រដ្ឋបាលខេត្តខ្មែរជាប់ព្រំដែនប្រទេសឡាវ ចំនួន៣ គឺរដ្ឋបាលខេត្តរតនគិរី ខេត្តស្ទឹងត្រែង និងខេត្តព្រះវិហារ បានលេចធ្លាយរឿងអាស្រូវពីការចេញលិខិតបើកផ្លូវ បណ្ណឆ្លងដែន និងឯកសារមិនប្រក្រតី ដល់ពលរដ្ឋខ្មែរសម្រាប់ការឆ្លងដែន ចេញចូលក្នុងទឹកដីកម្ពុជា-ឡាវ យ៉ាងអនាធិបតេយ្យ។
រដ្ឋមន្ត្រីក្រសួងមហាផ្ទៃលោក ស សុខា បានចេញលិខិតមួយកាន់ទៅអាជ្ញាធរខេត្តដែលជាប់ព្រំដែនឡាវទាំងអស់ កាលពីថ្ងៃទី៨ ខែធ្នូ និងត្រូវបានផ្សព្វផ្សាយកាលពីថ្ងៃព្រហស្បតិ៍ ទី១៤ ធ្នូ ថា រដ្ឋបាលខេត្តជាប់ព្រំដែនកម្ពុជា-ឡាវ និងកងកម្លាំងមានសមត្ថកិច្ចមួយចំនួន នៅតែបន្តចេញលិខិតបើកផ្លូវ បណ្ណឆ្លងដែន និងឯកសារឆ្លងដែនមិនប្រក្រតី ជូនពលរដ្ឋខ្មែរប្រើប្រាស់ឆ្លងកាត់ព្រំដែនជាហូរហែ ដែលផ្ទុយនឹងលិខិតបទដ្ឋានគតិយុត្តិជាធរមាន ដោយបង្កផលប៉ះពាល់ដល់សន្តិសុខ សុវត្ថិភាព និងផលប្រយោជន៍ស្របច្បាប់របស់ពលរដ្ឋខ្មែរធ្ងន់ធ្ងរ។
លោក ស សុខា អះអាងថា ពាក់ព័ន្ធនឹងបញ្ហានេះ ក្រសួងមហាផ្ទៃបានធ្វើការណែនាំអភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តជាប់ព្រំដែនទាំងអស់ ឱ្យបញ្ឈប់រាល់ការចេញឯកសារឆ្លងដែនមិនប្រក្រតី និងបញ្ឈប់ការយកកម្រៃក្រៅផ្លូវការពីពលរដ្ឋខ្មែរ ដែលធ្វើដំណើរចេញចូលឆ្លងកាត់ព្រំដែនម្តងរួចមកហើយ កាលពីដើមខែតុលា ឆ្នាំ២០២៣ នេះ ប៉ុន្តែករណីនេះនៅតែកើតមានដដែល។
រដ្ឋមន្ត្រីក្រសួងមហាផ្ទៃរូបនេះបញ្ជាក់ថា ដើម្បីពង្រឹងរបៀបរបបការងារ និងលើកកម្ពស់ការអនុវត្តច្បាប់ និងលិខិតបទដ្ឋានគតិយុត្តិឱ្យបានត្រឹមត្រូវ រដ្ឋបាលខេត្តជាប់ព្រំដែនកម្ពុជា-ឡាវទាំងអស់ ត្រូវអនុវត្តកិច្ចការចាំបាច់មួយចំនួន ដូចជា ត្រូវបញ្ឈប់ជាបន្ទាន់នូវរាល់ការចេញលិខិតមិនប្រក្រតីនានា និងជំរុញឱ្យពលរដ្ឋប្រើប្រាស់បណ្ណព្រំដែនដែលប្រទេសទាំងពីរបានទទួលស្គាល់ជាផ្លូវការ។
ជាងនេះទៀត ត្រូវផ្សព្វផ្សាយឱ្យពលរដ្ឋបានយល់ដឹងពីការប្រើប្រាស់បណ្ណព្រំដែនឱ្យកាន់តែច្បាស់ ត្រូវចាត់វិធានការពង្រឹងការគ្រប់គ្រងអ្នកដំណើរ ទំនិញ និងមធ្យោបាយចេញចូលឆ្លងកាត់ព្រំដែន ដើម្បីបង្ការ ទប់ស្កាត់ និងបង្ក្រាបរាល់បទល្មើសឆ្លងដែនគ្រប់ប្រភេទ ពិសេសបទល្មើសគ្រឿងញៀនឆ្លងកាត់ព្រំដែន ឧក្រិដ្ឋកម្មឆ្លងដែន និងការជួញដូរមនុស្សដែលអាចបង្កផលប៉ះពាល់យ៉ាងធ្ងន់ធ្ងរដល់សន្តិសុខ និងសង្គមជាតិ និងត្រូវធ្វើរបាយការណ៍ជាលាយលក្ខណ៍អក្សរអំពីលទ្ធផលវឌ្ឍនភាពនៃការអនុវត្តការងារ ជូនក្រសួងមហាផ្ទៃជារៀងរាល់ខែផងដែរ។
កាលពីថ្ងៃទី៣ ខែតុលា ឆ្នាំ២០២៣ រដ្ឋមន្ត្រីក្រសួងមហាផ្ទៃលោក ស សុខា បានចេញសេចក្តីណែនាំមួយបន្ទាប់ពីរកឃើញពីភាពមិនប្រក្រតីមួយចំនួនរបស់អាជ្ញាធរមានសមត្ថកិច្ចនៅតាមបណ្តាខេត្តជាប់ព្រំដែននានា ដូចជា ការបើកច្រករបៀងខុសច្បាប់ និងការចេញបណ្ណឆ្លងដែនមិនប្រក្រតី ជាដើម។
