អគ្គនាយកដ្ឋានអន្តោប្រវេសន៍ អះអាងថា កម្លាំងសមត្ថកិច្ចកម្ពុជាជួយសង្គ្រោះជនជាតិបរទេសចំនួន ៥៦នាក់ពីហេតុការណ៍ចាប់ជំរិតដោយជនជាតិបរទេសដូចគ្នា នៅពេលចុះត្រួតពិនិត្យរដ្ឋបាលចំនួនពីរទីតាំងនៅក្នុងខណ្ឌដូនពេញ កាលពីថ្ងៃទី១១ ខែមករា ឆ្នាំ២០២៤ កន្លងទៅ។
យោងតាមការចេញផ្សាយដោយអគ្គនាយកដ្ឋានអន្តោប្រវេសន៍ នៅព្រឹកថ្ងៃទី១៧ ខែមករា ឆ្នាំ២០២៤ បានឲ្យដឹងថា អគ្គនាយកដ្ឋានអន្តោប្រវេសន៍សហការជាមួយកម្លាំងរបស់នាយកដ្ឋានចារកម្មនៃអគ្គស្នងការដ្ឋាននគរបាលជាតិ ដោយមានការសម្របសម្រួលពីព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានចុះត្រួតពិនិត្យរដ្ឋបាលចំនួនពីរទីតាំងនៅខណ្ឌដូនពេញ។ ទីតាំងទី១ សណ្ឋាគារមួយកន្លែងស្ថិតនៅសង្កាត់វត្តភ្នំ ខណ្ឌដូនពេញ និងទីតាំងទី២ នៅផ្ទះសំណាក់មួយកន្លែងក្នុងសង្កាត់ផ្សារកណ្ដាល ខណ្ឌដូនពេញ ដែលជាទីតាំងសង្ស័យមានជាប់ពាក់ព័ន្ធករណីនាំមនុស្សចេញឆ្លងដែនខុសច្បាប់ ដោយអនុវត្តតាមបណ្ដឹងអន្តរាគមន៍ជួយសង្គ្រោះពីជនជាតិបង់ក្លាដេស កាលពីដើមសប្ដាហ៍កន្លងទៅនេះ។
ដោយអនុវត្តតាមបណ្ដឹងអន្តរាគមន៍ជួយសង្គ្រោះពីជនជាតិបង់ក្លាដេស កាលពីថ្ងៃទី១៤ ខែធ្នូ ឆ្នាំ២០២៣ នាយកដ្ឋានស៊ើបអង្កេត និងអនុវត្តន៍នីតិវិធីនៃអគ្គនាយកដ្ឋានអន្តោប្រវេសន៍ បានចុះស្រាវជ្រាវស៊ើបអង្កេតរហូតដល់ថ្ងៃទី១១ ខែមករា ឆ្នាំ២០២៤ បានឃាត់ខ្លួនជនបរទេសចំនួន ៥៨នាក់នៅចំនួនពីរទីតាំងក្នុងខណ្ឌដូនពេញ រាជធានីភ្នំពេញ ដោយក្នុងនោះ ជនបរទេស ៥៦នាក់ជាជនរងគ្រោះ និងជនបរទេសបង់ក្លាដេស ២នាក់ សង្ស័យជាមេខ្លោងពាក់ព័ន្ធករណីនាំមនុស្សចេញឆ្លងដែនខុសច្បាប់។
អគ្គនាយកដ្ឋានអន្តោប្រវេសន៍ បានឲ្យដឹងទៀតថា ជនបរទេសដែលជាជនរងគ្រោះ ៥៦នាក់នោះមាន ៣សញ្ជាតិ គឺបង់ក្លាដេស ៥១នាក់ ឥណ្ឌា ៤នាក់ និងស្រីលង្កា ចំនួនម្នាក់ ដោយត្រូវបានមេខ្យល់អូសទាញមកកម្ពុជា ដើម្បីស្វែងរកការងារធ្វើ។ ដោយឡែកសម្រាប់អ្នកមិនចេះអង់គ្លេស និងកុំព្យូទ័រ ត្រូវបញ្ជូនបន្តទៅប្រទេសថៃ និងម៉ាឡេស៊ី។
ប្រភពដដែលថា បច្ចុប្បន្ន ជនបរទេសដែលរងគ្រោះទាំង ៥៦នាក់ ដោយមានការសម្របសម្រួលពីក្រសួងសង្គមកិច្ច បានប្រគល់ឲ្យអង្គការការីតាសកម្ពុជា-ខេត្តកណ្តាល។ ចំពោះជនជាតិបង់ក្លាដេស ២នាក់ដែលសង្ស័យជាមេខ្លោងពាក់ព័ន្ធករណីនាំមនុស្សឆ្លងដែនខុសច្បាប់ ត្រូវបានកសាងសំណុំរឿងបញ្ជូនទៅតុលាការ និងបន្តស្រាវជ្រាវស្វែងរកជនសង្ស័យជាជនបរទេស ៤នាក់ទៀតដែលបានរត់គេចខ្លួន ដើម្បីយកមកអនុវត្តតាមនីតិវិធី។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានឲ្យដឹងថា លោកបារម្ភពីការផ្ទុះឡើងវិញនូវករណីឆបោកតាមប្រព័ន្ធអនឡាញ ការចាប់ជំរិត និងបង្ខាំងមនុស្សនៅលើទឹកដីកម្ពុជា បន្ទាប់ពីអាជ្ញាធរបានបង្ក្រាបករណីទាំងនោះជាបន្តបន្ទាប់កាលពីពេលកន្លងទៅ។
