អ្នកឃ្លាំមើលជំរុញឱ្យសមត្ថកិច្ចខ្មែរចាត់វិធានការទៅលើអំពើឆបោកតាមប្រព័ន្ធអនឡាញឱ្យបានតឹងរ៉ឹងជាទីបំផុត បន្ទាប់ពីរកឃើញជនជាតិជប៉ុន ជាង ២០នាក់មានពាក់ព័ន្ធករណីនេះ ហើយក៏កំពុងយកប្រទេសកម្ពុជាធ្វើជាទីតាំងសម្រាប់ប្រព្រឹត្តអំពើល្មើសនេះដែរ។
អ្នកផ្តល់ប្រឹក្សាផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី១៥ កញ្ញា នេះថា ដើម្បីបញ្ចៀសការខាតបង់ផលប្រយោជន៍ផ្សេងៗរបស់កម្ពុជា ទាំងក្នុងវិស័យទេសចរណ៍ និងវិនិយោគ គឺសមត្ថកិច្ចត្រូវតែទប់ស្កាត់ឱ្យបានដាច់ខាតកុំឱ្យកើតមានបទឧក្រិដ្ឋតាមអនឡាញនៅកម្ពុជាបន្តទៀត។ ជាងនេះទៀត ស្ថាប័នពាក់ព័ន្ធក៏ត្រូវត្រួតពិនិត្យករណីនេះដែរ ដែលអាចបណ្តាលមកពីការប្រព្រឹត្តអំពើពុករលួយរបស់មន្ត្រីមូលដ្ឋានជាមួយឧក្រិដ្ឋជនទាំងនោះ។
លោក សេក សុជាតិ លើកឡើងថា ប្រសិនបើសមត្ថកិច្ចបណ្តែតបណ្តោយឱ្យអំពើឧក្រិដ្ឋទាំងអស់នេះកើតមានឡើងមែន វាមិនមែនជារឿងល្អនោះទេសម្រាប់រដ្ឋាភិបាលកម្ពុជា ពីព្រោះវាអាចជះឥទ្ធិពលអាក្រក់ដល់វិស័យទេសចរណ៍ និងវិស័យវិនិយោគផ្សេងៗ ហើយក៏ធ្វើឱ្យកម្ពុជាធ្លាក់ទៅក្នុងចំណាត់ថ្នាក់មិនល្អនៃការជួញដូរមនុស្សថែមទៀត ស្របពេលដែលកម្ពុជានៅពេលនេះកំពុងស្ថិតក្នុងចំណាត់ថ្នាក់ទី៣ ក្នុងបញ្ជីខ្មៅនៃការជួញដូរមនុស្សរបស់សហរដ្ឋអាមេរិកទៅហើយនោះ។
ការអះអាងនេះ ធ្វើឡើងបន្ទាប់ពីសារព័ត៌មានរបស់ប្រទេសជប៉ុនជាច្រើនបានចុះផ្សាយជាបន្តបន្ទាប់អំពីការចាប់ខ្លួនជនជាតិជប៉ុន ជាង ២០នាក់ ដោយសង្ស័យថា ពួកគេបានប្រព្រឹត្តអំពើឆបោកតាមប្រព័ន្ធអនឡាញនៅកម្ពុជា កាលពីថ្ងៃទី១១ ខែកញ្ញា ឆ្នាំ២០២៣។ ទោះជាយ៉ាងណាក៏ដោយ អាជ្ញាធរក្រុងភ្នំពេញច្រានចោលនូវការចុះផ្សាយនេះ ប៉ុន្តែសមត្ថកិច្ចខ្មែរក៏មិនទាន់បង្ហាញពីបទចោទណាមួយលើក្រុមជនជាតិជប៉ុនទាំងនោះដែរ។
