វិស័យសណ្ឋាគារ និងមគ្គុទ្ទេសក៍ទេសចរណ៍ជាច្រើននាក់ ត្អូញត្អែរដូចៗគ្នាថា វិស័យទេសចរណ៍កម្ពុជាដែលកំពុងប្រឈមនឹងការកើនឡើងយឺត ឬអាចនឹងធ្លាក់ចុះទៅវិញ រួមទាំងបង្កឱ្យមានអសន្តិសុខជាតិផងដែរ បន្ទាប់ពីមានការប្រព្រឹត្តអំពើពុករលួយពីសំណាក់មន្ត្រីប៉ូលិសអន្តោប្រវេសន៍ដែលប្រចាំការនៅអាកាសយានដ្ឋាននានារបស់កម្ពុជាសព្វថ្ងៃនេះ។
អ្នកគ្រប់គ្រងសណ្ឋាគារ និងមគ្គុទ្ទេសក៍ទេសចរណ៍ជាច្រើននាក់នៅខេត្តសៀមរាប ប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះ ក្នុងបំណងផ្តាំផ្ញើដល់អាជ្ញាធរពាក់ព័ន្ធក្នុងវិស័យទេសចរណ៍នៅថ្ងៃទី២៩ វិច្ឆិកា នេះថា ផ្នែកបដិសណ្ឋារកិច្ច និងផ្នែកផ្តល់សេវាដល់ភ្ញៀវបរទេស ដូចជា សណ្ឋាគារ និងមគ្គុទ្ទេសក៍ទេសចរណ៍ ជាដើម តែងរងនូវផលប៉ះពាល់ដ៏អាក្រក់ដែលកើតចេញពីអំពើពុករលួយរបស់មន្ត្រីប៉ូលិសអន្តោប្រវេសន៍កម្ពុជា ដែលជាហេតុធ្វើឱ្យភ្ញៀវទេសចររាងចាលលែងហ៊ានមកលេងប្រទេសកម្ពុជាបន្តទៀត។
ប្រភពខាងលើលើកឡើងថា ប៉ូលិសអន្តោប្រវេសន៍ដែលប្រចាំការនៅអាកាសយានដ្ឋាននានា កំពុងនាំគ្នាសម្ងំប្រព្រឹត្តអំពើពុករលួយចំពោះភ្ញៀវទេសចរដែលបាត់បណ្ណព័ត៌មាន ដែលជាបណ្ណកត់ត្រាអំពីប្រវត្តិធ្វើដំណើរ កន្លែងស្នាក់នៅ និងសម្ភារៈរបស់ភ្ញៀវ ជាដើម ដោយពួកគេតម្រូវឱ្យភ្ញៀវបង់លុយក្នុងតម្លៃខ្ពស់ចាប់ពី ១៥០ដុល្លារអាមេរិកឡើងទៅក្នុងម្នាក់ ជាថ្នូរឱ្យភ្ញៀវទាំងនោះអាចចូលមកលេងក្នុងប្រទេសកម្ពុជាបាន ប៉ុន្តែបើភ្ញៀវណាមិនព្រមបង់លុយ ពួកគេនឹងឃាត់ខ្លួនឱ្យរង់ចាំនៅក្នុងព្រលានយន្តហោះនោះចាប់ពី ៣០នាទីរហូតដល់ទៅ ១ម៉ោង ទើបពួកគេឱ្យចាកចេញពីព្រលាន ដែលបញ្ហានេះបានធ្វើឱ្យភ្ញៀវខឹងសម្បាយ៉ាងខ្លាំង រហូតធ្វើឱ្យពួកគេជះកំហឹងដាក់មគ្គុទ្ទេសក៍ទេសចរណ៍ និងខាងសណ្ឋាគារថែមទៀត។
អ្នកគ្រប់គ្រងសណ្ឋាគារ និងមគ្គុទ្ទេសក៍ទេសចរណ៍ខាងលើ បញ្ជាក់ថា នៅពេលដែលភ្ញៀវទាំងនោះរងនូវការធ្វើទុក្ខបុកម្នេញដោយអំពើពុករលួយពីមន្ត្រីអន្តោប្រវេសន៍ទាំងនោះ ពួកគេបានទាមទារឱ្យខាងសណ្ឋាគារដែលពួកគេស្នាក់នៅ បន្ថែមសេវាផ្សេងៗលើសពីលក្ខខណ្ឌ ដូចជា ការទាមទារឱ្យបញ្ចុះតម្លៃក្នុងការស្នាក់នៅ ជាដើម ខណៈមគ្គុទ្ទេសក៍ទេសចរណ៍ក៏រងនូវការស្ដីបន្ទោស ឬនិយាយចំអកឡកឡាយពីភ្ញៀវទាំងនោះផងដែរ ដូចជា ពាក្យថា បើសេវាទេសចរណ៍របស់អ្នកល្អ ហេតុអ្វីមានអំពើពុករលួយ ជាដើម។ ជាងនេះទៀត មានភ្ញៀវខ្លះក៏បានរិះគន់សេវារបស់សណ្ឋាគារ ដោយដាក់ពិន្ទុក្នុងកម្រិតទាបលើការវាយតម្លៃតាមអនឡាញផងដែរ។
