គណបក្សសម្ព័ន្ធជាតិដើម្បីប្រជាធិបតេយ្យ (NLD) នៃប្រទេសភូមា ដែលពួកយោធាផ្ដួលរំលំក្នុងព្រឹត្តិការណ៍រដ្ឋប្រហារកាលពីខែកុម្ភៈ ឆ្នាំ២០២១ បានចេញសេចក្ដីថ្លែងការណ៍ចុងក្រោយមួយទៀត ដោយអំពាវនាវទៅកាន់សហគមន៍អន្តរជាតិ ជួយរំដោះអ្នកស្រី អ៊ុងសាន ស៊ូជី ពីរបបសឹក ព្រោះអ្នកស្រីអាចនឹងគ្រោះថ្នាក់ដល់ជីវិត។
អ្នកស្រី អ៊ុងសាន ស៊ូជី ជាប្រធានរបស់គណបក្សដែលពួកយោធាភូមា ផ្ដួលអំណាច ខណៈនេះអ្នកស្រីកំពុងត្រូវឃុំខ្លួនក្នុងលំនៅឋានដែលពួកយោធារៀបចំឡើង ក្រោយពីឃុំខ្លួនអ្នកស្រីស្ថិតក្នុងពន្ធនាគារជាង ២ឆ្នាំ។ អតីតមេដឹកនាំរដ្ឋាភិបាលស៊ីវិលភូមារូបនេះត្រូវបានតុលាការសឹកកាត់ទោសឱ្យជាប់ពន្ធនាគារសរុប ៣៣ឆ្នាំ។
តាមរយៈសេចក្ដីថ្លែងការណ៍ចេញផ្សាយជាបន្ទាន់នៅថ្ងៃទី១៤ កញ្ញា នេះ បក្សសម្ព័ន្ធជាតិដើម្បីប្រជាធិបតេយ្យបានសម្ដែងក្តីបារម្ភអំពីបញ្ហាសុខភាពរបស់អ្នកស្រី ព្រោះតែអ្នកស្រីធ្លាក់ខ្លួនឈឺធ្ងន់។
នៅក្នុងសេចក្តីថ្លែងការណ៍នេះ បក្សប្រឆាំងធំជាងគេប្រឆាំងនៅភូមា បានចោទរបបសឹកថាកំពុងបង្កគ្រោះថ្នាក់ដល់អាយុជីវិតរបស់អ្នកស្រី ស៊ូជី តាមរយៈការផ្តល់របបអាហារ និងការព្យាបាលមិនគ្រប់គ្រាន់។
កាសែតក្នុងស្រុកនៃប្រទេសភូមា បានសរសេរចុះផ្សាយថា អ្នកស្រី ស៊ូជី តែងតែឈឺញឹកញាប់ដូចជាមានអាការៈវិលមុខ ក្អួតចង្អោរ ហត់ និងញ៉ាំអ្វីមិនបាន ដោយសារឈឺធ្មេញ និងជំងឺផ្សេងៗទៀត។ អ្នកស្រី ស៊ូជី នៅឆ្នាំ២០២៣ នេះ មានអាយុ ៧៨ឆ្នាំហើយ។
នៅសប្តាហ៍មុន កូនប្រុសរបស់អ្នកស្រី គឺលោក គីម អារីស បាននិយាយថា គ្រូពេទ្យនៃរបបសឹកមិនបានយកចិត្តទុកដាក់ព្យាបាល និងមិនព្រមផ្តល់ថ្នាំព្យាបាលដល់ម្តាយរបស់លោក នៅពេលគាត់កំពុងមានបញ្ហាសម្ពាធឈាមធ្លាក់ចុះខ្សោយជាខ្លាំងនោះទេ។ លោក គីម អារីស ជាកូនប្រុសអ្នកស្រី ស៊ូជី តែគាត់ជាជនជាតិអង់គ្លេស ដោយសារអ្នកស្រីមានស្វាមីជាជនជាតិអង់គ្លេស។
នៅក្នុងបទសម្ភាសន៍ជាមួយទីភ្នាក់ងារសារព័ត៌មាន AP លោក គីម អារីស បានអះអាងថា ម្ដាយរបស់លោកដើរមិនរួចទេ ព្រោះតែសុខភាពរបស់គាត់ចុះខ្សោយខ្លាំង។ លោកទទូចសុំឱ្យមានការជួយម្ដាយរបស់លោកជាបន្ទាន់។
ដោយសារស្ថានភាពដូចនេះ គណបក្សសម្ព័ន្ធជាតិដើម្បីប្រជាធិបតេយ្យបានស្នើយ៉ាងទទូចទៅសហគមន៍អន្តរជាតិ ឱ្យរំដោះអ្នកស្រី ស៊ូជី ជាបន្ទាន់ពីរបបសឹក។
