ប្រជាពលរដ្ឋរងគ្រោះ ១៣១គ្រួសារក្នុងស្រុកគូលែន ខេត្តព្រះវិហារ ស្រែកអង្វរសុំឱ្យនាយករដ្ឋមន្ត្រីកម្ពុជា លោក ហ៊ុន ម៉ាណែត ជួយអន្តរាគមន៍រឿងដីធ្លីរបស់ពួកគាត់ដែលអាជ្ញាធរស្រុកគូលែន ខេត្តព្រះវិហារ បានធ្វើទុក្ខបុកម្នេញ និងគំរាមបណ្តេញពួកគាត់ចេញពីលំនៅឋាន ព្រមទាំងព្រមានចាប់ដាក់គុកថែមទៀត ប្រសិនបើប្រជាពលរដ្ឋទាំងនោះមិនរើចេញទេនោះ។
ប្រជាពលរដ្ឋទាំងជាង ១០០គ្រួសារខាងលើ ប្រាប់សារព័ត៌មាន The Cambodia Daily នៅថ្ងៃទី២២ ធ្នូ នេះថា អាជ្ញាធរខេត្តព្រះវិហារ បានប្រកាសថា ដីដែលពួកគាត់បានតាំងទីលំនៅតាំងពីឆ្នាំ២០១២ មកនោះដែលមានទំហំ ៦៤៩ហិកតារ និង ៤១អា មិនត្រូវបានកាត់ឆ្វៀលពីដីសម្បទានរបស់ក្រុមហ៊ុន សីលាដាម៉ិច ដើម្បីបែងចែកឱ្យពលរដ្ឋទាំង ១៣១គ្រួសារនេះឡើយ។
ប្រភពដដែលអះអាងថា កាលពីថ្ងៃទី៨ ខែមិថុនា ឆ្នាំ២០២៣ កន្លងទៅ អភិបាលស្រុកគូលែន ក៏បានព្រមានប្រជាពលរដ្ឋឱ្យចេញពីដីនោះដាច់ខាត បើមិនដូច្នោះទេ អាជ្ញាធរនឹងបញ្ជាកម្លាំងសមត្ថកិច្ចឱ្យចាប់ពួកគេដាក់គុកដោយគ្មានការលើកលែងឡើយ។
ប្រជាពលរដ្ឋរងគ្រោះទាំង ១៣១គ្រួសារ បញ្ជាក់ថា បើមិនមានការអន្តរាគមន៍ពីនាយករដ្ឋមន្ត្រីកម្ពុជា លោក ហ៊ុន ម៉ាណែត ទេ នោះដីរបស់ពួកគេទាំង ៦៤៩ហិកតារ និង ៤១អា នៅភូមិក្ដាក់ ឃុំត្បែងពីរ និងភូមិម្រេច ភូមិស្រយ៉ង់ត្បូង ឃុំស្រយ៉ង់ ស្រុកគូលែន ខេត្តព្រះវិហារ ច្បាស់ជាត្រូវរឹបអូសដោយសំណាក់អាជ្ញាធរខេត្តព្រះវិហារ ជាមិនខាន ហើយពួកគេក៏មិនដឹងថាទៅតាំងទីលំនៅកន្លែងណាទៀតដែរ។
ការអង្វរសុំឱ្យនាយករដ្ឋមន្ត្រីកម្ពុជា លោក ហ៊ុន ម៉ាណែត ជួយអន្តរាគមន៍រឿងដីធ្លីនេះ ធ្វើឡើងបន្ទាប់ពីអាជ្ញាធរស្រុកគូលែន ខេត្តព្រះវិហារ ព្រមានចាត់វិធានការច្បាប់លើពលរដ្ឋទាំងនោះ បើពួកគេមិនព្រមចាកចេញតាមការណែនាំរបស់អាជ្ញាធរទេនោះ។
