ក្រុមកូដករក្រុមហ៊ុនណាហ្គាវើលដ៍ ចោទក្រសួងស្ថាប័នចំនួន ៥ កំពុងស្ថិតក្រោមការបង្គាប់បញ្ជារបស់ថៅកែបនល្បែងស៊ីសងណាហ្គាវើលដ៍ ទើបពួកគេមិនចេញមុខដោះស្រាយវិវាទកម្មករជាមួយក្រុមហ៊ុនមួយនេះ បើទោះបីជាថៅកែណាហ្គាវើលដ៍បានរំលោភបំពានសិទ្ធិការងារធ្ងន់ធ្ងរដោយខុសច្បាប់របស់ប្រទេសកម្ពុជាក៏ដោយ។
ក្រុមកូដករក្រុមហ៊ុនណាហ្គាវើលដ៍រាប់សិបនាក់ កាលពីថ្ងៃទី៧ ខែធ្នូ ឆ្នាំ២០២៣ បានប្រមូលផ្តុំគ្នានៅមុខក្រុមហ៊ុនបនល្បែងស៊ីសងណាហ្គាវើលដ៍២ ស្ថិតក្នុងភូមិ៤ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ដោយរៀបចំឱ្យមានអ្នកឈរពាក់មុខតំណាងថៅកែក្រុមហ៊ុនណាហ្គាវើលដ៍ និងកាន់ខ្សែ ដែលពួកគេបានចងទៅអ្នកផ្សេងទៀត ដែលចងបដាពាក់នឹងក ដែលសរសេរអក្សរថា «ស្នងការនគរបាលរាជធានីភ្នំពេញ សាលារាជធានីភ្នំពេញ ក្រសួងការងារ និងបណ្ដុះបណ្ដាលវិជ្ជាជីវៈ តុលាការក្រុងភ្នំពេញ និងក្រសួងកិច្ចការនារី កំពុងស្ថិតក្រោមការត្រួតត្រារបស់ថៅកែបនល្បែងណាហ្គាវើលដ៍ សព្វថ្ងៃនេះ»។
ក្រុមកូដករទាំងនេះលើកឡើងថា ការតវ៉ាទាមទាររកយុត្តិធម៌របស់កម្មកររងគ្រោះ គឺដើម្បីចូលធ្វើការងារវិញប៉ុណ្ណោះ មិនមែនដើម្បីប្រឆាំង ឬមានផែនការផ្តួលរំលំរដ្ឋាភិបាលដូចជាការចោទប្រកាន់កន្លងមកនោះទេ។ ជាងនេះទៀត បើពួកគេចង់ដឹងច្បាស់ថាការធ្វើកូដកម្មនេះដើម្បីផ្តួលរំលំរដ្ឋាភិបាលមែន ឬក៏អត់ ពួកគេផ្តល់ការងារឱ្យក្រុមកូដករធ្វើការវិញទៅ នោះនឹងដឹងហើយ។
ប្រភពដដែលបញ្ជាក់ថា បើបានការងារធ្វើហើយ ក្រុមកូដករនៅតែបន្តធ្វើកូដកម្មទៀត នោះចាំចោទថាការធ្វើកូដកម្មនេះ គឺជាផែនការផ្តួលរំលំរដ្ឋាភិបាល ប៉ុន្តែការដែលពួកគេចោទកូដករថាមានផែនការផ្តួលរំលំរដ្ឋាភិបាលទាំងមិនឱ្យពួកគេចូលធ្វើការងារវិញកន្លងមកនោះ គឺគ្រាន់តែជាចេតនាដើម្បីបង្ក្រាបកូដករ និងមិនចង់ឱ្យកូដករចូលធ្វើការងារវិញប៉ុណ្ណោះ។
ក្រុមកូដករក្រុមហ៊ុនណាហ្គាវើលដ៍ អះអាងថា ពួកគេគ្រាន់តែទាមទារឲ្យថៅកែក្រុមហ៊ុនណាហ្គាវើលដ៍ចេញមុខដោះស្រាយបញ្ចប់វិវាទការងារឲ្យពួកគេ ដើម្បីឱ្យកម្មករដែលត្រូវបានក្រុមហ៊ុនបញ្ឈប់ពីការងារបានចូលធ្វើការវិញ និងទម្លាក់បទចោទលើប្រធានសហជីព កញ្ញា ឈឹម ស៊ីថរ ព្រមទាំងសមាជិកសហជីពដែលកំពុងរងនូវការចោទប្រកាន់ទាំងអយុត្តិធម៌សព្វថ្ងៃនេះប៉ុណ្ណោះ ដូច្នេះការទាមទារនេះ គឺមិនហួសហេតុទេ ហើយក៏មិនបង្ហាញពីចេតនាធ្វើបដិវត្តន៍ពណ៌ ឬផ្តួលរំលំរដ្ឋាភិបាលដែរ។
