នាយករដ្ឋមន្ត្រីតពូជថ្មីលោក ហ៊ុន ម៉ាណែត បន្តលើការលើកលែងពន្ធប៉ាតង់សម្រាប់អ្នកសារព័ត៌មានតាមប្រព័ន្ធអនឡាញប្រភេទតូចទាំងអស់រយៈពេល ៥ឆ្នាំ និងកាត់បន្ថយកម្រៃអាជ្ញាបណ្ណស្នើសុំបង្កើតអង្គភាពសារព័ត៌មានថ្មីចំនួន ៥០% ដើម្បីជួយសម្រួលបន្ទុករបស់អ្នកសារព័ត៌មានដែលរងផលប៉ះពាល់ពីវិបត្តិជំងឺកូវីដ-១៩ និងវិបត្តិសេដ្ឋកិច្ចសកល និងស្នើសុំឱ្យសារព័ត៌មានបន្តធ្វើជាកញ្ចក់ឆ្លុះបញ្ចាំងអំពីភាពពិតជាក់ស្តែង និងភាពអសកម្មក្នុងសង្គម។
តាមរយៈសារជូនវេទិកានិពន្ធនាយកលើកទី២០ លោកនាយករដ្ឋមន្ត្រី ហ៊ុន ម៉ាណែត បានលើកឡើងថា នៅអាណត្តិទី៧ នេះ រដ្ឋាភិបាលបន្តអនុវត្តតាមអតីតនាយករដ្ឋមន្ត្រីលោក ហ៊ុន សែន លើការលើកលែងពន្ធប៉ាតង់សម្រាប់អ្នកសារព័ត៌មានតាមប្រព័ន្ធអនឡាញតូចៗទាំងអស់។
ប្រភពដដែលលើកឡើងថា ស្ថាប័នសារព័ត៌មានគឺជាដៃគូដែលមិនអាចខ្វះបាន ដោយរដ្ឋាភិបាលតែងតែយកចិត្តទុកដាក់លើកកម្ពស់សេរីភាពនៃការបញ្ចេញមតិ សេរីភាពសារព័ត៌មាន និងជំរុញឱ្យមានការបណ្តុះបណ្តាលផ្នែកសារព័ត៌មាន និងបច្ចេកវិទ្យាប្រព័ន្ធផ្សព្វផ្សាយទំនើប ក៏ដូចជាពង្រឹងការអនុវត្តក្រមសីលធម៌វិជ្ជាជីវៈ ដើម្បីឱ្យអ្នកសារព័ត៌មានបំពេញភារកិច្ចប្រកបដោយវិជ្ជាជីវៈ និងការទទួលខុសត្រូវ។
លោកនាយករដ្ឋមន្ត្រី ហ៊ុន ម៉ាណែត ស្នើស្ថាប័នសារព័ត៌មាន អ្នកសារព័ត៌មាន បន្តចូលរួមថែរក្សាសន្តិភាព និងលុបបំបាត់ជនឱកាសនិយមដែលជ្រកក្រោមស្លាកសារព័ត៌មាន។
ការផ្តល់ព័ត៌មានពិតអំពីសភាពការណ៍ពិតនៅកម្ពុជា ការផ្សព្វផ្សាយគោលនយោបាយរបស់រដ្ឋាភិបាលទៅកាន់ពលរដ្ឋ ការអប់រំផ្សព្វផ្សាយពីវិធានការបង្ការគ្រោះថ្នាក់ចរាចរណ៍ គ្រោះថ្នាក់នៃការប្រើប្រាស់គ្រឿងញៀន ការជួញដូរមនុស្ស គោលនយោបាយភូមិ-ឃុំមានសុវត្ថិភាព សុទ្ធតែត្រូវការការចូលរួមពីស្ថាប័នសារព័ត៌មាន និងអ្នកសារព័ត៌មាន។
