មន្ត្រីជាន់ខ្ពស់របស់គណបក្សភ្លើងទៀន ព្រមានថា ស្ថានភាពនយោបាយរបស់ប្រទេសកម្ពុជាដែលធ្លាក់ដល់ចំណុចអាក្រក់សព្វថ្ងៃនេះ គឺជាការបង្កឡើងដោយក្រុមអ្នកកាន់អំណាច និងក្រុមប្រឆាំងមួយចំនួន ដែលពួកគេតែងចោទប្រកាន់ក្រុមអ្នករិះគន់របស់ខ្លួនថាជាជនក្បត់ ជាដើម ហើយដែលអត្តចរិតនយោបាយបែបនេះ បានបំផ្លាញប្រទេសកម្ពុជារហូតដល់ពេលនេះ។
អនុប្រធានគណបក្សភ្លើងទៀន លោក សុន ឆ័យ បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី១៣ វិច្ឆិកា នេះថា ក្រុមប្រឆាំងក៏មិនខុសពីក្រុមអ្នកកាន់អំណាចដែរ គឺតែងតែចោទប្រកាន់ទៅលើអ្នកដែលរិះគន់នូវទង្វើខុសឆ្គងរបស់ខ្លួន ថាជាជនក្បត់ជានិច្ច ទោះបីការរិះគន់នោះដើម្បីកែលំអក៏ដោយ ដែលបញ្ហានេះធ្វើឱ្យអ្នកដែលមាននិន្នាការកណ្តាលដែលចង់ផ្តល់មតិយោបល់ដើម្បីស្ថាបនា ត្រូវរងនូវការចោទប្រកាន់យ៉ាងអយុត្តិធម៌ និងរងនូវការលាបពណ៌យ៉ាងសាហាវ។
លោក សុន ឆ័យ លើកឡើងថា ដោយសារតែមើលឃើញនូវស្ថានភាពដ៏អាក្រក់បែបនេះហើយ ទើបបក្សភ្លើងទៀន កំណត់គោលដៅកែប្រែស្ថានភាពនយោបាយប្រទេសជាតិរបស់ខ្លួនឱ្យល្អប្រសើរជាងមុន ដើម្បីលទ្ធិប្រជាធិបតេយ្យនៅកម្ពុជា ប៉ុន្តែជាអកុសល គណបក្សនេះត្រូវរងនូវការរាំងខ្ទប់គ្រប់បែបយ៉ាងសព្វថ្ងៃនេះ ទាំងខាងអ្នកកាន់អំណាច និងខាងក្រុមប្រឆាំងមួយចំនួន។
អនុប្រធានគណបក្សភ្លើងទៀនរូបនេះត្អូញត្អែរថា ការតស៊ូដើម្បីលទ្ធិប្រជាធិបតេយ្យ គឺពិតជារងនូវការលំបាកណាស់ ប៉ុន្តែដោយសារបក្សភ្លើងទៀន គឺជាបក្សតំណាងឱ្យឆន្ទៈពលរដ្ឋ បានដាក់គោលដៅនយោបាយរបស់ខ្លួនថា នឹងត្រូវដឹកនាំនយោបាយដោយតម្កល់ផលប្រយោជន៍ជាតិ និងពលរដ្ឋជាធំ ដូច្នេះហើយទើបគណបក្សនេះព្យាយាមតស៊ូជម្នះឧបសគ្គរហូតដល់ពេលនេះ។
ចំណែកអនុប្រធានវេទិកាពលរដ្ឋលោក ម៉ែន ណាត បានលើកឡើងនៅក្នុងកម្មវិធីពិភាក្សានេះដែរថា បក្សកាន់អំណាចបានប្រើវិធីគ្រប់បែបយ៉ាងដើម្បីគាបសង្កត់បិទសេរីភាពនយោបាយរបស់គណបក្សភ្លើងទៀន ទាំងយន្តការរដ្ឋបាល យន្តការច្បាប់ និងការប្រើអំណាចរបស់លោក ហ៊ុន សែន តាមរយៈស្ថាប័នពាក់ព័ន្ធដែលស្ថិតក្រោមសេណារីយ៉ូរបស់ខ្លួនរហូតមក។ លោកបន្ថែមថា ស្ថានភាពនេះទោះបីជាបក្សភ្លើងទៀនមានបំណងស្ដារស្ថានភាពនយោបាយរបស់កម្ពុជាឱ្យល្អប្រសើរឡើងវិញក៏ដោយ គឺពិតជាពិបាកមើលឃើញពន្លឺខ្លាំងណាស់។
លោក ម៉ែន ណាត លើកឡើងថា កម្ពុជាដែលធ្លាក់ចូលក្នុងស្ថានភាពអាក្រក់បែបនេះ ក៏ដោយសារតែពលរដ្ឋមានការភាន់ច្រឡំទៅលើក្រុមអ្នកកាន់អំណាចថាជាក្រុមអ្នកប្រជាធិបតេយ្យដែរ ដែលធ្វើឱ្យពួកគេយល់ថា ទង្វើក្រុមអ្នកកាន់អំណាចទាំងនោះគឺដើម្បីប្រជាធិបតេយ្យ និងដើម្បីផលប្រយោជន៍របស់ពលរដ្ឋ។
ការដឹកនាំនយោបាយរបស់លោក ហ៊ុន សែន ចាប់តាំងពីឡើងកាន់តំណែងជានាយករដ្ឋមន្ត្រីឆ្នាំ១៩៨៥ មក ត្រូវគេមើលឃើញថា មេដឹកនាំខ្មែររូបនេះបានប្រើអំណាចហួសដែនកំណត់ ដោយការរំលោភលើសិទ្ធិមូលដ្ឋានរបស់ពលរដ្ឋ ធ្វើទុក្ខបុកម្នេញទៅលើក្រុមអ្នកនយោបាយក្រៅរដ្ឋាភិបាល រំលោភបំពានរដ្ឋធម្មនុញ្ញ រំលោភព្រះមហាក្សត្រ និងរំលោភលើច្បាប់អន្តរជាតិនានា ដូចជា កិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ជាដើម ដែលធ្វើឱ្យបរិយាកាសនយោបាយរបស់កម្ពុជាអាប់អួររហូតទល់ពេលនេះ។
សហភាពអឺរ៉ុប និងបណ្តាប្រទេសលោកសេរីជាច្រើន នៅតែជំរុញឱ្យអ្នកនយោបាយខ្មែរវិលទៅរកការចរចាបញ្ចប់ជម្លោះនយោបាយ ដោយតម្កល់ផលប្រយោជន៍ជាតិឱ្យធំជាងផលប្រយោជន៍បុគ្គល ឬបក្សរបស់ខ្លួន ប៉ុន្តែមកទល់ពេលនេះ ពន្លឺនៃការចរចានយោបាយរបស់អ្នកនយោបាយកំពូលៗនៅកម្ពុជា នៅមិនទាន់លេចចេញនៅឡើយទេ ដែលជាហេតុធ្វើឱ្យប្រទេសដ៏កម្សត់មួយនេះធ្លាក់ចុះទ្រុឌទ្រោមទាំងសេដ្ឋកិច្ច និងប្រព័ន្ធនយោបាយរបស់ខ្លួនសព្វថ្ងៃនេះ៕