ប្រធានរដ្ឋសភាកម្ពុជា អ្នកស្រី ឃួន សុដារី គ្រោងនឹងចូលរួមកិច្ចប្រជុំកំពូលសភារវាងកម្ពុជា ឡាវ និងវៀតណាម ស្ដីពីតំបន់ត្រីកោណអភិវឌ្ឍន៍ (CLV) ជាលើកដំបូងក្រោយពីឡើងកាន់តំណែងរបស់ខ្លួនចាប់ពីថ្ងៃទី៤ ដល់ថ្ងៃទី៧ ខែធ្នូ ឆ្នាំ២០២៣ នៅទីក្រុងវៀងចន្ទន៍ ដែលរដ្ឋសភាសាធារណរដ្ឋប្រជាធិបតេយ្យប្រជាមានិតឡាវ ធ្វើជាម្ចាស់ផ្ទះ។
អគ្គលេខាធិការដ្ឋាននៃរដ្ឋសភាកម្ពុជា ចេញសេចក្តីប្រកាសព័ត៌មាននៅថ្ងៃទី២៩ ខែវិច្ឆិកា ឆ្នាំ២០២៣ នេះថា កិច្ចប្រជុំកំពូលសភានៃប្រទេសទាំងបី ធ្វើឡើងដើម្បីពង្រឹង និងពង្រីកកិច្ចសហប្រតិបត្តិការនានាឱ្យកាន់តែស៊ីជម្រៅគ្រប់ជ្រុងជ្រោយ ក្នុងការគាំទ្រដល់គម្រោងអភិវឌ្ឍន៍របស់រដ្ឋាភិបាលនៃប្រទេសទាំងបី ដែលបានបង្កើតឡើងនូវតំបន់ត្រីកោណអភិវឌ្ឍន៍ (CLV-DTA) កាលពីឆ្នាំ១៩៩៩ និងក្នុងគោលដៅប្រែក្លាយតំបន់ត្រីកោណអភិវឌ្ឍន៍នេះឱ្យក្លាយទៅជាតំបន់សន្តិភាព និងអភិវឌ្ឍន៍ ប្រកបដោយនិរន្តរភាពស្របតាមទស្សនៈដើមរបស់មេដឹកនាំបក្សកាន់អំណាចលោក ហ៊ុន សែន។
អគ្គលេខាធិការដ្ឋាននៃរដ្ឋសភាកម្ពុជា អះអាងថា មុននឹងចូលរួមកិច្ចប្រជុំកំពូលសភានៃប្រទេសទាំងបី ប្រធានរដ្ឋសភាកម្ពុជា អ្នកស្រី ឃួន សុដារី នឹងធ្វើដំណើរទស្សនកិច្ចនៅសាធារណរដ្ឋសង្គមនិយមវៀតណាម រយៈពេល ៣ថ្ងៃ ចាប់ពីថ្ងៃទី៣០ ខែវិច្ឆិកា ដល់ថ្ងៃទី២ ខែធ្នូ ឆ្នាំ២០២៣ ដើម្បីជួបពិភាក្សាការងារទ្វេភាគីជាមួយអគ្គលេខាធិការបក្សវៀតណាម លោក ង្វៀន ភូជុង (NGUYEN Phu Trong) ប្រធានរដ្ឋវៀតណាម លោក វូ វ៉ាន់ធួង (VO Van Thuong) និងប្រធានរដ្ឋសភាវៀតណាម លោក វឿង ឌិញហ្វេ (VUONG Dinh Hue) ផងដែរ។
សេចក្តីជូនដំណឹងស្ដីពីកិច្ចប្រជុំកំពូលសភាកម្ពុជា ឡាវ និងវៀតណាម នេះ ធ្វើឡើងស្របពេលដែលគេមើលឃើញថា វៀតណាមកំពុងប្រើតំបន់ត្រីកោណអភិវឌ្ឍន៍នេះគ្រប់គ្រងប្រទេសកម្ពុជា និងឡាវ ទៅថ្ងៃមុខ។
តំបន់អភិវឌ្ឍន៍ត្រីកោណ (ឬហៅថា CLV) បានព្រមព្រៀងបង្កើតឡើងកាលពីឆ្នាំ១៩៩៩ ដោយរដ្ឋាភិបាលកម្ពុជា ឡាវ និងវៀតណាម ក្នុងនោះមានខេត្តចំនួន ១២ ដែលភាគីនីមួយៗបានដាក់បញ្ចូលក្នុងតំបន់ត្រីកោណអភិវឌ្ឍន៍នេះ រួមមាន ខាងភាគីកម្ពុជា បានដាក់ខេត្តក្រចេះ ស្ទឹងត្រែង រតនគិរី និងមណ្ឌលគិរី រីឯភាគីឡាវ បានដាក់ខេត្ត ៤ ដែរដូចជាខេត្តចំប៉ាសាក់ សាលវ៉ាន់ សេកុង និងខេត្តអាតាពើ។ ចំណែកភាគីវៀតណាម សម្រេចដាក់ខេត្ត ៤ ដូចគ្នា គឺខេត្តយ៉ាឡាយ កនតុម ដាក់ឡាក់ និងខេត្តប៊ិញភឿក។
ខេត្តទាំង ៤ របស់កម្ពុជា មានចំនួនប្រជាជនសរុបប្រមាណជា ៥០ម៉ឺននាក់ប៉ុណ្ណោះ ខណៈខេត្តទាំង ៤ របស់ប្រទេសឡាវ មានប្រជាជនប្រមាណជា ៧០ម៉ឺននាក់ ដោយឡែកខេត្តទាំង ៤ របស់ប្រទេសវៀតណាម មានប្រជាជនសរុបប្រមាណជាង ៧លាននាក់ឯណោះ។
