28.4 C
Phnom Penh

តំណាង​អង្គការ​ក្រៅ​រដ្ឋាភិបាល​ប្រកាស​អញ្ជើញ​លោក ហេង សួរ ឱ្យ​ចូលរួម​ពិភាក្សា​អំពី​ការ​ធ្លាក់​ចុះ​ការ​អនុវត្ត​សិទ្ធិ​សេរីភាព​មូលដ្ឋាន​របស់​សហជីព​នៅ​ខែ​កុម្ភៈ

ដោយ ឌឹ ខេមបូឌា ដេលី

បទវិភាគ

ក្រុម​សង្គម​ស៊ីវិល​បាន​ដាក់​សំណើ​ចំនួន ៥​ចំណុច​ជូន​ក្រសួង​ការងារ និង​បណ្តុះបណ្តាល​វិជ្ជាជីវៈ ជុំវិញ​កង្វល់​រួម​របស់​ពួកគេ​ទៅ​លើ​ការ​អនុវត្ត​សិទ្ធិ​សេរីភាព​មូលដ្ឋាន​របស់​សហជីព និង​បាន​អញ្ជើញ​លោក ហេង សួរ ឱ្យ​ចូលរួម​សន្ទនា​ពិគ្រោះ​យោបល់​អំពី​បញ្ហា​នេះ​នៅ​ខែ​កុម្ភៈ ឆ្នាំ​២០២៤។

តំណាង​អង្គការ​មិន​មែន​រដ្ឋាភិបាល សមាគម សហព័ន្ធ​សហជីព​ជាច្រើន​ស្ថាប័ន​ដែល​ធ្វើការ​លើក​កម្ពស់​សិទ្ធិ​ការងារ​នៅ​កម្ពុជា បាន​ប្រមូល​ផ្តុំ​គ្នា​នៅ​មុខ​ក្រសួង​ការងារ និង​បណ្តុះបណ្តាល​វិជ្ជាជីវៈ នៅ​ថ្ងៃទី​៨ ខែ​ធ្នូ ឆ្នាំ​២០២៣ នេះ ដើម្បី​ប្រគល់​សំណើ​ទាំង ៥​ចំណុច​ដែល​ជា​ក្តី​កង្វល់​រួម​ពាក់ព័ន្ធ​នឹង​ការ​អនុវត្ត​សិទ្ធិ​សេរីភាព​មូលដ្ឋាន​របស់​សហជីព​ជូន​ក្រសួង​ការងារ យក​ទៅ​ដោះស្រាយ។

អង្គការ​ស្ថាប័ន​ដដែល​នេះ លើកឡើង​ថា ពិត​មែន​តែ​រដ្ឋាភិបាល​បាន​ធ្វើ​វិសោធនកម្ម​ច្បាប់​ស្ដីពី​សហជីព​កាលពី​ឆ្នាំ​២០១៩ កន្លង​ទៅ​ក៏​ពិត​មែន ប៉ុន្តែ​គេ​នៅតែ​មើល​ឃើញ​ថា ការ​ផ្លាស់ប្ដូរ​ទាំងនេះ​គ្រាន់តែ​ល្អ​មើល​សម្បក​ក្រៅ​ប៉ុណ្ណោះ។ ផ្ទុយទៅវិញ ចលនា​សហជីព​ឯករាជ្យ​ក្នុង​វិស័យ​ការងារ មិន​ត្រឹមតែ​ស្ថិត​ក្រោម​ការ​គំរាមកំហែង​ប៉ុណ្ណោះ​ទេ ប៉ុន្តែ​ត្រូវ​បាន​ផ្ដោត​ជា​មុខសញ្ញា​ជាក់លាក់ និង​ជា​លក្ខណៈ​ប្រព័ន្ធ ក្នុង​ការ​ធ្វើ​ទុក្ខបុកម្នេញ​ពី​ថៅកែ​ក្រុមហ៊ុន​ថែម​ទៀត។

