ក្រុមអ្នកវិភាគលើកឡើងថា ការតែងតាំងលោក ហ៊ុន ម៉ាណែត ជាអនុប្រធានបក្សកាន់អំណាច គឺជាសញ្ញាបញ្ជាក់យ៉ាងច្បាស់នៃផែនការរបស់លោក ហ៊ុន សែន ក្នុងការបម្រើវៀតណាមដោយត្រកូលហ៊ុនផ្ដាច់មុខនាពេលអនាគត។
អ្នកវិភាគនយោបាយ និងជាប្រធានវេទិកាពលរដ្ឋលោក គឹម សុខ ប្រាប់សារព័ត៌មាន The Cambodia Daily នៅថ្ងៃទី១១ ធ្នូ នេះថា ការតែងតាំងលោក ហ៊ុន ម៉ាណែត ជាអនុប្រធានគណបក្សប្រជាជនកម្ពុជា មុនដំណើរទស្សនកិច្ចនៅប្រទេសវៀតណាម គឺជាបំណងរបស់លោក ហ៊ុន សែន ដែលគាត់ចង់បញ្ជាក់ប្រាប់បក្សកុម្មុយនីស្តវៀតណាម ថា គឺមានតែលោក ហ៊ុន ម៉ាណែត ម្នាក់គត់ដែលជាមេដឹកនាំបម្រើវៀតណាមថ្មីពីភាគីកុម្មុយនីស្តនៅកម្ពុជា ដែលកំពុងក្តោបក្តាប់ស្រុកខ្មែរសព្វថ្ងៃនេះ។
លោក គឹម សុខ ថាបក្សកុម្មុយនីស្តវៀតណាម ដែលជាបងធំនៃបក្សកុម្មុយនីស្តឥណ្ឌូចិនដែលមានឡាវ និងកម្ពុជា ជាប្អូនៗ គឺគេឲ្យតម្លៃខ្លាំងណាស់ទៅលើតួនាទីរបស់អ្នកដឹកនាំក្នុងគណបក្ស ដូច្នេះការតែងតាំងលោក ហ៊ុន ម៉ាណែត ជាអនុប្រធានគណបក្សប្រជាជនកម្ពុជា គឺជារឿងចាំបាច់បំផុតដែលលោក ហ៊ុន សែន ត្រូវតែធ្វើ ដើម្បីឱ្យបក្សកុម្មុយនីស្តវៀតណាម ដែលជាបងធំភ្ជាប់ទំនាក់ទំនងជាមួយក្រុមគ្រួសារហ៊ុនតែមួយច្រកទៅថ្ងៃមុខ។
លោក គឹម សុខ អះអាងថា ការតែងតាំងនេះក៏ជាការបង្ហាញយ៉ាងច្បាស់ពីផែនការរបស់លោក ហ៊ុន សែន ក្នុងការលើកអំណាចក្នុងបក្សកុម្មុយនីស្តមួយនេះ ឱ្យកូនប្រុសរបស់គាត់ជាអ្នកគ្រប់គ្រង និងកាច់ចង្កូតដូចដែលគាត់កំពុងគ្រប់គ្រងយ៉ាងណែនសព្វថ្ងៃនេះដែរ ដើម្បីឱ្យរដ្ឋការក្រុងហាណូយ ដែលជាបងធំរបស់ខ្លួនប្រគល់អំណាចផ្ដាច់មុខក្នុងការគ្រប់គ្រងទឹកដីខ្មែរលើក្រុមគ្រួសារគាត់ទាំងស្រុងតែម្តង។
លោកបន្ថែមថា ជំនាន់លោក ហ៊ុន សែន គឺវៀតណាមបានគ្រប់គ្រងទឹកដីខ្មែរដោយពឹងផ្អែកទៅមន្ត្រីបក្សកាន់អំណាចផ្សេងៗ មិនមែនតែលោក ហ៊ុន សែន ម្នាក់ទេ ដូចជាលោក ស ខេង អ្នកស្រី ម៉ែន សំអន និងលោក ហេង សំរិន ជាដើម ដែលធ្វើឱ្យលោក ហ៊ុន សែន ពិបាកក្នុងការក្តោបក្តាប់អំណាចផ្ដាច់មុខតែម្នាក់ឯង។
កាលពីថ្ងៃទី១០ ខែធ្នូ ឆ្នាំ២០២៣ គណបក្សប្រជាជនកម្ពុជា បានប្រារព្ធមហាសន្និបាតវិសាមញ្ញរបស់ខ្លួន ដើម្បីបញ្ចូលសមាជិកគណៈកម្មាធិការនាយកចំនួន ៤៩៦នាក់ ដែលធ្វើឱ្យសមាជិកគណៈកម្មាធិការមួយនេះមានចំនួនកើនឡើងដល់ជាង ១ពាន់នាក់ហើយ (១៣១២នាក់) នៅពេលនេះ ក្នុងនោះសមាជិកមហាសន្និបាតបក្សក៏បានអនុម័តជ្រើសរើសលោក ហ៊ុន ម៉ាណែត ដែលជាកូនប្រុសច្បងរបស់លោក ហ៊ុន សែន ជាអនុប្រធានគណបក្សប្រជាជនកម្ពុជាផងដែរ។
