 ក្នុងខេត្តតាកែវ ចោទថាមានអ្នកសារព័ត៌មានជិត ១ពាន់អង្គភាព (៧០០-៩០០អង្គភាព) បានទៅសុំប្រាក់ឧបត្ថម្ភពីបនល្បែងរបស់ខ្លួនជាប្រចាំខែ ប៉ុន្តែចាប់ពីពេលនេះតទៅ បនល្បែងអស់លទ្ធភាពនឹងឧបត្ថម្ភបន្តទៀតហើយ។){kind=link}
អ្នកគ្រប់គ្រងបនល្បែងកាស៊ីណូ ថបដាយមិន (Top Diamond Casino) ក្នុងខេត្តតាកែវ ចោទថាមានអ្នកសារព័ត៌មានជិត ១ពាន់អង្គភាព (៧០០-៩០០អង្គភាព) បានទៅសុំប្រាក់ឧបត្ថម្ភពីបនល្បែងរបស់ខ្លួនជាប្រចាំខែ ប៉ុន្តែចាប់ពីពេលនេះតទៅ បនល្បែងអស់លទ្ធភាពនឹងឧបត្ថម្ភបន្តទៀតហើយ។
អ្នកគ្រប់គ្រងបនល្បែងកាស៊ីណូ ថបដាយមិន ដែលមានទីតាំងស្ថិតនៅភូមិផ្សារ ឃុំភ្នំដិន ស្រុកគិរីវង់ ខេត្តតាកែវ បានចេញសេចក្តីជូនដំណឹងដែលត្រូវបានផ្សព្វផ្សាយនៅថ្ងៃទី៨ កញ្ញា នេះថា មួយរយៈពេលចុងក្រោយនេះ ក្រុមអ្នកសារព័ត៌មានបានចូលទៅសុំប្រាក់ឧបត្ថម្ភច្រើនហួសហេតុពីបនល្បែងរបស់ខ្លួន ដែលក្នុងមួយខែៗចន្លោះចាប់ពី ៧០០អង្គភាពទៅដល់ ៩០០អង្គភាព ដែលជាហេតុធ្វើឱ្យក្រុមហ៊ុនល្បែងស៊ីសងមួយនេះមិនមានលទ្ធភាពបន្តផ្តល់ជូនពួកគេទៀតបានទេ។
ប្រភពដដែលលើកឡើងថា ដោយសារតែបនល្បែងគ្មានលទ្ធភាពនឹងផ្តល់ប្រាក់ឧបត្ថម្ភដល់អង្គភាពសារព័ត៌មានទាំងនោះបន្តទៀត ដូច្នេះចាប់ពីថ្ងៃទី៥ ខែកញ្ញា ឆ្នាំ២០២៣ នេះតទៅ ក្រុមហ៊ុនប្រកាសថានឹងមិនផ្តល់ប្រាក់ឧបត្ថម្ភដល់អ្នកសារព័ត៌មានទាំងអស់នោះទៀតឡើយ។
អ្នកគ្រប់គ្រងបនល្បែងកាស៊ីណូ ថបដាយមិន បញ្ជាក់ថា កន្លងមក ក្រុមហ៊ុនល្បែងស៊ីសងរបស់ខ្លួនធ្លាប់បានផ្តល់ប្រាក់ឧបត្ថម្ភជាលក្ខណៈមនោសញ្ចេតនាសម្រាប់បាយ ទឹក និងថ្លៃសាំង ជាដើម ដល់អ្នកសារព័ត៌មានទាំងអស់ដែលបានឆ្លងកាត់ទីតាំងបនល្បែងរបស់ខ្លួន បើទោះបីជាតិចក្តី ច្រើនក្តី ទៅតាមលទ្ធភាពរបស់ក្រុមហ៊ុន មិនដែលអាក់ខានម្តងណាឡើយ ប៉ុន្តែនៅពេលនេះ ក្រុមហ៊ុនលែងមានលទ្ធភាពធ្វើបែបនេះទៀតហើយ។
ការចេញសេចក្តីជូនដំណឹងនេះ ត្រូវអ្នកលេងបណ្ដាញសង្គមហ្វេសប៊ុកលើកឡើងថា ទំនងជាមានការឃុបឃិតគ្នារវាងអ្នកសារព័ត៌មានដែលបានទទួលប្រាក់ឧបត្ថម្ភទាំងនោះជាមួយកាស៊ីណូមួយនេះ ដើម្បីលាក់បាំងអំពើទុច្ចរិតដែលបនល្បែងនេះបានប្រព្រឹត្តកន្លងមក។
