អ្នកឃ្លាំមើលជំរុញឱ្យរដ្ឋាភិបាលកម្ពុជាជួយដោះស្រាយពលករខ្មែរដែលត្រូវបានអាជ្ញាធរថៃចាប់ខ្លួនរាប់រយនាក់កាលពីពេលថ្មីៗនេះ និងផ្តល់ឯកសារស្របច្បាប់ដល់ពួកគេ ដើម្បីជួយលើកស្ទួយពលករចំណាកស្រុកក្នុងការធានានូវសុវត្ថិភាពការងាររបស់ពួកគេ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី១៨ តុលា នេះថា លោកនាយករដ្ឋមន្ត្រី ហ៊ុន ម៉ាណែត ធ្លាប់បានលើកឡើងពីគោលនយោបាយរបស់ខ្លួនដែលត្រូវជួយទៅដល់កម្មករដែលកំពុងបម្រើការនៅក្នុងប្រទេសកម្ពុជា នៅថ្ងៃដែលខ្លួនឡើងកាន់តំណែងជានាយករដ្ឋមន្ត្រីកាលពីចុងខែសីហា កន្លងទៅ ប៉ុន្តែលោកក៏មិនត្រូវភ្លេចពលរដ្ឋខ្មែរដែលកំពុងធ្វើចំណាកស្រុកទៅធ្វើការនៅប្រទេសជិតខាងដែរ ជាពិសេសពលរដ្ឋខ្មែរដែលគ្មានឯកសារស្របច្បាប់ត្រឹមត្រូវដោយសារតែចាញ់បោកមេខ្យល់ ហើយកំពុងរស់នៅតែលតោលនៅក្រៅប្រទេសសព្វថ្ងៃនេះ។
លោក សេក សុជាតិ លើកឡើងថា ក្រសួងការងារកម្ពុជាតែងតែបង្ហាញរបាយការណ៍ស្ដីពីតួលេខប្រាក់ចំណូលសេដ្ឋកិច្ចជាតិដែលកម្ពុជាទទួលបានពីពលករចំណាកស្រុក ដែលកំពុងធ្វើការនៅប្រទេសជិតខាង ប៉ុន្តែក្រសួងការងារ និងរដ្ឋាភិបាលកម្ពុជា មិនទាន់បានដាក់ចេញនូវគោលនយោបាយរបស់ខ្លួន ដើម្បីជួយលើកស្ទួយពលករចំណាកស្រុកក្នុងការធានានូវសុវត្ថិភាពការងាររបស់ពួកគេនៅឡើយទេ ជាពិសេសពលករខ្មែរដែលធ្វើការនៅប្រទេសថៃ និងប្រទេសជប៉ុន ដែលគ្មានឯកសារស្របច្បាប់ត្រឹមត្រូវ ដោយសារចាញ់បោកមេខ្យល់ ហើយកំពុងប្រឈមនឹងការចាប់ខ្លួនពីសមត្ថកិច្ចរបស់ប្រទេសដែលពួកគេកំពុងរស់នៅសព្វថ្ងៃនេះ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិតរូបនេះ បញ្ជាក់ថា ប្រសិនបើរដ្ឋាភិបាលកម្ពុជាគ្មានសមត្ថភាពបង្កើតការងារ និងប្រាក់ចំណូលគ្រប់គ្រាន់ឱ្យពលរដ្ឋរបស់ខ្លួនធ្វើការនៅក្នុងប្រទេសទេ រដ្ឋាភិបាលគួរតែជួយគាំពារដល់ពលរដ្ឋដែលចំណាកស្រុកទៅធ្វើការនៅប្រទេសជិតខាងឱ្យបានល្អ ដើម្បីឱ្យស័ក្តិសមនឹងគោលនយោបាយដែលខ្លួនបានលើកឡើងសម្រាប់រដ្ឋាភិបាលថ្មី និងក្នុងនាមជានាយករដ្ឋមន្ត្រីថ្មីរបស់កម្ពុជាក្នុងអាណត្តិទី៧ នេះ។
ការអះអាងនេះ ធ្វើឡើងបន្ទាប់ពីពលករខ្មែរជាង ៤០០នាក់ត្រូវបានប៉ូលិសថៃ ចាប់ខ្លួនបន្ទាប់ពីពួកគេលួចឆ្លងដែនចូលទៅធ្វើការដោយគ្មានឯកសារស្របច្បាប់ក្នុងប្រទេសថៃ កាលពីពេលថ្មីៗនេះ។
