នាយករដ្ឋមន្ត្រីថ្មីដែលមហាជនចាត់ទុកថាឡើងកាន់អំណាចតាមបែបតពូជរបស់កម្ពុជា គឺលោកហ៊ុន ម៉ាណែត បានបញ្ជាឱ្យមន្ត្រីតាមក្រសួងស្ថាប័នបែងចែកភារកិច្ចដល់រដ្ឋលេខាធិការ និងអនុរដ្ឋលេខាធិការដែលទើបតែត្រូវបានតែងតាំង ឲ្យរួចរាល់នៅសប្តាហ៍ក្រោយ ដើម្បីអនុវត្តការងារឱ្យមានប្រសិទ្ធភាព។
លោក ហ៊ុន ម៉ាណែត បានចេញខ្សែអាត់សំឡេងកាលពីថ្ងៃទី៣ ខែកញ្ញា ឆ្នាំ២០២៣ នេះ ដោយបញ្ជាឲ្យក្រសួង និងរដ្ឋលេខាធិការដ្ឋានទាំងអស់បែងចែកការងារឱ្យបានឆាប់ទៅដល់រដ្ឋលេខាធិការ និងអនុរដ្ឋលេខាធិការ ដើម្បីធានានិរន្តរភាព និងប្រសិទ្ធភាពការងារលើការដឹកនាំ និងការអនុវត្តការងាររបស់ក្រសួងស្ថាប័ននានា។
លោក ហ៊ុន ម៉ាណែត លើកឡើងថា ក្នុងការកំណត់ការបែងចែកភារកិច្ចត្រូវតែបែងចែកឱ្យបានច្បាស់លាស់រវាងការដឹកនាំខាងនយោបាយ និងការដឹកនាំខាងបច្ចេកទេស ដើម្បីធានាប្រសិទ្ធភាពស្ថាប័ន និងប្រសិទ្ធភាពការងារ ដោយចៀសវាងការលូកដៃក្នុងការដឹកនាំផ្ទាល់លើការងាររបស់អង្គភាពជំនាញនៃក្រសួងស្ថាប័ន ដោយមិនឆ្លង ឬរំលងឋានានុក្រមបច្ចេកទេស។
ជាងនេះទៀត ប្រសិនបើមានការរៀបចំប្រគល់ភារកិច្ចឱ្យមន្ត្រីខាងនយោបាយទទួលបន្ទុកការងារ ដើម្បីជួយការងារនាយកដ្ឋាន គឺដាច់ខាតមិនត្រូវឱ្យមានការរំលងឋានានុក្រមនៃការដឹកនាំផ្នែកបច្ចេកទេស ដូចជាការរំលង ឬមិនឆ្លងអគ្គនាយកដ្ឋាន ឬអគ្គលេខាធិការដ្ឋាននោះឡើយ ព្រោះថាការធ្វើបែបនេះ គឺដើម្បីធានានូវសាមគ្គីភាព និងឯកភាពនៅក្នុងស្ថាប័នរដ្ឋបាលសាធារណៈទាំងនោះ។
លោក ហ៊ុន ម៉ាណែត បញ្ជាក់ថា បញ្ហាចំពោះមុខត្រូវតែខិតខំធានាឱ្យបាននូវនិរន្តរភាព និងស្ថិរភាពនៃការអនុវត្តការងារនៅក្នុងស្ថាប័ន។ លើសពីនេះ ក្នុងករណីចាំបាច់ដែលត្រូវរៀបចំមន្ត្រីឡើងវិញ ត្រូវតែគិតគូរលើគោលការណ៍ជាមូលដ្ឋាន ដូចជាគុណសម្បត្តិ ស្នាដៃការងារ សមត្ថភាព ចំណេះដឹង ទេពកោសល្យ ក្រមសីលធម៌ និងគុណធម៌ ជាដើម។
