ខណៈព្រះមហាក្សត្រប្រើអំណាចព្រះអង្គមានឡាយព្រះហស្តលេខាលើរាជក្រឹត្យតែងតាំងមន្ត្រីក្នុងរដ្ឋាភិបាលយ៉ាងមមាញឹក អ្នកសង្កេតការណ៍មើលឃើញថា ក្បាលម៉ាស៊ីនថ្មីនៃរាជរដ្ឋាភិបាលអាណត្តិទី៧ ដែលទើបចាប់ផ្តើម កំពុងតែរីកប៉ោងកាន់តែធំឡើងៗដែលមិនទាន់អាចកំណត់បាន ដោយសារតែការតែងតាំងទីប្រឹក្សា និងជំនួយការបានកើនឡើងដល់ជាង ១ពាន់នាក់។
ព្រះមហាក្សត្រខ្មែរ ព្រះបរមនាថ នរោត្តម សីហមុនី បានចេញព្រះរាជក្រឹត្យតែងតាំងទីប្រឹក្សាក្រសួងព័ត៌មានកាលពីថ្ងៃទី២៦ ខែសីហា ឆ្នាំ២០២៣ ដែលត្រូវបានផ្សព្វផ្សាយកាលពីថ្ងៃអង្គារ ទី២៩ សីហា មានចំនួន ៤១៥នាក់ ហើយនៅថ្ងៃដដែលនោះ ព្រះអង្គក៏បានចេញព្រះរាជក្រឹត្យផ្តល់ឋានៈជាទីប្រឹក្សា និងជំនួយការដល់ទីស្ដីការគណៈរដ្ឋមន្ត្រីចំនួន ៩៧នាក់ថែមទៀត។
លើសពីនេះ ព្រះអង្គក៏បានផ្តល់ឋានៈជាទីប្រឹក្សាដល់ក្រសួងវិទ្យាសាស្ត្របច្ចេកវិទ្យា ៥៩នាក់ និងតែងតាំងទីប្រឹក្សាដល់ក្រសួងមុខងារសាធារណៈ ១៥នាក់ ព្រមទាំងតែងតាំងទីប្រឹក្សាដល់នាយករងខុទ្ទកាល័យប្រធានរដ្ឋសភាចំនួន ៧នាក់ផងដែរ។
ក្រៅពីផ្តល់ឋានៈដល់ក្រសួងស្ថាប័នខាងលើ ព្រះអង្គក៏បានចេញព្រះរាជក្រឹត្យនៅថ្ងៃទី២៦ សីហា ដោយត្រាស់បង្គាប់ផ្តល់ឋានៈជាទីប្រឹក្សា និងជំនួយការដល់រដ្ឋលេខាធិការដ្ឋានអាកាសចរណ៍ស៊ីវិលចំនួន ៤២នាក់បន្ថែមទៀត។ ទន្ទឹមនឹងនេះ ទ្រង់ក៏បានត្រាស់បង្គាប់ផ្តល់ឋានៈជាទីប្រឹក្សាដល់ប្រធានរដ្ឋសភាជាតិចំនួន ៤៦នាក់ដែរ។
ខណៈទីប្រឹក្សារាជរដ្ឋាភិបាលក៏ត្រូវបានតែងតាំងកាលពីថ្ងៃទី២៦ សីហា ចំនួន ៣៦៣នាក់ និងទីប្រឹក្សា រួមទាំងជំនួយការនាយករដ្ឋមន្ត្រីផ្ទាល់ចំនួន ១៧៤នាក់ ក៏ត្រូវបានតែងតាំងកាលពីថ្ងៃទី២៤ សីហា កន្លងទៅនោះ ដូច្នេះចំនួនទីប្រឹក្សា និងជំនួយការដែលត្រូវបានតែងតាំងគិតត្រឹមថ្ងៃទី៣០ ខែសីហា នេះមានចំនួនជាង ១២០០នាក់ហើយ (១២១៨នាក់) ដែលគេមើលឃើញថាក្បាលរដ្ឋាភិបាលថ្មីនេះកំពុងរីកប៉ោងដូចមហារីកកាន់តែធំឡើងហួសកម្រិត។
ការផ្តល់ឋានៈជាទីប្រឹក្សា និងជំនួយការសម្រាប់រដ្ឋាភិបាលអាណត្តិទី៧ នេះ ត្រូវគេមើលឃើញកំពុងធ្វើឱ្យរដ្ឋាភិបាលថ្មីនេះក្បាលកាន់តែធំ ខ្លួនកាន់តែតូច ដែលជាមូលហេតុនាំទៅរកការបំផ្លាញថវិកាជាតិកាន់តែធ្ងន់ធ្ងរ។
តំណាងរាស្ត្រអតីតគណបក្សសង្គ្រោះជាតិលោក អ៊ុំ សំអាន បានសរសេរលើគណនីហ្វេសប៊ុករបស់លោកកាលពីថ្ងៃទី២៩ សីហា ថា ទីប្រឹក្សា និងជំនួយការ នឹងត្រូវតែងតាំងជាបន្តបន្ទាប់ទៀតតាមក្រសួង និងស្ថាប័ននីមួយៗ ហើយរដ្ឋាភិបាលក្បាលធំអាណត្តិថ្មីនេះ នឹងរកយុទ្ធសាស្ត្រប្រមូលលុយពីប្រជាពលរដ្ឋ ដូចជាការដំឡើងពន្ធបន្ថែមទៀត ជាដើម ដើម្បីបង្គ្រប់ការចំណាយលើប្រាក់បៀវត្សនៃចំនួនសមាជិករដ្ឋាភិបាលដ៏ច្រើនលើសលប់នេះ។
