រដ្ឋាភិបាលកម្ពុជាចេញអនុក្រឹត្យស្ដីពីការអនុវត្តកម្មវិធីជាតិជំនួយសង្គមផ្នែកបណ្ដុះបណ្ដាលជំនាញវិជ្ជាជីវៈដូនតាសម្រាប់យុវជនមកពីគ្រួសារក្រីក្រ និងគ្រួសារងាយរងនូវហានិភ័យ ដើម្បីផ្តល់ឱកាសស្មើៗគ្នាដល់ពួកគេក្នុងការទទួលបានការអភិវឌ្ឍជំនាញ និងឱកាសការងារកាន់តែល្អប្រសើរសម្រាប់បង្កើនប្រាក់ចំណូល និងជីវភាពរស់នៅ។
យោងតាមអនុក្រឹត្យរបស់រាជរដ្ឋាភិបាលចុះថ្ងៃទី១៤ ខែវិច្ឆិកា ឆ្នាំ២០២៣ នេះ បានបញ្ជាក់ថា សិស្សដែលបានចុះឈ្មោះចូលរៀនជំនាញវិជ្ជាជីវៈដូនតា នឹងទទួលបានការសិក្សាដោយមិនបង់ថ្លៃ ទទួលបានប្រាក់ឧបត្ថម្ភប្រចាំខែចំនួន ២៨ម៉ឺនរៀលក្នុងមួយខែ ហើយដែលកម្មវិធីសិក្សានេះមានការសម្របសម្រួលបណ្តុះបណ្តាលដោយក្រសួងវប្បធម៌ និងវិចិត្រសិល្បៈ។ វគ្គសិក្សានេះមានរយៈពេល ៤ខែ។
ក្នុងករណីសិក្សានៅវេនយប់ ឬចុងសប្តាហ៍ ប្រាក់ឧបត្ថម្ភនឹងត្រូវកំណត់ក្នុងសៀវភៅគោលស្ដីពីការអនុវត្តកម្មវិធី។ សម្រាប់ជំនាញវិជ្ជាជីវៈផ្សេងទៀត ការផ្តល់ប្រាក់ឧបត្ថម្ភមិនត្រូវលើសពី ១លាន ២សែនរៀលក្នុង ១វគ្គសិក្សានោះទេ។
អនុក្រឹត្យដដែលបានលើកឡើងថា ក្រសួងវប្បធម៌ និងវិចិត្រសិល្បៈ ជាអ្នកទទួលខុសត្រូវក្នុងការចុះឈ្មោះចូលរៀនកម្មវិធីជំនាញវិជ្ជាជីវៈដូនតា និងបញ្ជាក់ពីលក្ខខណ្ឌសិក្សារបស់យុវជនមកពីគ្រួសារមានបណ្ណសមធម៌ និងបណ្ណសម្គាល់គ្រួសារងាយរងហានិភ័យ។
ការរៀនជំនាញវិជ្ជាជីវៈដូនតា នឹងរៀបចំឡើងតាមគ្រឹះស្ថានអប់រំបណ្ដុះបណ្ដាល និងសាលាបណ្ដុះបណ្ដាលជំនាញវិជ្ជាជីវៈដូនតានៅតាមសហគមន៍ ដែលទទួលស្គាល់ដោយក្រសួងវប្បធម៌ និងវិចិត្រសិល្បៈ។
កម្មវិធីបណ្តុះបណ្តាលវិជ្ជាជីវៈ និងបច្ចេកទេសនេះ នឹងជួយដល់និស្សិតក្រីក្រជាង ១,៥លាននាក់។ កាលពីដើមឆ្នាំ២០២៣ លោក ហ៊ុន សែន អតីតនាយករដ្ឋមន្ត្រីកម្ពុជា បានស្នើឱ្យនិស្សិតយ៉ាងហោចណាស់ពី ២% ទៅ ៤% សិក្សាវិជ្ជាជីវៈជំនាញដូនតា។
ជំនាញវិជ្ជាជីវៈដូនតាមានដូចជា ជាងចម្លាក់ ស្មូន គំនូរ និងតម្បាញហូលផាមួង ជាដើម។
ក្រសួងវប្បធម៌ មានតួនាទីអនុវត្តការងារចាំបាច់នានាក្នុងដំណើរការបណ្ដុះបណ្ដាលនេះ រហូតដល់ការផ្ដល់សេវាប្រឹក្សាការងារប្រកបដោយប្រសិទ្ធភាព និងគុណភាព។ ទន្ទឹមនឹងនេះ ក្រសួងវប្បធម៌ ត្រូវធ្វើរបាយការណ៍ទិន្នន័យព័ត៌មាន និងផ្ទៀងទិន្នន័យផ្សេងៗតាមតម្រូវការរបស់អគ្គលេខាធិការដ្ឋានក្រុមប្រឹក្សាជាតិគាំពារសង្គម៕