ពលករខ្មែរមួយចំនួនដែលកំពុងបម្រើការងារនៅប្រទេសជប៉ុន កំពុងរងនូវការគំរាមកំហែងពីសំណាក់សមាគមដែលបញ្ជូនពួកគេទៅធ្វើការនៅប្រទេសជប៉ុន កាន់តែខ្លាំងឡើងៗ ដើម្បីរារាំងកុំឱ្យពួកគេរត់ចេញពីកន្លែងធ្វើការ បើទោះបីជាពលករខ្មែរទាំងនោះត្រូវរងនូវការរំលោភបំពានសិទ្ធិការងារពីថៅកែក្រុមហ៊ុនយ៉ាងណាក៏ដោយ ខណៈមន្ត្រីស្ថានទូតខ្មែរប្រចាំប្រទេសជប៉ុន មិនទាន់ចុះស្រាវជ្រាវ និងជួយដោះស្រាយអំពីបញ្ហានេះនៅឡើយ។
ពលករខ្មែរម្នាក់ដែលកំពុងរងនូវការគំរាមកំហែងពីសមាគមបញ្ជូនពលករទៅប្រទេសជប៉ុន ប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះដើម្បីសុវត្ថិភាពផ្ទាល់ខ្លួននៅថ្ងៃទី២៣ សីហា នេះថា សព្វថ្ងៃនេះ ពលករខ្មែរមួយចំនួនបើមិនរត់ចេញពីកន្លែងធ្វើការទេ គឺមានតែទ្រាំធ្វើការដូចសត្វធាតុប៉ុណ្ណោះ។
ប្រភពដដែលបន្ថែមថា ពលករទាំងនោះ ទោះត្រូវគេវាយធ្វើបាប ឬគំរាមកំហែងយ៉ាងណាក៏ដោយ ក៏ខាងសមាគមមិនជួយដោះស្រាយបញ្ហាឱ្យពួកគេដែរ គឺមានតែគាបសង្កត់ឱ្យពួកគេធ្វើទៅតាមការកំណត់របស់ក្រុមហ៊ុនបន្តទៀតប៉ុណ្ណោះ ហើយការធ្វើបែបនេះ គឺដោយសារតែសមាគមចង់បន្តរក្សាទំនាក់ទំនងល្អជាមួយក្រុមហ៊ុន ក្នុងបំណងយកចិត្តក្រុមហ៊ុនឱ្យទទួលពលករដែលពួកគេបញ្ជូនមកនៅពេលក្រោយទៀត។
ពលករដែលកំពុងរងការគាបសង្កត់ទាំងនេះ លើកឡើងថា នៅពេលដែលពួកគេទាមទារឱ្យខាងសមាគមជួយដោះស្រាយបញ្ហាជាមួយថៅកែរោងចក្រ ដូចជាដូរកន្លែងធ្វើការ ឬទាមទារឱ្យរោងចក្រផ្តល់ការងារឱ្យពួកគេឱ្យបានគ្រប់ម៉ោងដូចក្នុងកិច្ចសន្យា ដើម្បីឱ្យពួកគេទទួលបានប្រាក់ឈ្នួលដូចក្នុងកិច្ចព្រមព្រៀង បែរជាខាងសមាគមស្ដីបន្ទោសរហូតដល់ជេរបញ្ចោរពួកគេធ្ងន់ៗទៅវិញ។
ពលករខ្មែររូបនោះបញ្ជាក់ថា អ្វីដែលពួកគេចង់បាន គឺមិនលើសពីលក្ខខណ្ឌដែលខាងសមាគមបានសន្យាក្នុងកិច្ចព្រមព្រៀងជាមួយពួកគេនោះទេ គឺការគោរពសិទ្ធិការងារ ទទួលបានម៉ោងធ្វើការតាមកិច្ចព្រមព្រៀងដូចការកំណត់ប៉ុណ្ណោះ ព្រោះថាគ្មាននរណាម្នាក់ដែលមានម៉ោងធ្វើការច្រើនទទួលបានប្រាក់ខែខ្ពស់ និងមានកន្លែងធ្វើការល្អហើយ បែរជាមកធ្វើជាចោរនោះទេ។
