អតីតបុគ្គលិកណាហ្គាវើលដ៍ និងសហជីពរាប់សិបនាក់ ប្រមូលផ្ដុំគ្នានៅមណ្ឌលអប់រំកែប្រែទី២ ឬពន្ធនាគារព្រៃស ដើម្បីលើកទឹកចិត្តដល់កញ្ញា ឈឹម ស៊ីថរ ក្នុងថ្ងៃខួបកំណើតរបស់កញ្ញាផង និងខួប ១ឆ្នាំនៃការចាប់ខ្លួនដាក់ពន្ធនាគារលើកទី២ ទាំងអយុត្តិធម៌ដោយអាជ្ញាធរក្រុងភ្នំពេញកាលពីថ្ងៃទី២៦ ខែវិច្ឆិកា ឆ្នាំ២០២២ កន្លងទៅ។
អតីតបុគ្គលិកណាហ្គាវើលដ៍ និងសហជីពប្រមាណជា ៥០នាក់ នៅថ្ងៃទី២៦ ខែធ្នូ ឆ្នាំ២០២៣ នេះ ប្រមូលផ្ដុំគ្នានៅមណ្ឌលអប់រំកែប្រែទី២ ឬពន្ធនាគារព្រៃស ដោយការថ្លែងសារ និងបង្ហោះប៉េងប៉ោង ជាដើម ដើម្បីស្នើឱ្យរដ្ឋាភិបាលកម្ពុជាពិចារណាដោះលែងកញ្ញា ឈឹម ស៊ីថរ ឱ្យមានសេរីភាពឡើងវិញ ដោយសារតែកញ្ញា ឈឹម ស៊ីថរ គ្រាន់តែជាអ្នកការពារសិទ្ធិការងាររបស់កម្មករនិយោជិតពីការរំលោភបំពានពីក្រុមហ៊ុនណាហ្គាវើលដ៍ប៉ុណ្ណោះ។
ក្រុមអតីតបុគ្គលិកណាហ្គាវើលដ៍ និងសហជីពខាងលើ លើកឡើងថា ការដោះលែងកញ្ញា ឈឹម ស៊ីថរ គឺជាចំណែកដ៏ធំមួយក្នុងការស្ដារស្ថានភាពសិទ្ធិមនុស្សនៅកម្ពុជាឡើងវិញ ព្រោះថាកន្លងមក មជ្ឈដ្ឋានជាតិ និងអន្តរជាតិ តែងតែរិះគន់កម្ពុជាជុំវិញការអនុវត្តសិទ្ធិមូលដ្ឋានរបស់ពលរដ្ឋជាបន្តបន្ទាប់ ជាពិសេសក្រោយពីកញ្ញា ឈឹម ស៊ីថរ ត្រូវបានចាប់ខ្លួនក្រោមបទចោទមិនសមហេតុផលនោះ។
លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) លើកឡើងក្នុងការប្រមូលផ្ដុំនៅថ្ងៃទី២៦ ខែធ្នូ ឆ្នាំ២០២៣ នេះថា រដ្ឋាភិបាលអាណត្តិថ្មីគួរពិចារណាដោះលែងកញ្ញា ឈឹម ស៊ីថរ ឱ្យមានសេរីភាពឡើងវិញ ព្រោះថាការដោះលែងកញ្ញា ឈឹម ស៊ីថរ គឺស្មើនឹងកែប្រែមុខមាត់របស់កម្ពុជាសម្រាប់រដ្ឋាភិបាលអាណត្តិថ្មីនេះលើឆាកអន្តរជាតិ។
លោក វន់ ពៅ អះអាងថា ប្រសិនបើគ្មានការដោះលែងកញ្ញា ឈឹម ស៊ីថរ ទេ សហជីពទាំងអស់គ្មានការជឿជាក់លើរដ្ឋាភិបាលថ្មីនេះថានឹងអាចបើកលំហសិទ្ធិសេរីភាពរបស់កម្មករ និងសហជីពឡើយ។
ចំណែកប្រធានសហជីពកម្មករចំណីអាហារ និងសេវាកម្មកម្ពុជា អ្នកស្រី អ៊ូ ទេព ផល្លីន លើកឡើងថា ក្រុមសហជីពទាំងអស់ដែលរងនូវភាពអយុត្តិធម៌ មិនដឹងថាត្រូវជួបនាយករដ្ឋមន្ត្រីថ្មីរបស់កម្ពុជាតាមវិធីណាទេ ដើម្បីស្នើសុំឱ្យគាត់ជួយរកយុត្តិធម៌ដល់សហជីព និងកម្មករនិយោជិតដែលកំពុងរងនូវការរំលោភបំពានសិទ្ធិការងារសព្វថ្ងៃនេះ។
អ្នកស្រី អ៊ូ ទេព ផល្លីន លើកឡើងថា លោក ហ៊ុន ម៉ាណែត គួរតែមកជួយកម្មករដែលរងនូវការរំលោភបំពានសិទ្ធិការងារពីក្រុមហ៊ុនណាហ្គាវើលដ៍ ដើម្បីឱ្យដឹងច្បាស់ដោយខ្លួនឯងថា កម្មករទាំងនេះពិតជាស៊ីឈ្នួលធ្វើកូដកម្មដូចគេបានចោទប្រកាន់ ឬពួកគេធ្វើកូដកម្មដើម្បីតែយុត្តិធម៌។
