នាយករដ្ឋមន្ត្រីបន្តពូជថ្មីរបស់កម្ពុជាលោក ហ៊ុន ម៉ាណែត លើកឡើងថា ទិវានយោបាយឈ្នះឈ្នះ និងការបញ្ចប់សង្គ្រាមនៅកម្ពុជាដែលប្រារព្ធឡើងនៅថ្ងៃទី២៩ ខែធ្នូ គឺមានអត្ថន័យស្មើនឹងទិវាសន្តិភាពដូច្នោះដែរ ដែលរដ្ឋាភិបាលរបស់លោកត្រូវតែធានាកុំឱ្យប្រទេសកម្ពុជាវិលទៅរកស្ថានភាពសង្គ្រាមវិញដូចកាលពី ៤០ឆ្នាំមុនឱ្យបានជាដាច់ខាត។
លោក ហ៊ុន ម៉ាណែត បានលើកឡើងក្នុងពិធីសម្ពោធប្រព័ន្ធបង្ហូរទឹកកខ្វក់ក្នុងរាជធានីភ្នំពេញកាលពីថ្ងៃទី២៧ ខែធ្នូ ឆ្នាំ២០២៣ ថា ផលលាភដែលកើតមាននៅកម្ពុជាដល់សព្វថ្ងៃនេះ គឺបានពីការបញ្ចប់សង្គ្រាមកាលពី ២៥ឆ្នាំមុន នាំឱ្យមានការអភិវឌ្ឍសង្គម និងសេដ្ឋកិច្ចជាបន្តបន្ទាប់។ លោកបន្តថា នៅសល់តែ ២ថ្ងៃទៀតប៉ុណ្ណោះ កម្ពុជាត្រូវប្រារព្ធខួបអនុស្សាវរីយ៍លើកទី២៥ នៃការសម្រេចបាននូវនយោបាយឈ្នះឈ្នះ និងការបញ្ចប់សង្គ្រាមនៅកម្ពុជា កាលពីថ្ងៃទី២៩ ខែធ្នូ ឆ្នាំ១៩៩៨ ហើយ។
នាយករដ្ឋមន្ត្រីថ្មីរបស់កម្ពុជារូបនេះលើកឡើងថា ប្រទេសកម្ពុជាគ្រប់ទីកន្លែង គឺសុទ្ធតែធ្លាប់រងទុក្ខដោយសារសង្គ្រាម ពលរដ្ឋរស់នៅវេទនាជូរចត់កាលពីជំនាន់ខ្មែរក្រហម ដែលនេះគឺជាសច្ចភាពនៃប្រវត្តិសាស្ត្រប្រទេសកម្ពុជា ដែលមនុស្សគ្រប់គ្នាត្រូវចងចាំ និងត្រូវជៀសវាងកុំឱ្យប្រវត្តិសាស្ត្រដ៏ជូរចត់នោះត្រឡប់មកកើតមានម្ដងទៀតលើទឹកដីកំណើតរបស់ខ្លួនឱ្យសោះ។
លោក ហ៊ុន ម៉ាណែត បញ្ជាក់ថា ការលើកឡើងពីប្រវត្តិសាស្ត្រ ប្រវត្តិសង្គ្រាមកាលពីអតីតកាលរបស់លោកនៅពេលនេះ គឺដើម្បីឱ្យពលរដ្ឋខ្មែរចងចាំពីប្រវត្តិសាស្ត្រ ហើយប្រៀបធៀបមកដល់ពេលបច្ចុប្បន្នថា តើកម្ពុជាបានដើរដល់ចំណុចណាហើយ។ ជាងនេះទៀត ក៏ដើម្បីឱ្យពលរដ្ឋមើលឃើញពីមោទនភាពថា ខ្មែរបានរួបរួមសាមគ្គីគ្នាកសាងប្រទេសដែលខ្ទេចខ្ទាំក្នុងភ្លើងសង្គ្រាមរហូតបានរីកចម្រើនមកដល់ចំណុចនេះ ទោះបីមិនបានដូចមហាប្រទេសនៅលើសកលលោកក៏ដោយ។
ការអះអាងរបស់នាយករដ្ឋមន្ត្រីកម្ពុជាបែបនេះ ធ្វើឡើងស្របពេលដែលរដ្ឋាភិបាលក្រោមការដឹកនាំរបស់បក្សប្រជាជនកម្ពុជាដែលមានលោក ហ៊ុន សែន ជាមេដឹកនាំ នឹងប្រារព្ធទិវាខួបអនុស្សាវរីយ៍លើកទី២៥ នៃនយោបាយឈ្នះឈ្នះ និងការបញ្ចប់សង្គ្រាមនៅកម្ពុជានៅចុងខែធ្នូ នេះ។
គណបក្សប្រជាជនកម្ពុជាដែលដឹកនាំដោយលោក ហ៊ុន សែន បានចាត់ទុកថ្ងៃទី២៩ ខែធ្នូ ឆ្នាំ១៩៩៨ ជាថ្ងៃបញ្ចប់នូវភ្លើងសង្គ្រាមដែលបានឆាបឆេះអស់រយៈពេលជាច្រើនឆ្នាំនៅក្នុងប្រទេសកម្ពុជា ក្រោមហេតុផលថា ថ្ងៃទី២៩ ខែធ្នូ ឆ្នាំ១៩៩៨ នេះ គឺជាថ្ងៃដែលអង្គការចាត់តាំងខ្មែរក្រហមបានរលាយបែកបាក់ពីទឹកដីកម្ពុជាដោយនយោបាយឈ្នះឈ្នះរបស់លោក។