ប្រភពដដែលបញ្ជាក់ថា ពួកគេគ្មានបំណងមកធ្វើការងារខុសច្បាប់ ឬមកធ្វើចោរនៅប្រទេសជប៉ុនឡើយ ប៉ុន្តែដោយសារការធ្វើបាបនៅកន្លែងធ្វើការ ការមិនជួយរកដំណោះស្រាយពីខាងសមាគមបញ្ជូនពលករ និងគ្មានការយកចិត្តទុកដាក់ពីមន្ត្រីស្ថានទូតកម្ពុជាប្រចាំប្រទេសជប៉ុន ទើបពួកគេធ្លាក់ខ្លួនទៅជាពលកររស់នៅខុសច្បាប់ និងប្រព្រឹត្តអំពើចោរកម្មដូច្នេះ ហើយការធ្វើបែបនេះ ក៏ដោយសារតែពួកគេគ្មានជម្រើសផ្សេងដែរ។
កាលពីថ្ងៃទី១៩ ខែសីហា ឆ្នាំ២០២៣ ស្ថានទូតកម្ពុជាប្រចាំនៅប្រទេសជប៉ុន បានអះអាងថា បច្ចុប្បន្ននេះមានកម្មសិក្សាការី និងពលករជំនាញខ្មែរកំពុងធ្វើការក្នុងប្រទេសជប៉ុនតាមរយៈក្រុមហ៊ុន មិនបានជួបវិបត្តិអត់ការងារធ្វើនោះទេ លើកលែងតែបុគ្គលមកធ្វើការខុសច្បាប់តាមទិដ្ឋាការទេសចរណ៍ប៉ុណ្ណោះ ប៉ុន្តែក៏មានកម្មសិក្សាការីខ្មែរមួយចំនួនតូចបានរត់ចេញពីកន្លែងការងារទៅធ្វើការខុសច្បាប់ដែរ ក្រោមការអូសទាញរបស់មេខ្យល់ ខណៈស្ថានទូតតែងតែទប់ស្កាត់ចំពោះបញ្ហានេះផងដែរ។
មន្ត្រីគ្រប់គ្រងខាងផ្នែកសិទ្ធិការងាររបស់អង្គការសង់ត្រាល់ (CENTRAL) លោក ឃុន ថារ៉ូ ធ្លាប់បានលើកឡើងថា លក្ខខណ្ឌការងាររបស់ប្រទេសជប៉ុន ពលករខ្មែរដែលទៅបម្រើការនៅទីនោះ គឺក្នុងនាមជាសិក្ខាកាមប៉ុណ្ណោះ មិនមែនក្នុងនាមជាពលករទេ ប៉ុន្តែការពិត ពលករខ្មែរទាំងនោះមិនមែនជាសិក្ខាកាមហាត់ការដូចក្នុងលក្ខខណ្ឌនោះឡើយ គឺពួកគេបានធ្វើការជាពលករសុទ្ធសាធ។
លោក ឃុន ថារ៉ូ អះអាងថា ពលករខ្មែរដែលទៅបម្រើការនៅប្រទេសជប៉ុន ហើយត្រូវបានគេចាត់ទុកថាគ្រាន់តែជាសិក្ខាកាមហាត់ការដូចសព្វថ្ងៃនេះ គឺជាបញ្ហាធ្ងន់ធ្ងរបំផុតសម្រាប់ពួកគេដែលរដ្ឋាភិបាលកម្ពុជាត្រូវរកដំណោះស្រាយជាបន្ទាន់ ព្រោះថាក្រុមហ៊ុនងាយនឹងកេងប្រវ័ញ្ចលើកម្លាំងពលករទាំងនោះបានយ៉ាងងាយ ត្បិតពួកគេសំអាងថាពលករទាំងនោះមិនមែនជាកម្មករនោះទេ គ្រាន់តែជាសិក្ខាកាមហាត់ការតែប៉ុណ្ណោះ។ ជាងនេះទៀត សិក្ខាកាមទាំងនោះក៏មិនស្ថិតក្នុងច្បាប់ការងារណាមួយរបស់ពលករដែរ។
មន្ត្រីគ្រប់គ្រងខាងផ្នែកសិទ្ធិការងាររូបនេះបញ្ជាក់ថា ដើម្បីដោះស្រាយបញ្ហានេះ រដ្ឋាភិបាលកម្ពុជាត្រូវតែចុះអនុសារណៈយោគយល់ដើម្បីបញ្ជូនពលករខ្មែរទៅធ្វើការនៅប្រទេសជប៉ុនជាផ្លូវការ ក្រោមកិច្ចព្រមព្រៀងរវាងរដ្ឋាភិបាលកម្ពុជា និងរដ្ឋាភិបាលជប៉ុន ដើម្បីធានាឱ្យពលករខ្មែរទទួលបានការការពារសិទ្ធិការងារពេញលេញពីរដ្ឋាភិបាលជប៉ុន និងដើម្បីចៀសវាងការធ្វើបាបពីក្រុមហ៊ុនដែលពួកគេបម្រើការឱ្យផងដែរ៕