នាយករដ្ឋមន្ត្រីតពូជថ្មីលោក ហ៊ុន ម៉ាណែត ប្រកាសជំហរគាំទ្រ និងត្រៀមខ្លួនពេញទំហឹងក្នុងការសហការ និងអនុវត្តនូវគោលការណ៍មួយចំនួនដែលប្រធានាធិបតីចិន លោក ស៊ី ជីនពីង ប្រកាសក្នុងវេទិកាខ្សែក្រវាត់ និងផ្លូវលើកទី៣ ដែលទើបនឹងបញ្ចប់កាលពីថ្ងៃពុធ ទី១៨ តុលា។
ក្រសួងការបរទេសកម្ពុជា បានចេញសេចក្តីប្រកាសព័ត៌មានកាលពីថ្ងៃទី១៩ ខែតុលា ឆ្នាំ២០២៣ នេះថា លោក ហ៊ុន ម៉ាណែត បានបញ្ជាក់យ៉ាងច្បាស់ក្នុងវេទិកាខ្សែក្រវាត់ និងផ្លូវ ជាមួយនឹងនាយករដ្ឋមន្ត្រីចិន លោក លី ឈាង និងមន្ត្រីជាន់ខ្ពស់បក្សកុម្មុយនីស្តចិនជាច្រើនទៀតថា កម្ពុជានឹងធ្វើឱ្យស៊ីជម្រៅនូវដៃគូយុទ្ធសាស្ត្រគ្រប់ជ្រុងជ្រោយរវាងកម្ពុជា-ចិន ដូចជាការកសាងបណ្ដាញតភ្ជាប់ពហុវិស័យខ្សែក្រវាត់ និងផ្លូវ គាំទ្រឲ្យមានការផ្លាស់ប្ដូររវាងប្រជាជន និងប្រជាជន និងការលើកកម្ពស់កិច្ចសហប្រតិបត្តិការខ្សែក្រវាត់ និងផ្លូវ ជាដើម។
លោក ហ៊ុន ម៉ាណែត អះអាងថា លោកបានប្រកាសរួមគ្នាជាមួយប្រធានាធិបតីចិន លោក ស៊ី ជីនពីង ដោយកំណត់យកឆ្នាំ២០២៤ ជាឆ្នាំឯកភាពគ្នាពន្លឿនការអភិវឌ្ឍច្រករបៀង អភិវឌ្ឍកសិកម្ម និងច្រករបៀងមច្ឆា និងអង្គរ ក្នុងគោលបំណងបង្កើនកិច្ចសហប្រតិបត្តិការឧស្សាហកម្ម និងកសិកម្មទ្វេភាគី ដើម្បីធ្វើទំនើបកម្មវិស័យកសិកម្មនៅកម្ពុជាផងដែរ។
លោក ហ៊ុន ម៉ាណែត បញ្ជាក់ថា កម្ពុជា-ចិន បានឯកភាពគ្នាបង្កើននូវកិច្ចសហប្រតិបត្តិការខ្សែក្រវាត់ និងផ្លូវបន្ថែមទៀត ក្នុងការប្រយុទ្ធប្រឆាំងនឹងល្បែងភ្នាល់ឆ្លងដែន ការជួញដូរមនុស្ស និងគ្រឿងញៀន ឧក្រិដ្ឋកម្មតាមអ៊ីនធឺណិត និងព័ត៌មានក្លែងក្លាយ ជាដើម។ ជាងនេះទៀត កម្ពុជាក៏បញ្ជាក់ពីជំហររបស់ខ្លួននូវការប្រកាន់ខ្ជាប់នូវគោលនយោបាយចិនតែមួយផងដែរ។
