ប្រធានាធិបតីសហរដ្ឋអាមេរិកលោក ចូ បៃដិន បានប្រាប់សមភាគីអ៊ុយក្រែន លោក វូឡូឌីមៀរ ហ្សេឡេនស្គី ថា ទីក្រុងវ៉ាស៊ីនតោនត្រូវប្រញាប់បញ្ជូនជំនួយយោធាថ្មីៗដើម្បីជួយទីក្រុងគៀវ នៅក្នុងការប្រយុទ្ធតស៊ូប្រឆាំងនឹងការឈ្លានពានរបស់រុស្ស៊ី។
លោកថា ជំនួយសព្វាវុធរបស់សហរដ្ឋអាមេរិក នឹងទៅដល់ប្រទេសអ៊ុយក្រែន ឆាប់ៗនេះហើយ។
នៅក្នុងកិច្ចសន្ទនាតាមទូរសព្ទមួយកាលពីថ្ងៃចន្ទ ទី២២ ខែមេសា ដែលត្រូវបានដកស្រង់ចេញផ្សាយដោយទីភ្នាក់ងារសារព័ត៌មាន AFP លោក បៃដិន ក៏បានបញ្ជាក់ឡើងវិញផងដែរពីការប្ដេជ្ញាចិត្តរបស់សហរដ្ឋអាមេរិកចំពោះអ៊ុយក្រែន ខណៈទីក្រុងគៀវ កំពុងការពារសេរីភាពរបស់ខ្លួនប្រឆាំងនឹងការឈ្លានពានពីរុស្ស៊ី។
បើតាមលោក បៃដិន សហរដ្ឋអាមេរិកនឹងប្រញាប់បញ្ជូនជំនួយយោធាថ្មីទៅឱ្យអ៊ុយក្រែន ឱ្យបានឆាប់តាមដែលអាចធ្វើទៅបាន ដើម្បីបំពេញតម្រូវការចាំបាច់នៅលើសមរភូមិ និងការការពារដែនអាកាស។
រដ្ឋសភាអាមេរិកកាលពីសប្ដាហ៍មុន បានបោះឆ្នោតអនុម័តលើសេចក្ដីព្រាងច្បាប់មួយស្ដីពីកញ្ចប់ជំនួយយោធាទំហំជិត ៦១ពាន់លានដុល្លារសម្រាប់អ៊ុយក្រែន បន្ទាប់ពីជាប់គាំងអស់រយៈពេលជាច្រើនខែមកនេះ។
សេចក្ដីព្រាងច្បាប់នេះ បានធ្លាក់ក្នុងដៃព្រឹទ្ធសភាហើយ ហើយនៅថ្ងៃទី២៣ ខែមេសា នេះ ព្រឹទ្ធសភានឹងបោះឆ្នោតអនុម័ត មុននឹងបញ្ជូនទៅលោក ចូ បៃដិន ចុះហត្ថលេខាឱ្យក្លាយទៅជាច្បាប់។
នៅក្នុងកិច្ចសន្ទនាតាមទូរសព្ទ លោក ហ្សេឡេនស្គី បានអរគុណដល់លោក បៃដិន ចំពោះការគាំទ្រឥតងាករេដល់ប្រជាជនអ៊ុយក្រែន ហើយក៏បានទទួលស្គាល់ដែរថា លោក បៃដិន បានប្រាប់រូបលោកផ្ទាល់ថាសហរដ្ឋអាមេរិកនឹងប្រញាប់បញ្ជូនជំនួយយោធានេះភ្លាមៗក្រោយពីព្រឹទ្ធសភាអនុម័តនៅថ្ងៃនេះ។
ជាមួយគ្នានេះ លោក ហ្សេឡេនស្គី ក៏បានឱ្យដឹងផងដែរថា ប្រទេសរបស់លោក និងសហរដ្ឋអាមេរិក បានឈានដល់ការព្រមព្រៀងនឹងគ្នាហើយក្នុងការជួយផលិតអាវុធ ដើម្បីឱ្យអ៊ុយក្រែន មានលទ្ធភាពទិញអាវុធរបស់ក្រុមហ៊ុនផលិតអាវុធរបស់សហរដ្ឋអាមេរិក។
តាមប្រធានាធិបតីអ៊ុយក្រែន រូបនេះ កិច្ចព្រមព្រៀងនេះក៏មានបញ្ជាក់ពីការបញ្ជូនគ្រាប់មីស៊ីលរយៈចម្ងាយឆ្ងាយ ATACMS សម្រាប់ជួយអ៊ុយក្រែន ប្រយុទ្ធវាយបកចំពោះការឈ្លានពានរបស់រុស្ស៊ី។
នៅក្នុងការថ្លែងមួយតាមវីដេអូកាលពីថ្ងៃចន្ទ ដែលជាសេចក្ដីថ្លែងការណ៍ប្រចាំថ្ងៃ លោក ហ្សេឡេនស្គី ជឿជាក់ថា ជំនួយយោធារបស់សហរដ្ឋអាមេរិក និងជំនួយរបស់ប្រទេសសម្ព័ន្ធមិត្ត អាចនឹងធ្វើឱ្យអ៊ុយក្រែន គ្រប់គ្រងបានការវាយលុករបស់កងទ័ពរុស្ស៊ី ហើយអាចនឹងរុញទ័ពរុស្ស៊ី ចេញពីទឹកដីអ៊ុយក្រែន ទៀតផង។
