នាយករដ្ឋមន្ត្រីតពូជ លោក ហ៊ុន ម៉ាណែត អបអរសាទរចំពោះកម្មករនិយោជិតវិស័យកាត់ដេរដែលទទួលបានការដំឡើងប្រាក់ឈ្នួលអប្បបរមាសម្រាប់ឆ្នាំ២០២៤ ចំនួន ២០៤ដុល្លារអាមេរិកក្នុង ១ខែ នៅឆ្នាំក្រោយនេះ។
លោក ហ៊ុន ម៉ាណែត បានសរសេរលើទំព័រហ្វេសប៊ុករបស់ខ្លួនកាលពីថ្ងៃទី២៨ ខែកញ្ញា ឆ្នាំ២០២៣ នេះថា លោកទទួលបានរបាយការណ៍ពីរដ្ឋមន្ត្រីក្រសួងការងារ អំពីលទ្ធផលបោះឆ្នោតរបស់ក្រុមប្រឹក្សាជាតិប្រាក់ឈ្នួលអប្បបរមាលើតួលេខចំនួន ៣ គឺតួលេខ ២០២ដុល្លារ តួលេខ ២០៤ដុល្លារ និងតួលេខ ២១៣ដុល្លារ ដោយក្នុងនោះតួលេខ ២០២ដុល្លារទទួលបានសំឡេង ៤៦សំឡេង តួលេខ ២០៤ដុល្លារទទួលបានសូន្យសំឡេង ហើយតួលេខ ២១៣ដុល្លារ ទទួលបាន ៥សំឡេងក្នុងចំណោមសំឡេងសរុប ៥១សំឡេង។ ហេតុដូច្នេះ លោកបន្ថែម ២ដុល្លារទៀតទៅលើតួលេខ ២០២ដុល្លារ ដែលនាំឲ្យប្រាក់ខែគោលរបស់កម្មករនិយោជិតទទួលបាន ២០៤ដុល្លារសម្រាប់ឆ្នាំ២០២៤ ខាងមុខតទៅ។
លោក ហ៊ុន ម៉ាណែត អះអាងថា ទន្ទឹមនឹងការដំឡើងប្រាក់ឈ្នួលនេះ លោកនឹងបន្តជំរុញដល់ក្រសួងស្ថាប័ន អាជ្ញាធរពាក់ព័ន្ធ ពិនិត្យតាមដាន និងដាក់វិធានការបន្ថែមដើម្បីពិនិត្យលទ្ធភាពកាត់បន្ថយបន្ទុកចំណាយរបស់បងប្អូនកម្មករនិយោជិតផងដែរ។ ជាងនេះទៀត លោកក៏មានផែនការជួបប្រជុំជាមួយវិស័យឯកជន ដើម្បីកែលំអបរិយាកាសវិនិយោគនៅកម្ពុជា សំដៅបង្កើនភាពប្រកួតប្រជែង និងទាក់ទាញវិនិយោគទុនបន្ថែម ក្នុងគោលដៅបង្កើតការងារថ្មីៗជូនពលរដ្ឋបន្ថែមទៀត។
លោក ហ៊ុន ម៉ាណែត បញ្ជាក់ថា លោកបានតាមដានយ៉ាងយកចិត្តទុកដាក់លើការពិភាក្សាប្រាក់ឈ្នួលអប្បបរមានេះ តាំងពីពេលចាប់ផ្តើមដំបូង ក្នុងបំណងដើម្បីជួយលើកកម្ពស់ជីវភាពរស់នៅរបស់ពលរដ្ឋ រួមទាំងកម្មករនិយោជិត ដែលនេះគឺជាកិច្ចការអាទិភាពខ្ពស់បំផុតរបស់រាជរដ្ឋាភិបាលអាណត្តិថ្មីនេះ។
ការកំណត់ប្រាក់ឈ្នួលអប្បបរមាត្រឹម ២០៤ដុល្លារនេះ ត្រូវបានអ្នកជំនាញទទួលបន្ទុកសិទ្ធិការងារ និងកម្មករ មើលឃើញថា ជាចំនួនដែលមិនអាចជួយឱ្យជីវភាពកម្មករនិយោជិតខាងវិស័យកាត់ដេរអាចរស់នៅសមរម្យ និងថ្លៃថ្នូរបាននៅឡើយ។
អ្នកគ្រប់គ្រងផ្នែកការងារនៃអង្គការសង់ត្រាល់ លោក ឃុន ថារ៉ូ បានប្រាប់សារព័ត៌មាន The Cambodia Daily នៅថ្ងៃទី២៩ កញ្ញា នេះថា ផ្អែកតាមរបាយការណ៍របស់សង់ត្រាល់ និងសហជីពឯករាជ្យជាច្រើន បានបង្ហាញពីការឱ្យព្រួយបារម្ភចំពោះស្ថានភាពត្រដាបត្រដួសកាន់តែខ្លាំងរបស់កម្មកររោងចក្រកាត់ដេរនៅកម្ពុជាសព្វថ្ងៃនេះ ដែលចំណូលរបស់ពួកគេកំពុងថយចុះ ស្របពេលដែលពួកគេត្រូវរ៉ាប់រងបន្ទុកបំណុលដ៏ធំថែមទៀត។
