សកម្មជនសង្គម លោក នី ណាក់ លើកឡើងថា រដ្ឋាភិបាលនៅតែទុកឲ្យជនដែលប្រព្រឹត្តបទឧក្រិដ្ឋរស់នៅក្រៅច្បាប់ ដោយសារតែរយៈពេលមួយខែហើយនៅមិនទាន់រកឃើញជនដែលប្រើអំពើហិង្សាលើរូបលោកយកមកផ្ដន្ទាទោស។
កាលពីថ្ងៃទី១២ កញ្ញា ជនមិនស្គាល់មុខមួយក្រុមស្លៀកពាក់ខ្មៅ មានពាក់មួកឃ្លុបបិទមុខជិត ដៃកាន់ដំបងដែកសម្រុកវាយសន្ធាប់លើក្បាលលោក នី ណាក់ ឱ្យបែកក្បាលជាច្រើនកន្លែង ឈាមស្រោចខ្លួន និងសន្លប់នៅនឹងកន្លែង។
លោក នី ណាក់ បានរងរបួសធ្ងន់ជាច្រើនកន្លែងនៅត្រង់ក្បាលដែលមានស្នាមរបួសដាច់រហូតចំនួន ៥កន្លែង និងរបួសដាច់នៅត្រង់ចិញ្ចើម រួមទាំងនៅលើដៃ និងជើង ដែលត្រូវដេរអស់ជាង ៣០ថ្នេរ និងត្រូវសម្រាកព្យាបាលក្នុងមន្ទីរពេទ្យអស់រយៈពេលមួយសប្ដាហ៍។
អ្នកជំនាញខាងកសិកម្ម និងជាសកម្មជនសង្គម លោក នី ណាក់ បានសរសេរលើហ្វេសប៊ុក IMan-KH ថា គិតត្រឹមថ្ងៃទី១២ ខែតុលា នេះ មានរយៈពេលខួប ១ខែហើយនៃអំពើឃាតកម្មមកលើរូបលោក ប៉ុន្តែលោកមិនទាន់បានតម្រុយអ្វីបន្តិចពីប៉ូលិស និងប៉េអិម និងស្នងការនោះទេ។
លោកបានត្អូញត្អែរថា យុត្តិធម៌សម្រាប់មកដល់ពេលនេះ មិនដឹងនៅឯណាឡើយ។ លោកចាត់ទុកករណីនេះថា រដ្ឋាភិបាលនៅតែទុកឲ្យជនដែលប្រព្រឹត្តបទឧក្រិដ្ឋរស់នៅក្រៅច្បាប់ ដោយថាមិនយូរទេ វិបត្តិសង្គមទូទាំងប្រទេសវានឹងផ្ទុះឡើងមិនខានឡើយ។
អនុប្រធានវេទិកាពលរដ្ឋ លោក ម៉ែន ណាត យល់ស្របចំពោះការលើកឡើងរបស់លោក នី ណាក់។ លោកកត់សម្គាល់ថា រដ្ឋាភិបាលដឹកនាំតាំងពីលោក ហ៊ុន សែន រហូតដល់លោក ហ៊ុន ម៉ាណែត នេះ ធ្វើជាប៉ូលិសផង និងជាចោរផង។ មានន័យថា រដ្ឋាភិបាលកំពុងប្រើប្រាស់មធ្យោបាយទុច្ចរិតបង្ក្រាបចំពោះអ្នកដែលមានទស្សនៈផ្ទុយ ឬមិនស្របនឹងខ្លួន។
ជាក់ស្ដែងកន្លងមក រដ្ឋមន្ត្រីក្រសួងការងារ លោក ហេង សួរ ធ្លាប់បាននិយាយក្នុងសារសំឡេងបែកធ្លាយដោយបញ្ជាឲ្យសម្លាប់ក្រៅប្រព័ន្ធច្បាប់ តាមរយៈគ្រោះថ្នាក់ចរាចរណ៍លើអ្នកមានទស្សនៈផ្ទុយពីពួកអ្នកកាន់អំណាច ឬអ្នករិះគន់គ្រួសារត្រកូលហ៊ុន។