ក្រុម​អង្គការ​សមាគម​ដដែល​រៀបរាប់​ថា ដោយសារតែ​បញ្ហា​នេះ ពួកគេ​បាន​រក​ឃើញ​នូវ​បញ្ហា​ប្រឈម​ជាច្រើន ដូចជា ការ​ចុះ​បញ្ជិកា ការ​ចេញ​វិញ្ញាបនបត្រ​ភាព​ជា​តំណាង នៅតែ​មាន​លក្ខណៈ​ស្មុគស្មាញ​សម្រាប់​សហជីព​នៅឡើយ។ ជាង​នេះ​ទៀត សហជីព​ភាគតិច​ដែល​មិន​ត្រូវ​បាន​អនុញ្ញាត​ឱ្យ​តំណាង​កម្មករ​និយោជិត​ក្នុង​វិវាទ​បុគ្គល នៅតែ​បង្កើត​ឱ្យ​មាន​ការ​រឹត​បន្តឹង​លទ្ធភាព​ទទួល​បាន​យុត្តិធម៌​របស់​កម្មករ​រងគ្រោះ​ផង​ដែរ។

លើស​ពី​នេះ ការ​ប្រើប្រាស់​កិច្ចសន្យា​ថេរវេលា​មាន​កំណត់ នៅតែ​ជា​ឧបករណ៍​ក្នុង​ការ​បន្លាច​កុំ​ឱ្យ​មាន​ការ​ចងក្រង​ជា​សហជីព ដែល​ជា​ទម្រង់​មួយ​នៃ​ការ​រើសអើង​ប្រឆាំង​សហជីព​យ៉ាង​ច្បាស់លាស់។ បន្ថែម​ពី​នេះ លិខិត​បទដ្ឋាន​គតិយុត្តិ​ដែល​រឹត​បន្តឹង​ការ​ប្រមូលផ្ដុំ​របស់​អង្គការ​សង្គម​ស៊ីវិល និង​សហជីព​ក្នុង​ច្បាប់​សហជីព និង​ច្បាប់​កូវីដ-១៩ ចំពោះ​ការ​តវ៉ា និង​ការ​ធ្វើ​កូដកម្ម ត្រូវ​គេ​មើល​ឃើញ​ថា​ជា​ការ​រំលោភ​បំពាន​សិទ្ធិ​ប្រមូលផ្ដុំ​ដោយ​សន្តិវិធី​យ៉ាង​ពិតប្រាកដ។

អង្គការ​ស្ថាប័ន​ខាងលើ​គូស​បញ្ជាក់​ថា ការ​ដែល​សហជីព​ឯករាជ្យ និង​សហជីព​មកពី​គ្រប់​វិស័យ​ទាំងអស់​ពុំ​ទាន់​មាន​តំណាង​ពេញលេញ​សមស្រប​នៅ​ក្នុង​ក្រុមប្រឹក្សា​ជាតិ​ប្រាក់​ឈ្នួល​អប្បបរមា និង​ការ​ចាត់ទុក​ជា​បទល្មើស និង​ការ​រើសអើង​ប្រឆាំង​សហជីព រួម​ទាំង​ការ​គំរាមកំហែង និង​សកម្មភាព​ហិង្សា ការ​រើសអើង​ថ្នាក់​ដឹកនាំ​សហជីព និង​សកម្មជន សិទ្ធិ​ការងារ​ពី​ការ​តស៊ូ​មតិ​នានា​របស់​សហជីព​សព្វថ្ងៃ​នេះ សុទ្ធសឹងតែ​ជា​ឧបសគ្គ​សម្រាប់​កម្មករ​និយោជិត​គ្រប់​គ្នា​ទាំងអស់។

ការ​ដាក់​សំណើ​នេះ ធ្វើឡើង​ដើម្បី​ទាមទារ​ឱ្យ​ក្រសួង​ការងារ​ដោះស្រាយ​នូវ​កង្វល់​រួម​របស់​សហជីព​ដែល​តែងតែ​រង​នូវ​ការ​គំរាមកំហែង និង​រឹតត្បិត​សិទ្ធិ​សេរីភាព​ដែល​បាន​ចែង​ក្នុង​ច្បាប់​ពី​ភាគី​ក្រុមហ៊ុន​នៅ​កម្ពុជា​សព្វថ្ងៃ​នេះ។

វិវាទ​ការងារ​នៅ​ក្នុង​ប្រទេស​កម្ពុជា​នៅតែ​បន្ត​មាន​ជា​ហូរហែ ដែល​ស្ថិត​ក្រោម​រូបភាព​ផ្សេងៗ​គ្នា បើ​ទោះជា​មាន​ក្រសួង​ការងារ ច្បាប់​ការងារ និង​សហជីព​ជាច្រើន​ត្រូវ​បាន​បង្កើត​ឡើង ដើម្បី​ការពារ​សិទ្ធិ និង​ផល​ប្រយោជន៍​របស់​និយោជិត​ក៏ដោយ ក៏​ការ​រំលោភ​បំពាន​សិទ្ធិ​ការងារ​ពី​សំណាក់​និយោជក ក្រុមហ៊ុន ឬ​រោងចក្រ នៅតែ​កើត​មាន​ដដែល ដែល​បណ្ដាល​ឱ្យ​មាន​ការ​ធ្វើ​កូដកម្ម និង​បាតុកម្ម​តវ៉ា​ទាមទារ​រក​យុត្តិធម៌​ជា​បន្តបន្ទាប់​សព្វថ្ងៃ​នេះ។