កញ្ចប់ថវិកាជំនួយដែលសភាអាមេរិកយល់ព្រមអនុម័តកាលពីថ្ងៃទី២០ ខែមេសា មានទំហំសរុបរហូតដល់ ៩៥ពាន់លានដុល្លារ។ ក្នុងចំណោមថវិកាជំនួយ ៩៥ពាន់លានដុល្លារនោះ ៦០ពាន់ ៨៤០លានដុល្លារ នឹងត្រូវផ្ដោតទៅលើវិបត្តិសង្គ្រាមនៅអ៊ុយក្រែន ជាចម្បង ក្នុងនោះ ២៣ពាន់លានដុល្លារសម្រាប់បំពេញអាវុធរបស់យោធាអាមេរិកឡើងវិញ។ ថវិកា ២៦ពាន់លានដុល្លារសម្រាប់វិបត្តិសង្គ្រាមអ៊ីស្រាអែល និងក្រុមហាម៉ាស ក្នុងនោះ ៩ពាន់ ១០០លានដុល្លារសម្រាប់តម្រូវការផ្នែកមនុស្សធម៌ និង ៨ពាន់ ១២០លានដុល្លារសម្រាប់តំបន់ឥណ្ឌូ-ប៉ាស៊ីហ្វិក ក្នុងនោះរួមមានទាំងសម្រាប់កោះតៃវ៉ាន់។
សហរដ្ឋអាមេរិក គឺជាអ្នកផ្ដល់សព្វាវុធដ៏ធំបំផុតសម្រាប់ប្រទេសអ៊ុយក្រែន នៅក្នុងសង្គ្រាមប្រឆាំងការឈ្លានពានរបស់រុស្ស៊ី ដែលបានផ្ទុះឡើងចាប់តាំងតែពីខែកុម្ភៈ ឆ្នាំ២០២២ មក។ ជាមួយគ្នានេះ នាយករដ្ឋមន្ត្រីអង់គ្លេស Rishi Sunak បានប្រកាសកញ្ចប់ជំនួយយោធា ៦២០លានដុល្លារដែលជាជំនួយបន្ទាន់សម្រាប់ជួយប្រទេសអ៊ុយក្រែន។
នាយករដ្ឋមន្ត្រីអង់គ្លេស បានបញ្ជាក់ដូចនេះនៅចំពោះមុខនាយករដ្ឋមន្ត្រីប៉ូឡូញ ដែលលោកទៅប្រទេសប៉ូឡូញ ដើម្បីពិភាក្សាអំពីស្ថានភាពសង្គ្រាមនៅអ៊ុយក្រែន និងផែនការបន្តផ្ដល់ជំនួយយោធាទៅឱ្យអ៊ុយក្រែន។ នៅក្នុងទីក្រុងវ៉ាស៊ូវី លោក Rishi Sunak ក៏បានជួបអគ្គលេខាធិការយោធាណាតូ Jens Stoltenberg ផងដែរ។
ក្រោយចេញពីប្រទេសប៉ូឡូញ លោក Rishi Sunak ត្រូវទៅប្រទេសអាល្លឺម៉ង់ ហើយត្រូវជួបអធិការបតីអាល្លឺម៉ង់ Olaf Scholz នៅក្រុងប៊ែរឡាំង។
តាមការចុះផ្សាយរបស់សារព័ត៌មានអ៊ុយក្រែន INTERFAX UKRAINE ក្នុងជំនួយយោធារបស់ប្រទេសអង់គ្លេស លើកនេះ ក៏មានគ្រាប់មីស៊ីលរយៈចម្ងាយឆ្ងាយ និងមីស៊ីលបាញ់យន្តហោះមានចំនួន ១៦០០គ្រាប់។ គ្រាន់តែឮដំណឹងថា អង់គ្លេសសម្រេចបញ្ជូនជំនួយយោធាក្នុងទំហំ ៦២០លានដុល្លារ លោក ហ្សេឡេនស្គី បានថ្លែងអរគុណលោក Rishi Sunak និងប្រជាជនអង់គ្លេសជាខ្លាំង។ អង់គ្លេស ជាប្រទេសដ៏ធំមួយដែរក្នុងចំណោមប្រទេសលោកខាងលិច ដែលផ្ដល់ជំនួយទៅឱ្យអ៊ុយក្រែន។
តាមការចុះផ្សាយរបស់សារព័ត៌មានរុស្ស៊ី បានឱ្យដឹងថា រុស្ស៊ីកំពុងបង្កើនកម្លាំងទ័ពវាយលុកយ៉ាងខ្លាំងវាយលើទ័ពអ៊ុយក្រែន ដោយបាញ់កាំភ្លើងធំមួយថ្ងៃដល់ទៅជាង ៣ម៉ឺនគ្រាប់ និងបាញ់មីស៊ីលរាប់សិបគ្រាប់សឹងរាល់ថ្ងៃ ដែលធ្វើឱ្យអ៊ុយក្រែន រងគ្រោះកាន់តែធ្ងន់ធ្ងរ។
អ្នកនាំពាក្យសម្រាប់វិមានក្រឹមឡាំង ឌីមីទ្រី ប៉េសកូវ ព្រមានថា ទោះជាពួកបស្ចិមប្រទេស រួមនឹងសហរដ្ឋអាមេរិកបន្ថែមសព្វាវុធយ៉ាងណា វានឹងមិនធ្វើឱ្យរុស្ស៊ី ចុះខ្សោយការប្រយុទ្ធនោះទេ តែផ្ទុយទៅវិញ នឹងធ្វើឱ្យអ៊ុយក្រែន កាន់តែខ្លោចផ្សា និងរងវិនាសកម្មធ្ងន់ធ្ងរថែមទៀត៕