31 C
Phnom Penh

សកម្មជន​ទទូច​ទៅ​រដ្ឋមន្ត្រី​បរិស្ថាន​ថ្មី​ទប់ស្កាត់​បទល្មើស​ព្រៃឈើ​នៅ​ដែន​ជម្រក​សត្វព្រៃ​ព្រះរការ

ដោយ ឌឹ ខេមបូឌា ដេលី

បទវិភាគ

សកម្មជន​បរិស្ថាន ស្នើ​ឲ្យ​រដ្ឋមន្ត្រី​ថ្មី​ក្រសួង​បរិស្ថាន លោក អ៊ាង សុផល្លែត ចាត់​វិធានការ​ទប់ស្កាត់​បទល្មើស​ព្រៃឈើ​នៅ​ដែន​ជម្រក​សត្វ​ព្រះរការ ក្រោយពី​រក​ឃើញ​ថា ការ​កាប់​បំផ្លាញ​ឈើ​ក្នុង​តំបន់​ការពារ​មួយ​នេះ​នៅតែ​បន្ត​កើត​ឡើង។

នៅ​ក្នុង​វីដេអូ​ឃ្លីប​ជាង ៥​នាទី​ដែល​បាន​ចុះ​ល្បាត​កាលពី​ថ្ងៃទី​៣ ខែ​កញ្ញា ឆ្នាំ​២០២៣ សកម្មជន​ការពារ​សិទ្ធិមនុស្ស និង​បរិស្ថាន លោក សាន់ ម៉ាឡា រក​ឃើញ​ថា ជន​ខិលខូច​បាន​កាប់​រំលំ​ដើម​ស្ទៀង​ដែល​មាន​ទំហំ​មុខកាត់​កន្លះ​ម៉ែត្រ។ លោក​បន្ត​ថា ឈើ​ប្រភេទ​នេះ​ជា​ប្រភេទ​ឈើ​កម្រ និង​មាន​តម្លៃ​នៅ​ក្នុង​ដែន​ជម្រក​សត្វព្រៃ​ព្រះរការ ខណៈ​ឈើ​បេង និង​ក្រញូង ជាដើម មិន​មាន​នៅ​កម្ពុជា​ទៀត​នោះ​ទេ ដោយសារ​មាន​ការ​កាប់​បំផ្លាញ​ស្ទើរ​រៀង​រាល់​ថ្ងៃ។

លោក​សោកស្តាយ ប្រសិនបើ​សកម្មភាព​នៃ​ការ​កាប់​បំផ្លាញ​ព្រៃឈើ​ក្នុង​តំបន់​ការពារ​នៅតែ​បន្ត​កើត​មាន​ឡើង ទោះបីជា​ការ​កាប់​នេះ​ធ្វើឡើង​ម្ដង​មួយៗ​ក៏ដោយ វា​នឹង​ធ្វើ​ឲ្យ​ព្រៃឈើ​វិនាស​នា​ពេល​ខាងមុខ បើ​រដ្ឋមន្ត្រី​ថ្មី​ក្រសួង​បរិស្ថាន​មិន​មាន​វិធានការ​ទប់ស្កាត់​ទេ​នោះ​។

លើស​ពី​នេះ លោក​សង្កេត​ឃើញ​ថា ត្បិត​តែ​ដែន​ជម្រក​សត្វព្រៃ​មួយ​ចំនួន​ត្រូវ​បាន​ពង្រីក​ទំហំ​ឲ្យ​ធំ​ជាង​មុន​ក៏ដោយ ប៉ុន្តែ​ដែន​ជម្រក​ដែល​សម្បូរ​ធនធាន​ធម្មជាតិ​ទៀត ត្រូវ​បាន​កាត់​ចេញពី​តំបន់​ការពារ​ដើម្បី​ប្រគល់​ទៅ​ឲ្យ​វិស័យ​ឯកជន​ធ្វើការ​អភិវឌ្ឍ ដោយ​មិន​បាន​គិត​ពី​ផល​ប៉ះពាល់ និង​សំណើ​របស់​ពលរដ្ឋ។

សកម្មជន​បរិស្ថាន​រូប​នេះ​ចាត់ទុក​ការ​អភិវឌ្ឍ​ដោយ​បំផ្លាញ​ធនធាន​ធម្មជាតិ ថា​ជា​ការ​អភិវឌ្ឍ​មិន​មាន​ភាព​ឆ្លាតវៃ និង​ឆ្លុះបញ្ចាំង​ឲ្យ​ឃើញ​ថា រដ្ឋាភិបាល​កំពុងតែ​បែងចែក​សម្បត្តិ​ជាតិ​ទៅ​ចែក​គ្នា​ស៊ី ធ្វើ​មាន​បាន​ដោយ​ខ្លួនឯង ដោយ​មិន​គិត​ពី​ផល​ប្រយោជន៍​ប្រទេស​ជាតិ និង​ពលរដ្ឋ​ដែល​អាស្រ័យ​ផល​ពី​ធនធាន​ធម្មជាតិ​ផង​ដែរ។

សកម្មជន​ការពារ​សិទ្ធិមនុស្ស និង​បរិស្ថាន លោក សាន់ ម៉ាឡា ក្នុង​ពេល​លោក​ចុះ​ល្បាត​នៅ​តំបន់​ការពារ​ព្រៃព្រះរការ។