ប្រភពដដែលគូសបញ្ជាក់ថា មានសណ្ឋាគារខ្លះត្រូវបង់ខាតធ្ងន់ធ្ងរ ដោយសារតែពួកគេបង្ខំចិត្តបង់លុយទៅឱ្យភ្ញៀវទាំងនោះវិញ ជាថ្នូរនឹងការទទួលពិន្ទុខ្ពស់ ក្រោយពីការរិះគន់របស់ភ្ញៀវទាំងនោះ ព្រោះថាប្រសិនបើសណ្ឋាគាររបស់ពួកគេទទួលបានពិន្ទុទាបពីការវាយតម្លៃរបស់ភ្ញៀវ នោះសណ្ឋាគារពួកគេនឹងលែងទទួលបានការមកស្នាក់នៅរបស់ភ្ញៀវបរទេសបន្តទៀតជាមិនខាន។
អគ្គនាយកគ្រឹះស្ថានអង្គរដែលជាស្ថាប័នលក់សំបុត្រចូលទស្សនារមណីយដ្ឋានអង្គរ លោក លី សែ ត្រូវបានសារព័ត៌មានក្នុងស្រុក «ថ្មីៗ» ស្រង់សម្ដីកាលពីថ្ងៃទី២៨ វិច្ឆិកា នេះថា ក្នុងរដូវសម្បូរភ្ញៀវដែលចាប់ផ្ដើមពីខែតុលា ឆ្នាំ២០២៣ នេះ សន្ទុះភ្ញៀវទេសចរមានការងើបឡើងវិញគួរឱ្យកត់សម្គាល់ ព្រោះថាក្នុងខែតុលា កន្លងទៅនេះ ជាមធ្យមមានភ្ញៀវទេសចរបានចូលទិញសំបុត្រទស្សនារមណីយដ្ឋានអង្គរចាប់ពី ១ពាន់ទៅជាង ២ពាន់នាក់ ខណៈខែវិច្ឆិកា នេះ ភ្ញៀវទេសចរបានកើនឡើងជាង ៣ពាន់នាក់ជារៀងរាល់ថ្ងៃ។
លោក លី សែ បញ្ជាក់ថា ភ្ញៀវទេសចរដែលឈរលំដាប់ទី១ សម្រាប់ខេត្តសៀមរាប គឺមកពីអាមេរិក ចំណែកទី២ គឺអង់គ្លេស ទី៣ គឺបារាំង បន្ទាប់មកមានកូរ៉េ និងជប៉ុន ជាដើម។ ចំណែកភ្ញៀវទេសចរចិន ដែលធ្លាប់ឈរកំពូលតារាងមុនកូវីដ-១៩ មានប្រមាណជា ៦ភាគរយប៉ុណ្ណោះនៅពេលនេះ ប៉ុន្តែប្រសិនបើវិស័យទេសចរណ៍នៅតែល្អប្រសើរដូចពេលនេះ នោះខេត្តសៀមរាប រំពឹងថានឹងទទួលបានភ្ញៀវទេសចរក្នុងរង្វង់ ៨០ម៉ឺននាក់នៅដំណាច់ឆ្នាំ២០២៣ នេះ។
ទាក់ទិននឹងបញ្ហានេះ កាលពីថ្ងៃទី១៦ ខែវិច្ឆិកា ឆ្នាំ២០២៣ លោក ហ៊ុន ម៉ាណែត បានលើកឡើងក្នុងពិធីសម្ពោធអាកាសយានដ្ឋានអន្តរជាតិសៀមរាបអង្គរថ្មី ដោយប្រកាសស្វាគមន៍ភ្ញៀវទេសចរចិន ដែលលោកចាត់ទុកជាមិត្ត និងបងប្អូនល្អរបស់កម្ពុជា ឱ្យនាំគ្នាមកទស្សនាកម្ពុជាឲ្យបានកាន់តែច្រើន ជាពិសេសមកកាន់ខេត្តសៀមរាប ទឹកដីអង្គរ ដោយធ្វើដំណើរតាមអាកាសយានដ្ឋានអន្តរជាតិសៀមរាបអង្គរថ្មី ដែលទើបសម្ពោធឱ្យដំណើរការនៅពេលនេះ។
ម្ចាស់ទំព័រហ្វេសប៊ុកឈ្មោះ The Kanitha Show បានរៀបរាប់ក្នុងវីដេអូស្រាវជ្រាវរបស់ខ្លួនកាលពីថ្ងៃទី១៥ វិច្ឆិកា ថា ខ្សែភាពយន្តចិនរឿង “No More Bets” ដែលបាននិយាយអំពីការចាប់ជំរិត និងការជួញដូរមនុស្ស ជាដើម បានធ្វើឱ្យប៉ះពាល់ដល់វិស័យទេសចរណ៍របស់កម្ពុជាយ៉ាងធ្ងន់ធ្ងរ។
ប្រភពដដែលបន្ថែមថា ក្នុងនោះក៏មានការស្ទង់មតិលើប្រជាជនចិនផងដែរ ដែលប្រមាណជា ៩០ភាគរយនៃប្រជាជនចិន បានបដិសេធទៅលេងប្រទេសកម្ពុជា។ ជាងនេះទៀត ជនជាតិចិនដែលបានទិញសំបុត្រយន្តហោះក្នុងបំណងទៅលេងប្រទេសកម្ពុជារួចរាល់ហើយ ក៏ត្រូវប៉ូលិសចិននៅព្រលានយន្តហោះ ហាមឃាត់មិនឱ្យទៅលេងកម្ពុជាដែរ ដែលធ្វើឱ្យអ្នកទាំងនោះលុបចោលសំបុត្រយន្តហោះរបស់ខ្លួនភ្លាមៗ៕