កាលពីថ្ងៃទី១៦ ខែតុលា ឆ្នាំ២០២៣ លោក ហ៊ុន ម៉ាណែត បានដឹកនាំមន្ត្រីរដ្ឋាភិបាលរបស់ខ្លួនទៅចូលរួមក្នុងវេទិកាខ្សែក្រវាត់ និងផ្លូវ ក្នុងទីក្រុងប៉េកាំង ប្រទេសចិន ដែលមានរយៈពេល ៣ថ្ងៃ ចាប់ពីថ្ងៃទី១៦ ដល់ថ្ងៃទី១៩ ខែតុលា ឆ្នាំ២០២៣ នេះ។
មេដឹកនាំបក្សកាន់អំណាចលោក ហ៊ុន សែន ធ្លាប់បានអះអាងថា គម្រោងខ្សែក្រវាត់ និងផ្លូវរបស់ចិន គឺជាយន្តការឈ្នះឈ្នះ ដែលនឹងអាចជួយជំរុញស្ថានភាពអភិវឌ្ឍន៍របស់កម្ពុជាឱ្យក្លាយជាប្រទេសមានចំណូលមធ្យមនៅឆ្នាំ២០៣០ តាមរយៈនៃការកសាងមូលដ្ឋានសេដ្ឋកិច្ច បន្ទាប់ពីកម្ពុជាចូលជាសមាជិកនៃគំនិតផ្ដួចផ្ដើម «ខ្សែក្រវាត់ និងផ្លូវ» របស់ចិន កាលពីឆ្នាំ២០១៦។
ប៉ុន្តែអ្នកវិភាគនយោបាយ និងជាប្រធានវេទិកាពលរដ្ឋលោក គឹម សុខ បានប្រាប់សារព័ត៌មាន The Cambodia Daily នៅថ្ងៃទី២០ តុលា នេះថា ការប្រកាសជំហររបស់លោក ហ៊ុន ម៉ាណែត អនុវត្តតាមប្រព័ន្ធសេដ្ឋកិច្ចពាណិជ្ជកម្មរបស់ចិន ក្នុងវេទិកា ខ្សែក្រវាត់ និងផ្លូវនេះ គឺដោយសារតែគាត់ដឹងថា រដ្ឋាភិបាលថ្មីរបស់គាត់មិនមានការគាំទ្រពីបស្ចិមប្រទេសនោះទេ។
លោកបន្តថា ប្រទេសប្រជាធិបតេយ្យសេរីនៅលើពិភពលោកក៏មិនទាន់មានប្រទេសណាមួយចេញមុខប្រកាសជំហរដកទណ្ឌកម្មពីរដ្ឋាភិបាលថ្មីនេះដែរ។ លើសពីនេះទៅទៀត ក្រោយកិច្ចប្រជុំនៅឯអង្គការសហប្រជាជាតិ ក៏គេនៅមិនទាន់ឃើញក្រុមហ៊ុនបស្ចិមប្រទេសណាមួយមកបោះទុនវិនិយោគនៅកម្ពុជានោះដែរ។
លោក គឹម សុខ បញ្ជាក់ថា ប្រព័ន្ធសេដ្ឋកិច្ចរបស់កម្ពុជាជាប្រព័ន្ធមួយដែលទន់ខ្សោយ ដូច្នេះការប្រជ្រៀតខ្លួនកាន់តែខ្លាំងចូលទៅក្នុងប្រព័ន្ធហិរញ្ញវត្ថុរបស់ចិន អាចនឹងនាំឱ្យរូបិយប័ណ្ណរបស់ចិន ហូរចូលទៅក្នុងប្រព័ន្ធសេដ្ឋកិច្ចរបស់កម្ពុជាកាន់តែងាយ ស្របពេលដែលពលរដ្ឋខ្មែរ និងអ្នកវិនិយោគខ្មែរនៅមិនទាន់ឱ្យតម្លៃលើរូបិយប័ណ្ណចិន របស់ចិននៅឡើយ ហើយបញ្ហានេះអាចនឹងនាំឲ្យមានវិបត្តិសេដ្ឋកិច្ចដល់កម្ពុជាកាន់តែស្មុគស្មាញទៅវិញ។
