 បានរំដោះផ្ទៃដីចម្ការមីនបានចំនួនជិត ៣ពាន់ទីតាំង (២៦០២ទីតាំង) ដែលមានផ្ទៃដីជាង ២៨១លានម៉ែត្រក្រឡា (២៨១ ៩៧៥ ៣២៨ម៉ែត្រក្រឡា)។){kind=link}
មជ្ឈមណ្ឌលសកម្មភាពកម្ចាត់មីនកម្ពុជា (CMAC) បានរំដោះផ្ទៃដីចម្ការមីនបានចំនួនជិត ៣ពាន់ទីតាំង (២៦០២ទីតាំង) ដែលមានផ្ទៃដីជាង ២៨១លានម៉ែត្រក្រឡា (២៨១ ៩៧៥ ៣២៨ម៉ែត្រក្រឡា)។
CMAC បានឲ្យដឹងថា ខ្លួនបានរកឃើញ និងកម្ទេចចោលគ្រាប់មីន និងយុទ្ធភណ្ឌមិនទាន់ផ្ទុះគ្រប់ប្រភេទសរុបចំនួនជាង ៨ម៉ឺនគ្រាប់ (៨៣៨១៤គ្រាប់) ដែលនាំឲ្យពលរដ្ឋទទួលផលដោយផ្ទាល់ និងដោយប្រយោលពីផ្ទៃដីដែលធ្លាប់មានមីនទាំងនោះមានចំនួនជិត ៦០ម៉ឺនគ្រួសារ (៥៤៥៣៧៨គ្រួសារ)។
ប្រតិភូរាជរដ្ឋាភិបាលទទួលបន្ទុកជាអគ្គនាយក CMAC លោក ហេង រតនា ថ្លែងនៅថ្ងៃទី០១ ខែកុម្ភៈ ឆ្នាំ២០២៤ ក្នុងកិច្ចប្រជុំឆ្លងរបាយការណ៍ការងារឆ្នាំ២០២៣ និងទិសដៅផែនការឆ្នាំ២០២៤ ថា នៅក្នុងឆ្នាំ២០២៣ កន្លងទៅនេះ កិច្ចប្រតិបត្តិការបោសសម្អាតមីន និងសំណល់យុទ្ធភណ្ឌសង្គ្រាមរបស់អង្គភាព CMAC សម្រេចបានលទ្ធផលដូចជា រំដោះផ្ទៃដីចម្ការមីនបានចំនួនជាង ២ពាន់ទីតាំង (២៦០២ទីតាំង)។
លោក ហេង រតនា បានឲ្យដឹងថា នៅក្នុងឆ្នាំ២០២៣ កន្លងទៅនេះ អង្គភាព CMAC បានចុះធ្វើការផ្សព្វផ្សាយអប់រំការយល់ដឹងពីមីន ដល់ក្រុមគោលដៅបានចំនួនជិត ២ម៉ឺនលើក (១៨៣៤៩លើក) ស្មើនឹងជិត ៩សែនខ្នងផ្ទះ (៨៧៩០៤៤ខ្នងផ្ទះ ដែលមានពលរដ្ឋចូលរួមសរុបចំនួន ១,៣លាននាក់ផងដែរ។
ប្រភពដដែលបានលើកឡើងថា នៅក្នុងឆ្នាំ២០២៤ នេះ អង្គភាព CMAC មានផែនការបោសសម្អាតផ្ទៃដីចម្ការមីនប្រមាណជាង ២៧៤គីឡូម៉ែត្រក្រឡា ក្នុងនោះផ្ទៃដីចម្ការមីនចំនួន ១៩៩គីឡូម៉ែត្រក្រឡា និងផ្ទៃដីចម្ការចំនួន ៧៥គីឡូម៉ែត្រក្រឡា ព្រមទាំងផ្ដល់ការអប់រំយល់ដឹងពីមីនដល់ពលរដ្ឋមូលដ្ឋានប្រមាណចន្លោះពី ១,៨លានទៅ ២លាននាក់ និងរៀបចំផែនការស្រាវជ្រាវព័ត៌មានចម្ការមីនផងដែរ។
ទេសរដ្ឋមន្ត្រី និងជាអនុប្រធានទី១ នៃអាជ្ញាធរមីន លោក លី ធុជ ឲ្យដឹងកន្លងមកថា ជនរងគ្រោះដោយសារមីន និងសំណល់ជាតិផ្ទុះពីសង្គ្រាម បានថយចុះ ២៥% ដោយក្នុងឆ្នាំ២០២៣ ពលរដ្ឋស្លាប់ និងរងរបួសមានសរុបចំនួន ៣០នាក់ ថយចុះពី ៤០នាក់កាលពីឆ្នាំ២០២២។ ចំនួនអ្នកស្លាប់ក៏ថយចុះពី ១០នាក់ក្នុងឆ្នាំ២០២២ មកត្រឹម ៤នាក់ក្នុងឆ្នាំ២០២៣។
លោក លី ធុជ អះអាងថា ចំនួនជនរងគ្រោះថយចុះ គឺដោយសារប្រតិបត្តិករដោះមីនទាំងជាតិ និងអន្តរជាតិ បានអប់រំផ្សព្វផ្សាយដល់ពលរដ្ឋបានច្រើន ស្របពេលរដ្ឋាភិបាលដាក់ចេញផែនការបោសសម្អាតផ្ទៃដីមានមីនឆ្នាំ២០២៣ ទំហំ ៣៥៦គីឡូម៉ែត្រក្រឡា ដែលជាផែនការប្រចាំឆ្នាំធំជាងគេក្នុងរយៈពេល ៣០ឆ្នាំ ចាប់តាំងពីឆ្នាំ១៩៩២។
រដ្ឋាភិបាលកម្ពុជាបានកំណត់គោលដៅឆ្ពោះទៅរកការសម្រេច «កម្ពុជាគ្មានមីនឆ្នាំ២០២៥»។ ក្នុងឆ្នាំ២០២២ និងឆ្នាំ២០២៣ រដ្ឋាភិបាលប្រកាសថា រាជធានី-ខេត្តចំនួន ១៨ «អស់មីន» និងបានដាក់ផែនការសម្អាតមីននៅក្នុងខេត្តចំនួន ៧ ទៀត ដែលរួមមានខេត្តកោះកុង ពោធិ៍សាត់ បាត់ដំបង ប៉ៃលិន បន្ទាយមានជ័យ ឧត្ដរមានជ័យ និងខេត្តព្រះវិហារ។ នេះបើតាមលោក លី ធុជ និងសារលិខិតរបស់អតីតនាយករដ្ឋមន្ត្រីលោក ហ៊ុន សែន នាពេលប្រារព្ធខួបលើកទី២៤ឆ្នាំនៃទិវាជាតិយល់ដឹងអំពីមីនកាលពីខែកុម្ភៈ ឆ្នាំ២០២៣។
ចំពោះរាជធានី-ខេត្តដែលបានប្រកាសថា «អស់មីន» រួមមានខេត្តស្ទឹងត្រែង កែប ព្រៃវែង ព្រះសីហនុ រាជធានីភ្នំពេញ កណ្តាល ត្បូងឃ្មុំ កំពង់ចាម ស្វាយរៀង កំពង់ឆ្នាំង តាកែវ កំពត មណ្ឌលគិរី និងខេត្តកំពង់ស្ពឺ ជាដើម៕