កាលពីថ្ងៃទី២៧ ខែកុម្ភៈ ឆ្នាំ២០២៣ មេដឹកនាំខ្មែរក្រាញអំណាចជាង ៤ទសវត្សរ៍ លោក ហ៊ុន សែន ណែនាំមន្ត្រីក្រោមឱវាទរបស់ខ្លួនថា ថ្ងៃទី២៩ ខែធ្នូ ឆ្នាំ១៩៩៨ គឺជាថ្ងៃជោគជ័យនៃនយោបាយឈ្នះឈ្នះរបស់លោក ក្រោយប្រទេសកម្ពុជាកើតមាននូវជម្លោះបែកបាក់ជាតិតាំងពីឆ្នាំ១៤៧៣ ដែលគិតមកទល់នឹងពេលនេះ គឺមានរយៈពេលជាង ៥សតវត្សរ៍ទៅហើយនោះ។
លោក ហ៊ុន សែន អះអាងថា ឆ្នាំ១៩៩៨ គឺជាឆ្នាំដែលបញ្ចប់បានបញ្ចប់សង្គ្រាមលើទឹកដីកម្ពុជាជាលើកដំបូងក្នុងប្រវត្តិសាស្ត្រដែលមិនធ្លាប់មាន និងបាននាំមកនូវសុខសន្តិភាពរហូតដល់សព្វថ្ងៃនេះ។
ទោះជាបែបនេះក្តី អ្នកវិភាគនយោបាយ និងជាប្រធានវេទិកាពលរដ្ឋលោក គឹម សុខ ប្រាប់សារព័ត៌មាន The Cambodia Daily នៅថ្ងៃទី២៨ ធ្នូ ថា នយោបាយឈ្នះឈ្នះរបស់លោក ហ៊ុន សែន មិនមែនជាវិធីបញ្ចប់សង្គ្រាម និងរកសន្តិភាពឱ្យកម្ពុជាទេ ប៉ុន្តែជាល្បិចកលដើម្បីគ្រប់គ្រងអំណាចផ្ទាល់ខ្លួនប៉ុណ្ណោះ ព្រោះថាការដឹកនាំជាង ៤០ឆ្នាំរបស់គាត់ បានប្រព្រឹត្តអំពើឃាតកម្មនីតិរដ្ឋ និងឃាតកម្មប្រជាធិបតេយ្យយ៉ាងធំធេង ដែលបានបង្កើតឡើងក្រោយកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១។
លោក គឹម សុខ លើកឡើងថា បន្ទាប់ពីលោក ហ៊ុន សែន ឡើងកាន់អំណាចក្រោយវៀតណាមលើកបន្តុប គាត់មិនអាចដឹកនាំរកការបង្រួបបង្រួមជាតិបានទេ គឺមានតែសម្លាប់អ្នកនយោបាយខ្មែរ និងពលរដ្ឋខ្លួនឯងតែប៉ុណ្ណោះ នៅមុនពេលមានកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ ប៉ុន្តែនៅពេលដែលកិច្ចសន្យាអន្តរជាតិមួយនេះបានបង្កើតឡើង ទើបកម្ពុជាចាប់ផ្តើមមានការចរចាពីគ្រប់ភាគី និងអាចបញ្ចប់នូវជម្លោះប្រដាប់អាវុធផ្ទៃក្នុងជាតិរបស់ខ្លួនរហូតដល់ពេលនេះ។
អ្នកវិភាគឯករាជ្យរូបនេះបញ្ជាក់ថា លោក ហ៊ុន សែន អួតថានយោបាយឈ្នះឈ្នះរបស់គាត់ចាប់ផ្តើមពីអំឡុងឆ្នាំ១៩៩៦ និងបញ្ចប់នៅឆ្នាំ១៩៩៨ គឺមានរយៈពេលតែ ២ឆ្នាំប៉ុណ្ណោះ ដូច្នេះបើគាត់ពិតជាមានសមត្ថភាពបែបនេះមែន ហេតុអ្វីគាត់មិនប្រើនយោបាយឈ្នះឈ្នះពីឆ្នាំ១៩៨៥ ដែលវៀតណាមលើកបន្តុបមកដើម្បីបញ្ចប់សង្គ្រាមនៅឆ្នាំ១៩៨៧ តែម្តងទៅ ចាំបាច់ទុកឱ្យសង្គ្រាមនៅកម្ពុជាអូសបន្លាយរហូតមានកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ធ្វើអ្វី។
លោក គឹម សុខ បញ្ជាក់ថា ការអួតអាងពីនយោបាយឈ្នះឈ្នះ គ្រាន់តែជាវិធីធ្វើប្រជាភិថុតិដើម្បីបំភ្លៃការពិត និងមានចេតនាលុបបំបាត់កិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ដើម្បីកេងចំណេញនយោបាយរបស់គាត់ទៅវិញទេ ដូច្នេះការលើកឡើងរបស់លោក ហ៊ុន ម៉ាណែត បែបនេះ គ្រាន់តែបង្ហាញពីការមិនយល់ដឹងរបស់គាត់ ឬជាចេតនាលើកតម្កើងឪពុករបស់ខ្លួនទាំងបំពានការពិតតែប៉ុណ្ណោះ៕