កូរ៉េខាងជើង ប្រកាសបញ្ចប់គោលនយោបាយស្វះស្វែងរកការបង្រួបបង្រួមឡើងវិញជាមួយនឹងប្រទេសកូរ៉េខាងត្បូង ខណៈមេដឹកនាំប្រទេសកុម្មុយនីស្តផ្ដាច់ការមួយនេះ បានអនុម័តដាក់កូរ៉េខាងត្បូង គឺជារដ្ឋសត្រូវចម្បង។
មេដឹកនាំកូរ៉េខាងជើង លោក គីម ជុងអ៊ុន (Kim Jong Un) បានស្នើឲ្យធ្វើវិសោធនកម្មរដ្ឋធម្មនុញ្ញដោយបញ្ចូលឃ្លាមួយដែលចែងថា ប្រទេសកូរ៉េខាងត្បូង គឺជារដ្ឋសត្រូវចម្បងរបស់កូរ៉េខាងជើង។
លោកបានអំពាវនាវដូច្នេះនៅក្នុងអំឡុងពេលលោកថ្លែងសុន្ទរកថាកាលពីថ្ងៃចន្ទ នៅចំពោះមុខសភាកូរ៉េខាងជើង។
យោងតាមសេចក្ដីរាយការណ៍របស់ទីភ្នាក់ងារសារព័ត៌មានមជ្ឈិមកូរ៉េ KCNA មេដឹកនាំកូរ៉េខាងជើងបានអនុម័តហៅកូរ៉េខាងត្បូង គឺជារដ្ឋសត្រូវចម្បងដោយចេញពីមាត់លោកផ្ទាល់។
លោក គីម ជុងអ៊ុន បាននិយាយថា រដ្ឋធម្មនុញ្ញក៏គួរតែបញ្ចូលផែនការត្រួតត្រា ការបង្ក្រាប និងការទាមទារយកមកវិញនូវកូរ៉េខាងត្បូងទាំងមូល ប្រសិនបើមានសង្គ្រាមកើតឡើងជាថ្មីរវាងប្រទេសទាំងពីរ តែលោក គីម ជុងអ៊ុន បញ្ជាក់ថា កូរ៉េខាងជើងគ្មានបំណងចាប់ផ្ដើមសង្គ្រាមនោះទេ ហើយក៏គ្មានបំណងបញ្ចៀសសង្គ្រាមដែរ។
សភាកូរ៉េខាងជើងបានប្រកាសកាលពីថ្ងៃអង្គារក្នុងសប្ដាហ៍នេះអំពីការលុបចោលទីភ្នាក់ងារចំនួនពីររបស់រដ្ឋាភិបាលដែលទទួលខុសត្រូវក្នុងគម្រោងផ្ដួចផ្ដើមបង្រួបបង្រួមឡើងវិញ និងកិច្ចសហប្រតិបត្តិការសេដ្ឋកិច្ច និងទីភ្នាក់ងារមួយទៀតដែលជំរុញផ្សព្វផ្សាយឱ្យពលរដ្ឋកូរ៉េខាងត្បូងទៅលេងកម្សាន្តនៅរមណីយដ្ឋានភ្នំ Kumgang របស់កូរ៉េខាងជើង។
កាលពីពេលថ្មីៗនេះ លោក គីម ជុងអ៊ុន បានបញ្ជាឱ្យបំផ្លាញចោលនិមិត្តសញ្ញាទាំងអស់នៃការបង្រួបបង្រួមឡើងវិញរវាងកូរ៉េខាងជើង និងកូរ៉េខាងត្បូង ដែលក្នុងនោះរួមមានទាំងបូជនីយដ្ឋានតំណាងការបង្រួបបង្រួមជាតិឡើងវិញនៅក្នុងរដ្ឋធានីព្យុងយ៉ាង ដែលកសាងឡើងដោយលោក Kim Jong Il ជាឪពុករបស់លោក ជុងអ៊ុន ប៉ុន្តែលោក ជុងអ៊ុន បានហៅបូជនីយដ្ឋាននោះថាជារបស់ទើសភ្នែកលែងតំណាងឱ្យនិមិត្តរូបនៃការបង្រួបបង្រួមជាតិឡើងវិញហើយ។