ចំណែកអ្នកប្រឹក្សាយោបល់ផ្នែកអភិវឌ្ឍផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី៣០ សីហា នេះថា ការតែងតាំងទីប្រឹក្សាសម្រាប់មន្ត្រីរដ្ឋាភិបាល គឺគ្មានបញ្ហាទេ បើទីប្រឹក្សាទាំងនោះមានចំណេះដឹងសមស្របនឹងក្រសួងដែលពួកគេត្រូវបានតែងតាំងនោះ ប៉ុន្តែជាក់ស្តែង មានទីប្រឹក្សាខ្លះត្រូវបានតែងតាំងដោយគ្មានកន្លែងធ្វើការ រួមទាំងសមត្ថភាពរបស់ពួកគេក៏មិនអាចបម្រើការងារក្នុងក្រសួង ឬស្ថាប័ននោះបានទៅវិញ ដែលបញ្ហានេះជាសញ្ញាមួយនៃការប្រើថវិកាជាតិខុសគោលដៅយ៉ាងធ្ងន់ធ្ងរ។
លោក សេក សុជាតិ លើកឡើងថា ថវិកាដែលប្រជាពលរដ្ឋបង់ពន្ធ នឹងត្រូវបែងចែកគ្មានសល់ ដូចជាសងបំណុលបរទេស និងផ្តល់ប្រាក់បៀវត្សដល់មន្ត្រីរដ្ឋាភិបាលដែលមិនចាំបាច់ ជាដើម ខណៈការកសាងសេដ្ឋកិច្ច និងការអភិវឌ្ឍប្រទេសជាតិ នៅតែត្រូវការខ្ចីបំណុលពីបរទេសមកប្រើការដដែល ដែលជាហេតុធ្វើឱ្យប្រទេសកម្ពុជាខ្វះខាតចំណូលសម្រាប់ផែនការចំណាយរបស់ខ្លួនទៅថ្ងៃមុខបន្តទៀត ខណៈបំណុលបរទេសនៅតែបន្តជំពាក់គេដដែល។
ការតែងតាំងជំនួយការ និងទីប្រឹក្សាតាមក្រសួងស្ថាប័ន និងសម្រាប់មន្ត្រីជាន់ខ្ពស់រដ្ឋាភិបាល ទើបតែត្រូវបានធ្វើឡើងបានមួយចំនួនតូចប៉ុណ្ណោះ ខណៈទីប្រឹក្សា និងជំនួយការរបស់ឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី និងទីប្រឹក្សា ជំនួយការអមក្រសួងស្ថាប័នទាំង ៣០ នឹងត្រូវតែងតាំងបន្តទៀត ដែលគេរំពឹងថាសរុបសមាជិកក្បាលម៉ាស៊ីនដឹកនាំរដ្ឋាភិបាលថ្មីនេះនឹងមានចំនួនមិនតិចជាង ១ម៉ឺននាក់នោះទេ។
ចាប់តាំងពីថ្ងៃប្រកាសតែងតាំងសមាសភាពរដ្ឋាភិបាលថ្មី កាលពីថ្ងៃទី២២ សីហា មក ព្រះមហាក្សត្របានចេញព្រះរាជក្រឹត្យតែងតាំងសមាសភាពរដ្ឋាភិបាលថ្មីនេះជាបន្តបន្ទាប់ ក្នុងនោះរួមមាននាយករដ្ឋមន្ត្រី ១នាក់ ឧបនាយករដ្ឋមន្ត្រី ១០នាក់ ទេសរដ្ឋមន្ត្រី ២១នាក់ និងរដ្ឋមន្ត្រី ៣០នាក់ផងដែរ។
ក្រៅពីនេះទៀត ក៏មានការតែងតាំងមន្ត្រីខុទ្ទកាល័យចំនួន ២៤នាក់ ក្រុមអ្នកពិធីការនាយករដ្ឋមន្ត្រីចំនួន ៥នាក់ ប្រតិភូអមនាយករដ្ឋមន្ត្រីចំនួន ២៩នាក់ រដ្ឋលេខាធិការ និងអនុរដ្ឋលេខាធិការតាមក្រសួងស្ថាប័នជាង ១ពាន់នាក់ថែមទៀត (១៤២៦នាក់) ដែលជាតួលេខមួយបង្ហាញថា សមាជិករដ្ឋាភិបាលកម្ពុជាថ្មីនេះមានទំហំធំហួសហេតុ បើប្រៀបធៀនឹងប្រទេសជិតខាងដែលមានប្រជាជនលើកម្ពុជា ៣ ទៅ ៤ដង ប៉ុន្តែសមាជិករដ្ឋាភិបាលរបស់ពួកគេមានចំនួនតិចជាងរដ្ឋាភិបាលខ្មែរ ២ ទៅ ៣ដង ដូចជាប្រទេសវៀតណាម និងប្រទេសអូស្ត្រាលី ជាដើម។
ពលរដ្ឋខ្មែរខ្លះសួរដោយចម្ងល់ថា ប្រទេសតូច ពលរដ្ឋតិច សេដ្ឋកិច្ចមិនជឿនលឿន ហើយបើកន្លែងនីមួយៗមានទីប្រឹក្សា ជំនួយការច្រើនម្ល៉ឹងៗ តើមកពីក្រសួងគ្មានសមត្ថភាពធ្វើការ ឬដូចម្តេច?៕