ក្រោយពីប្រកាសសមាសភាពរដ្ឋាភិបាលអាណត្តិថ្មីកាលពីថ្ងៃទី២២ ខែសីហា ឆ្នាំ២០២៣ព្រះមហាក្សត្របានចេញព្រះរាជក្រឹត្យតែងតាំងរដ្ឋលេខាធិការ និងអនុរដ្ឋលេខាធិការតាមក្រសួងស្ថាប័នទាំង ៣០ របស់កម្ពុជាសរុបជាង ១ពាន់នាក់ (១៤២៦នាក់) ដែលក្នុងនោះរដ្ឋលេខាធិការចំនួន ៧៣៧នាក់ និងអនុរដ្ឋលេខាធិការចំនួន ៦៨៩នាក់ផងដែរ។
រដ្ឋលេខាធិការ និងអនុរដ្ឋលេខាធិការដែលត្រូវបានតែងតាំងតាមក្រសួងទាំង ២៧ និងរដ្ឋលេខាធិការដ្ឋានចំនួន៣ មានតែក្រសួងមហាផ្ទៃប៉ុណ្ណោះដែលតែងតាំងច្រើនជាងគេ ដែលមានចំនួនរហូតទៅដល់ ១០៩នាក់ ខណៈទីស្ដីការគណៈរដ្ឋមន្ត្រីមានចំនួន ៩០នាក់ ក្រសួងការពារជាតិមានចំនួន ៨៧នាក់ ក្រសួងព័ត៌មាន ៧០នាក់ ចំណែកក្រសួងផ្សេងទៀតក៏បានតែងតាំងរដ្ឋលេខាធិការ និងអនុរដ្ឋលេខាធិការរាប់សិបនាក់ផងដែរ។
តំណាងរាស្ត្រអតីតគណបក្សសង្គ្រោះជាតិ លោក អ៊ុំ សំអាន ត្អូញត្អែរថា គួរឱ្យអាណិតប្រជារាស្ត្រខ្មែរដែលខំបង់ពន្ធឱ្យរដ្ឋដើម្បីកសាងជាតិ ប៉ុន្តែលុយបង់ពន្ធទាំងនោះត្រូវបែងចែកមួយចំណែកធំ គឺដើម្បីចិញ្ចឹមមន្ត្រីជាន់ខ្ពស់របស់រដ្ឋាភិបាលអាណត្តិថ្មីនេះ ដូចជារដ្ឋលេខាធិការ និងអនុរដ្ឋលេខាធិការ ដែលមានចំនួនជាង ១ពាន់នាក់នៅពេលនេះជាដើម ខណៈប្រសិទ្ធភាពការងារត្រូវគេមើលឃើញថាស្ថិតក្នុងភាពអវិជ្ជមានដូចរដ្ឋាភិបាលចាស់ដែលដឹកនាំដោយលោក ហ៊ុន សែន ដដែល។
ចំណែកសកម្មជនកិច្ចព្រមព្រៀងក្រុងប៉ារីសលោក ស្រ៊ុន ស្រ៊ន បានលើកឡើងថា រដ្ឋាភិបាលថ្មីរបស់កម្ពុជា នឹងទទួលថ្មបាក់យ៉ាងធ្ងន់ធ្ងរ ប្រសិនបើរដ្ឋាភិបាលថ្មីនេះមិនប្រើច្បាប់ដឹកនាំប្រទេស តែបែរជាតែងតាំងបក្សពួក គ្រួសារ សាច់ញាតិ ឱ្យទៅដឹកនាំក្រសួងស្ថាប័នដើម្បីគ្រប់គ្រងប្រព័ន្ធរដ្ឋបាលរបស់ប្រទេសនោះ។
លោកអះអាងថា ការតែងតាំងបក្ខពួកចូលទៅដឹកនាំក្នុងប្រព័ន្ធរដ្ឋាភិបាលរបស់ខ្លួនបែបនេះ នឹងធ្វើឱ្យបាត់បង់អព្យាក្រឹតភាពក្នុងនាមជាមន្ត្រីរាជការជាមិនខាន ដែលនឹងកើតមានជម្លោះផ្សេងៗរវាងមន្ត្រីរាជការ និងពលរដ្ឋចៀសមិនផុតឡើយ ដូចជាជម្លោះដីធ្លី អំពើពុករលួយ អំពើនិទ្ទណ្ឌភាព និងអំពើអយុត្តិធម៌សង្គមនានាជាដើម ហើយអំពើអវិជ្ជមានទាំងនេះនឹងរីករាលដាលពេញប្រទេសមិនអាចទប់ស្កាត់បានឡើយ៕