សកម្មជនក្នុងសហគមន៍ក្នុងទីក្រុងឡងប៊ិច ចាត់ទុកប្រទេសកម្ពុជាជារដ្ឋដែលពិការភាពខាងវិស័យព័ត៌មានពិតសម្រាប់ប្រជាពលរដ្ឋខ្មែរ ព្រោះរដ្ឋាភិបាលប្រទេសនេះចាំតែកម្ទេចសារព័ត៌មានពិតដែលផ្សព្វផ្សាយពីការបំផ្លាញសង្គមជាតិ។
សកម្មជនក្នុងសហគមន៍ក្នុងទីក្រុងឡងប៊ិច ក្នុងទឹកដីសហរដ្ឋអាមេរិក លោក មួង ណារ៉េត លើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី៩ ខែមករា ឆ្នាំ២០២៤ នេះថា លោកមិនដែលឃើញប្រទេសប្រជាធិបតេយ្យលើពិភពលោកចាប់ខ្លួនអ្នកបញ្ចេញមតិ ឬអ្នកសារព័ត៌មានដែលចុះផ្សាយពីការពិតក្នុងសង្គម ដើម្បីបង្ហាញពីចំណុចខ្វះខាតរបស់រដ្ឋាភិបាលទេ ប៉ុន្តែកម្ពុជាជាប្រទេសដែលចម្លែកខុសគេ ត្បិតអ្នកសារព័ត៌មានក្នុងប្រទេសនេះតែងរងនូវការចាប់ខ្លួន និងចោទប្រកាន់ពីសំណាក់រដ្ឋាភិបាលជាបន្តបន្ទាប់។
សកម្មជនក្នុងសហគមន៍រូបនេះត្អូញត្អែរថា រដ្ឋាភិបាលកម្ពុជាសព្វថ្ងៃនេះកំពុងមោទនភាពយ៉ាងខ្លាំងលើវិធានការបង្ក្រាបអ្នកសារព័ត៌មានឯករាជ្យ និងការបំបិទសិទ្ធិសេរីភាពបញ្ចេញមតិរបស់សកម្មជននានា រួមទាំងអ្នកនយោបាយផង ដោយការចាប់ដាក់គុក ឬចោទប្រកាន់តាមផ្លូវច្បាប់ ដោយប្រើប្រាស់ប្រព័ន្ធតុលាការប្រៀបបីដូចជាសត្វខ្លាដែលកំពុងខាំហែកសត្វម្រឹគដាច់ស្បែករហែកសាច់ហូរឈាមពេញព្រៃគួរឱ្យរន្ធត់ដូច្នោះដែរ។
លោក មួង ណារ៉េត អំពាវនាវឱ្យរដ្ឋាភិបាលកម្ពុជាអនុវត្តខ្លឹមសារនៃមាត្រានីមួយៗដែលមានចែងក្នុងរដ្ឋធម្មនុញ្ញឱ្យបានម៉ឺងម៉ាត់ ដើម្បីធានានូវសិទ្ធិមូលដ្ឋានរបស់ប្រជាពលរដ្ឋ សិទ្ធិសេរីភាពបញ្ចេញមតិ និងសិទ្ធិខាងសារព័ត៌មាន ជាដើម មុននឹងរដ្ឋាភិបាលចាប់ខ្លួនអ្នកបញ្ចេញមតិណាម្នាក់ ព្រោះថាកន្លងមក ប្រជាពលរដ្ឋ និងអ្នកសារព័ត៌មានដែលលើកឡើងពីចំណុចខ្វះខាតរបស់រដ្ឋាភិបាល ក៏ដោយសារតែមន្ត្រីរបស់ខ្លួនមិនស្វែងរកដំណោះស្រាយឱ្យជនរងគ្រោះទាំងនោះដែរ។
រដ្ឋាភិបាលកម្ពុជាបានបង្ហាញរបាយការណ៍របស់ខ្លួនកាលពីពេលកន្លងទៅថា សព្វថ្ងៃនេះ អង្គភាពសារព័ត៌មានជាតិ និងបរទេសដែលបានចុះបញ្ជីនៅក្រសួងព័ត៌មាន មានចំនួនជាង ២ពាន់អង្គភាព (២១៥៤អង្គភាព) ដែលកំពុងធ្វើសកម្មភាពផ្សព្វផ្សាយតាមបែបបុរាណ និងបែបទំនើប ទៅតាមលទ្ធភាពរបស់ពួកគេរៀងៗខ្លួន។
ទាក់ទិននឹងបញ្ហានេះ កាលពីចុងឆ្នាំ២០២៣ រដ្ឋមន្ត្រីក្រសួងព័ត៌មាន លោក នេត្រ ភក្ដ្រា ដែលទើបនឹងត្រូវបានតែងតាំងសម្រាប់រដ្ឋាភិបាលអាណត្តិថ្មីនេះ បានលើកឡើងក្នុងពិធីជួបជាមួយតំណាងអង្គការយូណេស្កូនៅកម្ពុជា ថា ក្រសួងព័ត៌មានតែងបណ្តុះបណ្តាលធនធានមនុស្សក្នុងវិស័យសារព័ត៌មាន ដើម្បីពង្រឹងគុណភាព និងផ្តល់ផលប្រយោជន៍សម្រាប់សាធារណជន។