កាលពីថ្ងៃទី១ ខែធ្នូ ឆ្នាំ២០២៣ អភិបាលស្រុកគូលែន លោក ប៉ែន ជឹង បានចេញសេចក្តីជូនដំណឹងមួយ ដោយព្រមានចាត់វិធានការច្បាប់លើប្រជាពលរដ្ឋជាង ១០០គ្រួសារ ដោយចោទថា ពួកគេចូលទន្ទ្រានដីសម្បទានសេដ្ឋកិច្ចរបស់ក្រុមហ៊ុន សីលាដាម៉ិច ខូអ៊ូលធីឌី ដែលមានផ្ទៃដីទំហំជាង ៦ពាន់ហិកតារ (៦៣៧៨ហិកតារ និង ៤៦អា) ក្នុងស្រុកគូលែន ខេត្តព្រះវិហារ ប្រសិនបើពួកគេមិនរើលំនៅឋានចេញឱ្យបានមុនថ្ងៃទី១០ ខែមករា ឆ្នាំ២០២៤ ខាងមុខនេះទេនោះ។
លោក ប៉ែន ជឹង បញ្ជាក់ថា ប្រជាពលរដ្ឋទាំងជាង ១០០គ្រួសារ (១៣១គ្រួសារ) ដែលកំពុងប្រើប្រាស់ដី និងអាស្រ័យផលដាំដុះដំណាំ ដូចជា ដំឡូង ពោត ស្រូវ យ៉ាងអនាធិបតេយ្យក្នុងទីតាំងដីសម្បទានសេដ្ឋកិច្ចរបស់ក្រុមហ៊ុន សីលាជាម៉ិច ដែលមានទំហំជាង ៦ពាន់ហិកតារ (៦៣៧៨,៤៦ហិកតារ) សព្វថ្ងៃនេះ គឺជាទង្វើខុសច្បាប់ធ្ងន់ធ្ងរ។
ចាប់តាំងពីដើមឆ្នាំ២០២២ មក ប្រជាពលរដ្ឋដែលបានរស់នៅ និងកាន់កាប់ដីដែលខ្លួនអាស្រ័យផលជាក់ស្តែងខាងលើនេះ ត្រូវបានអាជ្ញាធរខេត្តព្រះវិហារ ដាក់គ្រឿងចក្រឈូសឆាយជាបន្តបន្ទាប់ ក្រោមលេសថាប្រជាពលរដ្ឋទាំងនោះរស់នៅ និងអាស្រ័យផលលើដីរបស់ក្រុមហ៊ុន សីលាដាម៉ិច ដោយខុសច្បាប់។
ទាក់ទិននឹងបញ្ហានេះ ប្រជាពលរដ្ឋទាំង ១៣១គ្រួសារ និងមានដីសរុប ៦៤៩ហិកតារ និង ៤១អា នៅភូមិក្ដាក់ ឃុំត្បែងពីរ និងភូមិម្រេច ភូមិស្រយ៉ង់ត្បូង ឃុំស្រយ៉ង់ ស្រុកគូលែន ខេត្តព្រះវិហារ បាននាំគ្នាដាក់ញត្តិនៅរដ្ឋសភាកម្ពុជា ក្រសួងមហាផ្ទៃ និងខុទ្ទកាល័យនាយករដ្ឋមន្ត្រីជាបន្តបន្ទាប់ ដើម្បីសុំឱ្យស្ថាប័នទាំងនេះជួយអន្តរាគមន៍ទៅរដ្ឋបាលខេត្តព្រះវិហារ ដោះស្រាយជូនពួកគេ។ ជាងនេះទៀត សំណើទាំងនោះក៏បានស្នើសុំឱ្យអាជ្ញាធរ និងស្ថាប័នពាក់ព័ន្ធ ជួយកាត់ឆ្វៀលដីដែលមានទំហំ ៦៤៩ហិកតារ និង ៤១អា ដែលពួកគាត់បានកាន់កាប់ និងអាស្រ័យផលជាច្រើនឆ្នាំមកហើយ ព្រោះថាគ្រួសារខ្លះបានកាន់កាប់ដីនេះតាំងពីឆ្នាំ១៩៧៩ មក ចំណែកខ្លះទៀតក៏បានកាន់កាប់ដីនេះតាំងពីឆ្នាំ២០១២ មកដែរ គឺមុនពេលក្រុមហ៊ុន សីលាដាម៉ិច ទទួលបានដីសម្បទាននៅតំបន់នេះទៅទៀត។