អ្នកឃ្លាំមើលសង្គមលោក វ៉ន ចាន់ឡូត បានប្រាប់សារព័ត៌មាន The Cambodia Daily កន្លងមកថា ប្រព័ន្ធផ្សព្វផ្សាយដែលកាន់កាប់ដោយរដ្ឋាភិបាល ដូចជា កាសែត វិទ្យុ និងទូរទស្សន៍ ជាដើម ផ្សព្វផ្សាយតែពីសមិទ្ធផលដែលគណបក្សដឹកនាំរដ្ឋាភិបាលចង់បង្ហាញពលរដ្ឋប៉ុណ្ណោះ ចំណែករឿងណាដែលបង្ហាញពីភាពខ្វះចន្លោះរបស់រដ្ឋាភិបាល ពួកគេមិនបានផ្សព្វផ្សាយឱ្យពលរដ្ឋបានដឹងនោះទេ ដែលនេះគឺជាបញ្ហាសង្គមធំណាស់ក្នុងនាមពលរដ្ឋដែលជាម្ចាស់ប្រទេសក្នុងសង្គមប្រជាធិបតេយ្យ ត្រូវបានរដ្ឋាភិបាលរបស់ខ្លួនលាក់បាំងការពិត។ ចំណែកអង្គភាពសារព័ត៌មានមួយចំនួនវិញ ក៏មិនបានធ្វើកិច្ចការស្របតាមវិជ្ជាជីវៈរបស់ខ្លួនក្នុងការផ្តល់ព័ត៌មានពិតពីបញ្ហាសង្គម ដែលជាភាពចន្លោះប្រហោងនៃការដឹកនាំរបស់រដ្ឋាភិបាល ទៅកាន់ពលរដ្ឋម្ចាស់ប្រទេសដែរ ប៉ុន្តែពួកគេបែរជាផ្សាយតែព័ត៌មានដែលឥតប្រយោជន៍សម្រាប់ពលរដ្ឋខ្លួនឯងទៅវិញ។
កាលពីដើមខែមេសា ឆ្នាំ២០២៣ ក្រសួងព័ត៌មាន បានបង្ហាញរបាយការណ៍របស់ខ្លួនថា កម្ពុជាបានបើកឱ្យមានសិទ្ធិសេរីភាពបញ្ចេញមតិ និងសេរីភាពខាងសារព័ត៌មានយ៉ាងទូលំទូលាយ ដោយសារតែបច្ចុប្បន្ននេះ សារព័ត៌មានដែលបានចុះបញ្ជីនៅក្រសួងព័ត៌មាន មានចំនួនដល់ទៅជាង ៦០០អង្គភាព គេហទំព័រ និងទូរទស្សន៍អនឡាញមានជាង ៨០០អង្គភាព (៨៧៨អង្គភាព) វិទ្យុ FM ដែលកំពុងដំណើរការផ្សាយមានជាង ២០០ស្ថានីយ (២២១ស្ថានីយ) និងទូរទស្សន៍ផ្សាយផ្ទាល់មានរហូតដល់ទៅជិត ២០០ស្ថានីយផងដែរ (១៩០ស្ថានីយ)។
អង្គការអ្នកសារព័ត៌មានគ្មានព្រំដែន បានរកឃើញថា សេរីភាពសារព័ត៌មាននៅកម្ពុជាក្នុងឆ្នាំ២០២៣ នេះ បានបន្តធ្លាក់ចុះកាន់តែខ្លាំង បន្ទាប់ពីមេដឹកនាំកម្ពុជា លោក ហ៊ុន សែន បញ្ជាឲ្យបិទវិទ្យុ VOD ខណៈអ្នកសារព័ត៌មានបន្តរងការធ្វើទុក្ខបុកម្នេញ និងគំរាមកំហែង។
បើតាមសន្ទស្សន៍របស់អង្គការអ្នកសារព័ត៌មានគ្មានព្រំដែន (Reporters Without Border) ចេញផ្សាយជាសាធារណៈនៅខែឧសភា បានចាត់ចំណាត់ថ្នាក់សេរីភាពសារព័ត៌មាននៅកម្ពុជាស្ថិតក្នុងលំដាប់លេខរៀងទី១៤៧ លើ ១៨០ប្រទេសនៅឆ្នាំ២០២៣៕