ក្រៅពីអនុម័តជ្រើសរើសលោក ហ៊ុន ម៉ាណែត ជាអនុប្រធានគណបក្ស អង្គសន្និបាតនេះក៏បានអនុម័តជ្រើសរើសកូនៗមន្ត្រីជាន់ខ្ពស់បក្សកាន់អំណាចដទៃទៀត ឱ្យចូលជាសមាជិកគណៈកម្មាធិការអចិន្ត្រៃយ៍បក្សផងដែរ ដូចជាកូនរបស់លោក ស ខេង គឺលោក ស សុខា កូនរបស់លោក ទៀ បាញ់ គឺលោក ទៀ សីហា កូនប្រសារបស់លោក ហេង សំរិន គឺលោក វង្ស សូត្រ និងកូនរបស់លោក សាយ ឈុំ គឺលោក សាយ សំអាល់ ជាដើម ដែលសរុបទាំងអស់មានចំនួន ២៣នាក់ ក្នុងនោះលោក ជីវ កេង ដែលជាប្រធានតុលាការកំពូលដែលជាមេដឹកនាំស្ថាប័នឯករាជ្យ ក៏ត្រូវបានបញ្ចូលជាសមាជិកគណៈកម្មាធិការអចិន្ត្រៃយ៍បក្សកាន់អំណាចដែរ។
ទាក់ទិននឹងបញ្ហានេះ មន្ត្រីជាន់ខ្ពស់អតីតបក្សប្រឆាំង លោក អ៊ុំ សំអាន ធ្លាប់បានលើកឡើងថា សព្វថ្ងៃនេះ រដ្ឋាភិបាលកុម្មុយនីស្តវៀតណាមបានដាក់បញ្ចូលប្រទេសកម្ពុជាជាអាណាខេត្តមួយរបស់គេរួចទៅហើយ បើទោះបីជាវៀតណាម មិនទាន់ឈ្លានពានលេបត្របាក់យកប្រទេសកម្ពុជាទាំងស្រុងក៏ដោយ ព្រោះថាកន្លងមក រដ្ឋាភិបាលវៀតណាម មិនដែលដាក់តាំងទង់ជាតិកម្ពុជានៅពីក្រោយខ្នងលោក ហ៊ុន ម៉ាណែត ទេរាល់ពេលដែលមានជំនួបរវាងភាគីទាំងពីរម្តងៗ អំឡុងពេលដែលលោក ហ៊ុន ម៉ាណែត កាន់តួនាទីជាមេបញ្ជាការកងទ័ពជើងគោករបស់កម្ពុជា កាលពីពេលកន្លងទៅនោះ។
ចំណែកអនុប្រធានវេទិកាពលរដ្ឋលោក ម៉ែន ណាត ធ្លាប់បានប្រាប់សារព័ត៌មាន The Cambodia Daily កាលពីពេលថ្មីៗនេះថា រដ្ឋាភិបាលកម្ពុជាល្មមដល់ពេលដែលត្រូវត្រួតពិនិត្យឡើងវិញនូវទំនាក់ទំនងរវាងកម្ពុជា-វៀតណាមហើយ ថាតើរយៈពេលជាង ៤០ឆ្នាំក្រោមការដឹកនាំនៃគណបក្សប្រជាជនកម្ពុជាដែលដឹកនាំដោយលោក ហ៊ុន សែន កន្លងមកនេះ កម្ពុជាទទួលបានផលចំណេញអ្វីខ្លះពីទំនាក់ទំនងជាមិត្តភាពជាមួយប្រទេសវៀតណាម។ ជាងនេះទៀត នាយករដ្ឋមន្ត្រីថ្មីរបស់កម្ពុជា លោក ហ៊ុន ម៉ាណែត ក៏ត្រូវគិតគូរពីបញ្ហានេះឱ្យកាន់តែស៊ីជម្រៅផងដែរ។
រាល់ជំនួបរបស់មន្ត្រីជាន់ខ្ពស់នៃរដ្ឋាភិបាលកម្ពុជាជាមួយនឹងមន្ត្រីរដ្ឋាភិបាលកុម្មុយនីស្តវៀតណាម កន្លងមក តាំងពីជំនាន់ដឹកនាំរបស់លោក ហ៊ុន សែន រហូតដល់ជំនាន់ដឹកនាំរបស់លោក ហ៊ុន ម៉ាណែត ត្រូវគេសង្កេតឃើញថា វៀតណាមតែងស្នើមន្ត្រីរដ្ឋាភិបាលកម្ពុជា រួមទាំងនាយករដ្ឋមន្ត្រីរបស់កម្ពុជាផង ឱ្យជួយអនុវត្តនូវសំណើនានារបស់រដ្ឋាភិបាលវៀតណាមគ្រប់បែបយ៉ាង ដូចជាការផ្តល់សញ្ជាតិដល់ជនជាតិវៀតណាម ដែលកំពុងរស់នៅលើទឹកដីកម្ពុជាដោយខុសច្បាប់ ឱ្យមកជារស់នៅដោយស្របច្បាប់ និងឱ្យជួយពន្លឿនការធ្វើឱ្យស្របច្បាប់នូវឯកសារនានាដែលលោក ហ៊ុន សែន ធ្លាប់បានយល់ព្រមជាមួយរដ្ឋាភិបាលវៀតណាម ជាដើម ខណៈសំណើទាំងនោះមិនដែលត្រូវបានមន្ត្រីរដ្ឋាភិបាលកម្ពុជាបដិសេធម្តងណាឡើយ៕