ក្រុមអ្នកឃ្លាំមើលសង្គមលើកឡើងថា ប្រសិនបើប្រទេសវៀតណាម គ្រាន់តែបញ្ជូនប្រជាជនរបស់គេត្រឹមតែ ១លាននាក់ចូលមកធ្វើការ និងរកស៊ីក្នុងខេត្តទាំង ៤ របស់កម្ពុជា ដែលបានដាក់ក្នុងតំបន់ត្រីកោណអភិវឌ្ឍន៍នេះ ក៏ជនជាតិវៀតណាមច្រើនជាងពលរដ្ឋខ្មែរដល់ទៅពាក់កណ្ដាលដែរ ដូច្នេះគឺពិតជាគ្រោះថ្នាក់ខ្លាំងណាស់សម្រាប់កម្ពុជា ខណៈបរទេសឈ្លានពានមួយនេះនៅតែចិញ្ចឹមមហិច្ឆតារំលោភកាន់កាប់កម្ពុជាជាប់មិនដាច់រហូតដល់ពេលនេះ។
អនុប្រធានវេទិកាពលរដ្ឋលោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី២៩ វិច្ឆិកា នេះថា កម្ពុជាត្រូវតែដកខ្លួនចេញពីគម្រោងតំបន់ត្រីកោណអភិវឌ្ឍន៍ (Development Triangle Area) ជាបន្ទាន់ ព្រោះថាគម្រោងនេះគ្រាន់តែជាផែនការរបស់វៀតណាម ដើម្បីឈ្លានពានព្រំដែន សេដ្ឋកិច្ច និងនយោបាយប្រជាសាស្ត្រលើកម្ពុជាប៉ុណ្ណោះ ដូច្នេះ កម្ពុជាមិនទទួលបានផលចំណេញពីគម្រោងនេះទេ គឺមានតែខាតបង់ប៉ុណ្ណោះ។
លោក ម៉ែន ណាត បញ្ជាក់ថា ខេត្តខ្មែរដែលស្ថិតក្នុងតំបន់ត្រីកោណនេះ រួមមានខេត្តរតនគិរី មណ្ឌលគិរី ក្រចេះ និងស្ទឹងត្រែង ពុំមានការរីកចម្រើនទេ ប៉ុន្តែព្រៃឈើប្រណិតរបស់ខ្មែរនៅខេត្តទាំងនោះមានតែហិនហោចទៅៗ។
កាលពីចុងខែមេសា ឆ្នាំ២០២៣ បណ្ឌិត ឌី ការ៉េត បានលើកឡើងពីប្រវត្តិរបស់គណបក្សប្រជាជនកម្ពុជា ថាជាគណបក្សដែលត្រូវបានបង្កើតឡើងដោយវៀតណាម ដើម្បីគ្រប់គ្រងប្រទេសកម្ពុជា តាមរយៈនៃការបង្កើតឱ្យមានតំបន់ត្រីកោណអភិវឌ្ឍន៍រវាងកម្ពុជា ឡាវ និងវៀតណាម សព្វថ្ងៃនេះ។
បណ្ឌិត ឌី ការ៉េត អះអាងថា តំបន់ត្រីកោណអភិវឌ្ឍន៍រវាងប្រទេសកម្ពុជា ឡាវ និងវៀតណាម គឺជាផែនការរបស់វៀតណាម ដែលមានចេតនាបង្កប់កងទ័ពយួនឱ្យចូលទៅក្នុងទឹកដីខ្មែរ ដើម្បីគ្រប់គ្រងខ្មែរប៉ុណ្ណោះ។
លោកបន្ថែមថា តំបន់ត្រីកោណនេះ គឺមានឈ្មោះដើមថា សហព័ន្ធឥណ្ឌូចិនវៀតណាម ប៉ុន្តែក្រោយមកដោយខ្លាចមានការតវ៉ាពីប្រជាពលរដ្ឋខ្មែរ វៀតណាមក៏បានកែឈ្មោះមកជា តំបន់ត្រីកោណអភិវឌ្ឍន៍វិញ។
អ្នកជំនាញព្រំដែនរូបនេះបញ្ជាក់ថា ផែនការរបស់វៀតណាម ក្នុងការគ្រប់គ្រងទឹកដីខ្មែរ គឺជាផែនការសម្ងាត់របស់លោក ហ៊ុន សែន ជាមួយនឹងវៀតណាម ជាយូរមកហើយ ព្រោះថាតំបន់ត្រីកោណអភិវឌ្ឍន៍នេះ ត្រូវបានវៀតណាមដាក់ផែនការពង្រីកបន្តិចម្តងៗតាមរយៈនៃការដាក់ខេត្តខ្មែរចូលក្នុងតំបន់នេះម្តងមួយជំហានៗ។ ជាក់ស្តែង ពេលចាប់ផ្តើមដំបូង ពួកគេដាក់ខេត្តត្រឹមតែពីរប៉ុណ្ណោះ ប៉ុន្តែពួកគេបានព្យាយាមបញ្ចូលខេត្តផ្សេងទៀតជាបន្តបន្ទាប់រហូតដល់ ៤ខេត្តដូចសព្វថ្ងៃនេះ៕