ក្រៅពីបញ្ជាឲ្យសម្លាប់ហើយ លោក ហេង សួរ ក៏ធានាចិញ្ចឹមពួកឧក្រិដ្ឋជន ឬជនដៃដល់ទាំងនោះ ខណៈការប្រើប្រាស់អំពើហិង្សាលើសកម្មជនដីធ្លី លើអ្នកនយោបាយបក្សប្រឆាំង និងសកម្មជនសង្គម ជាដើម សមត្ថកិច្ចមិនបានចាប់ខ្លួនជនដៃដល់ ឬក្រុមឧក្រិដ្ឋជន មកផ្ដន្ទាទោសឡើយ បើទោះបីជាមានកាមេរ៉ាសុវត្ថិភាព និងភស្តុតាងផ្សេងៗក៏ដោយ។
ដូច្នេះ លោកថា រដ្ឋាភិបាលត្រកូលហ៊ុន មិនបានការពារប្រជាពលរដ្ឋក្នុងការស្វែងរកជនដៃដល់ទេ ផ្ទុយទៅវិញ ពួកគេអ្នកនៅពីក្រោយក្រុមឧក្រិដ្ឋជនទាំងនោះ ដោយមិនអើពើរកយុត្តិធម៌ជូនប្រជាពលរដ្ឋរងគ្រោះ។
លោក ម៉ែន ណាត អំពាវនាវទៅរដ្ឋាភិបាលត្រូវអនុវត្តច្បាប់ ដោយចាប់ខ្លួនជនដៃដល់មកផ្ដន្ទាទោសតាមច្បាប់ ដើម្បីជម្រះមន្ទិលសង្ស័យនានាកន្លងមក។
ការប្រើអំពើហិង្សាលើលោក នី ណាក់ ធ្វើឡើងបន្ទាប់ពីលោកបានរិះគន់លើរដ្ឋាភិបាលបក្សកាន់អំណាចជាបន្តបន្ទាប់ចំពោះមន្ត្រីអសកម្ម និងការតែងតាំងមន្ត្រីតាមក្រសួងស្ថាប័នច្រើនហួសហេតុ ក្នុងនោះកាលពីថ្ងៃទី១១ ខែកញ្ញា នេះ លោក នី ណាក់ បានសរសេរលើគណនីហ្វេសប៊ុករបស់ខ្លួនថា លោកធ្លាប់ជាប់គុក ១៨ខែពីការនិយាយអំពីកសិកម្មមាន់ពាក់ម៉ាស់ ដូច្នេះលោកមិនអាចនៅស្ងៀមបានទេចំពោះពួកមន្ត្រីកសិកម្មដែលធ្វើការដើម្បីតែដេកស៊ីប្រាក់ខែដែលពលរដ្ឋបង់ពន្ធ។
ករណីប្រើប្រាស់អំពើហិង្សាលើអ្នកជំនាញខាងកសិកម្មលោក នី ណាក់ ជាករណីនេះទី១ របស់រដ្ឋាភិបាលដឹកនាំដោយលោក ហ៊ុន ម៉ាណែត។
ទាក់ទិននឹងបញ្ហានេះ សង្គមស៊ីវិលធ្លាប់បានបង្ហាញទិន្នន័យរបស់ខ្លួនថា ចាប់តាំងពីដើមឆ្នាំ២០១៩ មក សកម្មជនសង្គម សកម្មជននយោបាយ ត្រូវជនមិនស្គាល់មុខលបវាយប្រហារបណ្តាលឲ្យមានរបួសជាបន្តបន្ទាប់ រហូតមានអ្នកខ្លះបាក់ដៃ បាក់ជើង បាក់ឆ្អឹងជំនីរ បែកក្បាល ជាដើម ខណៈសំណុំរឿងទាំងនោះមិនត្រូវបានសមត្ថកិច្ចរដ្ឋាភិបាលលោក ហ៊ុន សែន បើកការស៊ើបអង្កេតវែកមុខរកជនដៃដល់ទាំងនោះឡើយ ទោះបីមានខ្សែវីដេអូតាមកាមេរ៉ាសុវត្ថិភាពបង្ហាញពីភិនភាគជនល្មើសទាំងនោះក៏ដោយ៕