យ៉ាងណាក៏ដោយ សមាគមសម្ព័ន្ធអ្នកសារព័ត៌មានកម្ពុជា ខេមបូចា បានរកឃើញថា អ្នកសារព័ត៌មានជាង ៤០នាក់ (៤៤នាក់) និងស្ថាប័នសារព័ត៌មានឯករាជ្យមួយចំនួនទៀត ប្រឈមមុខនឹងការយាយីគ្រប់ទម្រង់ក្នុងឆ្នាំ២០២៣ កន្លងទៅ ជាពិសេសអំឡុងពេលប៉ុន្មានខែនៅមុនការបោះឆ្នោតសកលដែលប្រព្រឹត្តទៅកាលពីថ្ងៃទី២៣ ខែកក្កដា ឆ្នាំ២០២៣ ហើយក្នុងនោះ មាន ១៣ករណីដែលជាការប្រើប្រាស់ចំណាត់ការផ្លូវច្បាប់ប្រឆាំងអ្នកសារព័ត៌មាន។
របាយការណ៍ខាងលើបញ្ជាក់ថា ក្នុងឆ្នាំ២០២៣ យ៉ាងហោចណាស់អ្នកសារព័ត៌មាន ៦នាក់ ត្រូវបានឃុំខ្លួន និងចាប់ដាក់ពន្ធនាគារ ដោយការចោទប្រកាន់ពីបទជំរិតទារប្រាក់ និងចុះផ្សាយព័ត៌មានក្លែងក្លាយ។
ទាក់ទិននឹងបញ្ហានេះ នៅមុនការបោះឆ្នោតជាតិកាលពីខែកក្កដា ឆ្នាំ២០២៣ រដ្ឋាភិបាលកម្ពុជាបានបញ្ជាឱ្យអ្នកផ្គត់ផ្គង់សេវាអ៊ីនធឺណិតក្នុងប្រទេសកម្ពុជា រាំងខ្ទប់គេហទំព័រសារព័ត៌មានមួយចំនួន ដូចជា សារព័ត៌មានអាស៊ីសេរី សារព័ត៌មាន The Cambodia Daily និងគេហទំព័រកំណត់ត្រា ដែលជាបណ្ដុំព័ត៌មានរបស់សារព័ត៌មានវីអូឌី ដែលជាគេហទំព័រមួយត្រូវបានមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) ដាក់ឱ្យដំណើរការកាលពីខែមិថុនា ឆ្នាំ២០២៣ កន្លងទៅនោះ។
អង្គការអ្នកសារព័ត៌មានគ្មានព្រំដែន (Reporters Without Borders) បានដាក់ចំណាត់ថ្នាក់សេរីភាពសារព័ត៌មាននៅកម្ពុជាសម្រាប់ឆ្នាំ២០២៣ ស្ថិតក្នុងលំដាប់លេខរៀងទី១៤៧ ក្នុងចំណោមប្រទេស១៨០ ដែលចំណាត់ថ្នាក់នេះបង្ហាញអំពីសេរីភាពសារព័ត៌មាននៅកម្ពុជានៅតែមិនអាចងើបចេញពីចំណាត់ថ្នាក់ដ៏អាក្រក់ ដោយសារតែគេរកឃើញថា មានការកើនឡើងនៃការធ្វើទុក្ខបុកម្នេញរបស់រដ្ឋាភិបាលលើប្រព័ន្ធផ្សព្វផ្សាយឯករាជ្យ។
អង្គការអ្នកសារព័ត៌មានគ្មានព្រំដែន លាតត្រដាងថា វិស័យប្រព័ន្ធផ្សព្វផ្សាយឯករាជ្យនៅកម្ពុជាត្រូវបានបំផ្លិចបំផ្លាញ និងបោសសម្អាតដោយរដ្ឋាភិបាលកម្ពុជា ចាប់តាំងពីអំឡុងឆ្នាំ២០១៧ និងឆ្នាំ២០១៨ មក។ ជាលទ្ធផលនៃយុទ្ធនាការនេះ ពលរដ្ឋកម្ពុជាសព្វថ្ងៃនេះទទួលបានព័ត៌មានតែពីស្ថាប័នដែលស្និទ្ធនឹងរដ្ឋាភិបាលកម្ពុជាតែប៉ុណ្ណោះ។
ជាក់ស្តែង កូនស្រីលោក ហ៊ុន សែន គឺអ្នកស្រី ហ៊ុន ម៉ាណា ដែលត្រូវជាប្អូនស្រីបង្កើតរបស់លោក ហ៊ុន ម៉ាណែត នាយករដ្ឋមន្ត្រីថ្មីរបស់កម្ពុជា ត្រូវគេរកឃើញថាជាប្រធានក្រុមហ៊ុនដ៏ធំសម្បើមមួយដែលកាន់កាប់កាសែត ទស្សនាវដី្ត ស្ថានីយវិទ្យុ បណ្ដាញទូរទស្សន៍ និងគេហទំព័រអ៊ីនធឺណិតនៅកម្ពុជាទាំងអស់ ដែលជាស្ថាប័នឃោសនាឱ្យរដ្ឋាភិបាលកម្ពុជា ខណៈសហភាពសហព័ន្ធអ្នកសារព័ត៌មានកម្ពុជាដែលលោក ហ៊ុន សែន តែងផ្តល់ថវិការាប់សិបម៉ឺនដុល្លារក្នុង ១ឆ្នាំៗ និងស្ថាប័នសារព័ត៌មាន Fresh News ជាដើម ក៏ត្រូវគេមើលឃើញថាជាស្ថាប័នបម្រើសេណារីយ៉ូរបស់រដ្ឋាភិបាលកម្ពុជាដែរ៕