ក្រុមកូដករបង្ហាញការសោកស្ដាយ និងចាត់ទុកការសម្រេចរបស់សាលាឧទ្ធរណ៍ភ្នំពេញ ដែលតម្កល់សាលក្រមសាលាដំបូងរាជធានីភ្នំពេញ ផ្ដន្ទាទោសលើថ្នាក់ដឹកនាំសហជីពណាហ្គាវើលដ៍ កញ្ញា ឈឹម ស៊ីថរ និងសមាជិកផ្សេងទៀត ថាជារឿងអយុត្តិធម៌។
ការលើកឡើងរបស់កូដករនេះ បន្ទាប់ពីសាលាឧទ្ធរណ៍រាជធានីភ្នំពេញ នៅថ្ងៃទី១៩ ខែតុលា បានបើកសវនាការបណ្ដឹងជំទាស់ទៅនឹងសេចក្ដីសម្រេចរបស់សាលាដំបូងរាជធានីភ្នំពេញ កាលពីខែឧសភា ឆ្នាំ២០២៣។
ក្រោយពីបើកសវនាការពេញមួយព្រឹក តុលាការក៏ប្រកាសសាលដីកានារសៀលថ្ងៃដដែលនេះ ដោយសម្រេចតម្កល់សេចក្តីសម្រេចរបស់សាលាដំបូងរាជធានីភ្នំពេញ ដោយផ្ដន្ទាទោសអតីត និងបច្ចុប្បន្នជាថ្នាក់ដឹកនាំ និងសមាជិកសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍។
តំណាងកូដករក្រុមហ៊ុនណាហ្គាវើលដ៍ អ្នកស្រី ឈឹម សុខន ប្រាប់អ្នកសារព័ត៌មានបន្ទាប់ពីស្ដាប់តុលាការប្រកាសសាលដីកាថា កន្លងមក ពួកគេធ្វើការងារតស៊ូមតិជាមួយថៅកែ ដើម្បីតែផលប្រយោជន៍របស់កម្មករខ្មែរ បែរជាមកទទួលរងអយុត្តិធម៌ពីតុលាការម្ដងហើយម្ដងទៀត។
អ្នកស្រីបង្ហាញការសោកស្ដាយចំពោះសេចក្ដីសម្រេចរបស់សាលាឧទ្ធរណ៍រាជធានីភ្នំពេញ ទោះបីជាពួកគេបានបំភ្លឺបន្ថែមនៅខាងមុខចៅក្រមអំឡុងពេលបើកសវនាការថា ពួកគាត់មិនបានប្រព្រឹត្តបទល្មើសដូចតុលាការថ្នាក់ក្រោមចោទប្រកាន់ហើយក្ដី។
អំឡុងពេលតុលាការកំពុងបើកសវនាការ និងប្រកាសសាលដីកា ក្រុមកូដករក៏បាននាំគ្នាទៅប្រមូលផ្ដុំនៅខាងមុខតុលាការ ដោយសរសេរនៅលើបដាថា «ពីជនរងគ្រោះក្លាយជាអ្នកទោស និងដើម្បីសិទ្ធិសហជីព មិនមែនស៊ីឈ្នួល មិនមែនបទញុះញង់» ខណៈអ្នកខ្លះទៀតបានកាន់រូបថតរបស់កញ្ញា ឈឹម ស៊ីថរ ផងដែរ។
ថ្នាក់ដឹកនាំ និងសកម្មជនសហជីពក្រុមហ៊ុនណាហ្គាវើលដ៍ ត្រូវបានសាលាដំបូងរាជធានីភ្នំពេញកាលពីខែឧសភា ឆ្នាំ២០២៣ ផ្ដន្ទាទោសដាក់ពន្ធនាគារចន្លោះពី ១ឆ្នាំដល់ ២ឆ្នាំ ពីបទ «ញុះញង់ឲ្យប្រព្រឹត្តបទឧក្រិដ្ឋជាអាទិ៍» តាមមាត្រា ៤៩៤ និង ៤៩៥ នៃក្រមព្រហ្មទណ្ឌ បន្ទាប់ពីពួកគេបាននាំគ្នាធ្វើកូដកម្មទាមទារដំណោះស្រាយវិវាទការងារនៅក្រុមហ៊ុនណាហ្គាវើលដ៍។
ថ្នាក់ដឹកនាំ និងសកម្មជនសហជីពចំនួន ៨នាក់បានដាក់ពាក្យបណ្តឹងឧទ្ធរណ៍ជំទាស់នឹងសេចក្តីសម្រេចសាលាដំបូងរាជធានីភ្នំពេញ ក្នុងនោះ កញ្ញា ឈឹម ស៊ីថរ ដែលត្រូវបានសាលាដំបូងផ្ដន្ទាទោសពន្ធនាគាររយៈពេល ២ឆ្នាំ។
ចំណែកអ្នកស្រី ឈឹម សុខន អ្នកស្រី ហៃ សុភាព អ្នកស្រី ឃ្លាំង សុបិន្ដ កញ្ញា ស៊ុន ស្រីពេជ្រ និងអ្នកនាង ទូច សិរីមាស ត្រូវបានសាលាដំបូងផ្ដន្ទាទោសដាក់ពន្ធនាគារចំនួន ១៨ខែ រួមទាំងលោក សុខ ណារិទ្ធ និងអ្នកស្រី រី សុវណ្ណឌី ត្រូវបានសាលាដំបូងផ្ដន្ទាទោសចំនួន ១ឆ្នាំ ប៉ុន្តែទោសទាំងនោះត្រូវព្យួរ។
សមាជិកសហជីពណាហ្គាវើលដ៍ បានធ្វើកូដកម្មចាប់តាំងពីខែធ្នូ ឆ្នាំ២០២១ បន្ទាប់ពីក្រុមហ៊ុនកាស៊ីណូណាហ្គាវើលដ៍ បានបញ្ឈប់បុគ្គលិកដែលភាគច្រើនសុទ្ធតែជាសមាជិក និងថ្នាក់ដឹកនាំសហជីពណាហ្គាវើលដ៍។ សកម្មជនសហជីពមួយចំនួនត្រូវបានចាប់ខ្លួនកាលពីខែធ្នូ ឆ្នាំ២០២១ និងខែមករា ឆ្នាំ២០២២ ហើយត្រូវបានឃុំខ្លួនបណ្ដោះអាសន្នរង់ចាំសវនាការរហូតដល់ខែមីនា ឆ្នាំ២០២២។
ចំណែកកញ្ញា ឈឹម ស៊ីថរ ត្រូវបានសមត្ថកិច្ចចាប់ខ្លួនម្តងទៀតនៅក្នុងខែវិច្ឆិកា ឆ្នាំ២០២២ ដោយអាជ្ញាធរបានលើកឡើងថា កញ្ញាបានល្មើសនឹងវិធានការក្នុងការត្រួតពិនិត្យរបស់តុលាការ។ តាំងពីពេលនោះមក កញ្ញា ឈឹម ស៊ីថរ ត្រូវបានឃុំខ្លួននៅក្នុងពន្ធនាគារ «ម២» នៅព្រៃស ហើយសកម្មជនសហជីពដទៃទៀតនៅបន្តនៅក្រៅឃុំបណ្ដោះអាសន្នរហូតដល់សាលក្រមចូលជាស្ថាពរ។
ចាប់តាំងពីខែធ្នូ ឆ្នាំ២០២១ ដល់ខែតុលា ឆ្នាំ២០២៣ នេះ ក្រុមកូដករនៅមិនទាន់បានទទួលដំណោះស្រាយនៅឡើយទេ៕