ប្រទេសវៀតណាម ដែលមានគុណដ៏ធំធេងលើគណបក្សប្រជាជនកម្ពុជា ព្រោះបានជួយបក្សនេះឱ្យឡើងកាន់អំណាចក្រោយពីវៀតណាម លើកកងទ័ពរបស់ខ្លួនលុកលុយប្រទេសកម្ពុជា ផ្ដួលរំលំរបបកម្ពុជាប្រជាធិបតេយ្យ បានក្លាយជាប្រទេសមួយនៃប្រទេសដងទន្លេមេគង្គ ៦ប្រទេសទៀត បានចេញសេចក្ដីថ្លែងការណ៍ថា ព្រែកជីកហ្វូណនតេជោ អាចនឹងប៉ះពាល់ជីវចម្រុះបរិស្ថានទន្លេមេគង្គ បើត្រូវបានស្ថាបនា។
សារព័ត៌មានរបស់វៀតណាម VN Express បានចុះផ្សាយសេចក្ដីរាយការណ៍របស់ខ្លួនកាលពីពេលថ្មីៗនេះថា ប្រទេសវៀតណាម ដាក់ស្នើទៅរដ្ឋាភិបាលកម្ពុជា ឱ្យចែកចាយព័ត៌មាន និងការវាយតម្លៃអំពីផលប៉ះពាល់ជីវចម្រុះបរិស្ថានទន្លេមេគង្គ។
អ្នកនាំពាក្យរងក្រសួងការបរទេសវៀតណាម Doan Khac Viet និយាយថា វៀតណាមគាំទ្រការអភិវឌ្ឍផ្លូវនាវាចរណ៍នៃដងទន្លេមេគង្គ ព្រោះវាមានសារប្រយោជន៍ជាច្រើនក្នុងកំណើនសេដ្ឋកិច្ច ហើយមានសារសំខាន់ដល់កិច្ចសហការដែលសំដៅគ្រប់គ្រងជាចីរភាពនៃធនធានទន្លេមេគង្គ។
អ្នកនាំពាក្យក្រសួងការបរទេសវៀតណាម បានទាមទារឱ្យមានការផ្ដល់ចម្លើយពីរដ្ឋាភិបាលកម្ពុជា ចំពោះផែនការស្ថាបនាព្រែកជីកហ្វូណនតេជោ ថាតើអាចប៉ះពាល់កម្រិតណាចំពោះជីវចម្រុះ ធនធាន និងផ្ដល់ប្រយោជន៍នៃទន្លេមេគង្គ។
គម្រោងព្រែកជីកហ្វូណនតេជោ មានបណ្ដោយជាង ១៨០គីឡូម៉ែត្រ ដែលកំណត់តភ្ជាប់ពីដងទន្លេមេគង្គនៃផ្នែកមួយប្រទេសកម្ពុជា រហូតទល់ដល់ឆ្នេរសមុទ្រកម្ពុជានៃឈូងសមុទ្រថៃ នៅភាគនិរតីនៃប្រទេសកម្ពុជា។
ព្រែកជីកនេះត្រូវបានរំពឹងថានឹងចាប់ផ្ដើមស្ថាបនាចាប់ពីឆ្នាំ២០២៨ ដែលនេះបើយោងតាមឯកសារមួយដែលកម្ពុជាបញ្ជូនទៅឱ្យគណៈកម្មការទន្លេមេគង្គកាលពីខែសីហា ឆ្នាំ២០២៣។
ប្រទេសដែលជាប់ដងទន្លេមេគង្គ និងកំពុងបានផ្ដល់ប្រយោជន៍ពីធនធានរបស់ទន្លេនេះ មានប្រទេសចិន ភូមា ឡាវ ថៃ កម្ពុជា និងវៀតណាម ប៉ុន្តែវៀតណាម ស្ថិតនៅខ្សែទឹកខាងក្រោមដែលជាប្រទេសមួយស្រូបបានអត្ថប្រយោជន៍ពីធនធានទន្លេមេគង្គច្រើនជាងគេ។