កាលពីថ្ងៃទី១២ ខែតុលា ឆ្នាំ២០២៣ ប៉ូលិសថៃ បានចាប់ខ្លួនពលករខ្មែរជាង ៤០០នាក់នៅខេត្តអយុធ្យា ដែលភាគច្រើនជាកម្មករសំណង់ បន្ទាប់ពីមេខ្យល់របស់ពួកគេខកខានផ្តល់ឯកសារស្របច្បាប់ដល់ពលករខ្មែរទាំងនោះ ប៉ុន្តែក្រោយការចាប់ខ្លួន ពលករទាំងនោះក៏បានទាក់ទងទៅស្ថានទូតខ្មែរប្រចាំប្រទេសថៃផងដែរ ដើម្បីស្នើសុំឱ្យអាជ្ញាធរថៃដោះលែងពួកគេដែរ ប៉ុន្តែរហូតដល់ពេលនេះ នៅមិនទាន់មានការធ្វើអន្តរាគមន៍ណាមួយជាវិជ្ជមានពីមន្ត្រីស្ថានទូតខ្មែរនៅឡើយទេ។
ជុំវិញបញ្ហានេះ មន្ត្រីមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (CENTRAL) លោក លឹង សុផុន ដែលប្រចាំក្នុងប្រទេសថៃ បានអះអាងកាលពីពេលថ្មីៗនេះថា ប៉ូលិសថៃបានចាប់ខ្លួនមនុស្សជាង ១ពាន់នាក់ដែលឆ្លងដែនមកពីប្រទេសកម្ពុជា វៀតណាម និងភូមា មកធ្វើការនៅការដ្ឋានសំណង់ជាច្រើនកន្លែងក្នុងប្រទេសថៃ ក្នុងនោះក៏មានពលករខ្មែរដែលគ្មានឯកសារស្របច្បាប់ជាង ៤០០នាក់ដែរ ប៉ុន្តែកម្មករជាង ៣០០នាក់ត្រូវបានថៅកែក្រុមហ៊ុនធានាដោយការស្នើសុំប៉ូលិសថៃ ឱ្យដោះលែងពួកគេស្ថិតនៅក្រៅឃុំបណ្ដោះអាសន្ន ខណៈពលករផ្សេងទៀតកំពុងរង់ចាំការដោះស្រាយពីថៅកែរបស់ខ្លួន។
កាលពីថ្ងៃទី៥ ខែកក្កដា ឆ្នាំ២០២៣ គណៈរដ្ឋមន្ត្រីថៃ បានយល់ព្រមក្នុងការបន្តពេលវេលាសម្រាប់ពលករបរទេសដែលបានដាក់ស្នើបញ្ជីឈ្មោះអាចស្នាក់នៅ និងធ្វើការបានក្នុងប្រទេសថៃ រហូតដល់ថ្ងៃទី១៣ ខែកុម្ភៈ ឆ្នាំ២០២៥ និងពន្យារពេលសម្រាប់ពលករដែលបានចុះអនុសារណៈយោគយល់ (MoU) ដែលបានបញ្ចប់កិច្ចសន្យា ៤ឆ្នាំ អាចបន្តធ្វើការរហូតដល់ថ្ងៃទី៣០ ខែមេសា ឆ្នាំ២០២៤ ជាមួយនឹងការបញ្ចុះតម្លៃវីសាពី ២ពាន់បាត មកត្រឹមតែ ៥០០បាត ខណៈតម្លៃឯកសារស្នើសុំបន្តស្នាក់នៅប្រទេសថៃជាបណ្ដោះអាសន្ន គឺបន្ថយពី ១៩០០បាត មកត្រឹម ៥០០បាតប៉ុណ្ណោះ។
គណៈរដ្ឋមន្ដ្រីថៃ បានអនុម័តទៅលើសំណើរបស់ក្រសួងការងារថៃ ដូចជាបន្ធូរបន្ថយដល់ពលករបរទេស ក្នុងនោះថៅកែរោងចក្រដែលបានស្នើបញ្ជីឈ្មោះពលករត្រឹមថ្ងៃទី៣១ ខែកក្កដា ឆ្នាំ២០២៣ ស្របតាមការណែនាំរបស់គណៈរដ្ឋមន្ត្រី គឺអនុញ្ញាតឲ្យពលករបរទេសទាំងនោះអាចស្នាក់នៅ និងធ្វើការនៅក្នុងប្រទេសថៃរហូតដល់ថ្ងៃទី១៣ ខែកុម្ភៈ ឆ្នាំ២០២៥។
