ប្រធានាធិបតីសហរដ្ឋអាមេរិក លោក ចូ បៃដិន នឹងធ្វើទស្សនកិច្ចទៅកាន់ប្រទេសវៀតណាម ក្នុងខែកញ្ញា ខាងមុខនេះ ដើម្បីជួបពិភាក្សាជាមួយមន្ត្រីកំពូលៗវៀតណាម ដែលគេមើលឃើញថាក្រុងវ៉ាស៊ីនតោន កាន់តែឈោងដៃចាប់កាន់តែជ្រៅជាមួយប្រទេសមួយមានព្រំដែនជាប់ចិន។
តាមការចុះផ្សាយរបស់ទីភ្នាក់ងារសារព័ត៌មាន AFP ទស្សនកិច្ចរបស់លោក បៃដិន នៅវៀតណាម ផ្ដោតលើប្រធានបទសំខាន់ៗ រួមមានបច្ចេកវិទ្យា និងសេដ្ឋកិច្ច ស្ថិរភាពតំបន់ និងបញ្ហាបម្រែបម្រួលអាកាសធាតុ។
ប៉ុន្តែអ្នកសង្កេតការណ៍មើលឃើញថា លោក បៃដិន ដែលសម្រេចទៅជួបមេដឹកនាំកំពូលៗវៀតណាម នៅក្រុងហាណូយ ចំពេលដែលទីក្រុងវ៉ាស៊ីនតោន កំពុងស្វះស្វែងបង្កើនទំនាក់ទំនងកាន់តែជិតស្និទ្ធថែមទៀតជាមួយប្រទេសធំមួយក្នុងតំបន់អាស៊ីអាគ្នេយ៍ សំដៅពង្រឹងប្រទេសនេះទប់ទល់នឹងឥទ្ធិពលចិន។
តាមសេចក្ដីប្រកាសព័ត៌មានពីសេតវិមាន លោក បៃដិន នឹងជួបជាមួយអគ្គលេខាធិការគណបក្សកុម្មុយនីស្តវៀតណាម លោក Nguyen Phu Trong និងមេដឹកនាំជាន់ខ្ពស់វៀតណាមដទៃទៀតនៅរដ្ឋធានីហាណូយ នៅថ្ងៃទី១០ ខែកញ្ញា ខាងមុខនេះ មុនពេលលោកបន្តដំណើរទៅកាន់រដ្ឋ Alaska សហរដ្ឋអាមេរិក ដើម្បីចូលរួមទិវារំឭកខួបការវាយប្រហារភេរវកម្មនៅថ្ងៃទី១១ ខែកញ្ញា ឆ្នាំ២០០១ ទៅលើអគារភ្លោះក្នុងក្រុងញ៉ីវយ៉ក។
ទីក្រុងវ៉ាស៊ីនតោន ត្រូវគេមើលឃើញថាមានបំណងកាន់តែខ្លាំងក្នុងការបង្កើនទំនាក់ទំនងជាមួយរដ្ឋាភិបាលក្រុងហាណូយ ដោយចាត់ទុកប្រទេសនេះថាជាដៃគូដ៏សំខាន់នៅក្នុងតំបន់ ចំពេលដែលទំនាក់ទំនងរវាងសហរដ្ឋអាមេរិក និងប្រទេសចិន កំពុងមានភាពល្អក់កករកាន់តែខ្លាំង។ ទន្ទឹមនឹងនេះដែរ ប្រទេសវៀតណាម ក៏កំពុងប្រឈមមុខនឹងប្រទេសចិនក្បែរខាងរបស់ខ្លួន ដែលចិនកាន់តែបង្ហាញសកម្មភាពគឃ្លើនរំលោភដែនទឹកវៀតណាម នៅសមុទ្រចិនខាងត្បូង។
សារព័ត៌មានបស្ចិមប្រទេស ដូចជា Yahoo News, Bloomberg News ជាដើម និយាយថា សេដ្ឋកិច្ចវៀតណាម បានធ្លាក់ចុះរយៈពេល ៦ខែចុងក្រោយជាប់ៗគ្នា ព្រោះតែទំនិញនាំចេញធ្លាក់ចុះបរិមាណដោយសារសេដ្ឋកិច្ចចិនមានឱនភាព។
ក្នុងពេលស្ថិតក្នុងរដ្ឋធានីហាណូយ លោក បៃដិន និងមន្ត្រីវៀតណាម នឹងពិភាក្សាគ្នាអំពីការពង្រឹងចំណងទាក់ទងរវាងប្រទេសទាំងពីរ ក៏ដូចជាការជំរុញនូវកិច្ចសហប្រតិបត្តិការសេដ្ឋកិច្ចជាមួយវៀតណាម ដោយផ្អែកលើស្ថានភាពជាក់ស្ដែងនៃស្ថិរភាពតំបន់។
ក្រសួងការបរទេសវៀតណាម បានប្រកាសថា ជំនួបកំពូលរបស់មេដឹកនាំវៀតណាម និងលោក បៃដិន នឹងនាំមកនូវការពង្រឹងទំនាក់ទំនងរវាងប្រទេសទាំងពីរកាន់តែស៊ីជម្រៅថែមទៀត។