ជាមួយគ្នានេះ ប្រធានាធិបតីកូរ៉េខាងត្បូង លោក Yoon Suk Yeol បានវាយប្រហារធ្ងន់ៗចំពោះការលើកឡើងរបស់លោក គីម ជុងអ៊ុន។ លោកព្រមានថា កូរ៉េខាងជើងនឹងរងទណ្ឌកម្មធ្ងន់ធ្ងរជាងនេះច្រើនដង ប្រសិនបើប្រទេសនេះបង្កសង្គ្រាមវាយប្រហារលើកូរ៉េខាងត្បូង។ លោក Yoon Suk Yeol បានថ្លែងដូចនេះក្នុងអំឡុងការប្រជុំគណៈរដ្ឋមន្ត្រីរបស់លោក។
ភាពតានតឹងរវាងកូរ៉េខាងជើង និងកូរ៉េខាងត្បូង កាន់តែអាក្រក់ទៅៗក្នុងរយៈពេលប៉ុន្មានឆ្នាំថ្មីៗនេះខណៈដែលកូរ៉េខាងជើង បានបង្កើនកម្មវិធីសាកល្បងមីស៊ីលផ្លោងរបស់ខ្លួន ហើយបានប្ដេជ្ញាពង្រីកឃ្លាំងអាវុធនុយក្លេអ៊ែររបស់ខ្លួន។
ឧបទ្វីបកូរ៉េ ត្រូវបានបំបែករវាងកូរ៉េខាងជើង ដែលគ្រប់គ្រងដោយរបបកុម្មុយនីស្ត និងភាគខាងត្បូងគ្រប់គ្រងដោយរបបសាធារណរដ្ឋដែលគាំទ្រដោយសហរដ្ឋអាមេរិក។
សង្គ្រាមបានផ្ទុះឡើងរវាងកូរ៉េខាងជើង និងកូរ៉េខាងត្បូង ក្នុងឆ្នាំ១៩៥០ និងបានបញ្ចប់នៅឆ្នាំ១៩៥៣ តាមរយៈបទឈប់បាញ់គ្នាដែលអង្គការសហប្រជាជាតិជាអ្នកត្រួសត្រាយឱ្យមានយុទ្ធសន្តិភាព និងតំបន់មួយនៅព្រំដែនប្រទេសទាំងពីរ ហៅថាតំបន់គ្មានកងទ័ព ឬ DMZ។
ប៉ុន្តែប៉ុន្មានថ្ងៃចុងក្រោយនេះ លោក គីម ជុងអ៊ុន បានប្រកាសរំលាយតំបន់គ្មានកងទ័ព DMZ នេះហើយ ដោយចាប់ផ្ដើមស្ថាបនាមូលដ្ឋានទ័ពឡើងវិញជាមួយនឹងការប្រកាសឱ្យបក្សពលកររបស់លោក ពន្លឿនការត្រៀមលក្ខណៈសម្រាប់សង្គ្រាម ក្នុងនោះរួមមានទាំងកម្មវិធីនុយក្លេអ៊ែររបស់ទីក្រុងព្យុងយ៉ាង ផងដែរ។
ការប្រកាសរបស់លោក គីម ជុងអ៊ុន ធ្វើឡើងនៅឯកិច្ចប្រជុំចុងឆ្នាំរបស់បក្សពលករកូរ៉េ។
តាមប្រព័ន្ធផ្សព្វផ្សាយ KCNA នៅអំឡុងកិច្ចប្រជុំនោះ លោក គីម ជុងអ៊ុន បានស្នើឱ្យគណបក្សកាន់អំណាចតែមួយគត់របស់កូរ៉េខាងជើង នេះ ពន្លឿនការត្រៀមលក្ខណៈសម្រាប់សង្គ្រាមលើគ្រប់វិស័យទាំងអស់ ក្នុងនោះរួមមានត្រៀមអាវុធនុយក្លេអ៊ែរ ដែលជាអាវុធប្រល័យលោកដ៏គ្រោះថ្នាក់បំផុត។