លោក ឃុន ថារ៉ូ លើកឡើងថា ទោះបីជាមានការដំឡើងប្រាក់ឈ្នួលអប្បបរមាដល់កម្មករនៅពេលនេះក៏ដោយ ក៏ធ្វើឡើងក្នុងពេលដែលចំណូលសរុបរបស់ពួកគេកំពុងថយចុះដែរ។ ជាក់ស្តែង នៅពេលនេះ កម្មករជាច្រើនមានចំណូលតិចជាងមុន ដូចជាការថយចុះប្រាក់ថែមម៉ោង ការថយចុះប្រាក់រង្វាន់ និងការថយចុះអត្ថប្រយោជន៍ផ្សេងៗជាច្រើនទៀត ខណៈកំណើននៃការចំណាយលើការរស់នៅក៏កើនឡើងជាងមុនដែរ។
លោកបន្ថែមថា ដើម្បីធានាលទ្ធភាពនៃការដំទ្បើងប្រាក់ឈ្នួលអប្បបរមាឱ្យមានភាពល្អប្រសើរសម្រាប់កម្មករ រាជរដ្ឋាភិបាលត្រូវតែដាក់ចេញនូវវិធានការកាត់បន្ថយអតិផរណាផ្នែកចំណីអាហារ ថ្លៃសាំង និងការអនុវត្តច្បាប់ជួលផ្ទះក្នុងកម្រិតទាបឱ្យមានប្រសិទ្ធភាព ហើយជាពិសេស ត្រូវសម្រួលរចនាសម្ព័ន្ធប្រាក់ឈ្នួល និងប្រាក់រង្វាន់ ព្រមទាំងអត្ថប្រយោជន៍ផ្សេងទៀតទៅក្នុងប្រាក់ឈ្នួលអប្បបរមា និងដាក់ចេញនូវវិធានការ ពិនិត្យ ពិចារណាក្នុងការទម្លាក់ថវិកាជាតិដើម្បីសម្រួលលក្ខខណ្ឌបំណុល ដូចជាការពន្យារការបង់ប្រាក់ដើម និងការប្រាក់ទៅធនាគារ ដែលកម្មករកំពុងប្រឈមនៅពេលនេះជាបន្ទាន់ផងដែរ។
លោកបន្តថា រដ្ឋាភិបាលគួរសិក្សាឱ្យបានច្បាស់លាស់ពីកម្រិតចំណេញរបស់និយោជកប្រកបដោយតម្លាភាព ហើយបើតាមស្ថានភាពជាក់ស្តែងនៅពេលនេះ រដ្ឋាភិបាលគួរតែដំឡើងប្រាក់ឈ្នួលអប្បបរមាដល់កម្មករនិយោជិតក្នុងភាពសមរម្យ គឺចន្លោះពី ៣០០ដុល្លារអាមេរិកទៅដល់ ៥០០អាមេរិកសម្រាប់រយៈពេលវែង ទើបអាចជួយឱ្យកម្មករឈានទៅរកភាពធូរស្រាលលើបន្ទុកនៃការចំណាយរបស់ពួកគេ និងអាចរស់ក្នុងភាពថ្លៃថ្នូរបាន។
ទាក់ទិននឹងបញ្ហានេះ ក្រុមសហជីពកម្ពុជាបានបញ្ចេញរបាយការណ៍របស់ខ្លួនកាលពីពេលថ្មីៗនេះថា តាមរយៈនៃការសិក្សាស្រាវជ្រាវបឋមក្នុងឆ្នាំ២០២៣ បានរកឃើញថា កម្មករម្នាក់បានជាប់បំណុលជាមធ្យមពីរស្ថាប័ន ហើយបញ្ហានេះបានបង្កឱ្យពួកគេមានវិបត្តិផ្នែកសេដ្ឋកិច្ចរយៈពេលវែង ជាពិសេសពលរដ្ឋដែលត្រូវរស់នៅក្រោម និងស្មើ ឬលើបន្ទាត់ក្រីក្របន្តិចបន្តួច ខណៈរដ្ឋាភិបាលកម្ពុជាមិនទាន់មានការកំណត់ប្រាក់ឈ្នួលរបស់កម្មករឱ្យអាចរស់នៅបានសមរម្យបាននៅឡើយទេ។
កាលពីថ្ងៃទី២១ ខែកញ្ញា ឆ្នាំ២០២២ ប្រាក់ឈ្នួលអប្បបរមាសម្រាប់កម្មករនិយោជិតផ្នែកវាយនភណ្ឌ កាត់ដេរ ផលិតស្បែកជើង ត្រូវបានកំណត់ត្រឹម ២០០ដុល្លារអាមេរិកក្នុងមួយខែសម្រាប់ឆ្នាំ២០២៣ ដែលគេមើលឃើញថាជាទំហំប្រាក់ឈ្នួលមួយមិនអាចធានានូវការរស់នៅសមរម្យរបស់កម្មករនិយោជិតបាននៅឡើយ ខណៈឆ្នាំ២០២៤ ខាងមុខនេះ ត្រូវបានឡើងត្រឹមតែ ៤ដុល្លារអាមេរិកប៉ុណ្ណោះ៕