ប្រធានសមាគមទេសចរណ៍កម្ពុជា លើកឡើងថា ការចាញ់ប្រៀបខាងវិស័យទេសចរណ៍របស់កម្ពុជាជាមួយនឹងប្រទេសថៃ និងវៀតណាម កន្លងមក ដោយសារតែកម្ពុជាមិនមានជើងហោះហើរដោយត្រង់ទៅកាន់ប្រទេសធំៗ។
ប្រធានសមាគមទេសចរណ៍កម្ពុជា អ្នកស្រី ឆាយ ស៊ីវលីន លើកឡើងក្នុងកម្មវិធីពិភាក្សាលើប្រធានបទ «សក្ដានុពលនៃកំណើនទេសចរណ៍កម្ពុជាឆ្នាំ២០២៤» នៅថ្ងៃទី១៩ មករា ថា ភ្ញៀវទេសចរដែលមកលេងប្រទេសកម្ពុជា គឺមកតាមរយៈប្រទេសថៃ និងប្រទេសវៀតណាម ហើយបញ្ហានេះបានធ្វើឱ្យកម្ពុជាចាប់ប្រៀបប្រទេសទាំងនេះយ៉ាងខ្លាំង ប៉ុន្តែអ្នកស្រីបញ្ជាក់ថា ចំណែកតម្លៃក្នុងការចូលមកទស្សនានៅក្នុងប្រទេសកម្ពុជា ក៏ខ្ពស់ជាងប្រទេសទាំងពីរនេះដែរ។
អ្នកស្រី ឆាយ ស៊ីវលីន លើកឡើងថា បច្ចុប្បន្ននេះ ធនធានដើមនៃវិស័យទេសចរណ៍កម្ពុជាមានគ្រប់គ្រាន់ហើយ ប៉ុន្តែអ្វីដែលជាបញ្ហានោះ គឺកម្ពុជានៅកង្វះធនធានមនុស្សដើម្បីអភិវឌ្ឍវិស័យនេះឲ្យរីកចម្រើនប៉ុណ្ណោះ ហើយបញ្ហានេះក៏ដោយសារតែអ្នកជំនាញក្នុងវិស័យទេសចរណ៍មួយចំនួន កំពុងស្ទាក់ស្ទើរក្នុងការវិលត្រឡប់មកកម្ពុជាដែរវិញ បន្ទាប់ពីរងនូវវិបត្តិធ្ងន់ធ្ងរដោយសារជំងឺកូវីដ-១៩។
ប្រធានសមាគមទេសចរណ៍កម្ពុជារូបនេះបញ្ជាក់ថា កម្ពុជារំពឹងថាកំណើនភ្ញៀវទេសចរនៅក្នុងឆ្នាំ២០២៤ នេះ នឹងកើនឡើងជាងឆ្នាំ២០២៣ កន្លងទៅ ដោយសារតែកម្ពុជាចាប់ផ្តើមមានជើងហោះហើរដោយត្រង់ជាច្រើនចូលមកកម្ពុជានៅពេលនេះ ជាពិសេសមានការកក់សំបុត្រពីភ្ញៀវទេសចរពីបណ្តាប្រទេសធំៗដោយត្រង់ ដើម្បីមកលេងកម្សាន្តនៅក្នុងប្រទេសកម្ពុជាជាបន្តបន្ទាប់ក្នុងរយៈពេលចុងក្រោយនេះ។
ការអះអាងនេះ ធ្វើឡើងស្របពេលដែលគេមើលឃើញថា វិស័យទេសចរណ៍របស់កម្ពុជាកំពុងធ្លាក់ចុះខ្លាំង ខណៈភ្ញៀវទេសចរដែលបានទៅលេងកម្ពុជាក៏សម្ដែងការមិនពេញចិត្តនឹងសេវាកម្មនានាផងដែរ។
ក្រសួងទេសចរណ៍កម្ពុជា ចេញរបាយការណ៍របស់ខ្លួននៅថ្ងៃទី១៩ មករា ថា ពេញមួយឆ្នាំ២០២៣ កម្ពុជាទទួលបានភ្ញៀវទេសចរបរទេសជាង ៥លាននាក់ (៥ ៤៥៣ ២៣១នាក់) កើនឡើងជាង ១៣៩ភាគរយ បើធៀបនឹងឆ្នាំ២០២២ កន្លងទៅ។
ក្រសួងទេសចរណ៍ បង្ហាញថា ចំនួនភ្ញៀវទេសចរបរទេសជាង ៥លាន ៤សែននាក់នោះ គឺចូលមកកម្ពុជាតាមជើងហោះហើរជាង ១លាននាក់ (១ ៨៦៦ ២៣១នាក់) មកតាមផ្លូវគោកជាង ៣លាននាក់ (៣ ៥២០ ៧៣០នាក់) និងមកតាមផ្លូវទឹកជាង ៦ម៉ឺននាក់ (៦៦ ២៧០នាក់) ផងដែរ។
ប្រភពដដែលបញ្ជាក់ថា ទីផ្សារទេសចរណ៍អន្តរជាតិសំខាន់របស់កម្ពុជាកន្លងមក គឺមានប្រភពមកពីប្រទេសថៃ ប្រទេសវៀតណាម ប្រទេសចិន ប្រទេសឡាវ សហរដ្ឋអាមេរិក កូរ៉េខាងត្បូង ឥណ្ឌូនេស៊ី ប្រទេសបារាំង ចក្រភពអង់គ្លេស និងប្រទេសម៉ាឡេស៊ី ផងដែរ ហើយចំនួនភ្ញៀវទេសចរដែលមកលេងកម្ពុជាក្នុងតួលេខខាងលើនេះ បង្ហាញថា កម្ពុជាបានស្ដារវិស័យទេសចរណ៍របស់ខ្លួនឡើងវិញនៅពេលនេះ។