ខ្លឹមសារក្នុងញត្តិទាំងនោះបានរៀបរាប់ថា នៅដើមខែមីនា ឆ្នាំ២០២២ កម្លាំងអាជ្ញាធរចម្រុះដឹកនាំដោយអភិបាលរងខេត្តព្រះវិហារ លោក អ៊ុង វុទ្ធី បានបញ្ជាកម្លាំង និងគ្រឿងចក្រឈូសឆាយបំផ្លាញផ្ទះសម្បែងរបស់ពលរដ្ឋអស់ប្រហែល ៦០ខ្នង និងផលដំណាំប្រហែល ៤៥០ហិកតារ អស់គ្មានសល់ ហើយបានបណ្តេញពលរដ្ឋចេញពីលំនៅ និងបានគំរាមប្តឹង និងចាប់ពលរដ្ឋដាក់គុកថែមទៀត។
បន្ទាប់ពីប្រជាពលរដ្ឋរងគ្រោះទាំង ១៣១គ្រួសារ ដាក់សុំអន្តរាគមន៍ពីក្រសួងស្ថាប័នកំពូលៗ នៅថ្ងៃទី១០ ខែមិថុនា ឆ្នាំ២០២២ ក្រសួងមហាផ្ទៃ បានចេញលិខិតមួយទៅកាន់អភិបាលខេត្តព្រះវិហារ ឱ្យពិនិត្យ និងដោះស្រាយលើករណីនេះដែរ ប៉ុន្តែរហូតដល់ពេលនេះ អាជ្ញាធរខេត្តព្រះវិហារ មិនបានដោះស្រាយវិវាទនេះជូនប្រជាពលរដ្ឋទាំង ១៣១គ្រួសារនេះទេ គឺមានតែព្រមានបណ្តេញចេញពីលំនៅឋាន និងគំរាមចាប់ពួកគេដាក់គុកប៉ុណ្ណោះ។
ជុំវិញបញ្ហានេះ កាលពីថ្ងៃទី៣០ ខែវិច្ឆិកា ឆ្នាំ២០២៣ រដ្ឋបាលស្រុកគូលែន ខេត្តព្រះវិហារ បានបើកកិច្ចប្រជុំជាមួយតំណាងប្រជាពលរដ្ឋទាំង ១៣១គ្រួសារ មានលោក ហួន ប៊ុនឈឿន លោក តូ បោន លោក ឃ្លាក លាំ និងលោក លូត សាឡា ជាដើម ដោយណែនាំឱ្យពួកគេចាកចេញពីដីនោះជាបន្ទាន់ បើមិនដូច្នោះទេ រដ្ឋបាលស្រុកគូលែន នឹងអនុវត្តវិធានការច្បាប់បណ្តេញពួកគេចេញពីទីតាំងដីនោះឱ្យខាងតែបាន។
ទាក់ទិននឹងការរំលោភដីធ្លី និងលំនៅឋានរបស់ប្រជាពលរដ្ឋនេះ ក៏កំពុងក្លាយជាប្រធានបទក្តៅមួយរបស់អ្នករាយការណ៍ពិសេសរបស់អង្គការសហប្រជាជាតិ ដែលត្រូវតាមដាន ដើម្បីប្រមូលធ្វើជារបាយការណ៍ដាក់ជូនអង្គការសហប្រជាជាតិ ដែលត្រូវពិនិត្យលើការអនុវត្តសិទ្ធិមនុស្សរបស់រដ្ឋាភិបាលកម្ពុជាតាមយន្តការពិនិត្យឡើងវិញ UPR នៅអំឡុងខែឧសភា ឆ្នាំ២០២៤ ខាងមុខនេះដែរ៕