ចាប់តាំងពីផ្ទុះការតវ៉ាកាលពីថ្ងៃទី១៨ ខែធ្នូ ឆ្នាំ២០២១ មក តំណាងក្រុមកូដករបានស្វែងរកការចរចាជាមួយតំណាងក្រុមហ៊ុនណាហ្គាវើលដ៍ជាច្រើនលើកច្រើនសា និងបានដាក់ញត្តិទៅក្រសួងការងារ ខុទ្ទកាល័យនាយករដ្ឋមន្ត្រី ក៏ដូចជាភាគីពាក់ព័ន្ធជាបន្តបន្ទាប់ ប៉ុន្តែរហូតមកទល់នឹងពេលនេះមានរយៈពេលជិត ២ឆ្នាំហើយ ពួកគេមិនទាន់ទទួលបានដំណោះស្រាយណាមួយដើម្បីបញ្ចប់វិវាទនេះនៅឡើយទេ។
ជាងនេះទៀត សហភាពសហព័ន្ធ សម្ព័ន្ធសហជីព សហជីពមូលដ្ឋាន និងអង្គការសមាគមដែលធ្វើការលើវិស័យការពារសិទ្ធិមនុស្ស និងលើកកម្ពស់សិទ្ធិការងារ ក៏បានស្នើឱ្យស្ថាប័នពាក់ព័ន្ធជួយរកដំណោះស្រាយបញ្ចប់វិវាទនេះដែរ ប៉ុន្តែគ្មានស្ថាប័នណាមួយចេញមុខដោះស្រាយដើម្បីបញ្ចប់វិវាទនេះឡើយ។
ទាក់ទិននឹងបញ្ហានេះ គេសង្កេតឃើញថា ក្រោយរដ្ឋាភិបាលថ្មីដែលដឹកនាំដោយលោក ហ៊ុន ម៉ាណែត លេចចេញជារូបរាងចាប់តាំងពីថ្ងៃទី២២ ខែសីហា ឆ្នាំ២០២៣ មក នាយករដ្ឋមន្ត្រីថ្មីរូបនេះមិនដែលលើកឡើងពីវិវាទការងារនៃក្រុមកូដករណាហ្គាវើលដ៍ម្តងណាឡើយ បើទោះបីជាលោក ហ៊ុន ម៉ាណែត អះអាងថា រដ្ឋាភិបាលថ្មីរបស់លោកផ្ដោតការយកចិត្តទុកដាក់ពីសុខទុក្ខ និងជីវភាពរបស់កម្មករក៏ដោយ។
កាលពីអំឡុងខែធ្នូ ឆ្នាំ២០២១ កន្លងទៅ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ដែលទើបនឹងឡើងកាន់តំណែង លោក ហេង សួរ បានចោទកម្មករនិយោជិតថា ការតវ៉ារបស់កម្មករនិយោជិតទាំងនោះ គឺជាបច្ចេកទេសមួយដែលរៀបចំចលនាបដិវត្តន៍ពណ៌ប៉ុណ្ណោះ។
ជាងនេះទៀត ឪពុកនាយករដ្ឋមន្ត្រីបន្តពូជថ្មីលោក ហ៊ុន សែន កាលពីខែមិថុនា ឆ្នាំ២០២៣ បានលើកឡើងថា អតីតបុគ្គលិកណាហ្គាវើលដ៍ដែលនៅសេសសល់ គួរតែបញ្ឈប់សកម្មភាពតវ៉ាបន្តទៀតទៅ ព្រោះថាមិនមែនលោកមិនដឹងថាពួកគេកំពុងស៊ីឈ្នួលធ្វើបាតុកម្មនោះទេ។
លោក ហ៊ុន សែន លើកជាសំណួរថា កម្មករដែលអត់មានការងារធ្វើសោះ តែមានលទ្ធភាពធ្វើបាតុកម្មរយៈពេលជិត ២ឆ្នាំដោយមិនចាំបាច់ធ្វើការងារ តើជារឿងដែលទៅរួចដោយរបៀបណា។ លោកបន្ថែមថា នេះគឺដោយសារមានអ្នកជួលនៅពីក្រោយខ្នងឱ្យកម្មករទាំងនោះធ្វើបាតុកម្មប៉ុណ្ណោះ៕