ជាមួយគ្នានេះ លោក ជុងអ៊ុន ក៏បានបញ្ជាក់ថា ស្ថានការណ៍យោធានៅលើឧបទ្វីបកូរ៉េ កំពុងស្ថិតក្នុងសភាពកាន់តែយ៉ាប់យ៉ឺន ដោយសារតែសកម្មភាពអរិភាពមិនធ្លាប់មានរបស់សហរដ្ឋអាមេរិក និងកូរ៉េខាងត្បូង ចំពោះកូរ៉េខាងជើង។
កាលពីសប្ដាហ៍មុន លោក ជុងអ៊ុន បានព្រមានថា ទីក្រុងព្យុងយ៉ាង នឹងមិនស្ទាក់ស្ទើរឡើយក្នុងការប្រើអាវុធនុយក្លេអ៊ែរ ប្រសិនបើសត្រូវរករឿងកូរ៉េខាងជើងដែលជាប្រទេសមានអាវុធនុយក្លេអ៊ែរ។
តែការព្រមាននេះ កើតមានឡើងក្រោយសហរដ្ឋអាមេរិកបញ្ជូននាវាមុជទឹកមួយគ្រឿងបំពាក់ដោយមីស៊ីលបាលីស្ទិច ទៅកាន់មូលដ្ឋានទ័ពជើងទឹកទីក្រុងប៊ូសាន នៃប្រទេសកូរ៉េខាងត្បូង ព្រមទាំងការដាក់ពង្រាយយន្តហោះទម្លាក់គ្រាប់បែក B-1B របស់ទីក្រុងវ៉ាស៊ីនតោន ចូលរួមក្នុងការធ្វើសមយុទ្ធជាមួយកូរ៉េខាងត្បូង និងជប៉ុន។
ប៉ុន្តែការដែលលោក ជុងអ៊ុន ប្រកាសឱ្យមេទ័ពត្រៀមសង្គ្រាម កើតឡើងបន្ទាប់ពីប្រទេសកុម្មុយនីស្តផ្ដាច់ការមួយនេះបានបាញ់មីស៊ីលផ្លោងអន្តរទ្វីបបាលីស្ទីច ICBM ដល់ទៅពីរគ្រាប់ ដែលបានហោះធ្លាក់ក្នុងសមុទ្រជប៉ុន បាននាំឱ្យសហរដ្ឋអាមេរិក កូរ៉េខាងត្បូង និងជប៉ុន រួមគ្នាធ្វើសមយុទ្ធទ័ពអាកាសគំរាមក្រុងព្យុងយ៉ាង។
កាលពីមួយខែមុននេះ មេដឹកនាំផ្ដាច់ការកូរ៉េខាងជើងរូបនេះបានបញ្ជាឱ្យផលិតអាវុធនុយក្លេអ៊ែរថែមទៀត ក្រោយពីអាវុធនេះបានដាក់ចូលក្នុងរដ្ឋធម្មនុញ្ញ។
យោងតាមទីភ្នាក់ងារសារព័ត៌មានមជ្ឈិមបក្សកូរ៉េ KCNA លោក ជុងអ៊ុន ដែលបានចេញបទបញ្ជាដូចនេះ ក្រោយពីសភារបស់ប្រទេសផ្ដាច់ការមួយនេះបានអនុម័តបញ្ចូលឋានៈប្រទេសជាមហាអំណាចអាវុធនុយក្លេអ៊ែរទៅក្នុងរដ្ឋធម្មនុញ្ញជាផ្លូវការ។
យោងតាមប្រភពរបស់ KCNA លោក ជុងអ៊ុន បាននិយាយថា គោលនយោបាយកសាងកងកម្លាំងនុយក្លេអ៊ែររបស់កូរ៉េខាងជើង ត្រូវបានបញ្ចូលជាអចិន្ត្រៃយ៍ជាមូលដ្ឋានច្បាប់របស់រដ្ឋ ដែលគ្មាននរណាម្នាក់អាចល្មើស ឬបំពានបានឡើយ។
អ្នកសង្កេតការណ៍ព្រមានថា ឧបទ្វីបកូរ៉េនៅសល់ពេលតិចណាស់ដែលត្រូវបញ្ចៀសសង្គ្រាម៕