កម្ពុជា និងថៃ បានឯកភាពគ្នាដំឡើងកម្រិតទំនាក់ទំនងទ្វេភាគីពី «ការពង្រឹងភាពជាដៃគូដើម្បីសន្តិភាព និងវិបុលភាព» ឲ្យទៅជា «ភាពជាដៃគូយុទ្ធសាស្ត្រ» និងផ្លាស់ប្ដូរឯកសារកិច្ចសហប្រតិបត្តិការចំនួន៥ នៅក្នុងជំនួបរវាងលោក ហ៊ុន ម៉ាណែត និងលោក ស្រេតថា ថាវីស៊ីន (Srettha Thavisin) នាយករដ្ឋមន្ត្រីថៃ ក្នុងដំណើរបំពេញទស្សនកិច្ចផ្លូវការរបស់លោកទៅកាន់ក្រុងបាងកក នៅព្រឹកថ្ងៃទី៧ កុម្ភៈ។
នៅព្រឹកថ្ងៃទី៧ ខែកុម្ភៈ នាយករដ្ឋមន្ត្រីទាំងពីរបានផ្លាស់ប្ដូរយោបល់លើការពង្រីកកិច្ចសហប្រតិបត្តិការលើវិស័យជាច្រើន រួមមាន វិស័យនយោបាយ សេដ្ឋកិច្ច ការពារជាតិ សន្តិសុខ ពាណិជ្ជកម្ម វិនិយោគ ទេសចរណ៍ ការងារ និងវិស័យថាមពល។
ជាមួយគ្នានេះ មេដឹកនាំកម្ពុជា-ថៃ ក៏បានពិភាក្សាអំពីកិច្ចការក្នុងតំបន់ និងសកល និងសន្យាគាំទ្រគ្នាទៅវិញទៅមកនៅលើវេទិកាអន្តរជាតិ ជាពិសេសជំរុញកិច្ចសហប្រតិបត្តិការប្រយុទ្ធប្រឆាំងឧក្រិដ្ឋកម្មឆ្លងដែន ការបោកប្រាស់តាមប្រព័ន្ធអនឡាញ និងការកសាងព្រំដែនប្រទេសទាំងពីរទៅជាព្រំដែនសន្តិភាព និងវិបុលភាពផងដែរ។
ប្រភពដដែលបានលើកឡើងថា នៅក្នុងក្របខ័ណ្ឌទំនាក់ទំនងនយោបាយ និងការទូត ប្រមុខរដ្ឋាភិបាលទាំងពីរបានឯកភាពលើការដំឡើងកម្រិតទំនាក់ទំនងទ្វេភាគីពី “ការពង្រឹងភាពជាដៃគូដើម្បីសន្តិភាព និងវិបុលភាព” ឲ្យទៅជា “ភាពជាដៃគូយុទ្ធសាស្ត្រ” ដើម្បីផលប្រយោជន៍ទៅវិញទៅមកសម្រាប់ជាតិ និងប្រជាជន។
រដ្ឋាភិបាលកម្ពុជា និងថៃ ក៏បានព្រមព្រៀងគ្នាចុះហត្ថលេខា និងផ្លាស់ប្ដូរឯកសារកិច្ចសហប្រតិបត្តិការចំនួន ៥ រួមមាន៖
- អនុស្សរណៈនៃការយោគយល់គ្នាស្ដីពីកិច្ចសហប្រតិបត្តិការលើវិស័យសិក្សាធិការ វិទ្យាសាស្ត្រ និងបច្ចេកវិទ្យារវាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍កម្ពុជា និងក្រសួងឧត្ដមសិក្សា វិទ្យាសាស្ត្រ ស្រាវជ្រាវ និងនវានុវត្តន៍ថៃ។
- អនុស្សរណៈនៃការយោគយល់គ្នាស្ដីពីទំនិញឆ្លងកាត់រវាងអគ្គនាយកដ្ឋានគយ និងរដ្ឋាករកម្ពុជា និងនាយកដ្ឋានគយថៃ។
- អនុស្សរណៈនៃការយោគយល់គ្នាស្ដីពីកិច្ចសហប្រតិបត្តិការលើវិស័យនៃការកាត់បន្ថយហានិភ័យគ្រោះមហន្តរាយ និងការឆ្លើយតបគ្រោះអាសន្នរវាងគណៈកម្មាធិការជាតិគ្រប់គ្រងគ្រោះមហន្តរាយកម្ពុជា និងក្រសួងមហាផ្ទៃថៃ។
- អនុស្សរណៈនៃការយោគយល់គ្នារវាងសភាពាណិជ្ជកម្មកម្ពុជា និងធនាគារនាំចេញ-នាំចូលថៃ។
- និងអនុស្សរណៈនៃការយោគយល់គ្នារវាងសភាពាណិជ្ជកម្មកម្ពុជា និងគណៈកម្មាធិការពាណិជ្ជកម្មថៃ។
មុននឹងដំណើរទស្សនកិច្ចរបស់លោក ហ៊ុន ម៉ាណែត អាជ្ញាធរថៃ បានចាប់ខ្លួនសកម្មជនខ្មែរ ៣នាក់កាលពីថ្ងៃទី២ ខែកុម្ភៈ ឆ្នាំ២០២៤ ដែលក្រុមអង្គការសង្គមស៊ីវិលយល់ឃើញថា ការចាប់ខ្លួនសកម្មជនខ្មែរនោះ គឺដើម្បីទប់ស្កាត់ចលនាបាតុកម្មប្រឆាំងនឹងវត្តមានលោកនាយករដ្ឋមន្ត្រី ហ៊ុន ម៉ាណែត ដែលមានវត្តមាននៅប្រទេសថៃ។
សកម្មជនខ្មែរ ៣នាក់ដែលជាជនភៀសខ្លួនត្រូវបានអាជ្ញាធរថៃ ចាប់ខ្លួននោះរួមមាន លោក គង់ រ៉ៃយ៉ា និងលោក ផន ផាន់ណា ជាអតីតសមាជិកគណបក្សភ្លើងទៀន និងម្នាក់ទៀតឈ្មោះ លឹម សុខា ជាអនុប្រធានគណៈកម្មការជនភៀសខ្លួនខ្មែរនៅទីក្រុងបាងកក ប្រទេសថៃ៕