អ្នកឃ្លាំមើល និងអ្នកប្រើប្រាស់បណ្ដាញសង្គម ទាមទារឲ្យរដ្ឋាភិបាលលោក ហ៊ុន ម៉ាណែត លុបចោលឧត្ដមក្រុមប្រឹក្សាពិគ្រោះយោបល់ ដោយថាការបង្កើតឧត្ដមក្រុមប្រឹក្សានេះជាការចាយថវិកាជាតិអត់ប្រយោជន៍។
អំឡុងពេលបើកកិច្ចប្រជុំដំបូងនៃគណៈរដ្ឋមន្ត្រីថ្មីកាលពីថ្ងៃទី២៤ ខែសីហា ឆ្នាំ២០២៣ លោក ហ៊ុន ម៉ាណែត នាយករដ្ឋមន្ត្រីអាណត្តិទី៧ បានបញ្ជាទៅរដ្ឋមន្ត្រីក្រសួងយុត្តិធម៌លោក កើត រិទ្ធ និងលោក អូន ព័ន្ធមុនីរ័ត្ន ដែលជាឧបនាយករដ្ឋមន្ត្រី ស្នើព្រះរាជក្រឹត្យរៀបចំឧត្ដមក្រុមប្រឹក្សាពិគ្រោះ និងផ្តល់យោបល់អាណត្តិថ្មី ដោយនឹងពង្រីកសមាសភាពចូលរួមឲ្យច្រើនជាងមុន។
ជុំវិញរឿងបក្សនយោបាយមួយចំនួន ក្នុងនោះមានគណបក្សប្រជាធិបតេយ្យមូលដ្ឋាន នៅមិនទាន់សម្រេចថានឹងចូលរួមឧត្ដមក្រុមប្រឹក្សាពិគ្រោះ និងផ្តល់យោបល់អាណត្តិថ្មីនៅឡើយ។
អ្នកនាំពាក្យបក្សប្រជាធិបតេយ្យមូលដ្ឋាន លោក សេក សុខា បានប្រាប់សារព័ត៌មានក្នុងស្រុកថា ការមិនសម្រេចនេះ ដោយខ្លួនកំពុងរង់ចាំសេចក្ដីសម្រេចជាផ្លូវការ ឬលក្ខខណ្ឌរបស់រដ្ឋាភិបាល ដើម្បីត្រៀមពិភាក្សាផ្ទៃក្នុងតាមបក្សនីមួយៗ មុននឹងសម្រេចថាចូល ឬមិនចូលក្នុងឧត្ដមក្រុមប្រឹក្សាពិគ្រោះ និងផ្តល់យោបល់អាណត្តិថ្មី ខណៈកាលពីអាណត្តិមុន បក្សនេះមិនចូលរួមជាមួយឧត្ដមក្រុមប្រឹក្សាពិគ្រោះ និងផ្តល់យោបល់។
តែយ៉ាងណា អ្នកប្រើប្រាស់បណ្ដាញសង្គមឈ្មោះ La Hour HD បានសរសេរលើហ្វេសប៊ុកថា ឧត្ដមក្រុមប្រឹក្សាពិគ្រោះយោបល់ មិនគួរបង្កើតទៀតនោះទេ ព្រោះវាជាការចាយថវិកាជាតិអត់ប្រយោជន៍។ មួយវិញទៀត កម្ពុជាក៏មានមន្ត្រីគ្រប់គ្រាន់ធ្វើការហើយ ដោយមិនចាំបាច់អីមានឧត្ដមក្រុមប្រឹក្សាពិគ្រោះយោបល់ទៀតដែរ។
ចំណែកឈ្មោះ Sen Ang Uyfc ក៏បានសរសេរបញ្ចេញមតិដោយស្នើកុំឲ្យមានឧត្ដមក្រុមប្រឹក្សាពិគ្រោះយោបល់ទៀត ព្រោះធ្វើឲ្យខាតតែលុយរដ្ឋប៉ុណ្ណោះ។
អនុប្រធានវេទិកាពលរដ្ឋ លោក ម៉ែន ណាត យល់ថា ឧត្ដមក្រុមប្រឹក្សាពិគ្រោះ និងផ្តល់យោបល់នេះបង្កើតឡើងមកមិនបានជួយដល់ផលប្រយោជន៍ជាតិអ្វីសោះឡើយ ផ្ទុយមកវិញ មានតែចាយថវិកាខ្ជះខ្ជាយឥតប្រយោជន៍។ លោកថា ដូច្នេះបើជាលោក ហ៊ុន ម៉ាណែត គិតគូរផលប្រយោជន៍ជាតិបន្តិចបន្តួច គួរលុបចោលវិញ។
លោកផ្ដល់អនុសាសន៍ថា លោក ហ៊ុន ម៉ាណែត គួររៀនធ្វើការងារ និងបែងចែកអំពើអ្វីទៅជាការតម្កល់ផលប្រយោជន៍ជាតិជាធំ ដូចជារៀនធ្វើការងារតូចៗទៅ ជាដើម។
ឧត្ដមក្រុមប្រឹក្សាពិគ្រោះ និងផ្តល់យោបល់ ត្រូវបានបង្កើតឡើងនាអាណត្តិទី៦ កាលពីខែកញ្ញា ឆ្នាំ២០១៨ តាមការស្នើសុំរបស់លោក ហ៊ុន សែន។ ឧត្ដមក្រុមប្រឹក្សាពិគ្រោះ និងផ្តល់យោបល់មានតួនាទីផ្តល់យោបល់ជូនរាជរដ្ឋាភិបាល ដើម្បីលើកស្ទួយប្រសិទ្ធភាពការងារ ក្នុងការបម្រើប្រជាជន និងការអភិវឌ្ឍសង្គម។ សម្រាប់ប្រតិភូចូលក្នុងស្ថាប័ននេះ អាចមាន ៣រូបពីខាងគណបក្សនីមួយៗដោយអាចទទួលបានឋានៈស្មើទេសរដ្ឋមន្ត្រី រដ្ឋមន្ត្រី និងរដ្ឋលេខាធិការ។
ការបង្កើតនេះ ដើម្បីគេចវេះពីការរិះគន់ បន្ទាប់ពីបោះឆ្នោតជ្រើសតាំងតំណាងរាស្ត្រនៅឆ្នាំ២០១៨ ដោយគ្មានវត្តមានគណបក្សសង្គ្រោះជាតិចូលរួមប្រកួតប្រជែង។ អវត្តមានរបស់គណបក្សសង្គ្រោះជាតិនាពេលនោះ បន្ទាប់ពីលោក ហ៊ុន សែន បានបញ្ជាទៅតុលាការកំពូលឲ្យរំលាយគណបក្សសង្គ្រោះជាតិនៅមុនការបោះឆ្នោតឆ្នាំ២០១៨៕