ទាក់ទិន​នឹង​បញ្ហា​នេះ លោក អាត់ ធន់ ប្រធាន​សហភាព​ការងារ​កម្ពុជា (Cambodia Labour Confederation) ធ្លាប់​បាន​លើក​ឡើង​ថា ចលនា​សហជីព​នៅ​កម្ពុជា ជាពិសេស​គឺ​សហជីព​ឯករាជ្យ​មាន​ការ​លំបាក ហើយ​មាន​ការ​រឹត​បន្តឹង​ច្រើន​ជាទីបំផុត។ តែ​ផ្ទុយទៅវិញ សហជីព​ដែល​គាំទ្រ​ក្រុមហ៊ុន និង​រដ្ឋាភិបាល​ទៅ​ជា​មាន​ឱកាស​ច្រើន ដែល​ធ្វើ​ឱ្យ​អ្នក​តំណាង​ពិតប្រាកដ​របស់​កម្មករ​មាន​ការ​បាត់បង់ និង​ថយ​ចុះ​ដែល​ជា​ហេតុ​ធ្វើ​ឱ្យ​ការ​ទាមទារ​ដោះស្រាយ​បញ្ហា​កម្មករ​នៅ​កន្លែង​ការងារ​ធ្លាក់​ចុះ​ផង​ដែរ។

លោក អាត់ ធន់ បញ្ជាក់​ថា ផ្អែក​តាម​ហេតុផល​ខាងលើ គេ​អាច​សង្កេត​ឃើញ​ថា នៅ​ពេល​អនាគត បើ​សហជីព​ឯករាជ្យ​មាន​ចំនួន​កាន់តែ​តិច​ទៅៗ ប៉ុន្តែ​សហជីព​ដែល​គាំទ្រ​ក្រុមហ៊ុន និង​រដ្ឋាភិបាល​មាន​កាន់តែ​ច្រើន​ឡើងៗ​ទៅវិញ​នោះ កម្មករ​និយោជិត​អាច​នឹង​មិន​មាន​តំណាង​ពិតប្រាកដ​នៅ​ក្នុង​ការ​ដោះស្រាយ​វិវាទ​នៅ​ថ្នាក់​មូលដ្ឋាន ឬ​ថ្នាក់​ជាតិ​របស់​ពួកគាត់​បន្ត​ទៀត​នោះ​ទេ។

ថ្នាក់​ដឹកនាំ និង​សមាជិក​សហជីព​ឯករាជ្យ​នៅ​តាម​បណ្តា​ក្រុមហ៊ុន​រោងចក្រ​នៅ​ក្នុង​ប្រទេស​កម្ពុជា​សព្វថ្ងៃ​នេះ កំពុង​រង​នូវ​ការ​រំលោភ​បំពាន​សិទ្ធិ​ការងារ​ពី​សំណាក់​ថៅកែ​ក្រុមហ៊ុន ដោយ​បណ្តេញ​ពី​ការងារ​ជា​បន្តបន្ទាប់ ក្រោយ​ថ្នាក់​ដឹកនាំ និង​សមាជិក​សហជីព​ទាំងនោះ​ជួយ​តវ៉ា​ទាមទារ​លក្ខខណ្ឌ​ការងារ​ដល់​បុគ្គលិក​រងគ្រោះ។ ជាង​នេះ​ទៀត ពួកគេ​ក៏​តែង​រង​នូវ​ការ​ចោទប្រកាន់​ពី​បទ​ផ្សេងៗ​ពី​ថៅកែ​រោងចក្រ​ផង​ដែរ រហូត​ធ្វើ​ឱ្យ​អ្នក​ទាំងនោះ​បាត់បង់​ការងារ ឬ​ប្រឈមមុខ​នឹង​ផ្លូវ​ច្បាប់​យ៉ាង​ធ្ងន់ធ្ងរ​ថែម​ទៀត៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស