រដ្ឋបាលខេត្តពោធិ៍សាត់ ដែលជាខេត្តជាប់បឹងទន្លេសាប បានចេញលិខិតណែនាំមួយនៅថ្ងៃទី០៣ ខែមករា ឆ្នាំ២០២៤ នេះ ស្នើឱ្យពលរដ្ឋផ្អាកធ្វើស្រែប្រាំងរដូវកាលទី២ ព្រោះបារម្ភខ្វះទឹកផ្គត់ផ្គង់ដំណាំស្រូវដែលដាំដុះលើផ្ទៃដីជាង ៤ម៉ឺនហិកតារ គឺហួសកម្រិតពីបរិមាណទឹកដែលអាចស្រោចស្រពបាន ខណៈរដ្ឋាភិបាលបានត្រៀមចំណាយលើក្រសួងកសិកម្ម រុក្ខាប្រមាញ់ និងនេសាទ ប្រមាណ ៧៧លានដុល្លារអាមេរិកនៅក្នុងឆ្នាំ២០២៤ នេះ។
សេចក្ដីណែនាំរបស់រដ្ឋបាលខេត្តពោធិ៍សាត់ ឲ្យដឹងថា ផែនការទឹកស្រោចស្រពលើការ «បង្កបង្កើនផលស្រូវរដូវប្រាំងឆ្នាំ២០២៣-២០២៤» ចេញផ្សាយដោយមន្ទីរធនធានទឹក និងឧតុនិយមខេត្តពោធិ៍សាត់ បានដាក់ឱ្យកសិករអនុវត្តត្រឹមតែ ២ម៉ឺនហិកតារប៉ុណ្ណោះ ប៉ុន្តែបច្ចុប្បន្ននេះ បើផ្អែកតាមការពិនិត្យជាក់ស្ដែងពីមន្ត្រីជំនាញ និងមន្ទីរកសិកម្មខេត្តពោធិ៍សាត់ រកឃើញថា ការបង្កបង្កើនផលឆ្នាំនេះនឹងកើនរហូតដល់ ៤៦៣៤១ហិកតារ គឺលើសផែនការប្រើប្រាស់ទឹក ២៦៣៤១ហិកតារ។
សេចក្ដីណែនាំរបស់រដ្ឋបាលខេត្តពោធិ៍សាត់ ដដែល ស្នើឱ្យពលរដ្ឋផ្អាកការដាំដុះស្រូវលើកទី២ បន្ទាប់ពីប្រមូលផលរួចរាល់ចាប់ពីខែមករា ដល់ខែឧសភា ឆ្នាំ២០២៤ ខាងមុខ ហើយលើសពីនោះ ពលរដ្ឋត្រូវត្រៀមលក្ខណៈស្តុកទឹកក្នុងស្រះ អណ្តូង ប្រឡាយ ដែលអាចស្តុកទឹកបានសម្រាប់ទុកប្រើប្រាស់ប្រចាំថ្ងៃ និងសត្វពាហនៈ ជាដើម។
រដ្ឋបាលខេត្តពោធិ៍សាត់ បានបដិសេធទទួលខុសត្រូវចំពោះការខ្វះទឹកស្រោចស្រពដំណាំ ឬប្រើប្រាស់ក្នុងករណីប្រជាកសិករនៅតែអនុវត្ត មិនទទួលយកការណែនាំរបស់រដ្ឋបាលខេត្តទេនោះ ហើយករណីដែលប្រជាកសិករនៅតែបន្តបង្កបង្កើនផលស្រូវរដូវប្រាំងលើកទី២ ទៀតនោះ ពលរដ្ឋនឹងអាចជួបប្រទះការខ្វះទឹកប្រើប្រាស់ប្រចាំថ្ងៃ ខ្វះទឹកសម្រាប់សត្វពាហនៈ និងខាតបង់ថវិការបស់បងប្អូនប្រជាកសិករថែមទៀតជាមិនខាន។
ទាក់ទងទៅនឹងបញ្ហានេះ លោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា យល់ថា ចំណាត់ការនេះមិនទាន់គ្រប់គ្រាន់នៅឡើយទេ ហើយថាអាជ្ញាធរគួរមានចំណាត់ការសម្រាប់រយៈពេលវែង ដើម្បីធានាការកាត់បន្ថយបញ្ហាខ្វះទឹកនេះឲ្យមានប្រសិទ្ធភាព។
លោកបន្តថា ខេត្តពោធិ៍សាត់ តែងតែមានទឹកលើសតម្រូវការក្នុងរដូវវស្សា អាជ្ញាធរគួរពិនិត្យមើលទីតាំងភូមិសាស្ត្រដែលសមស្របក្នុងការរៀបចំប្រព័ន្ធគ្រប់គ្រងទឹក ឬអាងស្តុកទឹកសម្រាប់ទុកប្រើប្រាស់ក្នុងរដូវប្រាំង។
