សកម្មជនសិទ្ធិមនុស្សរងគ្រោះពីការបង្ក្រាបដោយហិង្សា និងព្រៃផ្សៃពីសំណាក់កងទាហានឆត្រយោង៩១១ ទាមទារឱ្យរដ្ឋាភិបាលថ្មីលាងជម្រះភាពអយុត្តិធម៌សង្គម និងផ្តល់យុត្តិធម៌ដល់ពួកគេដែលជាជនរងគ្រោះអស់រយៈពេល ១០ឆ្នាំកន្លងមក។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ បានសរសេរនៅលើហ្វេសប៊ុករបស់លោកនៅថ្ងៃទី៣ មករា ថា «១០ឆ្នាំហើយស្លាកស្នាមដិតដាមក្រឡៅនៅជាប់ជានិច្ច ព្យាយាមរកយុត្តិធម៌ តែហាក់នៅសែនឆ្ងាយ ឆ្ងាយដូចជើងមេឃ ឬដូចកំពុងតែរាវម្ជុលនៅក្នុងបាតសមុទ្រដែលរលកកំពុងតែបោកបក់ដូច្នោះដែរ»។
លោកបានសរសេររៀបរាប់ថា «សព្វថ្ងៃលោកបានរស់នៅក្រៅឃុំមែន តែគុកកម្មប្រចាំកាយវាហាក់ដូចជាស្រមោលអន្ទោលតាមប្រាណដូច្នោះដែរ។ អ្នកផ្សេងគេអាចបំភ្លេចរឿងនេះបាន តែសម្រាប់ពួកលោកជាអ្នករងគ្រោះ នៅតែមិនអាចបំភ្លេចបានទេ ព្រោះស្លាកស្នាមដិតដាមនៅលើរាងកាយ និងផ្លូវចិត្ត មិនអាចរលុបបានទេ ដរាបណាគ្មានយុត្តិធម៌ពិតប្រាកដ»។
លោក វន់ ពៅ អះអាងថា រជ្ជកាលថ្មីហើយ គួរតែត្រូវបានផ្តល់យុត្តិធម៌សម្រាប់លោក និងជនរងគ្រោះដទៃទៀត។ ម្យ៉ាងទៀត ឆ្នាំថ្មី២០២៤ ហើយ គួរតែធ្វើឲ្យពួកលោកជាជនរងគ្រោះមានពន្លឺយុត្តិធម៌ផង។
ចំណែកឯលោក ថេង សាវឿន ប្រធានសមាគមបណ្ដាញសហគមន៍កសិករកម្ពុជា បានសរសេរថា អ្វីដែលលោកនៅចងចាំមិនភ្លេចនោះ គឺគ្រប់រូបភាពនៃការប្រើប្រាស់អំពើហិង្សាយ៉ាងព្រៃផ្សៃជាទីបំផុតរបស់កងទាហានឆត្រយោង៩១១ មកលើរូបលោក។ លោកថា លោកនិងជនរងគ្រោះផ្សេងទៀតកំពុងរង់ចាំយុត្តិធម៌អស់រយៈពេល ១០ឆ្នាំហើយ ដោយសារតែការទាមទារដំឡើងប្រាក់ខែគោលឲ្យកម្មករ ១៦០ដុល្លារកាលពីឆ្នាំ២០១៣។
ប្រភពដដែលថា ការកាត់ក្ដីឲ្យលោកជាប់ពន្ធនាគាររយៈពេល ៤ខែ និង ២៨ថ្ងៃ ថាជាការសម្រេចក្តីដោយអយុត្តិធម៌ និងថាលោកនៅតែតស៊ូមតិស្វែងរកយុត្តិធម៌ក្នុងទិដ្ឋភាពច្បាប់។ ក្នុងរយៈពេល ១០ឆ្នាំមកនេះ និងក្នុងនាមជាជនរងគ្រោះម្នាក់ លោកស្នើទៅគណៈកម្មាធិការកែទម្រង់ប្រព័ន្ធយុត្តិធម៌ដែលត្រូវបានព្រះមហាក្សត្រតែងតាំងកាលពីថ្ងៃទី៣០ ខែធ្នូ ឆ្នាំ២០២៣ ឲ្យជំរុញទៅតុលាការកំពូលទម្លាក់ការចោទប្រកាន់ទៅលើពួកគេ ដែលជាជនរងគ្រោះក្នុងព្រឹត្តិការណ៍ផ្លូវវេងស្រេង។
កាលពីថ្ងៃទី២ ខែមករា ឆ្នាំ២០១៤ ទាហានកងឆត្រយោងនៃកងពលតូចលេខ៩១១ ដែលដឹកនាំដោយលោក ចាប ភក្តី បានប្រើអំពើហិង្សាជាខ្លាំងលើក្រុមសកម្មជនសិទ្ធិមនុស្ស សកម្មជនដីធ្លី និងកម្មករនៅមុខរោងចក្រ យ៉ាកជីន។ មួយថ្ងៃក្រោយមក មានការបង្ក្រាបបង្ហូរឈាមពីសំណាក់កងកម្លាំងចម្រុះនៃរបបលោក ហ៊ុន សែន រាប់រយនាក់ ប្រដាប់ដោយអាវុធទំនើបៗគ្រប់ដៃ បាញ់រះទៅលើកម្មករនៅលើផ្លូវវេងស្រេង។
ព្រឹត្តិការណ៍ទាំងពីរនេះ បណ្ដាលឱ្យកម្មករ ៤នាក់ស្លាប់ និងបាត់ខ្លួនម្នាក់រហូតមកទល់ពេលបច្ចុប្បន្ន ព្រមទាំងរងរបួសជាច្រើននាក់។
យោងតាមរបាយការណ៍របស់អង្គការលីកាដូ បានឲ្យដឹងថា កាលពីថ្ងៃទី០៣ ខែមករា ឆ្នាំ២០១៤ កងកម្លាំងសមត្ថកិច្ចចម្រុះបានបាញ់ប្រហារបណ្តាលឲ្យស្លាប់មនុស្សយ៉ាងតិច ៤នាក់ និងរងរបួសយ៉ាងតិច ៣៨នាក់។ កម្មករនិយោជិត និងអ្នកការពារសិទ្ធិមនុស្សចំនួន ២៣នាក់ ត្រូវបានចាប់ខ្លួន និងផ្ដន្ទាទោសពីបទហិង្សាដោយចេតនា បទបំផ្លិចបំផ្លាញទ្រព្យសម្បត្តិដោយចេតនា បទរារាំងចរាចរណ៍សាធារណៈ និងបទប្រមាថ។ ការបង្ក្រាបនៅពេលនោះ ធ្វើឡើងពាក់ព័ន្ធទៅនឹងការតវ៉ាសុំដំឡើងប្រាក់ខែឈ្នួលដោយសន្តិវិធីនៅលើមហាវិថីវេងស្រេង។
អង្គការលីកាដូ បានឲ្យដឹងថា ការស៊ើបអង្កេតក្រោយមកទៅលើការបាញ់ប្រហារនេះ ត្រូវបានរាយការណ៍ថា ធ្វើឡើងត្រឹមរយៈពេល ៣សប្ដាហ៍ប៉ុណ្ណោះ ហើយពុំមាននរណាម្នាក់ត្រូវបានយកមកផ្ដន្ទាទោសចំពោះការស្លាប់នេះទេ៕