សហរដ្ឋអាមេរិកបានអំពាវនាវឱ្យមានការបញ្ចេញព័ត៌មានដោយតម្លាភាពអំពីការមកដល់នៃកងនាវាចម្បាំងរបស់ចិន ដែលចូលចតនៅមូលដ្ឋានទ័ពជើងទឹករាម ក្នុងប្រទេសកម្ពុជា ខណៈក្រុងវ៉ាស៊ីនតោន បារម្ភអំពីវត្តមានទ័ពចិនចាប់ផ្ដើមមាននៅកម្ពុជាហើយ។
អ្នកនាំពាក្យស្ថានទូតសហរដ្ឋអាមេរិកប្រចាំនៅកម្ពុជា លោក Wesley Holzer បានលើកឡើងថា លោកបានស្នើទៅរដ្ឋាភិបាលកម្ពុជា ឱ្យបង្ហាញព័ត៌មានអំពីតម្លាភាពពាក់ព័ន្ធនឹងវត្តមាននាវាចម្បាំងរបស់ចិន ដែលចូលចតនៅមូលដ្ឋានទ័ពជើងទឹករាមកម្ពុជា ហើយស្នើទៅប្រទេសជិតខាងកម្ពុជា ក៏ត្រូវបញ្ចេញព័ត៌មានអំពីដំណឹងនៃការមកដល់របស់កងនាវាចម្បាំងចិនផងដែរ។
លោក Wesley Holzer បានបញ្ជាក់ដូចនេះនៅពេលលោកឆ្លើយតបទៅនឹងសំណួររបស់អ្នកកាសែត Bloomberg News ហើយត្រូវបានកាសែតបាងកកប៉ុស្តិ៍ចុះផ្សាយនៅថ្ងៃសុក្រ ទី៨ ខែធ្នូ នេះ។
បើតាមលោក Wesley Holzer ឲ្យដឹងថា ប្រទេសក្នុងតំបន់អាស៊ីអាគ្នេយ៍ រួមទាំងសហរដ្ឋអាមេរិក កំពុងតាមដានជាខ្លាំងនៃការមកដល់របស់កងនាវាចម្បាំងរបស់ចិន ដែលបានបើកចូលមកក្នុងសមុទ្ររបស់ប្រទេសកម្ពុជា និងនៅមូលដ្ឋានទ័ពជើងទឹករាមរបស់កម្ពុជានោះ ថាតើវាអាចក្លាយជាមូលដ្ឋានកងទ័ពចិន ឬដូចម្ដេចទៅថ្ងៃខាងមុខ។
កងនាវាចម្បាំងចិន ចូលមកដល់សមុទ្ររាមកម្ពុជាកាលពីថ្ងៃអង្គារដើមសប្ដាហ៍នេះ។
ជាមួយនឹងវត្តមានរបស់នាវាចម្បាំងចិន លោក ទៀ សីហា រដ្ឋមន្ត្រីនៃក្រសួងការពារជាតិកម្ពុជា ដែលឡើងកាន់តំណែងជំនួសឪពុក បាននិយាយថា នាវាចម្បាំងរបស់ចិន ដែលមកកម្ពុជានេះ គឺមកធ្វើសមយុទ្ធជាមួយកងទ័ពជើងទឹកកម្ពុជា ប៉ុន្តែទាំងក្រសួងការបរទេស និងក្រសួងការពារជាតិកម្ពុជា មិនបានទាន់ឃើញឆ្លើយតបនឹងការលើកឡើងរបស់មន្ត្រីស្ថានទូតអាមេរិកនៅឡើយទេ។
យ៉ាងណា នេះជាលើកដំបូងហើយដែលកងនាវាចម្បាំងចិន ចូលចតនៅមូលដ្ឋានទ័ពជើងទឹករាមកម្ពុជា ដែលប្រទេសចិន ចំណាយប្រាក់រាប់លានដុល្លារដើម្បីស្ថាបនាឡើងវិញ និងធ្វើឱ្យកាត់តែធំទូលាយចូលកាន់តែជ្រៅក្នុងលំហសមុទ្រ។
ចិន ជាប្រទេសម្ចាស់បំណុលពាន់លានដុល្លាររបស់កម្ពុជា។ សេដ្ឋកិច្ចរបស់កម្ពុជា ភាគច្រើនពឹងលើដង្ហើមរបស់ចិន។ លោក ហ៊ុន សែន និងបក្សប្រជាជនកម្ពុជា ត្រូវបានពួកបស្ចិមប្រទេសចាត់ទុកជាមេដឹកនាំនៅអាស៊ីអាគ្នេយ៍ម្នាក់ដែលមានភាពទន់ភ្លន់ និងក្រោមឥទ្ធិពលរបស់បក្សកុម្មុយនីស្តចិន។
