ក្រសួងវប្បធម៌ និងវិចិត្រសិល្បៈ ព្រមានចាត់វិធានការច្បាប់លើអាជីវករ ឬអ្នកលក់អនឡាញ បើសិនពួកគេមិនបញ្ឈប់សកម្មភាពប្រើប្រាស់រូបថតវត្ថុបុរាណខ្មែរ ដើម្បីធ្វើការផ្សព្វផ្សាយលក់វត្ថុសិល្បៈតាមប្រព័ន្ធបណ្ដាញសង្គមទេនោះ។
សេចក្តីជូនដំណឹងរបស់ក្រសួងវប្បធម៌ និងវិចិត្រសិល្បៈ កាលពីថ្ងៃទី៤ ខែកញ្ញា ឲ្យដឹងថា ការហាម និងបញ្ឈប់សកម្មភាពនេះ បន្ទាប់ពីមន្ត្រីជំនាញបានសង្កេតឃើញអាជីវករ និងអ្នកលក់អនឡាញមួយចំនួនបានធ្វើការផ្សព្វផ្សាយលក់ដូរវត្ថុសិល្បៈតាមប្រព័ន្ធបណ្ដាញសង្គមហ្វេសប៊ុក និងតិកតុក ដោយប្រើប្រាស់រូបថតវត្ថុបុរាណខ្មែរដែលក្រសួងបានបង្ហោះកន្លងមក ដើម្បីយកធ្វើជារូបភាពទាក់ទាញសម្រាប់លក់ដូរវត្ថុសិល្បៈឯកជនរបស់ខ្លួន។
ប្រភពដដែលថា ការយករូបថតវត្ថុបុរាណមកប្រើប្រាស់បែបនេះ ថាជាសកម្មភាពខុសឆ្គង និងជារូបភាពបោកប្រាស់ ដែលនាំឲ្យមានការភាន់ច្រឡំ ហើយទង្វើនេះក៏អាចធ្វើឲ្យសមត្ថកិច្ចបរទេស និងអ្នកកាន់កាប់សមុច្ច័យឯកជននានាយល់ច្រឡំថា វត្ថុបុរាណខ្មែរដែលគេបានប្រគល់មកកម្ពុជាវិញត្រូវបានចរាចរលក់ដូរក្នុងទីផ្សារដោយខ្វះការគ្រប់គ្រងការពារពីសំណាក់រដ្ឋាភិបាលកម្ពុជា។
ក្រសួងអំពាវនាវទៅអាជីវករ និងអ្នកលក់អនឡាញនានាដែលប្រកបមុខរបរនេះ ត្រូវបញ្ឈប់ជាបន្ទាន់នូវការប្រើប្រាស់រូបភាពវត្ថុបុរាណខ្មែរដើម្បីផ្សព្វផ្សាយលក់ដូរវត្ថុសិល្បៈរបស់ខ្លួន។
ក្រសួងអះអាងថា ការប្រើប្រាស់រូបភាពវត្ថុបុរាណខ្មែរដើម្បីផ្សព្វផ្សាយលក់នេះ បានធ្វើឲ្យប៉ះពាល់ធ្ងន់ធ្ងរដល់ដំណើរការនៃការទាមទារវត្ថុបុរាណខ្មែរមកវិញ និងធ្វើឲ្យប្រទេសផ្សេងទៀតបាត់បង់ទំនុកចិត្តមកលើកម្ពុជា ដែលបានខិតខំប្រឹងប្រែងកន្លងមកក្នុងការស្វែងរក និងនាំយកមកវិញនូវសម្បត្តិវប្បធម៌ខ្មែរដែលត្រូវបានលួចនាំចេញដោយខុសច្បាប់ទៅក្រៅប្រទេស។
ក្រសួងវប្បធម៌ និងវិចិត្រសិល្បៈ ក៏បានព្រមានចាត់វិធានការច្បាប់លើអាជីវករ ឬអ្នកលក់អនឡាញទាំងនោះ ដោយថាបើសិនជាពួកគេនៅតែមិនបញ្ឈប់នូវទង្វើប្រើប្រាស់រូបភាពវត្ថុបុរាណខ្មែរដើម្បីផ្សព្វផ្សាយលក់ដូរវត្ថុសិល្បៈរបស់ខ្លួនទៀត។
ការសម្រេចដូច្នេះ ដោយក្រសួងថាក្នុងការថែរក្សាការពារ និងលើកតម្លៃកេរដំណែលដូនតាដែលជាសម្បត្តិបេតិកភណ្ឌវប្បធម៌ និងអត្តសញ្ញាណជាតិ ដើម្បីជាឧត្ដមប្រយោជន៍សម្រាប់កូនខ្មែរជំនាន់ក្រោយៗទៀត។
កាលពីថ្ងៃទី៤ ខែកញ្ញា ឆ្នាំ២០២៣ បារាំងប្រគល់ចម្លាក់លិបមួយផ្ទាំងដល់កម្ពុជាវិញ បន្ទាប់ពីភ្នាក់ងារគយបារាំងរឹបអូសបាន។ ចម្លាក់នេះ ត្រូវបានគេលួចកាលពីដើមទសវត្សរ៍ឆ្នាំ១៩៩០ និងត្រូវបានភ្នាក់ងារគយបារាំងរឹបអូសបាននៅក្នុងប្រតិបត្តិការចុះត្រួតពិនិត្យទីតាំងរបស់ក្រុមហ៊ុនលក់ដេញថ្លៃវត្ថុបុរាណមួយកន្លែងនៅទីក្រុងលីយ៉ុង កាលពីខែកុម្ភៈ ឆ្នាំ២០២០។
ចម្លាក់លិបដែលបារាំងប្រគល់ឲ្យកម្ពុជាវិញនេះ ជាចម្លាក់ធ្វើពីថ្មភក់មានប្រាំបំណែក កសាងឡើងនៅសតវត្សរ៍ទី១២ ឬទី១៣ និងមានទម្ងន់ប្រហែល ៣០០គីឡូក្រាម អាចមានប្រភពមកពីប្រាសាទព្រះខ័នកំពង់ស្វាយ ឬពីប្រាសាទបន្ទាយឆ្មារ។
ក្រៅពីប្រទេសបារាំង ក៏មានសហរដ្ឋអាមេរិកដែលតែងតែយកវត្ថុបុរាណ និងចម្លាក់ខ្មែរមកប្រគល់ឲ្យកម្ពុជាវិញ បន្ទាប់ពីប្រទេសលោកសេរីមួយនេះរកឃើញ និងរឹបអូសបានពីការលួចនាំចេញទៅក្រៅប្រទេស៕