ប្រភពដដែលព្រមានថា បទល្មើសនៃការចាប់ជំរិត និងបង្ខាំងធ្វើទារុណកម្មមនុស្ស នៅតែបន្តមានវត្តមាននៅកម្ពុជា ដែលទាមទារឱ្យអាជ្ញាធរបង្កើនការទប់ស្កាត់ និងបង្ក្រាបឱ្យកាន់តែខ្លាំង។ លោកអះអាងថា ការផ្ទុះករណីចាប់ជំរិតបង្ខាំងមនុស្សនៅពេលនេះ គឺជាក្ដីបារម្ភធំមួយក្នុងពេលដែលកម្ពុជាកំពុងទាក់ទាញភ្ញៀវទេសចរអន្តរជាតិ នឹងធ្វើឲ្យប៉ះពាល់ដល់កិត្តិយសប្រទេសជាតិ ស្របពេលដែលកម្ពុជាកំពុងមានឈ្មោះមិនល្អក្នុងករណីនេះស្រាប់។
សារព័ត៌មាន The Cambodia Daily មិនអាចទាក់ទងអ្នកនាំពាក្យក្រសួងមហាផ្ទៃ លោក ខៀវ សុភ័គ និងរដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស អ្នកស្រី ជូ ប៊ុនអេង ដើម្បីសុំការបកស្រាយពីក្ដីបារម្ភនេះបានទេរហូតដល់ម៉ោងចេញផ្សាយនេះ។
កាលពីថ្ងៃទី៣០ ខែវិច្ឆិកា ឆ្នាំ២០២៣ កន្លងមក អាជ្ញាធរបានឃាត់ខ្លួនជនល្មើសចំនួន ១៣នាក់ ក្នុងនោះមានជនជាតិខ្មែរម្នាក់ និងជនជាតិបង់ក្លាដេស (Bangladesh) ចំនួន ១២នាក់ នៅក្នុងខណ្ឌជ្រោយចង្វារ រាជធានីភ្នំពេញ ដោយសង្គ្រោះបានជនជាតិចិន ២នាក់។
ដោយឡែកកាលពីថ្ងៃទី២០ ខែវិច្ឆិកា ឆ្នាំ២០២៣ សមត្ថកិច្ចនៅរាជធានីភ្នំពេញ បានឃាត់ខ្លួនជនសង្ស័យចំនួន ៣៣នាក់ មានជនជាតិខ្មែរ ចិន វៀតណាម ពាក់ព័ន្ធករណីបង្ខាំងមនុស្សដោយខុសច្បាប់ និងបើកអនឡាញខុសច្បាប់ និងករណីចាប់ជំរិតជាច្រើនផ្សេងទៀត។
គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស បានបង្ហាញរបាយការណ៍ក្នុងពិធីខួបលើកទី១៧ នៃទិវាជាតិប្រឆាំងការជួញដូរមនុស្ស ១២ ធ្នូ ឆ្នាំ២០២៣ ក្រោមប្រធានបទ «បច្ចេកវិទ្យាជាមធ្យោបាយដើម្បីអភិវឌ្ឍជាតិ មិនមែនដើម្បីជួញដូរមនុស្ស» ថា ក្នុងឆមាសទី១ ឆ្នាំ២០២៣ គណៈកម្មាធិការប្រឆាំងអំពើជួញដូរមនុស្សបានសហការជាមួយអាជ្ញាធរពាក់ព័ន្ធ ដើម្បីបង្ក្រាប និងសង្គ្រោះជនរងគ្រោះសរុបមានចំនួនជាង ៨០ករណី (៨៧ករណី) ប៉ុន្តែបើធៀបនឹងឆមាសទី១ ឆ្នាំ២០២២ គឺមានចំនួនត្រឹមតែជាង ៧០ករណី (៧៤ករណី) ប៉ុណ្ណោះ។
ប្រភពដដែលបង្ហាញថា ក្នុងប្រតិបត្តិការដែលបានធ្វើឡើងក្នុងឆមាសទី១ ឆ្នាំ២០២៣ អាជ្ញាធរមានសមត្ថកិច្ចបានឃាត់ខ្លួនជនសង្ស័យបញ្ជូនទៅតុលាការចំនួនជិត ១០០នាក់ (៩៦នាក់) និងជួយសង្គ្រោះជនរងគ្រោះបានជិត ៣០០នាក់ (២៨១នាក់) ផងដែរ។
របាយការណ៍របស់ការិយាល័យអង្គការសហប្រជាជាតិប្រឆាំងគ្រឿងញៀន និងឧក្រិដ្ឋកម្ម (UNODC) ចេញផ្សាយកាលពីខែកញ្ញា ឆ្នាំ២០២៣ បង្ហាញថា ប្រទេសកម្ពុជាស្ថិតក្នុងចំណោមប្រទេសក្នុងតំបន់អាស៊ីអាគ្នេយ៍ រួមមាន ឡាវ (Lao) និងមីយ៉ាន់ម៉ា (Myanmar) ដែលកំពុងមានភាពសកម្មខ្លាំងក្នុងការជួញដូរមនុស្ស បង្ខំឱ្យធ្វើឧក្រិដ្ឋកម្ម បោកប្រាស់តាមប្រព័ន្ធអនឡាញ និងក្លែងបន្លំហិរញ្ញវត្ថុ ក្នុងនោះរួមមានការធ្វើទារុណកម្មឃោរឃៅទៅលើជនរងគ្រោះដោយការឃុំខ្លួន បំបិទសិទ្ធិសេរីភាព ការដកហូតឯកសារបញ្ជាក់អត្តសញ្ញាណផ្ទាល់ខ្លួន ការរំលោភបំពានរាងកាយ វាយដំ និងការផ្ទេរជនរងគ្រោះពីកន្លែងមួយទៅកន្លែងមួយផ្សេងទៀត ជាដើម៕