្ឋប្រហារឆ្នាំ២០១៤។ ក្រុមគាំទ្រគណបក្សចលនាឆ្ពោះទៅមុខ ក៏បានធ្វើការប្រមូលផ្ដុំគ្នាផងដែរចាប់ពីថ្ងៃនេះតទៅ ដែលពួកគេប្រឆាំងការយកគណបក្សពួកយោធាចូលទៅក្នុងរដ្ឋាភិបាលអាណត្តិថ្មីនេះ។
ចុះហេតុអ្វីបានជាលោក ថាក់ស៊ីន សម្រេចយកថ្ងៃទី២២ វិលចូលប្រទេសថៃវិញ?
បើតាមអ្នកសង្កេតការណ៍ លោក ថាក់ស៊ីន សម្រេចវិលចូលប្រទេសថៃនៅថ្ងៃដែលសភាប្រជុំគ្នាជ្រើសរើសបេក្ខភាពនាយករដ្ឋមន្ត្រី មកពីគណបក្សភឿថៃទំនងលោក ថាក់ស៊ីន មានទំនុកចិត្តរួចទៅហើយថាស្ថានភាពនយោបាយនៅពេលនេះនឹងនាំឲ្យលោកវិលចូលស្រុកវិញបាន ព្រោះតែបក្សភឿថៃ ដែលកូនស្រីរបស់លោកជាអ្នកនយោបាយមានឥទ្ធិពលក្នុងបក្សនេះ កំពុងតែសម្របសម្រួលជាមួយពួកយោធាក្រោមហេតុផលនៃការផ្សះផ្សាជាតិ។
ដូចនេះហើយបានជាបក្សភឿថៃ សម្រេចឱបក្រសោបបក្សរបស់ពួកយោធា គឺបក្សប៉ាល្ល័ង្គប្រាចារ៉ាត់ និងបក្សថៃរួបរួមជាតិ មកចូលក្នុងរដ្ឋាភិបាលចម្រុះរបស់ខ្លួន ដែលលោក ថាក់ស៊ីន សង្ឃឹមថាបក្សភឿថៃ នឹងក្លាយជាមេដឹកនាំនៃរដ្ឋាភិបាលចម្រុះ ហើយបេក្ខជននាយករដ្ឋមន្ត្រីគឺលោក ស្រេតថា ថាវីស៊ីន អាចនឹងបានសភាទាំងពីរថ្នាក់ ទាំងសមាជិកសភា និងព្រឹទ្ធសភា បោះឆ្នោតគាំទ្រឲ្យក្លាយជានាយករដ្ឋមន្ត្រីថ្មីទី៣០ របស់រាជាណាចក្រនេះ៕