អង្គការ Right Livelihood ស្នើទៅតុលាការកម្ពុជាឲ្យពិចារណាឡើងវិញចំពោះការរារាំងក្រុមយុវជនមាតាធម្មជាតិ មិនឲ្យទៅទទួលពានរង្វាន់នៅប្រទេសស៊ុយអែត ក្រោមហេតុផលថាជាករណីមិនចាំបាច់នោះ។
អង្គការ Right Livelihood បានចេញសេចក្តីថ្លែងការណ៍មួយកាលពីថ្ងៃទី៣ ខែតុលា ដោយសម្ដែងការសោកស្ដាយក្រោយពីអង្គការនេះទទួលដំណឹងថា តុលាការក្រុងភ្នំពេញមិនឲ្យក្រុមយុវជនមាតាធម្មជាតិចំនួន ៣រូបទៅទទួលពានរង្វាន់ Right Livelihood Award ដែលនឹងធ្វើឡើងនៅប្រទេសស៊ុយអែត នាថ្ងៃទី២៩ ខែវិច្ឆិកា ឆ្នាំ២០២៣ ខាងមុខនេះ។
អង្គការ Right Livelihood បញ្ជាក់ជំហរថា ខ្លួននឹងឈរជាមួយអង្គការមាតាធម្មជាតិកម្ពុជាចំពោះការបន្តការខិតខំប្រឹងប្រែងរបស់ពួកគេ ដើម្បីការពារបរិស្ថាន និងជីវភាពរស់នៅរបស់ប្រជាជនកម្ពុជាជំនាន់បច្ចុប្បន្ន និងអនាគត។
តែយ៉ាងណា អង្គការ Right Livelihood ស្នើទៅតុលាការក្រុងភ្នំពេញឲ្យពិចារណាឡើងវិញចំពោះការរារាំងក្រុមយុវជនចលនាមាតាធម្មជាតិ។ ក្រៅពីទទូចទៅតុលាការកម្ពុជាហើយ អង្គការនេះក៏ស្នើទៅសហគមន៍អន្តរជាតិ ឲ្យចូលរួមអបអរក្រុមយុវជនមាតាធម្មជាតិដែលបានតស៊ូមតិ ដើម្បីសិទ្ធិសេរីភាពរបស់ពួកគេឲ្យទទួលស្គាល់នៅលើពិភពលោកផងដែរ។
ការស្នើរបស់អង្គការ Right Livelihood ធ្វើឡើងបន្ទាប់ពីតុលាការក្រុងភ្នំពេញ កាលពីថ្ងៃទី២ ខែតុលា ឆ្នាំ២០២៣ បានបដិសេធសំណើរបស់យុវជនចលនាមាតាធម្មជាតិ ដែលស្នើសុំទៅទទួលពានរង្វាន់ Right Livelihood 2023 នៅប្រទេសស៊ុយអែត នៅចុងខែវិច្ឆិកា ខាងមុខនេះ។ ការបដិសេធនេះ ក្រោមហេតុផលថាគ្មានភាពចាំបាច់ បើទោះជាការទទួលពានរង្វាន់នេះជាការលើកមុខមាត់ឲ្យប្រទេសកម្ពុជាក៏ដោយ។
ក្រុមយុវជនចលនាមាតាធម្មជាតិ បង្ហាញការហួសចិត្តដែលសាលាដំបូងរាជធានីភ្នំពេញបដិសេធសំណើពួកគេ បើទោះជាការទទួលពានរង្វាន់ Right Livelihood 2023 នៅប្រទេសស៊ុយអែត នេះ បានជួយលើកមុខមាត់ប្រទេសកម្ពុជាក៏ដោយ។
ក្រុមយុវជនចលនាមាតាធម្មជាតិ ដូចជាលោក ថុន រដ្ឋា កញ្ញា ភួន កែវរស្មី កញ្ញា ឡុង គន្ធា លោក យីម លាងហ៊ី លោក លី ចន្ទ្រដារ៉ាវុធ និងកញ្ញា ស៊ុន រដ្ឋា ត្រូវបានអាជ្ញាធរចាប់ខ្លួនកាលពីអំឡុងខែមិថុនា ឆ្នាំ២០២១ ក្រោយរដ្ឋាភិបាលកម្ពុជាចោទថា ពួកគេមានអង្គការចាត់តាំងខុសច្បាប់ពីក្រៅប្រទេស ប្រើប្រាស់ហិរញ្ញប្បទានភេរវកម្ម និងធ្វើសកម្មភាពបំបែកបំបាក់ជាតិ ក្រោមបទចោទ «ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម» បទ «រួមគំនិតក្បត់» និងបទ «ប្រមាថអង្គព្រះមហាក្សត្រ»។
សកម្មជនទាំងនេះត្រូវបានអាជ្ញាធរដោះលែងឱ្យនៅក្រៅឃុំបណ្ដោះអាសន្ន កាលពីថ្ងៃទី១២ ខែវិច្ឆិកា ឆ្នាំ២០២១ ខណៈការដោះលែងនេះ អ្នកខ្លះបានអនុវត្តទោសចប់តាមការកំណត់របស់តុលាការ ចំណែកអ្នកខ្លះទៀតត្រូវបានដោះលែងឱ្យនៅក្រៅឃុំបណ្ដោះអាសន្ន ដោយទោសដែលនៅសល់ ត្រូវព្យួរសាកល្បង ប៉ុន្តែពួកគេគ្រប់គ្នាសុទ្ធតែមានទោសផ្សេងទៀតដែលតុលាការមិនទាន់ជំនុំជម្រះនៅឡើយពីបទចោទ រួមគំនិតក្បត់ និងបទ ប្រមាថអង្គព្រះមហាក្សត្រ៕