ទូរទស្សន៍ Asahi (ANN) សារព័ត៌មាន Yahoo Japan សារព័ត៌មាន Japan Today និងសារព័ត៌មាន Japan Time ជាដើម បានចុះផ្សាយជាបន្តបន្ទាប់ពីករណីជនជាតិជប៉ុនជាង ២០នាក់ដែលត្រូវបានចាប់ខ្លួននៅកម្ពុជា ក្នុងទីក្រុងភ្នំពេញនោះ ដោយបញ្ជាក់ថា ពួកគេបានប្រើប្រាស់ផ្ទះល្វែងមួយកន្លែងដើម្បីធ្វើការឆបោកតាមប្រព័ន្ធអនឡាញ។ ជាងនេះទៀត ក៏មានករណីដូចគ្នានេះជាច្រើនទៀតដែរ ដែលបានកើតឡើងជាបន្តបន្ទាប់ ដែលក្រុមទុច្ចរិតជនជាតិជប៉ុនជាច្រើននាក់ត្រូវបានរកឃើញថាកំពុងប្រើប្រាស់ប្រទេសក្នុងតំបន់អាស៊ីអាគ្នេយ៍ ធ្វើជាកន្លែងលាក់ខ្លួនដើម្បីប្រព្រឹត្តអំពើឆបោកនេះ។
កាលពីអំឡុងខែមេសា ឆ្នាំ២០២៣ អាជ្ញាធរកម្ពុជាបាននិរទេសជនជាតិជប៉ុនចំនួន ១៩នាក់ចំពោះការសង្ស័យថា បានពាក់ព័ន្ធក្នុងអំពើឆបោកតាមទូរស័ព្ទ ហើយពួកគេត្រូវបានចាប់ខ្លួនម្តងទៀតនៅពេលសមត្ថកិច្ចកម្ពុជាបញ្ជូនពួកគេទៅដល់ប្រទេសជប៉ុន។
ទាក់ទិនអំពើឆបោកតាមអនឡាញនេះ អង្គការសហប្រជាជាតិ (អ.ស.ប) បានចេញរបាយការណ៍មួយកាលពីអំឡុងខែសីហា ឆ្នាំ២០២៣ ដោយបង្ហាញថា បច្ចុប្បន្ននេះករណីបោកបញ្ឆោតតាមអនឡាញបានកើនឡើងខ្លាំងនៅក្នុងប្រទេសចំនួន ៥ ក្នុងតំបន់អាស៊ីអាគ្នេយ៍ ក្នុងនោះរួមមានប្រទេសភូមា ដែលមានតួលេខខ្ពស់បំផុត គឺប្រមាណជាង ១២ម៉ឺននាក់ ចំណែកនៅកម្ពុជាវិញ ត្រូវបានគេរកឃើញថាមានប្រមាណជាង ១០ម៉ឺននាក់ផងដែរ។
អ្នកនាំពាក្យអគ្គស្នងការដ្ឋាននគរបាលជាតិលោក ឆាយ គឹមខឿន ត្រូវបានវិទ្យុសំឡេងសហរដ្ឋអាមេរិក VOA ដកស្រង់សម្ដីចុះផ្សាយកាលពីថ្ងៃទី១៤ ខែកញ្ញា ថា សមត្ថកិច្ចរបស់កម្ពុជាពិតជាបានឃាត់ខ្លួនជនជាតិជប៉ុនជាង ២០នាក់មែន តែមិនទាន់មានការចោទប្រកាន់យ៉ាងណានោះទេ ដោយសមត្ថកិច្ចកំពុងបន្តនីតិវិធីសាកសួរ ក្នុងនោះលោកបានច្រានចោលព័ត៌មានដែលថា ជនជាតិជប៉ុនទាំងនោះត្រូវបានសង្ស័យថាបានប្រព្រឹត្តអំពើបោកបញ្ឆោតតាមប្រព័ន្ធអនឡាញនៅកម្ពុជា ប៉ុន្តែលោកអះអាងថា ការចាប់ខ្លួននេះគឺធ្វើឡើងតាមសំណើរបស់ស្ថានទូតជប៉ុនតែប៉ុណ្ណោះ។
ទាក់ទិននឹងបញ្ហានេះ អតីតមេដឹកនាំបក្សប្រឆាំងលោក សម រង្ស៊ី ធ្លាប់បានលើកឡើងកាលពីពេលកន្លងទៅថា ទម្រង់នៃការគ្រប់គ្រងប្រទេសដែលលោក ហ៊ុន សែន និងកូនប្រុសរបស់គាត់កំពុងដឹកនាំនៅពេលនេះ គឺជារបៀបដឹកនាំដែលយកកម្ពុជាធ្វើជាឋានសួគ៌សម្រាប់ក្រុមឧក្រិដ្ឋជនប៉ុណ្ណោះ មិនមែនជារបៀបដឹកនាំរកការរីកចម្រើនឱ្យប្រទេសជាតិនោះឡើយ៕