ជាងនេះទៀត ពលករដែលមកពីប្រទេសកម្ពុជា ឡាវ និងមីយ៉ាន់ម៉ា ដែលបានបញ្ចប់កិច្ចសន្យា (MOU) រយៈពេល ៤ឆ្នាំចន្លោះថ្ងៃទី១ ខែវិច្ឆិកា ឆ្នាំ២០២០ និងថ្ងៃទី៣១ ខែធ្នូ ឆ្នាំ២០២៣ អាចស្នាក់នៅ និងធ្វើការនៅក្នុងប្រទេសថៃ រហូតដល់ថ្ងៃទី៣០ ខែមេសា ឆ្នាំ២០២៤ ដែលអំឡុងពេលនោះ ថៅកែរោងចក្រត្រូវតែរៀបចំដំណើរការស្នើសុំការអនុញ្ញាតជ្រើសរើសពលករតាមប្រព័ន្ធ (MoU)។ បន្ទាប់ពីពេលនោះ ពលករបរទេសទាំងនោះអាចត្រឡប់ទៅកាន់ប្រទេសកំណើតវិញ ដើម្បីដំណើរការ និងត្រឡប់មកកាន់ប្រទេសថៃវិញ ដោយមិនចាំបាច់ត្រូវរង់ចាំរហូតរយៈពេលដល់ ៣០ថ្ងៃឡើយ។
ទាក់ទិននឹងបញ្ហានេះ របាយការណ៍របស់អង្គការសង់ត្រាល់ បានបង្ហាញកាលពីពេលថ្មីៗនេះថា គិតត្រឹមដើមឆ្នាំ២០២៣ នេះ ពលករខ្មែរដែលកំពុងរស់នៅ និងធ្វើការងារនៅក្នុងប្រទេសថៃ មានជាង ២លាននាក់ ក្នុងនោះពលករខ្មែរប្រមាណ ១លាននាក់ដែលមិនមានឯកសារស្របច្បាប់ កំពុងប្រឈមការកេងប្រវ័ញ្ចកម្លាំងពលកម្ម និងបារម្ភចំពោះការចាប់ខ្លួនពីសមត្ថកិច្ចថៃ។
ជាងនេះទៀត ប្រធានកម្មវិធីប្រឆាំងការជួញដូរមនុស្ស និងទេសន្តរប្រវេសន៍នៃអង្គការសង់ត្រាល់ លោក ឌីថេ ហូយ៉ា បានអះអាងកាលពីពេលកន្លងទៅថា ក្នុងចំណោមពលករខ្មែរជាង ១លាននាក់ដែលមិនមានឯកសារផ្លូវច្បាប់នេះ មួយចំនួនចូលទៅទឹកដីថៃដោយខុសច្បាប់ និងមួយចំនួនទៀតមានឯកសារផ្លូវច្បាប់ផុតកំណត់ តែមិនបានបន្តសុពលភាព។
ទាក់ទិននឹងបញ្ហានេះ កាលពីថ្ងៃទី៣ ខែតុលា ឆ្នាំ២០២៣ រដ្ឋមន្ត្រីក្រសួងមហាផ្ទៃលោក ស សុខា បានចេញសេចក្តីណែនាំមួយដោយបញ្ជាឱ្យអាជ្ញាធរខេត្តជាប់ព្រំដែនជាមួយប្រទេសជិតខាងគ្រប់ខេត្ត បិទច្រករបៀងខុសច្បាប់ទាំងអស់ជាបន្ទាន់។
លោក ស សុខា បញ្ជាក់ថា ក្រសួងមហាផ្ទៃបានកត់សម្គាល់ឃើញពីភាពខ្វះចន្លោះ និងភាពមិនប្រក្រតីមួយចំនួនដែលកើតចេញពីការធ្វេសប្រហែសក្នុងការអនុវត្តតួនាទីភារកិច្ចរបស់អាជ្ញាធរមានសមត្ថកិច្ចនៅតាមបណ្តាខេត្តជាប់ព្រំដែននាពេលកន្លងមក ដូច្នេះដើម្បីបង្ការ ទប់ស្កាត់ និងបង្ក្រាបរាល់បទល្មើសឆ្លងដែនគ្រប់ប្រភេទ និងបញ្ឈប់នូវការចេញឯកសារឆ្លងដែនមិនប្រក្រតី គឺមានតែបិទច្រករបៀងខុសច្បាប់ប៉ុណ្ណោះ៕