តែការលើកឡើងរបស់លោក គីម អារីស និងគណបក្ស NLD ត្រូវបានរបបសឹកច្រានចោល។ អ្នកនាំពាក្យរបបសឹកភូមា លោក Zaw Min Tun បដិសេធការចោទប្រកាន់ចំពោះការចុះផ្សាយពីបញ្ហាសុខភាពរបស់អ្នកស្រី ស៊ូជី ដែលចុះខ្សោយខ្លាំង ហើយដើរមិនរួច ដោយចាត់ទុកថាជាពាក្យចចាមអារ៉ាមប៉ុណ្ណោះ។
តាមអ្នកនាំពាក្យរបបសឹក អ្នកស្រី ស៊ូជី ពុំមានជំងឺអ្វីទេ ដែលលោកអះអាងថាមានគ្រូពេទ្យនៅប្រចាំការចាំព្យាបាលអ្នកស្រីគ្រប់ម៉ោង។
យ៉ាងណា បក្ស NLD ទទូចថាប្រសិនបើស្ថានភាពសុខភាពរបស់អ្នកស្រី ស៊ូជី នៅតែធ្លាក់ចុះធ្ងន់ធ្ងរ និងប្រឈមគ្រោះថ្នាក់ដល់អាយុជីវិត គឺរបបសឹកជាអ្នកទទួលខុសត្រូវតែម្នាក់គត់។
គេនៅចាំថា នៅក្នុងសវនាការជំនុំជម្រះរបស់តុលាការសឹកភូមា កាលពីថ្មីៗនេះ អ្នកស្រី ស៊ូជី ខកខានមិនបានចូលស្តាប់សវនាការដោយសារហេតុផលសុខភាព។
កាលពីថ្ងៃទី១ សីហា ក្នុងពិធីបុណ្យសាសនាដ៏ធំមួយ របបសឹកភូមាបានកាត់បន្ថយទោសទៅលើអ្នកស្រី ស៊ូជី ដោយទម្លាក់ទោស ៦ឆ្នាំ ក្នុងទោសសរុប ៣៣ឆ្នាំ ដែលអ្នកស្រី ស៊ូជី ត្រូវបានចោទក្នុងសំណុំរឿង ១៩ករណី។ ស្ត្រីអ្នកនយោបាយភូមារូបនេះមានអាយុ ៧៨ឆ្នាំហើយ ដែលកំពុងមានទោសជាប់នឹងខ្លួន ២៧ឆ្នាំទៀត។ រឿងនេះបើពួកយោធាមិនមានការលើកលែងទោសទៀតទេ គឺអ្នកស្រី ស៊ូជី គ្មានផ្លូវមានសេរីភាពឡើងវិញនោះទេ គឺរហូតអស់មួយជីវិត។ ជាមួយគ្នានេះ បក្ស NLD ដែលតំណាងឱ្យរដ្ឋាភិបាលស្រមោលបានអំពាវនាវសុំឱ្យសហគមន៍អន្តរជាតិជួយគាបសង្កត់ពួកយោធា ឱ្យដោះលែងអ្នកស្រី ស៊ូជី ជាបន្ទាន់ រួមទាំងអ្នកទោសមនសិការទាំងអស់ដែលកំពុងជាប់ឃុំ។
បើតាមអង្គការសហប្រជាជាតិ អំពើហិង្សាក្នុងសង្គមនៃរបបសឹក បានបណ្ដាលឱ្យប្រជាជនជាង ៣០០០នាក់បាត់បង់ជីវិត និងជាង ២ម៉ឺន ៤ពាន់នាក់ត្រូវចាប់ខ្លួន ហើយជាងមួយលាននាក់ត្រូវបង្ខំចិត្តរត់ភៀសខ្លួន។
ទាំងអង្គការសហប្រជាជាតិ និងសហគមន៍អន្តរជាតិមានដូចជា សហរដ្ឋអាមេរិក សមាគមអាស៊ាន សហភាពអឺរ៉ុប ប្រទេសជប៉ុន អូស្ត្រាលី កាណាដា បានអំពាវនាវឱ្យពួកយោធាដោះលែងអ្នកទោសនយោបាយ និងរៀបចំការបោះឆ្នោតមួយមានលក្ខណៈសេរី និងបើកចំហ។ នៅក្នុងជំនួបកំពូលនៃមេដឹកនាំអាស៊ាន ក៏មេដឹកនាំនៃសមាគមនេះបានទាមទារឱ្យរបបសឹកត្រូវអនុវត្តគោលការណ៍ប្រាំចំណុច ដែលក្នុងនោះត្រូវដោះលែងអ្នកទោសនយោបាយទាំងអស់ រួមទាំងអ្នកស្រី ស៊ូជី។
សម្រាប់សហរដ្ឋអាមេរិក បានទទូចថា សមាគមអាស៊ានត្រូវបង្ខំរបបសឹកអនុវត្តឱ្យបាននូវការសន្យារបស់ខ្លួន ដោយព្រមានបន្តដាក់ទណ្ឌកម្មខ្លាំងថែមទៀតទៅលើរបបសឹកនេះ៕