នាយករដ្ឋមន្ត្រីតពូជ លោក ហ៊ុន ម៉ាណែត ព្រមានថា ទីប្រឹក្សា ឬជំនួយការទាំងអស់មិនអាចប្រើប្រាស់នូវបុព្វសិទ្ធិ ឬសិទ្ធិអំណាចរបស់ខ្លួនក្នុងនាមជាទីប្រឹក្សា ឬជាជំនួយការពីលើមុខតំណែងដែលជាមន្ត្រីរាជការក្នុងស្ថាប័នរបស់ខ្លួនបានឡើយ។
ប្រមុខរដ្ឋស្តីទីលោក សាយ ឈុំ បានចុះហត្ថលេខាលើព្រះរាជក្រឹត្យស្ដីពីគោលការណ៍សម្រាប់ការតែងតាំងទីប្រឹក្សា និងជំនួយការនៅក្នុងអង្គការនីតិប្រតិបត្តិ កាលពីថ្ងៃទី៦ ខែកញ្ញា ឆ្នាំ២០២៣ តាមការស្នើសុំរបស់នាយករដ្ឋមន្ត្រីថ្មីថា ព្រះរាជក្រឹត្យនេះបានកំណត់ពីគោលការណ៍ លក្ខខណ្ឌ និងបែបបទសម្រាប់តែងតាំងទីប្រឹក្សា និងជំនួយការនៅក្នុងអង្គការនីតិប្រតិបត្តិ ក្នុងគោលបំណងពង្រឹងគោលការណ៍ឋានានុក្រមរដ្ឋបាលដើម្បីលើកកម្ពស់ប្រសិទ្ធភាពការងាររបស់ទីប្រឹក្សា និងជំនួយការដែលត្រូវបានតែងតាំងសម្រាប់អាណត្តិថ្មីនេះ។
ព្រះរាជក្រឹត្យនេះ កំណត់ថា ការតែងតាំងមន្ត្រីរាជការស៊ីវិល មន្ត្រីនគរបាលជាតិ ឬយោធិនដែលកំពុងកាន់មុខតំណែងនានាចំណុះឱ្យរដ្ឋាភិបាលជាទីប្រឹក្សា ឬជាជំនួយការ មិនត្រូវធ្វើឱ្យប៉ះពាល់ដល់ការអនុវត្តកាតព្វកិច្ចជាមន្ត្រីរាជការឡើយ ហើយមន្ត្រីទាំងនោះក៏មិនអាចត្រូវបានតែងតាំងជាទីប្រឹក្សា ឬជាជំនួយការ ក្រៅពីស្ថាប័នសាមីដែលខ្លួនកំពុងបំពេញការងារបានដែរ លើកលែងតែពួកគេបានលាលែងពីក្របខ័ណ្ឌ ឬត្រូវបានដាក់ឱ្យស្ថិតនៅក្រៅក្របខ័ណ្ឌដើមប៉ុណ្ណោះ។
ព្រះរាជក្រឹត្យដដែលនេះបញ្ជាក់ថា ក្រសួងស្ថាប័ន និងរដ្ឋលេខាធិការដ្ឋានទាំង ៣០ របស់កម្ពុជា អាចតែងតាំងទីប្រឹក្សា និងជំនួយការតាមការចាំបាច់របស់ខ្លួន ខណៈនាយករដ្ឋមន្ត្រី ឧបនាយករដ្ឋមន្ត្រី និងទេសរដ្ឋមន្ត្រី អាចមានទីប្រឹក្សា និងជំនួយការតាមការកំណត់របស់នាយករដ្ឋមន្ត្រីជាកំហិត។
ការចេញព្រះរាជក្រឹត្យនេះ ធ្វើឡើងដើម្បីកំណត់គោលការណ៍នៃការអនុវត្តការងាររបស់ទីប្រឹក្សា និងជំនួយការដែលកំពុងត្រូវបានតែងតាំងនៅតាមក្រសួងស្ថាប័ននីមួយៗរាប់រយនាក់ក្នុងអាណត្តិរដ្ឋាភិបាលថ្មីនេះ។
កាលពីថ្ងៃទី១ ខែកញ្ញា ឆ្នាំ២០២៣ លោក ហ៊ុន ម៉ាណែត អះអាងថា ការផ្តល់តួនាទីជាទីប្រឹក្សា ឬជាជំនួយការ បានបង្កឱ្យមានបញ្ហាមួយចំនួនដែលប៉ះពាល់ដល់ដំណើរការការងារនៅតាមក្រសួងស្ថាប័ន ដែលជាហេតុធ្វើឱ្យប៉ះពាល់អារម្មណ៍ និងពិបាកក្នុងការអនុវត្តនូវបទបញ្ជា។