លោក សាន់ ម៉ាឡា សង្កេត​ឃើញ​ថា រដ្ឋាភិបាល​ដែល​ទើប​ឡើង​ថ្មី​បច្ចុប្បន្ន​នេះ​បាន​នាំគ្នា​អួត​ពី​សញ្ញាបត្រ និង​គោរមងារ​របស់​ខ្លួន ប៉ុន្តែ​ចំពោះ​ស្នាដៃ​ដោះស្រាយ​បញ្ហា​ជាតិ​ជាក់ស្ដែង​នោះ មិន​ទាន់​ឃើញ​មាន​នៅ​ឡើយ។

លោក​អំពាវនាវ​ទៅ​រដ្ឋមន្ត្រី​ថ្មី​នៃ​ក្រសួង​បរិស្ថាន ឲ្យ​ចាត់​វិធានការ​ទប់ស្កាត់​បទល្មើស​ព្រៃឈើ​នៅ​ដែន​ជម្រក​សត្វព្រៃ​ព្រះរការ ដើម្បី​បង្ហាញ​ពី​ស្នាដៃ និង​ត្រូវតែ​បើក​ទូលាយ​ឲ្យ​សាធារណជន ជាពិសេស​សហគមន៍​មូលដ្ឋាន​ដែល​ជា​អ្នក​ការពារ​ព្រៃឈើ​តាំងពី​ដូនតា​របស់​ពួកគាត់​មក អាច​ចុះ​ល្បាត​ការពារ​ព្រៃឈើ​បាន​ដូច​ដើម​ឡើង​វិញ។

លោក​ថា បច្ចុប្បន្ន​បទល្មើស​ព្រៃឈើ​នៅ​ក្នុង​ដែន​ជម្រក​សត្វព្រៃ​ព្រះរការ នៅ​បន្ត​កើត​មាន​ឡើង ខណៈ​រដ្ឋាភិបាល​បន្ត​រឹតត្បិត​សិទ្ធិ​សេរីភាព​របស់​សហគមន៍​មូលដ្ឋាន និង​អ្នក​ការពារ​ព្រៃឈើ​មិន​ឲ្យ​ធ្វើ​ការ​ចុះ​ល្បាត។

សារព័ត៌មាន The Cambodia Daily មិន​អាច​សុំ​ការ​អត្ថាធិប្បាយ​ពី​រដ្ឋមន្ត្រី​ក្រសួង​បរិស្ថាន លោក អ៊ាង សុផល្លែត និង​អ្នក​នាំពាក្យ​ក្រសួង​បរិស្ថាន​បាន​នៅឡើយ​ទេ។

រាជរដ្ឋាភិបាល​បាន​ដាក់​បញ្ចូល​ព្រៃ​ព្រះរការ ដែល​មាន​ទំហំ​ជិត ១០​ម៉ឺន​ហិកតារ​ជា​តំបន់​ដែន​ជម្រក​សត្វព្រៃ​កាលពី​ឆ្នាំ​២០១៦។ ព្រៃ​អភិរក្ស​មួយ​នេះ​គ្របដណ្ដប់​លើ​ភូមិសាស្ត្រ​ប្រជុំ​ស្រុក​ចំនួន​៣ រួម​មាន​ស្រុក​ជាំក្សាន្ត ស្រុក​ត្បែងមានជ័យ និង​ស្រុក​ឆែប ខេត្ត​ព្រះវិហារ។

ទោះបី​រដ្ឋាភិបាល​ដាក់​បញ្ចូល​ព្រៃ​ព្រះរការ​ក្នុង​តំបន់​ការពារ​ក៏ដោយ ប៉ុន្តែ​ដែន​ជម្រក​នេះ​ត្រូវ​បាន​សកម្មជន​បរិស្ថាន និង​សហគមន៍​អះអាង​ថា ការ​កាប់​បំផ្លាញ​ព្រៃឈើ​កំពុង​កើតឡើង​រាល់​ថ្ងៃ ដោយ​គ្មាន​ការ​ទប់ស្កាត់​ពី​សំណាក់​មន្ត្រី​ជំនាញ​បរិស្ថាន។

កាលពី​ថ្ងៃទី​២៨ ខែ​មករា ឆ្នាំ​២០២២ អង្គការ​លើកលែង​ទោស​អន្តរជាតិ (Amnesty International) បាន​ចេញ​របាយការណ៍​ដោយ​បង្ហាញ​ថា ក្នុង​ឆ្នាំ​២០២១ ព្រៃឈើ​ជាង ៦​ពាន់​ហិកតារ​នៅ​តំបន់​ជម្រក​សត្វព្រៃ «ព្រៃឡង់» និង «ព្រៃ​ព្រះរការ» ត្រូវ​បាន​កាប់​បំផ្លាញ​ដោយ​មាន​ការ​ទទួល​សំណូក និង​ការ​ប្រព្រឹត្ត​អំពើពុករលួយ​របស់​អាជ្ញាធរ​ពាក់ព័ន្ធ។

ទំហំ​នៃ​ការ​បាត់បង់​ផ្ទៃដី​ព្រៃឈើ​នៅ​តំបន់​ការពារ​ទាំង​ពីរ​នេះ អង្គការ​លើកលែង​ទោស​អន្តរជាតិ​អះអាង​ថា មាន​ទំហំ​ស្មើ​នឹង​ទីលាន ឬ​តារាង​បាល់ទាត់​ចំនួន​ជិត ១​ម៉ឺន​កន្លែង​ឯណោះ (៨៧៨៤​ទីតាំង)៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស