លោកនាយករដ្ឋមន្ត្រី ហ៊ុន ម៉ាណែត នឹងដាក់ចេញផែនការកំណែទម្រង់រចនាសម្ព័ន្ធតាមក្រសួងឡើងវិញនៅឆ្នាំ២០២៤ ខាងមុខនេះ ដើម្បីកុំឱ្យអនុវត្តផែនការការងារជាន់គ្នា ដែលនាំឲ្យក្រសួងនីមួយៗពិបាកក្នុងការសម្រេចចិត្ត។
ថ្លែងនៅក្នុងពិធីប្រកាសឱ្យអនុវត្តជាផ្លូវការ «កម្មវិធីគោលនយោបាយអាទិភាពទី៥ និងទី៦» របស់រដ្ឋាភិបាលអាណត្តិទី៧ ដែលផ្ដោតលើវិស័យកសិកម្មនាព្រឹកថ្ងៃទី២០ វិច្ឆិកា លោក ហ៊ុន ម៉ាណែត ថាអាណត្តិថ្មីនៅឆ្នាំ២០២៤ នេះ គឺលោកដាក់គោលដៅកំណែទម្រង់រដ្ឋបាលសាធារណៈ គឺគ្រប់ក្រសួងត្រូវពិនិត្យឡើងវិញនូវរចនាសម្ព័ន្ធផ្ទៃក្នុង ពិនិត្យតួនាទីភារកិច្ចរបស់ខ្លួន ព្រោះកន្លែងខ្លះជាន់គ្នា។
លោក ហ៊ុន ម៉ាណែត ដែលទើបតែស្នងតំណែងពីឪពុកនាពេលថ្មីៗនេះ បានលើកឡើងថា ដោយសារផែនការ និងគោលនយោបាយមានភាពប្រទាក់ក្រឡាគ្នាជាអន្តរក្រសួង និងភាគីពាក់ព័ន្ធ ដូច្នេះលោកណែនាំឱ្យមន្ត្រីចេះសហការគ្នាអនុវត្តផែនការ ដោយមិនត្រូវមើលស្រាលការងារ និងប្រចាំគ្នាដូចពាក្យចាស់ពោលថា «គ្នាច្រើន អន្សមខ្លោចនោះទេ»។
លោកនាយករដ្ឋមន្ត្រីកម្ពុជា ហ៊ុន ម៉ាណែត លើកឡើងថា ឧទាហរណ៍ថាបើការងារនោះពាក់ព័ន្ធនឹងវិស័យកសិកម្ម គឺរដ្ឋមន្ត្រីកសិកម្ម ត្រូវដឹកនាំក្បាលម៉ាស៊ីនរៀបចំកិច្ចប្រជុំជាមួយភាគីពាក់ព័ន្ធ ដូចជា ក្រសួងធនធានទឹក និងឧតុនិយម ក្រសួងអភិវឌ្ឍន៍ជនបទ ជាដើម ក្នុងការពិភាក្សាគ្នារកចំណុចរួមមួយដាក់ចេញសកម្មភាព និងដំណោះស្រាយឱ្យចំគោលដៅ ទើបផែនការការងារមានប្រសិទ្ធភាព។
លោកថា ចំពោះការបំពេញការងារទៀត គឺមិនអាស្រ័យលើការចំណាយច្រើន ទើបមានប្រសិទ្ធភាពទេ គឺចេះប្រើប្រាស់ថវិកាតិច តែចំគោលដៅវិញ ដូច្នេះមន្ត្រីឱ្យធ្វើការដោយចេញពីបេះដូង។
ថ្លែងចំពោះមុខរដ្ឋមន្ត្រី និងថ្នាក់ដឹកនាំពាក់ព័ន្ធទាំងអស់ ប្រមុខរដ្ឋាភិបាលក៏មើលឃើញដែរពីបញ្ហាធ្វើការជាន់គ្នា និងត្រួតស៊ីគ្នារបស់ក្រសួង និងស្ថាប័នជាតិ និងថ្នាក់ក្រោមជាតិកន្លងមក ដែលរំខានដល់ការអនុវត្តការងារឱ្យមានប្រសិទ្ធភាព។
លោក ហ៊ុន ម៉ាណែត លើកឡើងថា បញ្ហាការងារជាន់គ្នា និងត្រួតស៊ីគ្នានេះ គឺលោកចង់សំដៅលើកិច្ចការងារតែមួយទេ តែវាពាក់ព័ន្ធ និងប្រទាក់ក្រឡាគ្នាជាអន្តរក្រសួង ដែលពិបាកដល់ការសម្រេចចិត្តនានារបស់ថ្នាក់ដឹកនាំស្ថាប័នទាំងនោះ ជាពិសេសពិបាករកចំណុចឯកភាពគ្នាដែលប៉ះពាល់ដល់ការអនុវត្តការងារឱ្យមានប្រសិទ្ធភាព។
លោកថា ដូចជាករណីបូមខ្សាច់កន្លងមក គឺស្ថិតនៅក្រោមការគ្រប់គ្រងរបស់ក្រសួងរ៉ែ និងថាមពលផង ហើយផ្នែកខ្លះទៀតស្ថិតក្រោមការទទួលខុសត្រូវរបស់ក្រសួងធនធានទឹក និងឧតុនិយមផង។
អ្នកផ្តល់ប្រឹក្សាផ្នែកអភិវឌ្ឍផ្នត់គំនិត និងការស្រាវជ្រាវលោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី២០ វិច្ឆិកា នេះថា តាមការសង្កេតរបស់លោកនៅក្នុងរដ្ឋាភិបាលថ្មីនេះគឺមានការតែងតាំងអ្នកចាស់ ហើយនិងអ្នកថ្មីដែលមើលទៅឃើញក្បាលម៉ាស៊ីនដឹកនាំជាងមុន ហើយខ្លួនតូច។
លោកថា ការតែងតាំងនេះជាដើមចមធ្វើឲ្យមានការអនុវត្តតួនាទីជាន់គ្នា និងឱ្យការអនុវត្តការងារគ្មានប្រសិទ្ធភាព។ លោកថា អ្នកចាស់យល់ដឹងការងារស៊ីជម្រៅជាងអ្នកថ្មី ដែលធ្វើឲ្យអ្នកចាស់លូកដៃក្នុងការងារស៊ីជម្រៅជាងអ្នកថ្មី។
ចំណែកឯអ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានលើកឡើងថា លោកស្វាគមន៍ចំពោះចំណាត់ការរបស់រដ្ឋាភិបាលទៅលើការកំណែទម្រង់នេះ ពីព្រោះរដ្ឋាភិបាលលោក ហ៊ុន ម៉ាណែត បានតែងតាំងមន្ត្រីរបស់ខ្លួនច្រើនលើសលប់ ជាហេតុធ្វើឲ្យការអនុវត្តការងារគ្មានប្រសិទ្ធភាព និងចំណាយថវិការបស់រដ្ឋអស់ច្រើន និងមិនចំគោលដៅ៕