លោកបន្ថែមថា ការប្រឹងប្រជ្រៀតខ្លួនចូលក្នុងប្រព័ន្ធហិរញ្ញវត្ថុរបស់ចិន ដើម្បីត្រដរខំរស់របស់លោក ហ៊ុន ម៉ាណែត នៅពេលនេះ ក៏មិនប្រាកដថារដ្ឋាភិបាលរបស់គាត់អាចរស់បានដែរ ព្រោះថាប្រព័ន្ធហិរញ្ញវត្ថុពិភពលោកបច្ចុប្បន្ន នៅតែពឹងផ្អែកលើលុយដុល្លាររបស់អាមេរិកតែប៉ុណ្ណោះ។
លោកបញ្ជាក់ថា ចិននឹងបង្ហូរលុយរបស់គេឱ្យរដ្ឋាភិបាលកម្ពុជាខ្ចីកាន់តែច្រើនដោយគ្មានតម្លាភាព ដែលជាហេតុធ្វើឱ្យកម្ពុជាធ្លាក់ចូលទៅក្នុងអន្ទាក់បំណុលកាន់តែជ្រៅ។
លោកបន្ថែមថា នៅពេលនោះ កម្ពុជាជំពាក់លុយចិនកាន់តែច្រើន ប៉ុន្តែការអភិវឌ្ឍ និងការវិនិយោគនានា ដូចជា ផ្លូវល្បឿនលឿន ព្រលានយន្តហោះ និងវារីអគ្គិសនី ជាដើម គឺចិនជាអ្នកគ្រប់គ្រងទាំងអស់ ខណៈផលប្រយោជន៍ដែលទទួលបានមកពីវិនិយោគទាំងនេះ គឺចិនជាអ្នកក្តោបក្តាប់រហូតដល់កន្លះសតវត្ស ចំណែកកម្ពុជាបានត្រឹមខូចខាតទ្រព្យសម្បត្តិជាតិ និងក្លាយជាកូនបំណុលរបស់ចិនប៉ុណ្ណោះ។
ទាក់ទិននឹងបញ្ហានេះ វិទ្យាស្ថាន Kiel Institute ដែលមានមូលដ្ឋាននៅប្រទេសអាល្លឺម៉ង់ ធ្លាប់អះអាងថា កម្ពុជាស្ថិតក្នុងចំណោមប្រទេសដែលមានអត្រាជំពាក់បំណុលចិនច្រើនជាងគេបំផុតលំដាប់ទី៦ ក្នុងចំណោមប្រទេស ៥០ លើពិភពលោក ដែលជាបំណុលមានហានិភ័យ ការប្រាក់ខ្ពស់ និងកង្វះតម្លាភាព។
ទាក់ទិននឹងបញ្ហានេះ កាលពីអំឡុងខែតុលា ឆ្នាំ២០២០ ក្រសួងសេដ្ឋកិច្ច និងហិរញ្ញវត្ថុកម្ពុជា បានព្យាករថា នៅក្នុងឆ្នាំ២០២០ កម្ពុជាបានបង្កើនកម្ចីពីបរទេសដល់ទៅជាង ៨,៦ពាន់លានដុល្លារអាមេរិក ខណៈឆ្នាំ២០២១ ខ្លួននឹងបង្កើនកម្ចីឱ្យដល់ជាង ១០ពាន់លានដុល្លារ ចំណែកឆ្នាំ២០២២ នឹងបង្កើនកម្ចីឱ្យបានជាង ១១ពាន់លានដុល្លារ រីឯនៅឆ្នាំ២០២៣ នឹងបង្កើនកម្ចីបន្ថែមឱ្យបានជាង ១២ពាន់លានដុល្លារ។ ដោយឡែកនៅឆ្នាំ២០២៤ កម្ពុជាក៏នឹងគ្រោងបង្កើនកម្ចីឱ្យបានជាង ១៣,៩ពាន់លានដុល្លារអាមេរិកផងដែរ៕