លោក ស សុខា ព្រមានថា ក្នុងករណីច្រកទ្វារព្រំដែនណាមួយកើតមានបញ្ហាមិនប្រក្រតីបណ្តាលមកពីការអនុវត្តតួនាទីភារកិច្ចមិនបានត្រឹមត្រូវតាមគោលការណ៍ច្បាប់ និងលិខិតបទដ្ឋានគតិយុត្តិដែលបានកំណត់ ក្រសួងមហាផ្ទៃនឹងចាត់វិធានការតាមផ្លូវច្បាប់ជាធរមានដោយគ្មានករណីលើកលែងដាច់ខាត។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ធ្លាប់បានប្រាប់សារព័ត៌មាន The Cambodia Daily កាលពីពេលថ្មីៗនេះថា ការដាក់ចេញនូវវិធានការទប់ស្កាត់ការចេញឯកសារមិនប្រក្រតីនេះ គឺជារឿងល្អ ប៉ុន្តែបញ្ហាគឺស្ថិតនៅត្រង់ថា មន្ត្រីថ្នាក់ក្រោមទទួលយកទៅអនុវត្ត ឬក៏អត់ប៉ុណ្ណោះ ហើយបើពួកគេមិនអនុវត្ត តើក្រសួងមានវិធានការដាក់ពិន័យ ឬទោសទណ្ឌដែរទេ នេះទើបជាបញ្ហាដែលត្រូវបារម្ភចំពោះវិធានការខាងលើនេះ។
លោក សេក សុជាតិ លើកឡើងថា កន្លងមក រាល់ពេលរដ្ឋាភិបាលដាក់ចេញវិធានការរឹតបន្តឹងលើករណីណាមួយ ក៏ជាឱកាសរបស់មន្ត្រីមូលដ្ឋានប្រព្រឹត្តអំពើពុករលួយកាន់តែខ្លាំងដែរ ព្រោះថាអាជ្ញាធរបានយកវិធានការទាំងនោះទៅប្រើក្នុងអំពើពុករលួយរបស់ពួកគេ ដើម្បីទារប្រាក់ពីជនរងគ្រោះឱ្យបានកាន់តែច្រើន ខណៈការស៊ើបអង្កេត ឬការដាក់ពិន័យលើមន្ត្រីបែបនេះ គឺមានតែបន្តិចបន្តួចប៉ុណ្ណោះនាពេលកន្លងមក។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិតរូបនេះបញ្ជាក់ថា ការកាន់តួនាទីរយៈពេលយូររហូតដុះស្នឹមរបស់មន្ត្រីទាំងនោះ ក៏ជាហេតុដែលនាំឱ្យការអនុវត្តច្បាប់គ្មានប្រសិទ្ធភាព និងបណ្តាលឱ្យកើតមានអំពើពុករលួយជាប្រព័ន្ធដែរ ដូច្នេះមន្ត្រីដែលប្រចាំការតាមច្រកព្រំដែន គួរតែត្រូវបានផ្លាស់ប្ដូររាល់ ៣ខែ ឬ ៦ខែម្តង ក្នុងនោះរាល់ការផ្លាស់ចេញ ក៏ត្រូវធ្វើការស៊ើបអង្កេតចំពោះការអនុវត្តការងាររបស់ពួកគេដែរ ដើម្បីធានាភាពស្អាតស្អំ ហើយក៏ជាកត្តាជំរុញឱ្យមានការអនុវត្តការងារមានប្រសិទ្ធភាពបន្តទៀត។
កម្ពុជាមានព្រំដែនរួមគ្នាជាមួយប្រទេសឡាវ ប្រវែងប្រមាណជា ៥៤១គីឡូម៉ែត្រ ដែលជាប់ជាមួយខេត្តចំនួន៣ គឺខេត្តព្រះវិហារ ខេត្តស្ទឹងត្រែង និងខេត្តរតនគិរី ប៉ុន្តែខេត្តទាំង ៣ នេះ ត្រូវបានរដ្ឋាភិបាលយកខេត្តរតនគិរី និងខេត្តស្ទឹងត្រែង ទៅដាក់ក្នុងតំបន់ត្រីកោណអភិវឌ្ឍន៍កម្ពុជា ឡាវ និងវៀតណាម តាំងពីឆ្នាំ១៩៩៩ មកម្ល៉េះ ដូច្នេះគេមិនសង្ឃឹមថា ការអនុវត្តច្បាប់ក្នុងការទប់ស្កាត់ការឆ្លងដែនខុសច្បាប់ក្នុងខេត្តទាំងនេះមានប្រសិទ្ធភាពនោះទេ ព្រោះថា កន្លងទៅថ្មីៗនេះ ក៏មានការបែកធ្លាយពីការឆ្លងដែនរបស់ជនជាតិវៀតណាម ចូលទឹកដីកម្ពុជា ដោយគ្មានការទប់ស្កាត់ពីអាជ្ញាធរខ្មែរដែរ ដូចជាកើតមាននៅខេត្តព្រៃវែង និងខេត្តស្វាយរៀង ជាដើម៕