កាលពីឆ្នាំ២០២២ លោក ចូ បៃដិន ដែលមកចូលរួមកិច្ចប្រជុំកំពូលអាស៊ាន លោកបានថ្លែងនៅចំពោះមុខលោក ហ៊ុន សែន អំពីមូលដ្ឋានទ័ពចិននៅសមុទ្ររាមកម្ពុជាថា តើអនាគតអាចជារបស់ចិន ឬក៏របស់កម្ពុជា។
លោក ចូ បៃដិន ក៏ដូចជារដ្ឋមន្ត្រីការបរទេសរបស់លោកផងដែរ តែងតែប្រាប់មន្ត្រីកម្ពុជាថាកុំយកមូលដ្ឋានទ័ពជើងទឹករាមរបស់កម្ពុជានេះ ធ្វើជាទីតាំងសម្រាប់កងទ័ពចិនឲ្យសោះ ព្រោះវាប៉ះពាល់ធ្ងន់ធ្ងរដល់ស្ថិរភាពនៅក្នុងតំបន់។
មិនថាតែរដ្ឋការរបស់លោក ចូ បៃដិន ទេដែលដាក់ការព្រួយបារម្ភនេះ ប៉ុន្តែការព្រួយបារម្ភនេះមានចាប់តាំងពីរដ្ឋការរបស់លោក ដូណាល់ ត្រាំ និងរដ្ឋការរបស់លោក បារ៉ាក់ អូបាម៉ា មកម្ល៉េះ ដែលសម្ដែងការព្រួយបារម្ភពីកងទ័ពចិនអាចបោះជំរំនៅកម្ពុជាផងដែរ។
យ៉ាងណា មេដឹកនាំវៀតណាមក៏ធ្លាប់សួរអតីតនាយករដ្ឋមន្ត្រីកម្ពុជា លោក ហ៊ុន សែន អំពីការព្រួយបារម្ភរបស់អាមេរិកផងដែរ។
លោក ហ៊ុន សែន តែងតែប្រាប់មេដឹកនាំវៀតណាម ថា រដ្ឋធម្មនុញ្ញកម្ពុជាដាច់ខាតមិនឲ្យមានទ័ពបរទេសនៅលើទឹកដីកម្ពុជានោះទេ ទោះកាលៈទេសៈណាក៏ដោយនោះ។
លោក ហ៊ុន សែន បានថ្លែងដោយអះអាងថា កម្ពុជាមិនមែនជាប្រទេសដែលត្រូវគេខ្ចីប្រើឥទ្ធិពលរបស់ខ្លួនបាននោះទេ។ ជាមួយគ្នានេះ លោក ហ៊ុន សែន បានប្រាប់ទៅមេដឹកនាំអាស៊ានថា សូមទុកចិត្តកម្ពុជា គឺកម្ពុជាមិនបណ្ដោយឲ្យមានទ័ពបរទេសនៅលើទឹកដីកម្ពុជាដាច់ខាត ប៉ុន្តែវត្តមាននៃកងនាវាចម្បាំងរបស់ចិនជាលើកដំបូងនៅកម្ពុជានេះ គឺបានចូលចតនៅមូលដ្ឋានទ័ពរាមកម្ពុជា។
យ៉ាងហោចណាស់មេបញ្ជាការរងនៃកងទ័ពរំដោះប្រជាជនចិនទទួលបន្ទុកកងទ័ពជើងទឹក បានមកកាន់រាជធានីភ្នំពេញ ហើយបានជួបនឹងលោក ហ៊ុន ម៉ាណែត នាយករដ្ឋមន្ត្រីថ្មីរបស់កម្ពុជា។ ជំនួបនេះធ្វើឡើងនៅវិមានសន្តិភាព គឺចំពេលដែលឧត្តមសេនីយ៍ចិន He Weidong រូបនេះមកពិនិត្យមើលកងនាវាចម្បាំងរបស់ចិន ដែលចូលចតនៅមូលដ្ឋានទ័ពជើងទឹករាមកម្ពុជា។
ប្រសិនបើមូលដ្ឋានទ័ពជើងទឹកចិន មាននៅកម្ពុជា ហើយមានរហូតដល់នាវាចម្បាំងរបស់ចិន ទៀតផងនោះ នឹងបើកផ្លូវឲ្យទីក្រុងប៉េកាំង ពង្រីកឥទ្ធិពលរបស់ខ្លួននៅតំបន់អាស៊ីអាគ្នេយ៍។ ប្រសិនបើមានមែននោះ វានឹងអំណោយផលដល់ចិន ក្នុងការគ្រប់គ្រងនាវាចរណ៍ពីជ្រោយម៉ាឡាកា ទៅកាន់សមុទ្រចិនខាងត្បូង។
មិនតែប៉ុណ្ណោះ វានឹងអាចផ្ដល់ភាពងាយស្រួលដល់ចិន ក្នុងការតាមដានសមយុទ្ធយោធារួមគ្នារវាងប្រទេសថៃ និងសហរដ្ឋអាមេរិក និងជាការដាក់គំនាបទៅលើវៀតណាម ផងដែរ៕