ក្រោយពីការលើកឡើងបែបនេះ ប្រមុខរដ្ឋស្តីទីលោក សាយ ឈុំ ក៏បានចុះហត្ថលេខាលើព្រះរាជក្រឹត្យស្ដីពីគោលការណ៍សម្រាប់ការតែងតាំងទីប្រឹក្សា និងជំនួយការនៅក្នុងអង្គការនីតិប្រតិបត្តិតាមការស្នើសុំរបស់លោក ហ៊ុន ម៉ាណែត តែម្តង ដែលបានកំណត់ពីគោលការណ៍ លក្ខខណ្ឌ និងបែបបទសម្រាប់តែងតាំងទីប្រឹក្សា និងជំនួយការសម្រាប់អាណត្តិរដ្ឋាភិបាលដែលលោកនឹងដឹកនាំទៅថ្ងៃមុខ។
ក្រោយពីថ្ងៃប្រកាសអនុម័តសមាសភាពក្បាលម៉ាស៊ីនរដ្ឋាភិបាលថ្មី កាលពីថ្ងៃទី២២ ខែសីហា ព្រះមហាក្សត្របានចេញព្រះរាជក្រឹត្យតែងតាំងទីប្រឹក្សា ជំនួយការរបស់នាយករដ្ឋមន្ត្រីរបស់រាជរដ្ឋាភិបាល និងមន្ត្រីជាន់ខ្ពស់ផ្សេងៗ រួមទាំងទីប្រឹក្សា និងជំនួយការអមក្រសួងស្ថាប័ននានាជាបន្តបន្ទាប់ ដែលមកទល់នឹងពេលនេះមានចំនួនជាង ១៧០០នាក់ (១៧១៣នាក់) ហើយ។
ទីប្រឹក្សា និងជំនួយការដែលត្រូវបានតែងតាំងតាមក្រសួងស្ថាប័ននីមួយៗមានចំនួនរាប់រយនាក់ ដូចជាទីប្រឹក្សា និងជំនួយការរបស់នាយករដ្ឋមន្ត្រីចំនួន ១៧៤នាក់ ទីប្រឹក្សារាជរដ្ឋាភិបាលចំនួន ៣៦៣នាក់ ទីប្រឹក្សា និងជំនួយការក្រសួងយុត្តិធម៌ ២៣៩នាក់ និងទីប្រឹក្សាក្រសួងព័ត៌មានចំនួន ៤១៥នាក់ ជាដើម។ ការតែងតាំងតាមក្រសួងស្ថាប័ននីមួយៗ ទើបតែត្រូវបានធ្វើសម្រាប់ក្រសួងចំនួន ៧ ប៉ុណ្ណោះ។
ជុំវិញការតែងតាំងទីប្រឹក្សា និងជំនួយការសម្រាប់រដ្ឋាភិបាលថ្មីអាណត្តិទី៧ នេះ ត្រូវតំណាងរាស្ត្រអតីតគណបក្សសង្គ្រោះជាតិលោក អ៊ុំ សំអាន រិះគន់ថា ទីប្រឹក្សា និងជំនួយការនៃរដ្ឋាភិបាលដែលដឹកនាំដោយលោក ហ៊ុន ម៉ាណែត នឹងត្រូវតែងតាំងជាបន្តបន្ទាប់ទៀតតាមក្រសួងស្ថាប័ននីមួយៗ ដែលនឹងធ្វើឱ្យរដ្ឋាភិបាលថ្មីនេះក្បាលធំជាងគេលើពិភពលោក និងក្លាយជាបន្ទុករបស់ពលរដ្ឋដែលត្រូវបង់ពន្ធដើម្បីយកទៅបើកប្រាក់ខែឱ្យទីប្រឹក្សា និងជំនួយការទាំងនោះ។
ក្រុមអ្នកសង្កេតការណ៍លើកឡើងថា ដំណើរនៃការរៀបចំរដ្ឋាភិបាលថ្មីរបស់លោក ហ៊ុន ម៉ាណែត មិនខុសពីការរៀបចំរបស់លោក ហ៊ុន សែន នោះទេ គឺជាការរៀបចំរដ្ឋាភិបាលដែលមានតែចំនួនមនុស្ស តែមិនអាចធានាប្រសិទ្ធភាពការងារជូនជាតិ និងប្រជាជនបាន។
ពួកគេរិះគន់ថា លោក ហ៊ុន ម៉ាណែត កំពុងតែអនុវត្តតាមទម្រង់រដ្ឋាភិបាលចាស់របស់លោក ហ៊ុន សែន គឺរក្សាសមាជិករដ្ឋាភិបាលចាស់ បង្កើនសមាជិករដ្ឋាភិបាលថ្មី ដោយមិនគិតលើសមត្ថភាពការងារដូចដែលលោក ហ៊ុន សែន ឪពុករបស់គាត់បានដឹកនាំជាង ៤ទសវត្សរ៍កន្លងមកនោះ៕