លោក បៃដិន ត្រូវធ្វើដំណើរទៅដល់ប្រទេសវៀតណាម ក្រោយពីដំណើរទស្សនកិច្ចរបស់លោកនៅប្រទេសឥណ្ឌា ពីថ្ងៃទី៧ ដល់ថ្ងៃទី១០ ខែកញ្ញា ដើម្បីចូលរួមកិច្ចប្រជុំកំពូលនៃក្រុមប្រទេស G-20 ដែលមានសេដ្ឋកិច្ចរីកចម្រើន ត្រូវប្រជុំគ្នាលើទឹកដីអាស៊ីខាងត្បូងមួយនេះ។
ទោះបីជាយ៉ាងនេះក្តី បើតាមការចុះផ្សាយរបស់ទីភ្នាក់ងារសារព័ត៌មាន Reuters លោក បៃដិន នឹងមិនចូលរួមកិច្ចប្រជុំអាស៊ាននៅដើមខែកញ្ញា នោះទេ។ លោក បៃដិន បានចាត់តាំងឱ្យអនុប្រធានាធិបតីរបស់លោក គឺអ្នកស្រី Kamala Harris ចូលរួមប្រជុំជំនួសវិញ។ ជំនួបមេដឹកនាំអាស៊ាននៅឆ្នាំនេះជាមួយសហរដ្ឋអាមេរិក មានអ្នកស្រី Kamala Harris ជាតំណាង។ ចំណែកឯប្រទេសកម្ពុជា ជាសមាជិកអាស៊ានមួយដែរ នឹងតំណាងដោយលោក ហ៊ុន ម៉ាណែត កូនប្រុសរបស់លោក ហ៊ុន សែន ដែលទើបតែងតាំងជានាយករដ្ឋមន្ត្រីជំនួសឪពុករបស់ខ្លួន ត្រូវគេរំពឹងថានឹងមានវត្តមានក្នុងជំនួបអាស៊ាន-អាមេរិក។
ទោះជាយ៉ាងណាក៏ដោយ វត្តមានរបស់លោក ចូ បៃដិន មេដឹកនាំសហរដ្ឋអាមេរិកនៅប្រទេសវៀតណាម ជាប្រទេសមួយជាប់នឹងកម្ពុជា បែរមិនមកកម្ពុជា គឺជារឿងមិនចម្លែកអ្វីទេ ដែលគេថាមេដឹកនាំក្រុងវ៉ាស៊ីនតោន ច្រើនតែមើលរំលងប្រទេសកម្ពុជា ហើយហួសទៅប្រទេសវៀតណាម ហ្វីលីពីន សិង្ហបុរី ឬឥណ្ឌូនេស៊ី។
កាលពីថ្ងៃទី២៧ ខែកក្កដា សារព័ត៌មាន Asia Times បានចុះផ្សាយសេចក្តីរាយការណ៍ស៊ើបអង្កេតរបស់ខ្លួនពាក់ព័ន្ធនឹងមូលដ្ឋានទ័ពជើងទឹកនៅសមុទ្ររាមក្នុងដែនដីខ្មែរ ដែលអាចក្លាយជាមូលដ្ឋានទ័ពចិន ដែលថាការស្ថាបនាប៉មទឹកជ្រៅសម្រាប់នាវាផ្ទុកយន្តហោះចិន សង្ស័យថាត្រូវបានស្ថាបនារួចរាល់ហើយ។
យោងតាមការបញ្ចេញរូបភាពដោយផ្កាយរណប ហើយចាប់បានដោយក្រុមហ៊ុនផ្កាយរណបអាមេរិក BlackSky បានបង្ហាញពីរូបភាពមូលដ្ឋានទ័ពជើងទឹករាម និងប៉មរបស់វាក៏ស្ថាបនាជិតរួចហើយដែរ។ វាជាទម្រង់ដូចប៉មមូលដ្ឋានទ័ពជើងទឹកចិននៅប្រទេស Djibouti ក្នុងទ្វីបអាហ្វ្រិក។ ប្រទេសកម្ពុជា ជាប្រទេសទី១ នៅអាស៊ី ដែលត្រូវគេសង្ស័យថានឹងផ្ដល់ឱ្យចិនមានមូលដ្ឋានទ័ពជើងទឹក។
តាមកាសែតជប៉ុន Nikkei Asia គេមើលឃើញចិនអាចគំរាមដល់ប្រទេសក្នុងតំបន់អាស៊ាន មានទាំងប្រទេសវៀតណាម ផងដែរ បើចិនមានទ័ពរបស់ខ្លួននៅលើទឹកដីខ្មែរ ព្រោះជាមធ្យោបាយមួយដែលចិនពង្រីកអានុភាពយោធាក្នុងតំបន់ ខណៈជម្លោះដែនទឹកនៅសមុទ្រចិនខាងត្បូងកំពុងតែឡើងកំដៅ។
ទោះជាយ៉ាងណាក្តី រាជរដ្ឋាភិបាលកម្ពុជាបានច្រានចោលនូវការសង្ស័យរបស់សហរដ្ឋអាមេរិក ដោយប្រកាសធានាថា មូលដ្ឋានទ័ពឆ្នេររាមមិនមែនស្ថាបនាឡើងដើម្បីតែកងនាវាចរណ៍ចិននោះទេ គឺនាវាមកពីប្រទេសណាក៏ប្រទេសកម្ពុជាស្វាគមន៍ដែរ៕