យ៉ាងណាក៏ដោយ មគ្គុទ្ទេសក៍ទេសចរណ៍ខេត្តសៀមរាបមួយចំនួន ប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះនៅថ្ងៃទី១៩ មករា ថា ការលើកឡើងរបស់ប្រធានសមាគមទេសចរណ៍កម្ពុជា គឺពិតជាត្រឹមត្រូវ ដែលថាធនធានដើមនៃវិស័យទេសចរណ៍របស់កម្ពុជាមានគ្រប់គ្រាន់នោះ ប៉ុន្តែបញ្ហាគឺនៅត្រង់ថា រដ្ឋាភិបាល និងក្រសួងទេសចរណ៍ គ្មានសមត្ថភាពរៀបចំវិស័យនេះឱ្យដំណើរការដូចប្រទេសជិតខាងប៉ុណ្ណោះ។
មគ្គុទ្ទេសក៍ទេសចរណ៍ខាងលើលើកឡើងថា អ្វីៗក៏កម្ពុជាមានដែរសម្រាប់ទទួលភ្ញៀវទេសចរ ដូចជា ប្រាសាទអង្គរវត្ត និងរមណីយដ្ឋានដ៏ស្រស់ស្អាតជាច្រើនទៀត ប៉ុន្តែក្រសួងទេសចរណ៍ និងរដ្ឋាភិបាលមិនបានរៀបចំសេវាកម្មឱ្យបានល្អសម្រាប់ទទួលភ្ញៀវដែលមកលេងប្រទេសកម្ពុជាទេ ប៉ុន្តែបែរជាបង្កភាពស្មុគស្មាញដល់ភ្ញៀវទេសចរទាំងនោះទៅវិញ ដូចជា បញ្ហាអំពើពុករលួយនៅចក្រទ្វារអន្តជាតិតាមអាកាសយានដ្ឋាននានា ជាដើម។
ទាក់ទិននឹងបញ្ហានេះ អ្នកគ្រប់គ្រងសណ្ឋាគារ និងមគ្គុទ្ទេសក៍ទេសចរណ៍ខេត្តសៀមរាបជាច្រើននាក់ ធ្លាប់បានប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះកាលពីចុងខែធ្នូ ឆ្នាំ២០២៣ ថា ប៉ូលិសអន្តោប្រវេសន៍ដែលប្រចាំការនៅអាកាសយានដ្ឋាននានា សម្ងំប្រព្រឹត្តអំពើពុករលួយលើភ្ញៀវទេសចរដែលបាត់ប័ណ្ណព័ត៌មាន ដែលជាប័ណ្ណកត់ត្រាអំពីប្រវត្តិធ្វើដំណើរ កន្លែងស្នាក់នៅ និងសម្ភារៈរបស់ភ្ញៀវ ជាដើម ដោយពួកគេតម្រូវឱ្យភ្ញៀវបង់លុយក្នុងតម្លៃខ្ពស់ចាប់ពី ១៥០ដុល្លារអាមេរិកឡើងទៅក្នុងម្នាក់ ជាថ្នូរឱ្យភ្ញៀវទាំងនោះអាចចូលមកលេងក្នុងប្រទេសកម្ពុជា។
ប្រភពដដែលបញ្ជាក់ថា បើភ្ញៀវបរទេសណាមិនព្រមបង់លុយ ពួកគេនឹងឃាត់ខ្លួនឱ្យរង់ចាំនៅក្នុងព្រលានយន្តហោះចាប់ពី ៣០នាទីរហូតដល់ទៅ ១ម៉ោង ទើបពួកគេឱ្យចាកចេញពីព្រលាន ដែលបញ្ហានេះបានធ្វើឱ្យភ្ញៀវខឹងសម្បាយ៉ាងខ្លាំង រហូតធ្វើឱ្យពួកគេជះកំហឹងដាក់មគ្គុទ្ទេសក៍ទេសចរណ៍ និងខាងសណ្ឋាគារថែមទៀត។
ទាក់ទិននឹងបញ្ហានេះ ភ្ញៀវទេសចរបរទេសជាច្រើន ក្នុងរយៈពេលចុងក្រោយនេះ បានផ្តល់ពិន្ទុដល់វិស័យទេសចរណ៍នៅកម្ពុជាជុំវិញសេវាកម្មរបស់អាកាសយានដ្ឋានអន្តរជាតិថ្មីខេត្តសៀមរាប ត្រឹមតែផ្កាយមួយប៉ុណ្ណោះ ក្នុងចំណោមពិន្ទុដែលមានផ្កាយ៥ លើបណ្ដាញអ៊ីនធឺណិត ដោយលើកឡើងពីបញ្ហាអនាម័យ និងការប្រព្រឹត្តអំពើពុករលួយ ដូចជា ការទាមទាររកលុយធីបពីភ្ញៀវទេសចរពីសំណាក់បុគ្គលិកនៅព្រលានយន្តហោះ និងមន្ត្រីអន្តោប្រវេសន៍ដែលប្រចាំការនៅច្រកអន្តរជាតិ ជាដើម៕