រដ្ឋាភិបាលកម្ពុជាបានបង្ហាញរបាយការណ៍របស់ខ្លួនកាលពីពេលកន្លងទៅថា សព្វថ្ងៃនេះ អង្គភាពសារព័ត៌មានជាតិ និងបរទេសដែលបានចុះបញ្ជីនៅក្រសួងព័ត៌មាន មានចំនួនជាង ២ពាន់អង្គភាព (២១៥៤អង្គភាព) ដែលកំពុងធ្វើសកម្មភាពផ្សព្វផ្សាយតាមបែបបុរាណ និងបែបទំនើបទៅតាមលទ្ធភាពរបស់ពួកគេរៀងៗខ្លួន។
ទាក់ទិននឹងបញ្ហានេះ កាលពីថ្ងៃទី៦ ខែកញ្ញា ឆ្នាំ២០២៣ រដ្ឋមន្ត្រីក្រសួងព័ត៌មាន លោក នេត្រ ភក្ត្រា បានលើកឡើងក្នុងពិធីជួបជាមួយតំណាងអង្គការយូណេស្កូ (UNESCO) នៅកម្ពុជា ថា ក្រសួងព័ត៌មានតែងបណ្តុះបណ្តាលធនធានមនុស្សក្នុងវិស័យសារព័ត៌មាន ដើម្បីពង្រឹងគុណភាព និងផ្តល់ផលប្រយោជន៍សម្រាប់សាធារណជន។
ទាក់ទិននឹងបញ្ហានេះ ក្រុមអ្នកសង្កេតការណ៍លើកឡើងថា ប្រសិនបើសេចក្តីជូនដំណឹងរបស់បនល្បែងកាស៊ីណូ ថបដាយមិន គឺជាការពិត នោះគឺបង្ហាញថាអំពើពុករលួយក្នុងវិស័យសារព័ត៌មាននៅកម្ពុជាកំពុងតែកើនឡើងធ្ងន់ធ្ងរ ខណៈបនល្បែងនានា និងកន្លែងប្រកបអាជីវកម្មមិនស្របច្បាប់ដទៃទៀតក៏ច្បាស់ជាកើតមាននូវអំពើពុករលួយបែបនេះដូចគ្នាដែរ។
ប្រភពដដែលអះអាងថា អំពើពុករលួយទាំងនេះបានកើតឡើងដោយសារតែរដ្ឋាភិបាលកម្ពុជាប្រើយុទ្ធនាការបំបិទសំឡេងសារព័ត៌មានឯករាជ្យកន្លងមក និងបើកដៃឱ្យសារព័ត៌មានដែលមាននិន្នាការគាំទ្រខ្លួន ធ្វើសកម្មភាពដោយសេរី ខណៈអង្គភាពសារព័ត៌មានខ្លះបានប្រើឥទ្ធិពល និងអំណាចរបស់ខ្លួនដែលមានសែស្រឡាយបក្ខពួកក្នុងជួររដ្ឋាភិបាល ជំរិតទារប្រាក់ពីកន្លែងប្រកបអាជីវកម្មនានា ជាថ្នូរនឹងការមិនចុះផ្សាយនូវអំពើខុសច្បាប់របស់ម្ចាស់អាជីវកម្មខុសច្បាប់ទាំងនោះ។
អង្គការអ្នកសារព័ត៌មានគ្មានព្រំដែន (Reporters Without Borders) បានដាក់ចំណាត់ថ្នាក់សេរីភាពសារព័ត៌មាននៅកម្ពុជាសម្រាប់ឆ្នាំ២០២២ ស្ថិតក្នុងលំដាប់លេខរៀងទី១៤២ ក្នុងចំណោមប្រទេស១៨០ ដែលចំណាត់ថ្នាក់នេះបង្ហាញអំពីសេរីភាពសារព័ត៌មាននៅកម្ពុជានៅតែមិនអាចងើបចេញពីចំណាត់ថ្នាក់មិនល្អដដែល ខណៈសារព័ត៌មានឯករាជ្យ វីអូឌី ដែលជាសារព័ត៌មានឯករាជ្យសេសសល់ចុងក្រោយ ក៏ត្រូវបានរដ្ឋាភិបាលកម្ពុជាបិទទាំងស្រុងនៅចុងឆ្នាំ២០២២ ផងដែរ៕