លោក Doan Khac Viet អ្នកនាំពាក្យរងក្រសួងការបរទេសវៀតណាម បានស្នើឱ្យកម្ពុជាបង្ហាញកិច្ចសហការឱ្យស៊ីជម្រៅជាមួយវៀតណាម និងគណៈកម្មការទន្លេមេគង្គ ដោយចែកចាយព័ត៌មានដោយតម្លាភាពចំពោះការអាចប៉ះពាល់ជីវចម្រុះ បរិស្ថាន ប្រព័ន្ធអេកូរបស់ទន្លេមេគង្គ និងតំបន់ទន្លេមេគង្គ ដោយត្រូវធានាថាអត្ថប្រយោជន៍បានដល់គ្រប់ប្រទេសទាំងអស់នៃតំបន់ទន្លេមេគង្គ។
តាមលោក Doan Khac Viet ការប្រើប្រាស់ធនធានទឹកទន្លេមេគង្គ គឺជាការបានមកពីអាងទន្លេមេគង្គដែលមានជានិរន្តដល់ជីវភាពរបស់សហគមន៍នៃប្រទេសទន្លេមេគង្គ។
អ្នកសង្កេតការណ៍ថា មានកត្តាយ៉ាងតិច ៣ នៅពីក្រោយកម្ពុជាដែលមានផែនការស្ថាបនាព្រែកជីកហ្វូណនតេជោ៖
- ទីមួយ លោក ហ៊ុន សែន ចង់បង្កើតស្នាដៃរបស់លោកនូវឈ្មោះថា ព្រែកជីកហ្វូណនតេជោ។ តេជោសម័យនេះមានតែតេជោសែនទេ ដែលមានអំណាចលើសលប់បំផុត ប៉ុន្តែហ្វូណនគឺជាសម័យកាលមួយនៃការចាប់ផ្ដើមកកើតប្រទេសកម្ពុជា។
- ទីពីរ ជាការតម្រូវនៃសេចក្ដីត្រូវការលើវិស័យកសិកម្ម និងជលផល ដែលជាផ្នែកមួយជួយជំរុញវិស័យសេដ្ឋកិច្ច។
- ទីបី មានគោលដៅវែងឆ្ងាយជាងនេះទៀត ការងាយចល័តកងទ័ពចិន បើទ័ពចិនមាននៅលើមូលដ្ឋានទ័ពជើងទឹករាមកម្ពុជា។
ការចល័តកងទ័ពចិន អាចកើតមានករណីមានជម្លោះប្រដាប់អាវុធអាចកើតមានរវាងកម្ពុជា និងវៀតណាម តែបែបនេះក្ដី កាលពីថ្ងៃទី៩ មេសា លោក ហ៊ុន សែន ដែលមានឋានៈជាប្រធានព្រឹទ្ធសភា បានច្រានចោលចំពោះការលើកឡើងទាំងឡាយណាដែលថា ផែនការជីកព្រែកជីកហ្វូណនតេជោដើម្បីសម្រួលការចល័តនាវាទ័ពជើងទឹកចិន មកកាន់ទន្លេមេគង្គ។
លោក ហ៊ុន សែន បានថ្លែងថា ប្រទេសកម្ពុជាមិនអនុញ្ញាតឱ្យមានកងទ័ពបរទេសតាំងនៅលើកម្ពុជាដាច់ខាត ទោះកងទ័ពនៃប្រទេសណាក៏ដោយ ដែលលោកថា នេះជាការកំណត់ដោយរដ្ឋធម្មនុញ្ញកម្ពុជា។ លោកបញ្ជាក់ទៀតថា បើរដ្ឋធម្មនុញ្ញកម្ពុជាចែងដូចនេះ គ្មានទេការអនុញ្ញាតឱ្យទ័ពបរទេសឈរជើងនៅកម្ពុជា ហើយកុំសង្ស័យថាចិនមានមូលដ្ឋានទ័ពរបស់ខ្លួននៅកម្ពុជាឱ្យសោះ។
លោកបញ្ជាក់ថា ព្រែកជីកហ្វូណនតេជោ វាមានសារសំខាន់បំផុតទៅលើវិស័យដឹកជញ្ជូន កសិកម្ម និងធារាសាស្ត្រដែលផ្ដល់ផលប្រយោជន៍ដល់ប្រជាជនប្រកបមុខរបរកសិកម្ម និងនេសាទនៅតាមតំបន់នៃព្រែកជីកហ្វូណនតេជោនេះ ប៉ុន្តែព្រែកជីកនេះត្រូវបានគេទម្លាយព័ត៌មានថា ស្ថិតនៅក្រោមប្រាក់កម្ចីរបស់ចិន ពាន់លានដុល្លារ៕