កញ្ញា ឈឹម ស៊ីថរ គឺជាប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ ដែលបានតស៊ូការពារសិទ្ធិកម្មកររាប់ពាន់នាក់ក្នុងក្រុមហ៊ុនណាហ្គាវើលដ៍ ប៉ុន្តែកញ្ញាត្រូវបានសមត្ថកិច្ចចាប់ខ្លួនយ៉ាងហិង្សាកាលពីដើមខែមករា ឆ្នាំ២០២២ អំឡុងពេលកញ្ញាព្យាយាមចូលរួមធ្វើកូដកម្មជាមួយក្រុមកូដករផ្សេងទៀត និងត្រូវបានឃុំខ្លួនជាបណ្ដោះអាសន្នក្នុងពន្ធនាគារព្រៃសអស់រយៈពេល ២ខែ ប៉ុន្តែកញ្ញាត្រូវបានដោះលែងឱ្យនៅក្រៅឃុំវិញកាលពីខែមីនា ឆ្នាំ២០២២ កន្លងទៅ។
ក្រោយមានសេរីភាពឡើងវិញ នៅអំឡុងខែវិច្ឆិកា ឆ្នាំ២០២២ កញ្ញា ឈឹម ស៊ីថរ បានធ្វើដំណើរទៅកាន់ប្រទេសអូស្ត្រាលី ចូលរួមមហាសន្និបាតពិភពលោកនៃសហភាពសហជីពអន្តរជាតិ (ITUC) នៅទីក្រុង Melbourne ក្នុងភាពជាតំណាងឱ្យផលប្រយោជន៍របស់កម្មករកម្ពុជា ដែលកំពុងរងនូវការធ្វើទុក្ខបុកម្នេញពីរដ្ឋាភិបាលកម្ពុជា និងក្រុមហ៊ុនណាហ្គាវើលដ៍ ជុំវិញការរំលោភសិទ្ធិការងារនោះ។
យ៉ាងណាក៏ដោយ នៅថ្ងៃទី២៦ ខែវិច្ឆិកា ឆ្នាំ២០២២ កញ្ញាត្រូវសមត្ថកិច្ចក្រុងភ្នំពេញចាប់ខ្លួននៅអាកាសយានដ្ឋានអន្តរជាតិភ្នំពេញជាលើកទី២ ក្រោយពីវិលត្រឡប់ពីប្រទេសអូស្ត្រាលី តាមដីកាបង្គាប់ឱ្យនាំខ្លួនរបស់សាលាដំបូងរាជធានីភ្នំពេញ ក្រោមហេតុផលថា កញ្ញាបានចាកចេញពីដែនដីនៃព្រះរាជាណាចក្រកម្ពុជា ដោយគ្មានការអនុញ្ញាតពីចៅក្រមស៊ើបសួរ ដែលអំពើនេះគឺបានបំពានលើកាតព្វកិច្ចនៃការត្រួតពិនិត្យតាមផ្លូវតុលាការ។
អង្គការសង្គមស៊ីវិលជាច្រើនលើកឡើងថា ការចាប់ខ្លួនកញ្ញា ឈឹម ស៊ីថរ ចំពោះការខកខានក្នុងការអនុវត្តនូវលក្ខខណ្ឌដែលតុលាការមិនបានប្រាប់សាមីខ្លួន និងមេធាវីឲ្យដឹងមុន គឺជាភាពអយុត្តិធម៌ធ្ងន់ធ្ងរបំផុតសម្រាប់តំណាងកម្មកររូបនេះ ដោយពួកគេសង្កេតឃើញថា តុលាការបានប្រើប្រាស់ប្រព័ន្ធយុត្តិធម៌របស់ខ្លួនដើម្បីដាក់សម្ពាធលើក្រុមកូដករ និងមេដឹកនាំសហជីព ជាជាងការធានាឱ្យបាននូវអព្យាក្រឹតភាពរបស់ខ្លួន ស្របពេលដែលមតិជាតិ និងអន្តរជាតិមើលឃើញថា ការអនុវត្តច្បាប់របស់តុលាការបានលម្អៀងទៅរកនិន្នាការនយោបាយរបស់បក្សកាន់អំណាច និងភាគីខាងក្រុមហ៊ុនរហូតមក។
ទាក់ទិននឹងសកម្មភាពការពារសិទ្ធិកម្មករ កាលពីដើមឆ្នាំ២០២៣ ក្រសួងការបរទេសសហរដ្ឋអាមេរិក បានចេញសេចក្តីប្រកាសព័ត៌មានថា អ្នកដឹកនាំសហជីពនៅកម្ពុជា កញ្ញា ឈឹម ស៊ីថរ គឺជាម្ចាស់ពានម្នាក់ក្នុងចំណោមម្ចាស់ពាន ១០នាក់ផ្សេងទៀតនៅជុំវិញសកលលោក ដែលទទួលបានពានរង្វាន់អ្នកការពារសិទ្ធិមនុស្សប្រចាំឆ្នាំ២០២២៕