ទោះយ៉ាងណា ក្រុមអ្នកតាមដានការអភិវឌ្ឍសង្គម រិះគន់ថា នៅពេលដែលពលរដ្ឋបង្កើតមុខរបរ ឬធ្វើស្រែចម្ការដាំដុះដំណាំនៅក្នុងស្រុក នោះរដ្ឋាភិបាលមិនដែលទទួលខុសត្រូវរកទីផ្សារឲ្យពួកគេនោះទេ ថែមទាំងរារាំងពលរដ្ឋដែលប្រកបរបរចិញ្ចឹមជីវិតថែមទៀត។ ករណីនេះ គឺមិនខុសពីបិទមុខរបរក្នុងស្រុករបស់ពលរដ្ឋ ហើយរុញខ្នងឲ្យពលរដ្ឋធ្វើចំណាកស្រុកទាំងប្រថុយប្រថានទៅស៊ីឈ្នួលធ្វើជាកម្មករនៅក្រៅប្រទេសនោះឡើយ។
ប្រភពដដែលបានលើកឡើងថា ខេត្តពោធិ៍សាត់ គឺជាប់នឹងបឹងទន្លេសាប ដែលជាប្រភពធនធានធម្មជាតិសម្បូរបែប និងជាអាងផ្ទុកទឹកធម្មជាតិ ប៉ុន្តែបែរជាពលរដ្ឋនៅក្នុងខេត្តនេះខ្វះទឹកសម្រាប់ស្រោចស្រពដំណាំកសិកម្មរបស់ខ្លួនទៅវិញ។
ក្រុមអ្នកតាមដានការអភិវឌ្ឍសង្គម បានលើកឡើងថា ដើម្បីលើកកម្ពស់ជីវភាពប្រជាកសិករ រដ្ឋបាលខេត្តពោធិ៍សាត់ គួរបង្កើនប្រភពទឹក និងជួយបូមទឹកឱ្យប្រជាកសិករបានធ្វើស្រែ ជាជាងប្រកាសណែនាំមិនឱ្យពលរដ្ឋធ្វើស្រែលើកទី២។ រដ្ឋាភិបាលគួរអន្តរាគមន៍ឱ្យប្រជាកសិករដាំដុះស្រូវឱ្យបានគ្រប់រដូវ ជាជាងប្រកាសឱ្យប្រជាពលរដ្ឋផ្អាកការបង្កបង្កើនផល ដែលនាំឱ្យបាត់បង់ប្រាក់ចំណូល។
អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ កញ្ញា អ៊ឹម រចនា បានប្រាប់សារព័ត៌មានក្នុងស្រុកថា មូលហេតុដែលបណ្ដាលឱ្យខ្វះខាតទឹកសម្រាប់ធ្វើស្រែ គឺបណ្ដាលមកពីតម្លៃស្រូវសើមនៅលើទីផ្សារនៅតែមានតម្លៃថ្លៃ ចន្លោះពី ១៣០០រៀល ទៅដល់ ១៥០០រៀល ដែលធ្វើឱ្យពលរដ្ឋនៅខេត្តពោធិ៍សាត់ នាំគ្នាសម្រុកដាំដុះស្រូវច្រើនជាងឆ្នាំមុនៗ។
ប្រភពដដែលអះអាងថា អាជ្ញាធរខេត្តបានគណនាហ្មត់ចត់រួចរាល់អស់ហើយថា នឹងអាចខ្វះទឹកផ្គត់ផ្គង់ក្នុងពេលខាងមុខ។
សម្រាប់ឆ្នាំ២០២៤ កញ្ចប់ថវិកាដែលរដ្ឋាភិបាលត្រៀមចំណាយលើក្រសួងកសិកម្ម រុក្ខាប្រមាញ់ និងនេសាទ មានចំនួន ៣១៦៣៥៣លានរៀល ឬស្មើនឹងប្រមាណ ៧៧លានដុល្លារអាម៉េរិក។ រដ្ឋាភិបាលក៏បានចំណាយបន្ថែមលើវិស័យកសិកម្មចំនួន ៤លានដុល្លារទៀត ក្នុងការដាក់ពង្រាយមន្ត្រីបច្ចេកទេសកសិកម្មទៅតាមឃុំ-សង្កាត់ ដែលមានសកម្មភាពកសិកម្មនៅទូទាំងប្រទេស ដើម្បីជំរុញការលើកកម្ពស់ផលិតភាពកសិកម្ម និងជួយដល់គ្រួសារកសិករ ក្នុងការលើកស្ទួយផលិតកម្មរបស់ខ្លួន និងការរៀបចំឱ្យមានសមាគមកសិកម្មនៅតាមទីជនបទ៕